Proverbios 7:1-27
7 Nayan wawaja, kuntï nayajj arskta uk phoqam,mandamientonakajsa chuymamar imam.+
2 Mandamientonakaj phoqam ukatsti jakarakim,+kunjamtï nayranakamarojj wali sum uñjktajja ukhamarak yatichäwinakajarojj* wali sum uñjam.
3 Ukanakjja lukʼananakamar chintʼasim,chuymamar qellqantarakim.+
4 Yatiñarojj akham sarakim: “Jumajj kullakajätawa” sasa.
Amuytʼañarusti akham sarakim: “Jumajj parientejätawa” sasa.
5 Ukhamat ukanakajj saranukut warmit* jumar jarkʼaqañapataki,+qʼañu juchan sarnaqer warmita* ukhamarak mojjsa arunakapat jarkʼaqañapataki.+
6 Nayajj utajan ventanapata,ventan rejillajatwa aynachar uñtayäta,
7 kunapachatï jan amuytʼasirinakar uñtaskayäta ukhajja,waynanak taypinjja jan amuytʼasir mä waynaruw uñjayäta.+
8 Uka waynajj uka warmin callep jakʼnamaw pasaskäna,uka warmin utap toqeruw saraskarakïna.
9 Ukhasti intejj jalantaskänwa, jaypʼöjjarakïnwa,+niya arumäjjänwa, chʼamakäjjarakïnwa.
10 Ukatsti mä warmiruw uka waynar jikjjatir uñjta,uka warmejj prostitutjam isthapitänwa,+ engañjir chuymanirakïnwa.
11 Uka warmejj wali parliri, qallasiri ukhamawa.+
Janipuniw utapansa achtʼkiti.*
12 Uka warmejja mä ratojj callenkiwa, ukatjja plazanakankarakiwa,sapa esquinanwa suyjjataraki.+
13 Ukatjja uka warmejj uka waynaruw katthapi, jampʼattʼarakiwa.
Jan phenqʼaniw uñkati, akham sarakiwa:
14 “Nayajj sumankañ sacrificionak loqtañajänwa.+
Jichhüruw promesanakaj phoqta.
15 Ukatwa nayajj jumar jikjjatir mistunta,jumar thaqañataki, ¡jichhajj jikjjatsmawa!
16 Ikiñajarojj wali suma ikiñanakampiw nayajj janjjatta,uka ikiñanakajj lino hilot lurata qhana coloranakamp luratawa, Egipto markat apanitarakiwa.+
17 Mirrata, aloenakata, canelata lurat perfumenakampiw ikiñajarojj nayajj uchta.+
18 Jutam, qhantatkamay sistʼasiñkam munasiñäni,panpachanejj wali munasiñamp kusistʼañäni.
19 Kuna laykutejj esposojajj janiw utankkiti,wali jayaruw viaji.
20 Qollqeni mä bolsa apasi,phajjsejj urtʼankani uka urkamajj janiw kuttʼankaniti” sasa.
21 Uka warmejj chuymar purtʼkir arunakampiw uka waynar engañji.+
Mojjsa arunakampiw parljjayaraki.
22 Ukatjja uka waynajj uka warmin qhepapwa sari, kunjamtï mä torojj mataderor sarki ukhama,kunjamtï jan amuytʼasir mä jaqejj cepon* castigatäñatak sarki ukhama,+
23 mä flechajj uka waynan higadop passuñapkama.
Ukham lurasajj jakañ vidapwa uka waynajj aptʼasini, ukjja jupajj janiw amuyaskiti,+ kunjamtï mä jamachʼejj trampar jaltʼki ukhama.
24 Jichhasti nayan wawanakaja, istʼapjjeta,nayajj arskta uka arunakajarojj wali amuyumpi istʼapjjam.
25 Chuymamajj jan uka warmin thakinakap toqerojj saranukpanti.
Janirak thakinakapansa jumajj chhaqanukumti,+
26 uka warmejj waljaniruw jiwañar purtʼasiyi,+jupan jiwayat jaqenakajj waljapuniwa.+
27 Uka warmin utapajj Sepulturar* apiriwa,jiwañaruw saraqayaraki.
Notanaka
^ Jan ukajja, “leyijarojj”.
^ Hebreo arunjja, “jan uñtʼat warmit”. Proverbios 2:16 texton notap liytʼäta.
^ Hebreo arunjja, “extranjera warmita”. Proverbios 2:16 texton notap liytʼäta.
^ Hebreo arunjja, “Janipuniw kayunakapajj utapan achtʼkiti”.
