Acab reyejj Jezreel markankir palaciopan ventanapatwa mä suma uva yapu uñjäna, ukajj Nabot chachankänwa. Acab reyejj uka yapu wal munasajj alasiñwa munäna. Ukampis Nabot chachajj janiw aljañ munkänti. Diosan Leyiparjamajja, awkejj herenciat jaytkäna uka oraq janiw aljapjjañapäkänti. Ukhamajj Nabot chachajj kunatï cheqäki ukakwa luraskäna, ¿Acab reyejj ukar respetpachänti? Janiwa. Antisas wal colerasïna. Janiw cuartopat mistuniñsa ni manqʼañsa munkänti.

Acab reyin jan sinttʼasir Jezabel warmipajj akham sänwa: ‘Jumajjay Israel markan reyipästajja, kuntï munkta ukwa katusisma. Nayaw uka yapu aparasajj jumar churäma’ sasa. Ukatwa uka markankir ancianonakar akham sasin cartanak qellqäna: ‘Nabot chacharojj Diosar maldisirit juchañchapjjam, qalamp jaqjasin jiwayapjjarakim’ sasa. Kuntï Jezabel warmejj siskäna ukwa ancianonakajj lurapjjäna. Ukatjja Jezabelajj akham sasaw Acab reyir säna: ‘Nabot chachajj jiwatäjjewa. Uva yapupajj jumankjjewa’ sasa.

Jezabelajj janiw uka jaqeruk jiwaykänti, jan ukasti Jehová Diosar munasiri walja jaqenakaruw jiwayäna. Uka warmejj idolonakaruw adoräna, kunayman jan walinak lurarakïna. Jehová Diosajj uka jan walinak luratap uñjaskänwa. ¿Diosajj jupar castigpachänti?

Acab reyin jiwatapatjja, Jehoram yoqapaw reyëjjäna. Ukapachaw Jehová Diosajj Jezabelaru familiapar castigañatakejj Jehú chachar khitäna.

Jehú chachajja Jezabelajj jakkäna uka Jezreel markaruw carropat saräna. Jehoram reyejj jupamp jikisiriw carropat jutarakïna. Jehoram reyejj Jehú chachar uñjasajja, ‘¿sumankañ amtampit jutta?’ sasaw jisktʼäna. Jupajj sarakïnwa: ‘Jezabel mamamajj jan walinak luraski, ¿kunjamarak sumankañajj utjaspasti?’ sasa. Uk istʼasasti Jehoram reyejj carropat kutjtaskäna, ukhamaruw Jehú chachajj flechtʼas jiwayäna.

 Ukatjja Jehú chachajj Jezabelan palacioparuw saräna. Jezabelajj jupan jutaskatap yatïna ukhajja, wali sum maquillsusïna, ñikʼutapsa sum peinasïna kʼachachtʼasirakïna, altus utan ventanapatwa suyanïna. Jehú chachajj purinïna ukhajj jan wali arunakampi jan respetompiw Jezabelajj aruntäna. Jehú chachajj Jezabel warmin jakʼankapkäna uka servirinakarojj ‘¡jaqoqanipjjam!’ sasaw säna. Jupanakajj ventanatwa jaqoqanipjjäna, Jezabelajj uka altot jalaqtasaw jiwjjäna.

Uka qhepatjja, Jehú chachajj Acab chachan 70 wawanakaparuw jiwarayäna, Baal diosar adorapkäna uksa chhaqtayarakïnwa. Jehová Diosajj taqe kunwa uñjaski, horasaparuw jan walinak luririnakarojj castigaraki, ¿uk amuytati?