Salmos 145:1-21
Davidan alabanzapa.
א [álef]
145 Nayan Diosaja, nayan Reyija,+ nayajj jumaruw jachʼañchäma,wiñayans wiñayapatakiw sutim jachʼañchäjja.+
ב [bet]
2 Jurnälaw nayajj jumar jachʼañchäma,+wiñayans wiñayapatakiw sutim jachʼañchäjja.+
ג [guímel]
3 Jehová Diosajj jachʼa Diosawa, juparuw jachʼañchäwi katoqañajj waktʼi,+jupajj kunja jachʼa Diosasa ukajj jan yatjjatkayawa.+
ד [dálet]
4 Aka tiempon jakir jaqenakasa jutir tiempon jakir jaqenakasa luratanakam uñjasaw jumar jachʼañchapjjätam.
Kunanaktï chʼamamampi lurkta ukanakatwa jupanakajj yatiyapjjani.+
ה [he]
5 Jumajj kunja jachʼañchatätasa, kunja jachʼa Diosätas ukanakatwa jupanakajj parlapjjani,+nayasti musparkañ luratanakamatwa lupʼirakëjja.*
ו [waw]
6 Jupanakajj musparkañ luratanakamatwa* parlapjjani,nayasti jachʼa Diosätamatwa yatiyarakëjja.
ז [zayin]
7 Jupanakajj suma chuyman Diosätamatwa yatiyapjjani,+cheqapar uñjir Diosätam laykojja kusisitaw arnaqasipjjarakini.+
ח [jet]
8 Jehová Diosajj sinttʼasiri, khuyapayasiri,+pacienciani* Diosawa, munasirïtapasa jan jaytjasirïtapas wali jachʼawa.+
ט [tet]
9 Jehová Diosajj taqenimpis suma Diosawa,+taqe luratanakapanwa khuyapayasirïtapajj uñjasi.
י [yod]
10 Jehová Dios Tata, taqe luratanakamaw jumar jachʼañchapjjätam,+jumat jan jitheqtirinakas jachʼañchapjjarakïtamwa.+
כ [kaf]
11 Reinomajj* kunja jachʼañchatasa ukwa jupanakajj yatiyapjjani,+kunja chʼamanïtas uka toqetwa parlapjjarakini,+
ל [lámed]
12 ukhamat kunanaktï chʼamamampi lurkta ukanak jaqenakan yatipjjañapataki+ukhamarak reinomajj* kunja jachʼañchatasa uk yatipjjañapataki.+
מ [mem]
13 Reinomajj* jan tukuskiriwa,apnaqäwimas wiñayatakiwa.+
ס [sámekh]
14 Taqe khitinakatï niya liwisirjamäpki ukanakarojj Jehová Diosaw katjjasiski,+taqe khitinakatï altʼatäpki ukanakarojj jupaw wayti.+
ע [ayin]
15 Taqe jaqenakaw jumar suytʼasipktamjja,jumaw jupanakarojj manqʼañanak tiempopar churtajja.+
פ [pe]
16 Jumajj amparamwa jistʼartajja,kunanaktï taqe jakirinakajj munapki ukanakwa jupanakar churtajja.+
צ [sadé]
17 Jehová Diosajj taqe kunsa cheqaparjamapuniw luri,+taqe kunanaktï jupajj lurki ukanakanjja jan jaytjasirïtapaw uñjasi.+
ק [qof]
18 Jehová Diosajj taqe khitinakatï jupar artʼasipki ukanakan jakʼapankiwa,+taqe khitinakatï qʼoma chuymampi* jupar artʼasipki ukanakan jakʼapankiwa.+
ר [resh]
19 Jupar ajjsaririnakajj kunanaktï munapki ukwa Diosajj jupanakar churi.+
Yanap mayiñatak artʼasitanakaparojj Diosajj istʼiwa, salvarakiwa.+
ש [shin]
20 Jehová Diosajj taqe khitinakatï jupar munasipki ukanakarojj jarkʼaqewa,+ukampis taqe jan wali jaqenakarojj tukjaniwa.+
ת [taw]
21 Jehová Diosajj kunja jachʼañchatasa uka toqetwa lakajajj yatiyani.+
Taqe jakirinakajj Diosan santo sutip jachʼañchapjjpan, wiñayans wiñayapataki.+
Notanaka
^ Jan ukajja, “piensarakëjja”.
^ Jan ukajja, “chʼamamatwa”.
^ Jan ukajja, “jan ratuk colerasiri”.
^ Jan ukajja, “Gobiernomajj”.
^ Jan ukajja, “gobiernomajj”.
^ Jan ukajja, “Gobiernomajj”.
^ Jan ukajja, “cheqampi”.
