Zacarías 1:1-21
-
Jehová Diosan ukar kuttʼaniñatakiw jawsasi (1-6)
-
‘Nayan ukar kuttʼanipjjam, nayasti jumanakan ukaruw kuttʼanëjja’ (3)
-
-
Nayrïri visión: mirto sat qoqanak taypinkir caballor qonjjatat jaqenaka (7-17)
-
“Jehová Diosajj mayampiw Sionarojj chuymachtʼani” (17)
-
-
Payïri visión: pusi wajjranakampi pusi artesanonakampi (18-21)
1 Zacarías* profetajja Berekías chachan yoqapänwa, Berekías chachasti Idó chachan yoqaparakïnwa. Kunapachatï Darío+ reyejj pä maranak apnaqaskäna, kimsaqallqöri phajjsëjjarakïna ukhajja, aka arunakwa Zacarías+ profetajj Jehová Diosat katoqäna:
2 “Jehová Diosajj jumanakan awkinakamatakejj wali coleratawa.+
3 ”Jupanakarojj akham sañamawa: ‘Ejercitonakan Jehová Diosapajj akham siwa: “‘Nayan ukar kuttʼanipjjam’ siw ejercitonakan Jehová Diosapajja, ‘nayasti jumanakan ukaruw kuttʼanëjja’+ siw ejercitonakan Jehová Diosapajja”’.
4 ”‘Jumanakajj jan awkinakamjam tukupjjamti, nayra profetanakajja akham sasaw awkinakamarojj sapjjäna: “Ejercitonakan Jehová Diosapajj akham siwa: ‘Mirä amp suma, jan wali thakinakamsa jan wali luratanakamsa apanukupjjam’*+ sasa”’.
”‘Ukampis jupanakajj janiw istʼapkänti, janirakiw nayarojj kasupkitänti’+ siw Jehová Diosajja.
5 ”‘¿Jichhajj awkinakamajj kawkinkapjjesa? ¿Profetanakajj wiñayat jakapjjänjja?
6 Ukampis arunakajatsa leyinakajatsa servirinakajaruwa, mä arunjja profetanakajaruw yatiyapjjañapatak ordenayätjja, awkinakamajj ukanak phoqasir uñjapjjänwa, ¿janich ukhamäki?’.+ Ukatwa jupanakajj nayan ukar kuttʼanipjjäna, akham sapjjarakïnwa: ‘Ejercitonakan Jehová Diosapajj sarnaqatanakasarjama luratanakasarjamaw uñjistu, kunjamtï jupajj lurañ amtkäna ukarjama’+ sasa”.
7 Zacarías profetajja Berekías chachan yoqapänwa, Berekías chachasti Idó chachan yoqaparakïnwa. Kunapachatï Darío reyejj pä maranak apnaqaskäna,+ sebat* phajjsïkäna, tunka mayani phajjsit 24 urunak saraqjjarakïna ukhajja, Zacarías profetajj aka arunakwa Jehová Diosat katoqäna:
8 “Arumajj mä visionwa nayajj uñjayäta. Wila color caballor qonjjatat mä chachaw ukankaskäna, barranconkir mirto sat qoqanak* taypinwa jan onjjtas sayaskarakïna. Jupa qhepäjjanjja wila color caballonakampi, chʼiyar wila color caballonakampi, janqʼo caballonakampiw utjarakïna” sasa.
9 Ukatwa nayajj akham jisktʼayäta: “¿Tata, caballonakar qonjjatat jaqenakajj khitinakäpjjesa?” sasa.
Nayamp parlkäna uka angelajj akham sarakitänwa: “Khitinakäpjjes uk nayaw uñachtʼayäma” sasa.
10 Mirto sat qoqanak* taypin jan onjjtas sayaskäna uka jaqejja akham sänwa: “Jupanakajja Jehová Diosajj oraqe inspeccionapjjañapatak khitankäna ukanakäpjjewa” sasa.
11 Jupanakasti Jehová Diosan angelaparojja, mä arunjja mirto sat qoqanak* taypin sayaskäna uka angelarojj akham sapjjänwa: “Oraqjja inspeccionjjapjjtwa, oraqpachajj sumakïskiwa, sumankañaw utjaraki”+ sasa.
12 Ukatwa Jehová Diosan angelapajj akham sasin jisktʼäna: “Ejercitonakan Jehová Diosapa, Jerusalén markatakisa Judá oraqenkir markanakatakis 70 maranakaw+ coleratäjjtajja, ¿kunapachkamarak uka markanakat jan khuyaptʼayaskätasti?”+ sasa.
13 Nayamp parlkäna uka angelarojja, Jehová Diosajj suma arunakampi ukhamarak chuymachtʼkir arunakampiw jaysäna.
14 Nayamp parlkäna uka angelajja, akham sitänwa: “Akanak yatiyam: ‘Ejercitonakan Jehová Diosapajj akham siwa: “Jerusalenarusa Sionarusa arjjatäwa,* jïsa, taqe chuymaw arjjatäjja.+
15 Jachʼa jachʼa tukuri markanakatakejj wali coleratätwa,+ kuna laykutejj markajatakejj mä jukʼa nayajj coleraskayäta+ ukhajja, jupanakajj jukʼamp jan walinakwa utjayapjjäna”+ sasa’.
16 ”Jehová Diosajj akham siwa: ‘“Jerusalén markatjja mayampiw khuyaptʼayasëjja,+ ukanwa utajajj mayamp saytʼayatarakïni,+ Jerusalén markajja mediñatak mä pitampi midtʼatäniwa”+ siw ejercitonakan Jehová Diosapajja’.
17 ”Akanak yatiyarakim: ‘Ejercitonakan Jehová Diosapajj akham siwa: “Markanakajanjja kunanakatï sumäki ukanakajj mayampiw jilarkir utjani, Jehová Diosajj mayampiw Sionarojj chuymachtʼani,+ mayampiw Jerusalenarojj ajllirakini”+ sasa’”.
18 Uñtasasti pusi wajjranakwa nayajj mä visionan uñjayäta.+
19 Ukatwa nayamp parlkäna uka angelarojj akham sasin jisktʼayäta: “¿Kunas uka wajjranakajja?” sasa. Jupajj akham sarakitänwa: “Judá+ markaru, Israel+ markaru, Jerusalén+ markaru aywitataykäna uka wajjranakawa” sasa.
20 Ukatjja Jehová Diosajj pusi artesanonakwa uñachtʼayitäna.
21 Nayasti akham sasaw jisktʼayäta: “¿Kun lurañatakis jupanakajj jutapjje?” sasa.
Jupajj akham sarakitänwa: “Aka wajjranakajj Judá markaruw aywitatayapjjäna, Judá markankirinakat janiw khitis uka wajjranakar saykatañ puedkänti. Aka artesanonakajja uka markanakan wajjranakapar ajjsarayiriw jutapjjani, markanakan wajjranakap tukjiriw jutapjjarakini, kuna laykutejj uka wajjranakajj Judá marka contraw wajjranakap aytapjjäna, ukhamat uka markan jakir jaqenakar aywitatayañataki” sasa.
Notanaka
^ Uka sutejja, “Jehová Diosajj amtiwa” sañ muni.
^ Jan ukajja, “jan wali thakinakamatsa jan wali luratanakamatsa kuttʼanipjjam”.
^ Apéndice B15 uñjjattʼäta.
^ Jan ukajja, “arbolanak”.
^ Jan ukajja, “arbolanak”.
^ Jan ukajja, “arbolanak”.
^ Jan ukajja, “jarkʼaqäwa”.
