1, 2. ¿Khitinakas Jehová Diosan yaqhep amigopäpjjäna?

 ¿KHITIRUS amigomäñapatak ajllisma? Khitimpitï sum apaskta, jumjam amtanïki ukaruw ajllisma. Jan ukajj khititï munasirïki, suma chuymanïki ukaruw ajllisma.

² Jehová Diosajj ukhamarakiw yaqhep jaqenakarojj amigopäpjjañapatak ajlli. Sañäni, Abrahán chachajj Diosan amigopänwa (Isaías 41:8; Santiago 2:23). David chachas Diosan amigoparakïnwa. Diosajja Davidajj “chuymajar purtʼkiriwa” sasaw säna (Hechos 13:22). Daniel profetarus ‘wal munasirakïna’ (Daniel 9:23).

3. ¿Kunatsa Abrahán, David, Daniel chachanakajj Diosan amigopäpjjäna?

³ Abrahán, David, Daniel chachanakajj ¿kunsa Diosan amigopäñatakejj lurapjjäna? Jehová Diosajj Abrahanar akham sänwa: “Nayaru obedecitam layku” sasa (Génesis 22:18). Jehová Diosajj humilde chuymampi jupar istʼapki ukanakan amigopawa. Mä markan jakir jaqenakas taqpachaniw Diosan amigopäpjjarakispa. Diosajj Israel markar akham sänwa: ‘Nayar istʼapjjeta, ukhamatwa nayajj jumanakan Diosamäyäjja, jumanakasti nayan markajäpjjarakïtawa’ sasa (Jeremías 7:23). Ukhamasti jumajj Jehová Diosar istʼañamarakiwa, ukhamatwa jupan amigopäsma.

4, 5. ¿Kunjamsa Jehová Diosajj amigonakapar jarkʼaqe?

⁴ Jehová Diosajja ‘taqe chuyma juparu confiyapki’ ukanakar jarkʼaqañatakiw uñchʼukiski, ukhamat jupanakar jarkʼaqasin chʼamap uñachtʼayañataki sasaw Bibliajj qhanañchi (2 Crónicas 16:9, NM). Salmo 32:8 qellqatanjja, Jehová Diosajj amigonakapar akham siwa: “Nayranakajjajj  jumaruw uñchʼukisktam, nayaw yatichaskäma, nayaw amuytʼayaskäma, nayaw sarañamäki uka thak uñachayaskäma” sasa.

⁵ Wali chʼamani mä enemigosaw utji, jupajj janiw Diosan amigopäñas munkiti. Ukampis Jehová Diosajj jarkʼaqañ munistu (Salmo 55:22 liytʼañataki). Amigonakapajj taqe chuymaw Jupar sirvtanjja. Jan walinakan uñjaskasas janipuniw Jupat jitheqtktanti. Salmo qellqerjamarakiw Diosar confiytanjja, jupajj Jehová Diosat akham sänwa: “Jupaw kupëjjajjanki, janiw kunas tinkuykitaniti” sasa (Salmo 16:8; 63:8). ¿Kunjamatsa Supayajj Diosat jitheqtayañ munistu?

6. ¿Kuna kʼarinaksa Supayajj jaqenakat parläna?

⁶ Kunjamsa Supayajj Jehová Diosat kʼarinak parläna uka toqetwa 11 yatichäwin yatjjataniwaytanjja, jupajja kunatï walïki jan walïkaraki uk amtañatak Adanampi Evampis derechonïpkaspa ukhamwa säna. Supayajj Diosan amigopäñ munapki ukanakat kʼarinakwa parläna sasaw Job libronjja saraki. Kun katoqañ laykukis jaqenakajj Diosar servipkaspa, janis Diosar munasiñat servipkaspa ukhamwa Supayajj säna. Ukhamarusa, khitirus Diosat jitheqtayakiristwa sasaw Supayajj saraki. Jichhajja, kunsa Job chachat yateqsna, kunjamsa Jehová Diosajj jupar jarkʼaqäna uka toqetwa yatjjatañäni.

7, 8. 1) ¿Kunjamsa Jehová Diosajj Job chachar uñjäna? 2) ¿Kunsa Supayajj Job chachat säna?

⁷ ¿Khitïnsa Job chachajja? Diosatakjam sarnaqer jaqënwa, jupajj 3.600 maranak nayraw jakarakïna. Jehová Diosajj jupat akham sänwa: ‘Janiw khitisa oraqenjja utjkiti jupjamajja’ sasa. Job chachajj Diosar wal respetäna, jan walinaksa uñisirakïnwa (Job 1:8). Jupajj Diosan cheqpach amigopänwa.

 ⁸ Job chachajj kun katoqañ laykukis Diosar sirvkaspa ukhamwa Supayajj parläna, ukatwa Jehová Diosar akham säna: “Jumajj janiw khitina juparu llamktʼañapsa munktati, janirakiw familiaparusa, kuna yänakapatejj utjki ukanakarusa. Jumasti taqe luratanakaparojj bendeciraktawa, ukatwa jupajj oraqenjja walja uywanakani qamir jaqejja” sasa (Job 1:10, 11).

9. ¿Kun lurañapatakis Jehová Diosajj Supayar jaytäna?

⁹ Kun katoqañ laykukiw Job chachajj Diosar serviski sasaw Supayajj säna. Job chacharojj Jehová Diosat jitheqtayiristwa sasaw sarakïna. Ukampis Jehová Diosajj janiw Job chachat ukham amuykänti, ukatwa yantʼañapatakejj Supayar jaytäna. Job chachajj Diosan amigopänti janicha, Diosar taqe chuymat munasïna janicha ukajj ukhamatakwa yatisispäna.

10. 1) ¿Kunjamsa Supayajj Job chachar yantʼäna? 2) Ukhaman uñjasisajja, ¿kunsa Job chachajj luräna?

¹⁰ Nayraqatajja, Supayajj Job chachan taqpach uywanakap lunthatsuyäna, jiwarayarakïna. Ukjjarojj niya taqpach uywatanakaparuw jiwarayäna. Job chachajj janiw kunanëjjänsa. Ukjjarusti Supayajj mä jachʼa thayampiw 10 wawanakapar jiwarayäna. Ukhampachas Job chachajj janipuniw Jehová Diosat jitheqtkänti. Taqe ukhamanakan uñjaskasasa “Job chachajja janiw kuna juchsa lurkänti, janirakiw kuna jan walinaksa Dios toqejj” arskarakïnti (Job 1:12-19, 22).

11. 1) ¿Kunjamsa Supayajj Job chachar mayamp yantʼäna? 2) Ukhaman uñjasisajja, ¿kunsa Job chachajj luräna?

¹¹ Supayajj janiw ukhamak qheparkänti. Jehová Diosarojj mayampiw akham säna: “Jichhasti janchiparu llamktʼam, ukatsti ukapachaw uñjäta kunjämtejj juman ajanumaru ñanqha arunakampi maldecïtam ukjja” sasa.  Ukatwa Supayajj mä jan wali usumpi Job chachar usuntayäna (Job 2:5, 7). Ukhaman uñjaskasasa, Job chachajj janipuniw Diosat jitheqtkänti. Jupajj “janiw kuna juchanaksa lurkänti, janirakiw lakapampis kuna jan walinaksa arskarakïnti” (Job 2:10).

12. ¿Kunjamsa Job chachajj Supayan kʼarïtap qhanstayäna?

¹² Job chachajj kunatsa tʼaqesïna uk janiw yatkänti, kunanaksa jupjjat Supayajj Jehová Diosar säna uksa janirakiw yatkänti. Diosas tʼaqesiykaspa ukham amuyäna (Job 6:4; 16:11-14). Ukhamäkchïnsa janipuniw Jehová Diosat jitheqtkänti. Job chachajj janiw jupatakik taqe kuns munir jaqëkänti, Jehová Diosarus cheqapuniw munasïna, ukatwa amigopäna. ¡Kunanaktï Supayajj Job chachat parlkäna ukanakajj kʼarïnwa!

13. Diosat jan jitheqtasajja, ¿kunsa Job chachajj qhanstayäna?

¹³ Kunanakas alajjpachan pasaskäna uk janis Job chachajj yatkchïnjja, janipuniw Jehová Diosat jitheqtkänti. Ukham lurasajj Supayan kʼarïtapwa qhanstayäna. Jupat jan jitheqtatapatjja, Jehová Diosajj walja bendicionanakwa Job chachar churäna (Job 42:12-17).

14, 15. ¿Kuna kʼarinaksa Supayajj taqe jaqenakat parli?

¹⁴ ¿Kunanaksa Job chachan sarnaqäwipat yateqsna? Jichhürunakanjja, kun katoqañ laykukis Diosar sirvksna ukhamwa Supayajj jiwasat saraki. Job 2:4 qellqatanjja Supayajj akham sänwa: “Mä jaqejja jakañapa qhespiyasiña laykojja kunsa lurakispawa” sasa. Ukham sasinjja, janiw Supayajj Job chachatak parlkänti, jan ukasti taqe jaqenakatwa parlarakïna. Job chachan jiwatapat walja maranak qhepatsti, Supayajj Jehová Diosatsa servirinakapatsa kʼarinak parlaskakïnwa. Proverbios 27:11 qellqatajj siwa: “Munat wawajjay, yatiñanïmaya, nayarojj kusisiyitätawa; ukhamatwa arsusëjja nayar [kutkatasirirusa]” sasa.

 ¹⁵ Jehová Diosar istʼaña, jupan amigopäñwa jumajj ajllisma, ukhamatwa Supayan kʼarïtap qhanstayäta. Diosan amigopäñatakejj jan walinak apanukuñamawa. ¡Ukham luratamat janiw amtaskätati! Diosar serviñajj janiw aleq ukham amtañakïkiti. Supayajja, maynejj jan walinakan uñjasisajj Diosat jitheqtaspawa sasaw parli. Jupajj kunaymanitwa Diosat jitheqtayañ munistu. ¿Kunanaksa ukatakejj lurpacha?

16. 1) ¿Kunjamanakatsa Supayajj jaqenakar Diosat jitheqtayañ muni? 2) ¿Kunjamatsa Supayajj Jehová Diosat jitheqtayiristam?

¹⁶ Supayajj janiw Diosan amigopäñas munkiti, ukatwa Diosat jitheqtañasatakejj kunaymaninak luri. Supayajj “mä leonar uñtataw warartʼasis muyuski, maynir manqʼantañwa thaqaskaraki” (1 Pedro 5:8). Inas amigonakamasa, familiaranakamasa, yaqhanakasa kunatï Dios nayraqatan walïki uk jan lurañam munapkchiniti, jan ukajj inas Bibliat yatjjatañamsa jan munapkchiniti. Ukhaman uñjasisajj yantʼatäkasmas ukham amuyasisma, ukampis janiw aynachtʼañamäkiti (Juan 15:19, 20). * Supayajj ‘qhankir angeläkaspas’ ukhamaw tukuraki. Ukham tukusaw Diosar jan istʼañasatakejj engañjistaspa (2 Corintios 11:14). Maysa toqetjja, Diosar serviñatakejj janis walïksna ukham amuyañaswa Supayajj munaraki, ukhamatwa Jehová Diosat jitheqtayañ munistu (Proverbios 24:10).

17. ¿Kunatsa Jehová Diosar istʼtanjja?

¹⁷ Jehová Diosar istʼasajj Supayan kʼarïtapwa uñachtʼaytanjja. ¿Kunas Diosar istʼañatakejj yanaptʼistani?  Bibliajj siwa: “Diosamarusti taqe chuymamampi, taqe jakañamampi, taqe chʼamamampi munam” sasa (Deuteronomio 6:5). Jehová Diosarojj wal munastanjja, ukatwa jupar istʼtanjja. Diosarutï jukʼamp munasiñänejja, kuntï jupajj lurañas munki ukanakwa lurañäni. Apóstol Juanajj sänwa: “Jiwasatejj Diosar munasstan ukhajja, mandamientonakap phoqarakiñäniwa, mandamientonakap phoqañajj janiw chʼamäkiti” sasa (1 Juan 5:3).

18, 19. 1) ¿Kunanak lurañas Jehová Diosatakejj jan walïki? 2) Diosajj janipuniw kuntï jan lurirjamäktan uk maykistaspati, ¿kunjamatsa uk yattanjja?

¹⁸ ¿Kunanak lurañas Jehová Diosatakejj jan walïki? “ Diosajj uñiski ukanak uñisiñasawa” siski uka recuadronwa ukanakat mä qhawqha uñjjattʼäta. Qalltanjja ukanakajj janis sinti jan walïkaspa ukhamwa amuyasma. Ukampis jumatï Biblia liytʼäta, uka toqet sum amuytʼarakïta ukhajja, Jehová Diosan leyipar istʼañajj kunja wakiskirisa ukwa amuyäta. Jan walinak apanukuñ wakisitapsa amuyarakïtawa. Ukham lurañajj  chʼamakïspawa, ukampis jumatï ukham lurätajja, Jehová Diosan amigopäñatak chʼamachasitamatjja kusisita, suma ukhamaw jakasïta (Isaías 48:17, 18). ¿Kunas jan walinak apanukuñatakejj yanaptʼistaspa?

¹⁹ Jehová Diosajja, janipuniw kuntï jan lurirjamäktan uk maykistuti (Deuteronomio 30:11-14). Niyakejjay Diosajj amigosächejja, sum uñtʼistu. Kunanaksa lurirjamätan, kunanakas aynachtʼayistaspa uksa yatirakiwa (Salmo 103:14). Apóstol Pablojj akham chʼamañchtʼistu: “Diosajj arunakap phoqapuniwa, janiw jupajj munkaniti jumanakajj jan aguantirjamäpkta ukat jukʼampi yantʼatäpjjañamjja. Ukhamajj yantʼanakan aguantapjjañamatakejj jupaw yanaptʼapjjätam” sasa (1 Corintios 10:13). Jehová Diosajj kunatï walïki uk lurañatakejj yanaptʼistaniwa. Jan walinakar atipjañatakisa, Jupajj “jaqen chʼamapat jilankki uka” chʼamwa churistani (2 Corintios 4:7). Pablojja, kunjamsa Diosajj jupar yanaptʼäna uk uñjasajj akham sänwa: “Khititejj nayar chʼam churkitu ukan  chʼamapampejja taqe kunatakiw nayajj chʼamanïta” sasa (Filipenses 4:13).

20. 1) ¿Kunjam jaqëñasasa? 2) ¿Kunatsa ukatakejj chʼamachasiñasa?

²⁰ Jehová Diosan amigopäñ munstan ukhajja, kunanakatï jan walïki ukanak janiw lurañasäkiti (Romanos 12:9). Diosan amigonakapjamajja, kunanakarutï jupajj munaski ukanakaruw munasiñasa. Ukajj Salmo 15:1-5 (liytʼañataki) qellqatanwa qhanañchasi. Jehová Diosan amigonakapajj jupat yateqasipjje. Jupanakajj ‘munasiri, kusisiri, sumankiri, pacienciani, khuyapayasiri, suma chuymani, Diosar confiyiri, llampʼu chuymani’ ukhamäpjjewa (Gálatas 5:22, 23).

21. ¿Kunsa Jehová Diosjam chuymanïñatakejj lurañama?

²¹ ¿Kunas Jehová Diosjam chuymanïñatakejj yanaptʼiristam? Kunarutï Jupajj munaski ukaruw munasiñama, ukatakejj sapüruw Biblia liyiñama, yatjjatañamaraki (Isaías 30:20, 21). Ukhamtï lurätajja, Jehová Diosarojj jukʼampiw munasïta, jupar istʼañsa munarakïtawa.

22. ¿Kunsa Jehová Diosar istʼatamat katoqäta?

²² Jan walinak apanukuñajja, thantha isi apsusisin machaq isimpi isthapisiñampi sasiwa. Biblianjja akham siwa: “Nayrajj kunjam jaqëpjjayätas ukanakjja isïkaspas ukham apsusipjjam [...]. Antisas Diosajj churkistu uka machaq jaqëñamp isthapisipjjam” sasa (Colosenses 3:9, 10). Ukham lurañajj chʼamakïspawa, ukampis jiwasatï Jehová Diosar istʼañäni, jan walinaksa apanukuñäni ukhajja, Jehová Diosat ‘walja askinaka’, mä arunjja bendicionanak katoqañäni (Salmo 19:11). Ukhamasti, Jehová Diosar istʼañ ajllim, Supayan kʼarïtapsa uñachtʼayarakim. Jehová Diosarojja, janiw jutïrin kun katoqañ laykukis serviñamäkiti, jan ukasti jupar munasiñatwa serviñama. Ukhamtï lurätajja, ¡Jehová Diosan cheqpach amigopäyätawa!