Adanampi Evampejj Edén jardinat mistjjapjjäna uka qhepatjja, walja wawanakanipjjänwa. Nayrïr wawapajj Caín satänwa, jupajj yapu lurirïnwa. Payïr wawapajj Abel satarakïnwa, jupasti ovej awatirïnwa.

Mä urojj Cainampi Abel sullka jilapampejj Jehová Diosaruw ofrendanak loqtapjjäna. ¿Kunas mä ofrendajj uk yattati? Diosar mä suma regalo churaski ukaw ofrenda satajja. Abel chachan regalopaw Jehová Diosar kusisiyäna. Caín chachan regalopasti janiw kusisiykänti. Ukatwa Cainajj wal colerasïna. Diosasti jupar akham sänwa: ‘Colerataki sarnaqaskäta ukhajja, jan waliruw purtʼasïta’ sasa. Cainajj janiw Diosar istʼkänti.

 Antisas Abel sullka jilaparojj akham sänwa: “Pampar saraskañäni” sasa. Pampankasipkäna ukhajja, Cainajj Abel sullkapar atacasaw jiwayäna. ¿Kunjamsa Jehová Diosajj Cainar castigäna? Familiapatjja wali jayaruw apanuküna, janipuniw kuttʼaniñapäkänti.

¿Kunsa ukat yateqsna? Munañasarjam kunas jan phoqaskaspa ukhajja, inas colerassna. Uka colerasiñatejj chuymasan jiltaskakispa, jan ukajj colerataki mayninakajj uñjapjjestaspa ukhajj cambiañasawa. Jan jankʼaki pacienciasksna ukhajja, colerampiw atipayassna, jan waliruw purtʼasiraksna.

Abel chachajj Jehová Diosar wal munasïna, Diosar istʼasaw sarnaqarakïna. Jehová Diosajj janiw jupat armaskiti, aka oraqe paraisor tukuyjjani ukhas jaktayaniniwa.