Jesusajj apostolonakar uñstkäna uka qhepatjja, Pedrojj chawlla katuriw Galilea qotar saräna. Tomás, Santiago, Juan, ukhamarak yaqha discipulonakas sarapjjarakïnwa. Uka arumajj janiw kunsa katupkänti.

Qhanjtanjjäna ukhajja, mä jaqeruw qota lakan saytʼat uñjapjjäna. Uka jaqejj jupanakar akham jisktʼäna: ‘¿Chawll katupjjtati?’ sasa. Jupanakajj ‘janiwa’ sapjjänwa. Ukatjja ‘chawlla katuñ botet kupi toqer jaqontapjjam’ sasaw uka jaqejj säna. Jaqontapjjäna ukhajja, walja chawllanak katupjjäna, janiw boter apsurjamäpkänsa. Juan apostolojja, akatjamatwa uka jaqejj Jesusätap amuyäna, akham sarakïnwa: ‘¡Jupajj Jesusarakisä!’ sasa. Pedrojj jankʼakiw umar thoqontasin Jesusan ukar saräna. Mayni discipulonakasti botetwa arktapjjarakïna.

Qotat mistupjjäna ukhajja, nina nakhaskir uñjapjjäna. Uka patjjanjja, chawllampi tʼantʼampiw utjäna. Katupkäna uka chawllanakat mä qhawqha apanipjjañapwa Jesusajj mayïna, ukhamat kankañataki. Ukatsti akham sänwa: “Jutapjjam, manqʼasipjjam” sasa.

 Manqʼasiñ tukuyasajja, Jesusajj Pedror akham jisktʼäna: ‘¿Aka chawllanakat sipans jukʼampit munasista?’ sasa. Pedrojj sarakïnwa: “Jïsa, Tata, jumajj yatisktawa, nayajj jumar munassmawa” sasa. Jesusajj sänwa: “Jiskʼa ovejanakajar manqʼayarapita” sasa. Jesusajj wasitat akham jisktʼäna: ‘Pedro, ¿munasistati?’ sasa. Pedrojj sarakïnwa: “Jïsa, Tata, jumajj yatisktawa, nayajj jumar munassmawa” sasa. Jesusajj sarakïnwa: “Jiskʼa ovejanakajar awatirapita” sasa. Jesusajj wasitat jisktʼäna, ukampejj kimsa kutiw jisktʼjjäna. Pedrojj llakitaw akham säna: “Tata, jumajj taqe kunwa yattajja, nayajj jumar munassma uksa sumwa yatiraktajja” sasa. Jesusajj sarakïnwa: “Jiskʼa ovejanakajar manqʼayarapita” sasa. Ukatsti “nayar arkaskakita” sasaw sarakïna.