Israel markat inti jalsu toqenkir yaqhep jaqenakajja, ‘warawaranakaw irpistu’ sasaw creyipjjäna. Mä arumajja, inti jalsu toqenkir mä qhawqha jaqenakaw jitnaqer mä warawara uñjapjjäna, ukaruw arkapjjarakïna. Uka “warawarajj” Jerusalenaruw jupanakar irpäna. Ukansti akham sasaw jaqenakar jisktʼapjjäna: ‘¿Kawkinkisa judionakan reyipäkani uka wawajja? Jupar jachʼañchañwa munapjjta’ sasa.

Jerusalén markan Herodes reyipajja, machaq reyin nasitap yatisajj llakisïnwa. Ukatwa jilïr sacerdotenakar akham sasin jisktʼäna: ‘¿Kawkinsa uka reyejj nasiñapäna?’ sasa. Jupanakasti sapjjarakïnwa: ‘Belén markanwa nasini sasaw profetanakajj sapjjäna’ sasa. Uk yatisasti Herodes reyejj inti jalsu toqet jutiri jaqenakar jawsayasajj akham sänwa: ‘Belén markar sarapjjam ukanwa uka wawar thaqtapjjäta. Ukatsti kuttʼanisajj kawkinkisa ukwa yatiyapjjetäta, nayajj jupar jachʼañchañwa munarakta’ sasa. Ukampis uka arunakapajj kʼarïnwa.

Uka “warawarajj” wasitat sartäna, uka jaqenakasti Belén markakamaw arkapjjarakïna. “Warawarajj” mä uta patjjaruw saytʼäna, uka jaqenakajj utar mantapjjäna ukhajja, Jesusaruw María mamapampir uñjapjjäna. Ukatsti Jesús wawaruw jachʼañchapjjäna, qori, incienso, mirra ukanakwa regalot churapjjarakïna. ¿Jehová Diosat uka jaqenakarojj Jesusan ukar khitpachäna? Janiwa.

Uka arumajja, samkanwa Jehová Diosajj Josear akham säna: ‘Herodes reyejj Jesusar jiwayañwa muni. Esposamampi wawamampi Egipto markar escapapjjam. “Ajjsarañajj janiw utj-jjeti” siskäma ukapachkam uka markan quedasipjjam’ sasa. Ukatwa Joseampi familiapampejj jankʼak Egipto markar sarjjapjjäna.

Ukatjja inti jalsu toqet jutapkäna uka jaqenakarojja, ‘janiw Herodes reyin ukar kuttʼapjjätati’ sasaw Jehová Diosajj säna. Herodes reyejja, jupanakajj maysnam sarjjapjjatap amuyäna ukhajj wal colerasïna. Jesusar katjañ jan puedesajja, Jesusjam  taqpach jiskʼa yoqall wawanakar Belenan jiwarayasiñapwa mayïna. Jesusajj Egipto markankjjatap laykojj janiw kunas jupar paskänti.

Tiempompejja Herodes reyejj jiwjjänwa. Ukatwa Jehová Diosajj Josear akham säna: ‘Janiw kuna ajjsarañas utj-jjeti, kuttʼanjjasmawa’ sasa. Joseampi Mariampi Jesusampejj Israelaruw kuttʼanjjapjjäna, Nazaret sat markanwa jakapjjarakïna.