Asirionakajja, Israel markan 10 tribunakaparuw katuntapjjäna. Asirionakan Senaquerib sat reyipajj Judá markan pä tribunakaparuw katuntañ munarakïna. Ukhamajj mayat mayatwa Judá toqenkir markanak katuntañ qalltäna. Jukʼampisa Jerusalén markwa katuntañ wal munäna. Ukampis Jehová Diosaw uka markar jarkʼaqaskäna, Senaquerib reyejj janiw uk yatkänti.

Judá markan Ezequías reyipajja, Jerusalenar jan katuntañapatakejj walja qollq churäna. Senaquerib reyejj uka qollq katoqaskchïnsa, Jerusalenar katuntañatakejj jachʼa ejercitopar khitaskakïnwa. Uka ejerciton jukʼamp jakʼachasinitap uñjasajja, Jerusalén markankirinakajj wal ajjsarapjjäna. Ukatwa Ezequías reyejj akham säna: ‘Jan ajjsarapjjamti. Asirionakajj chʼamanïpkchisa, Jehová Diosajj jiwasanakarojj jukʼamp chʼamaniruw tukuyistani’ sasa.

Senaquerib reyejja Jerusalenankir jaqenakar jiskʼachañatakejj rabsaqué jaqeruw khitäna. Rabsaqué jaqejj marka anqar saytʼasisaw akham sasin arnaqasïna: ‘Jehová Diosajj janiw yanapapkätamti. Jan Ezequiasampejj engañayasipjjamti. Janiw kuna diosas nanakat jarkʼaqapkiristamti’ sasa.

Ezequías reyejja ‘kunsa lurapjjäjjaʼ sasaw Jehová Diosar jisktʼasïna. Diosasti akham sänwa: ‘Rabsaqué jaqen arunakaparojj jan ajjsaramti. Senaquerib reyejj janiw Jerusalenar katuntkanitiʼ sasa. Qhepatjja Ezequiasajj Senaquerib reyin cartapwa katoqäna, ukansti akham sänwa: ‘Sumatak katuntayasjjapjjam. Jehová Diosajj janiw salvapkiristamti’ sasa. Ezequiasajj Diosaruw akham sasin orasïna: ‘Jehová Dios, mirä amp suma, salvapjjakitaya, ukhamatwa taqenejj juma sapaki cheqpach Diosätam yatipjjani’ sasa. Jehová Diosajj akham sänwa: ‘Asiria markan reyipajj janiw Jerusalenar mantankaniti. Nayaw markajar jarkʼaqaskäjja’ sasa.

 Senaquerib reyejja ‘Jerusalenar niyaw katuntäjja’ sasaw confiyasïna. Ukampis Jehová Diosajj mä arumaw asirionakan campamentopar mä ángel khitäna. ¡Uka angelajj 185.000 soldadonakaruw jiwarayäna! Wali chʼaman soldadonakapajj qʼala jiwaratäjjänwa, ukatwa atipjatäsajj Senaquerib reyejj utapar sarjjäna. Ukhamatwa Jehová Diosajj Ezequías reyirusa Jerusalén markarus promesaparjam jarkʼaqäna. Jumajj Jerusalén markankasmäna ukhajja, ¿Jehová Diosar confiyasmänti?