Job 9:1-35
9 Job chachajj akham sarakïnwa:
2 “Jïsa, nayajj ukhamätap sum yatta.
Ukampis ¿kunjamarak mä jiwir jaqejj Dios nayraqatan razonanïspasti?+
3 Maynitï Diosamp juicionkañ munchejja,+janiw jupajj Diosan 1.000 jisktʼanakapat ni mä jisktʼaparus jaysañ puedkaspati.
4 Jupajj chuymapan yatiñaniwa, wali chʼamanirakiwa.+
¿Khitis jupa contra saytʼasin jan usuchjatäkaspa?+
5 Jupajj qollunakwa onjjtayi, janirakiw khitis uk yatkiti,jupajj colerasiñapanwa qollunak jaqokipstayi.
6 Jupajj oraq khatatiyasaw lugarapat onjjtayi,ukatwa columnanakapajj khatatiraki.+
7 Jupaw intirojj jan qhanañapatak ordeni,jupaw warawaranakan qhanaps imanti.+
8 Jupaw alajjpachanak mä telar uñtasit janatati,+jupaw lamar qotan jachʼa oladanakap patjjan sarnaqe.+
9 Jupaw Ash,* Kesil,* Kimá* sat warawaranak* luri,+juparakiw aynach toqenkir* warawaranak luri.*
10 Jupaw kunanakatï jachʼäki jan yatjjatkañäki ukanak luri,+juparakiw jan jaktʼañjamäki uka musparkañanak luri.+
11 Jupajj naya jakʼaj pasi, ukampis janiw jupar uñjañ puedkti.
Jupajj nayar pasakipasaw nayrankjje, ukampis janiw khitïtaps amuykti.
12 Kunapachatï jupajj kuns katunti ukhajja, ¿khitirak juparojj jan churañ munaspasti?
¿Khitirak juparojj ‘kunsa luraskta’ saspasti?+
13 Diosajj janiw colerasitap aguantaskaniti.+
Rahaban*+ yanapirinakapas Dios nayraqatanwa altʼasipjjani.
14 ¡Yamas jupar jayskä ukhajj jukʼampïñapawa!
¡Jupampi jiskhisiñatakejj wali amuyumpiw arunak ajlliñajäspa!
15 Nayajj razonanïkirista ukhasa, janiw jupar jayskiristti.+
Juezajarojj* nayat khuyaptʼayasiñapatakikiw wal ruwtʼasirista.
16 Nayatï jupar jawsiristjja, ¿jupajj jaysanitaspati?
Janjakiw jupajj arojj istʼkaspati,
17 kuna laykutejj jupaw nayar mä jachʼa thayampi tʼaqesiyitu,jan razonanirakiw tʼaqesiñanakaj jiljjattayi.+
18 Jupajj janiw samsuykituti.
Jupajj jan waltʼäwinakampiw phoqantaskakitu.
19 Nayatï chʼamanïñat parliristjja, Diosaw jukʼamp chʼamanejja.+
Nayatï kunatï cheqapäki ukat parliristjja, Diosajj akham siwa: ‘¿Khitirak nayarojj cuenta mayitaspasti?’* sasa.
20 Nayajj razonanïskiristsa pachpa lakajaw juchañchitaspa.
Taqpach chuymampis jupar sirvkäjja,* jupajj juchan uñstayitaspa.
21 Taqpach chuymampis jupar sirvkäjja,* kunas nayarojj pasitani uk janiw yatiskti,nayajj janiw jakañ munjjti.
22 Taqe kunas pachpakïskiwa, ukatwa nayajj akham sista:
‘Jan juchanirus* jan wali jaqerus igualak jupajj tukji’ sasa.
23 Mä akatjamat chhaqtayir umanakatï maynirojj mä akatjamat jiwayaspajja,jupajj jan juchan jaqen tʼaqesitapat burlasispawa.
24 Oraqejj jan wali jaqenakan amparapar katuyatawa.+
Jupaw juezanakan nayranakaps* tapanti.
Janitï jupäkaspajj ¿khitirak uk luraspasti?
25 Jichhasti urunakajajj mä tʼijurit sipans jukʼamp ratukiw tʼijuski.+
Nayasti janipuniw kunapachas kusisiñ uñjawaykti.
26 Urunakajajj soqos lawat lurat botenakar uñtasitaw ratuk sarjje,kunjamtï pakanakajj mä animalar katjañatak ratuk jaljjatki ukhama.
27 Nayatï sirista: ‘Llakinakaj armasjjäwa,ajanujajj janiw llakitäjjaniti’ sasinjja,
28 nayan taqe llakinakaj laykojj ajjsaraskakiristwa,+janirakiw nayarojj jan juchanirjam uñjkitasmati.
29 Nayajj juchaniw uñjasirista.*
Ukhamajj ¿kunatakirak jan juchanïtaj uñachtʼayañatak chʼamachasïsti?+
30 Nayatï khunu umampi jareqasirista,amparanakajsa lejiampi* qʼomachasirista ukhajja,+
31 jumajj ñeqʼerar mä pʼiyaruw chhaqantayitasma,ukhamatwa pachpa isinakajas nayat ajjtasipjjetaspa.
32 Jupajj janiw nayjam jaqëkiti, ukhamat jupar jaysañajataki,ukhamat panpachani mä juicior sarapjjañajataki.+
33 Nanak panin lanti mä amtar puriñapatakejj janiw khitis utjkiti,nanakatak mä juezjam saytʼañapataki.
34 Jupatï nayar jan jukʼamp castigjjetaspa,*janirak kuna ajjsarkañanakampis jukʼamp sustjkitaspa ukhajja,+
35 nayajj jan ajjsarasaw parlirista,cheqas ajjsarañamp parlañajj janiw nayan utjkiti.
Notanaka
^ Ukajja, inas Orión sat constelacionat parlaskchi.
^ Hebreo arunjja, “aynacha (sur) toqenkir manqhäjj cuartonak luri”.
^ Jan ukajja, “sur toqenkir”.
^ Uka sutinakajj grup grupo warawaranakan sutinakapawa, oraqetpach uñtatajj animalanakaru ukhamarak kunaymaninakar uñtasitanakaw uñjasispa.
^ Ukajja, inas Tauro sat constelacionankki uka Pléyades sat warawaranakapat parlaskchi.
^ Ukajja, inas Osa Mayor sat constelacionat parlaskchi.
^ “Rahaban” sasinjja, inas lamar qotankir wali ajjsarkañ animalat parlaskchi.
^ Ukajja, “Mä juicion juchañchkitu ukarojj” sasaw jaqokipasirakispa.
^ Hebreo arunjja, “¿Khitirak nayarojj mä juicior apitaspasti?”.
^ Jan ukajja, “Nayajj janis juchanïkäjja”.
^ Jan ukajja, “Nayajj janis juchanïkäjja”.
^ Jan ukajja, “Taqpach chuymamp servirirus”.
^ Hebreo arunjja, “ajanunakaps”.
^ Hebreo arunjja, “jan wali jaqet uñjatïristwa”.
^ Jan ukajja, “potasampi”. Ukajja qhellat lurat jabonawa.
^ Hebreo arunjja, “Jupatï varap nayjjat apaqjjetaspa”.
