Israelanjja manqʼat pistʼañaw utjäna, ukatwa Noemí sat mä israelit warmejj esposopampi pä yoqapamp Moab oraqer sarjjapjjäna. Esposopajj ukanwa jiwjjäna. Yoqanakapajj Rut, Orpá sat moabita warminakampiw casarasipjjäna. Tiempompejja yoqanakapajj jiwjjapjjarakïnwa.

Israelan manqʼat pistʼañajj janiw utj-jjänti, ukatwa Noemí warmejj markapar kuttʼañ amtäna. Rut warmisa Orpá warmisa jupamp chikaw sarapjjäna, thakinjja Noemí warmejj akham sänwa: ‘Jumanakajj suma esposa, suma yojjchʼa ukhamäpjjtawa. Wasitat casarasipjjañamwa munta. Moab markankir utanakamar kuttʼjjapjjam’ sasa. Jupanakasti sapjjarakïnwa: ‘Wal munasipjjsma, janiw sapak jaytañ munapksmati’ sasa. Noemí warmejj walja kutiw ‘kuttʼjjapjjam’ sasin säna. Ukatwa Orpá warmejj kuttʼjjäna, ukampis Rut warmejj quedasïnwa. Noemí warmejj jupar akham sänwa: ‘Orpá yojjchʼa masimajj markaparu diosanakapan ukaruw kuttʼjje. Jumajj mamitaman utapar jupamp chik kuttʼjjarakim’ sasa. Ukampis Rut warmejj sänwa: ‘Janiw jaytjkämati. Markamajj markajäniwa, Diosamasti Diosajarakïniwa’ sasa. Ukham satajj ¿Kunjamakis Noemí warmejj jikjjataspachäna?

Cebada cosechajj qalltkäna ukhaw uka pä warmejj Israelar puripjjäna. Mä urojj Boaz sat jaqen yapupan ukaruw Rut warmejj cebada pallasir saräna. Boazajj Rahab warmin yoqapänwa. Boazarojj akham sasaw yatiyapjjäna: ‘Rut warmejj moabitawa. Suegrapar jan jaytjiri suma warmiwa’ sasa. Ukatwa trabajirinakaparojj granonak jukʼamp jiltʼayapjjañapatak mayïna, ukhamat Rut warmin pallasiñapataki.

 Uka arumajja Noemí warmejj akham sasaw Rut warmir jisktʼäna: ‘¿Khitin yapupansa jichhürojj trabajta?’ sasa. Jupasti sarakïnwa: ‘Boaz chachan yapupana’ sasa. Noemí warmejj saskakïnwa: ‘Boaz chachajj esposojan familiarapawa. Mayni tawaqonakamp ukan trabajiskakim. Ukan walikïskätawa’ sasa.

Rut warmejj cosecha tukusiñapkamaw Boaz chachan yapupan trabajïna. Boazajj jupar wali trabajtʼiri suma warmitwa uñjäna. Uka tiemponjja, mä jaqetï jan wawan jiwäna ukhajja, warmipajj jupan mä familiarapampiw casarasispäna. Ukhamajj Boaz chachajj Rut warmimpiw casarasjjäna. Mä wawanïpjjarakïnwa, Obed sasaw sutiyapjjäna. Tiempompejja Obed chachajj David reyin abuelopäjjänwa. Noemí warmin amiganakapajj wal kusisipjjäna. Sapjjarakïnwa: ‘Nayraqatjja, Diosajj munasir suma yojjchʼa churtamjja. Jichhasti mä allchhinëjjaraktawa. Jehová Diosajj jachʼañchatäpan’ sasa.