Job 5:1-27
5 ”Mirä amp suma, ¡jawsamaya! ¿Jumar jaysanirejj utjiti?
¿Kawkïr angelarus* yanaptʼayasiñatak jawsasïta?
2 Chuyma ustʼat sarnaqañasti, jan amuytʼasiri jaqerojj jiwayaniwa,envidiasiñasti taqe kun creyir jaqerojj jiwayaniwa.
3 Jan amuytʼasir jaqen suma saphintatap uñjta,ukampis jupajj jakki uka lugarajj mä akatjamat maldisitaw uñjasi.
4 Jupan wawanakapajj jan khiti jarkʼaqeriniw uñjasipjje,jan khitin salvataw jupanakajj markan punkupan taksut uñjasipjje.+
5 Jupan cosechapsti manqʼat jiwat jaqew manqʼanti,chʼapinak taypitpachwa apsuraki,kunanakatï jakañapatak wakiski ukanakajj sipitaruw jaltʼaraki.
6 Ukampis kunanakatï maynir jan waltʼayki ukanakajj janiw laqʼat jilskiti,jan waltʼäwinakajj janirakiw oraqet mistkiti.
7 Kunjamtï ninajj altorupun aqkejja,ukhamarakiw jaqejj cheqpachans jan walinakan uñjasiñatak nasi.
8 Ukampis nayatï jumïristjja, Diosaruw nayajj jakʼachasirista,Diosaruw quejasirista,
9 khititejj kunayman musparkañanakampi jan amuykañanakampi lurki,suma luratanakapas jan jaktʼkañäkaraki ukaru.
10 Jupaw oraqpacharojj jall churi,juparakiw oraqenakarojj umanak apayani.
11 Jupaw humilde jaqerojj jachʼar apti,juparakiw llakitarojj salvi.
12 Jupaw engañjir jaqen amtanakap jan phoqasiykiti,ukhamat amparanakapan luratanakapajj jan sumar sarañapataki.
13 Diosaw yatiñan jaqenakarojj jupanakan wakichat pachpa trampapar jaltʼayi,+ukhamat engañjir jaqenakan amtanakap pantjayañataki.
14 Urunsti jupanakajj wali chʼamakanwa uñjasipjje,chika urunsti arumäkaspas ukhamaw payinaqapjje.
15 Diosaw jupanakarojj lakapan mä espadanïpki ukanakat salvi,pobre jaqerusti chʼamanin amparapatwa salvaraki,
16 ukhamat jan khiti yanapirini jaqetakejj mä suytʼäwi utjañapataki,ukampis jan cheqapar sarnaqer jaqenakan lakanakapajj jistʼantatawa.
17 ¡Diosamp cheqañchayaski uka jaqejj kusisitawa!
Ukhamajj ¡Taqe Chʼamani Diosan cheqañchäwip jan apanukumti!
18 Diosasti maynirojj ustʼayaspawa, ukampis heridarojj chʼoqtʼarakiwa,jupasti maynirojj tukjiwa, ukampis pachpa amparanakapampiw qollaraki.
19 Jupajj sojjta jan waltʼäwinakatwa jumarojj salvätam,paqallqöri jan waltʼäwis janirakiw kunsa kamachkätamti.
20 Manqʼañ jan utjkani uka tiempon jupaw jiwañat salvätam,guerran nuwasiñ tiemponsa juparakiw mä espadan chʼamapat salvätam.
21 Diosaw usuchjir arunakats jarkʼaqätam,+kunapachatï tukjäwejj jutkani ukhas janiw ajjsarkätati.
22 Tʼunjäwitsa manqʼat jiwañatsa janiw llakiskätati,salvaje animalanakarus janirakiw ajjsarkätati.
23 Oraqenkir qalanakas janiw kamachapkätamti,salvaje animalanakas jumampejj sumankapjjaniwa.
24 Juman carpamajj segurötap* yatïta,pastom uñjasinkäta ukhas janirakiw kunas ukan faltkaniti.
25 Jumajj walja wawanakanïyätawa,jumat jutir wawanakajj oraqenkir walja pastonakjamäniwa.
26 Juman jiwañamkamajj chʼamanïskakïtawa,tiempopar apthapiski uka marq marqa granonakjama.
27 Ukajj ukhamäskapuniwa, nanakajj uk sum yatjjatapjjta.
Taqe ukanak amuytʼam, ukarjam lurarakim”.
