Salmos 140:1-13
Directorataki. Davidan salmopa.
140 Jehová Dios Tata, jan wali jaqenakat salvita,nuwasir jaqenakat jarkʼaqtʼita,+
2 chuymanakapan jan wal amtapki ukanakatsa,+uru jurnäla nuwasiñanak* utjayapki ukanakatsa jarkʼaqtʼita.
3 Jupanakajj asirjamaw* lajjranakap afilasipjje,+lakanakapansa asirunakan venenopaw utji.+ (Sélah).
4 Jehová Dios Tata, jan wali jaqenakan amparapat jarkʼaqtʼakitaya,+nuwasir jaqenakatsa jarkʼaqtʼita,jupanakajj nayar lanktʼasiyañatakiw amtapjje.
5 Jachʼa jachʼa tukurinakajj mä trampa nayatakejj imantapjje,jupanakajj pitanakampiw* thaki jakʼan mä qäna* janatatapjje,+jupanakajj sipitanakwa nayatak uchapjje.+ (Sélah).
6 Jehová Diosarojj nayajj akham sistwa: “Jumaw nayan Diosajätajja.
Jehová Dios Tata, yanap mayiñatak ruwtʼasitanakajarojj istʼakimaya”+ sasa.
7 Jehová Dios Tata, jumajj Taqe Kunjjar Munañanïtawa, wali chʼaman Salvirijätawa,jumaw nuwasiñ urunjja nayan pʼeqej jarkʼaqtajja.+
8 Jehová Dios Tata, jan wali jaqenakan amtap janikiy phoqasiyamti.
Jan wali amtanakap sumar mistuñap janikiy munamti, ukhamat jan jachʼañchasipjjañapataki.+ (Sélah).
9 Nayar muyuntapkitu uka jaqenakan pʼeqenakapajja,lakanakapat mistki uka jan wali parlatanakapampi imjjatatäpjjpan.+
10 Jupanakjjarojj aqkir nina sankʼanak purjjatpan.+
Jupanakajj ninar jaqontatäpjjpan, manqha pʼiyanakaru,*+janirak wasitat sartapjjpanti.
11 Kʼarintir jaqejj janikiy mä lugarjja oraqen jikjjatpanti,+nuwasir jaqenakarojj kunatï jan walïki ukay arknaqpan, tukjarakpan.
12 Jehová Diosajj jan khiti yanapirini jaqenakarojj arjjataniwa, uk nayajj sum yatta.
Pobrenakarojj cheqaparjamaw uñjarakini.+
13 Cheqap sarnaqer jaqenakajj cheqpachapuniw sutimar yuspärapjjani,cheqap sarnaqerinakajj juma nayraqatanwa jakapjjani.+
Notanaka
^ Jan ukajja, “guerranak”.
^ Jan ukajja, “katarjamaw”.
^ Variante: “kawuyanakampiw”.
^ Jan ukajja, “rede”.
^ Jan ukajja, “uma phujunakaru”.
