Zacarías 3:1-10
3 Ukatjja jupajj* Josué+ jachʼa jilïr sacerdoteruw uñachtʼayitäna, jupajj Jehová Diosan angelap nayraqatan saytʼatäskänwa, kupëjjapansti Supayaw*+ jupa contra saytʼasiñatakejj saytʼatäskarakïna.
2 Jehová Diosan angelapajj akham sasaw Supayarojj* säna: “¡Supaya,+ Jehová Diosay jumarojj juchañchpan! ¡Jïsa, Jerusalenar ajlliski+ uka Jehová Diosay jumarojj juchañpan! ¿Janit aka jaqejj nina taypit apsut lawäki?” sasa.
3 Josué chachasti qʼañu isinakamp isthapitänwa, ángel nayraqatan saytʼatäskarakïnwa.
4 Angelasti jupa nayraqatan saytʼatäsipkäna uka angelanakarojj akham sänwa: “Uka qʼañu isip apsupjjam” sasa. Ukatsti juparojj sarakïnwa: “Nayajj juchamjja apaqsmawa, suma isimpi isthapitäyätawa”+ sasa.
5 Nayajj akham sayätwa: “Pʼeqepar mä qʼoma ukat suma turbante uchapjjam”+ sasa. Ukatjja pʼeqeparojj mä qʼoma turbante uchapjjäna, isimpiw isthapiyapjjarakïna, Jehová Diosan angelapajj uka jakʼanwa sayaskarakïna.
6 Jehová Diosan angelapajj akham sasaw Josué chacharojj säna:
7 “Ejercitonakan Jehová Diosapajj akham siwa: ‘Jumatï thakinakajan sarnaqäta, nayraqatajansa luräwinakam phoqarakïta ukhajja, utajanjja juezayätawa,+ pationakajsa uñjarakïtawa.* Jumarojj nayraqatajar libre mantaniñamatakiw permiso churäma, kunjamtï akan saytʼatäsipki uka angelanakarojj permiso churkta ukhama’ sasa.
8 ”‘Josué, jachʼa jilïr sacerdote, mirä amp suma istʼam, jumasa juma nayraqatan qontʼasipki uka sacerdotenakasa istʼapjjpan, kuna laykutejj jumanakajj kunatï jutïrin paskani ukatakejj mä señaläpjjtawa. ¡Uñtapjjam, nayajj Chʼichtanir Ali+ satäki uka servirijaruw+ irpanëjja!
9 ¡Josué nayraqatan nayajj uchkta uka qala uñtapjjam! Aka mä sapa qalanjja paqallqo nayranakaw utji, uka qalaruw nayajj qellqantäjja, mä urunakwa nayajj uka oraqen juchap apasjjäjja’+ siw ejercitonakan Jehová Diosapajja.
10 ”Ejercitonakan Jehová Diosapajj akham siwa: ‘Uka urunjja, jumanakat sapa mayniw vecinoparojj uvas alipan chʼiwiparu, higos qoqapan* chʼiwipar invittʼani’+ sasa”.
Notanaka
^ “Jupajj” sasinjja, inas Jehová Diosat parlaskchi.
^ Jan ukajja, “Satanás”.
^ Jan ukajja, “Satanás”.
^ Jan ukajja, “pationakajatsa encargasïtawa”.
^ Jan ukajja, “arbolapan”.
