Mä urojja, Evajj sapakïskän ukhaw mä asirojj jupar parljjayäna, akham sasaw jisktʼäna: ‘¿Cheqapunit Diosajj taqpach achunakat jarkʼasipjjtamjja?’ sasa. Evasti sänwa: ‘Kawkïr achsa manqʼasipkiristwa, mä qoqan achupakwa jan manqʼapkiristti. Manqʼapjjerista ukhajj jiwapjjeristwa’ sasa. Asirusti sarakïnwa: ‘Janiw jiwapkätati. Antisas manqʼapjjäta ukhajj Diosjamäpjjätawa’ sasa. ¿Ukajj cheqänti? Janiwa. Ukampis Evajj creyïnwa. Uka achu wal uñchʼukisajj wal manqʼantañ munäna, ukatwa manqʼantäna, Adán esposoparus churarakïnwa. Uka achu manqʼantasajj jiwapjjañapänwa, uk yatkasaw Adanajj manqʼantäna.

Uka uru jaypʼpachaw Jehová Diosajj Adanampi Evampi parläna. ‘¿Kunatsa arunakaj jan istʼapkta?’ sasaw jisktʼäna. Evajj ‘asiruw juchani’ sänwa, Adanasti ‘Evaw juchani’ sarakïnwa. Niyakejjay Adanampi Evampi juchachasipjjchïnjja, Jehová Diosajj uka suma jardinat apsjjänwa. Ukatsti jardinar mantañäki ukawjarojj angelanakampi nakhaskir mä espadampi Diosajj uchäna, ukhamat jan mantapjjañapataki.

‘Evar kʼarinak parlirirojj castigäwa’ sasaw Diosajj sarakïna. ¿Khitis Evar parläna? Diosajj janiw asirurojj parlir lurkänti. Ukhamajj janiw asirojj Evar parlkänti, jan ukasti mä jan wali angelaw asir taypi parläna. Uka angelajj Supaya, Diablo satarakiwa. Jehová Diosaw jutïrin jupar jiwayjjani. Janiw jan walinak lurapjjañapatakejj jaqenakar engañjjaniti.