Jeremías 6:1-30
6 Benjamín chachan wawanakapa, jarkʼaqatäñatakejj Jerusalén markat yaqha cheqar escapjjapjjam.
Tecoa+ markan putut phustʼapjjam.+
¡Bet-Hakerem sat lugaran mä señaljam nina naktayapjjam!
Kuna laykutejj alay toqetwa* mä jan waltʼäwejj jakʼachasisinki, wali jachʼa tʼunjäwiw jakʼachasisinki.+
2 Sionan phuchapajj wali suma uñnaqtʼani wali qʼayachat warmjamawa.+
3 Awatirinakajj uywanakapampiw jutapjjani.
Jupanakajj jupar muyuntatwa carpanakap saytʼayapjjarakini,+sapa maynirakiw uñjañapäki uka uywanakaparojj uñjani.+
4 “Jerusalén contra guerran nuwasir sarañatak wakichasipjjam.
¡Sartasipjjam, chika urun jupa contra saytʼapjjañäni!”.
“¡Ay jiwasat kunakïkani, niyaw jaypʼthapiski,chʼamakthapiskiwa!”.
5 “¡Sarañäni! Aruman jupa contra saytʼapjjañäni,jachʼa torrenakap tukjapjjañäni”.+
6 Kuna laykutejj akham siw ejercitonakan Jehová Diosapajja:
“Lawanak khuchurapjjam, Jerusalén markar atacañatakejj mä laqʼa montón montontʼapjjam.+
Uka markaw cuenta churañapa,uka markan tʼaqesiñakiw utjaski.+
7 Kunjamtï mä uma phujut chʼuchʼu umajj jalskejja,ukhamarakiw aka markat jan walinakajj mistu.
Nuwasiñampi tukjañampiw uka markan istʼasi,+usunakampi jan walinakampikiw naya nayraqatan utjaski.
8 Ay Jerusalén marka, cheqañchäw katoqasim, jan ukajj ajjtasisaw jumat jitheqtjjäma,+jumarojj chʼusak jaytäma, jan khiti jakirin oraqjama”+ sasa.
9 Ejercitonakan Jehová Diosapajj akham siwa:
“Jiltʼir israelitanakajj uvas alin jiltʼir uvasanakjamäpjjewa.
Jumaw taqpach apthapiñama, kunjamtï maynejj jiltʼir uvasanak mä canastar apthapki ukhama” sasa.
10 “¿Khitirus parlañajäspa? ¿Khitirus ewjjtʼañajäspa?
¿Khitis istʼani?
Jiñchunakapajj llupantatawa,* janirakiw istʼasirjamäpkiti.+
Jehová Diosan arunakaparojj jiskʼachapjjewa,+janirakiw jupanakar gustkiti.
11 Ukatwa nayajj Jehová Diosan colerasiñapamp phoqtʼatätjja,janirakiw aguantirjamäjjti”.+
“Nayan colerasiñaj callenkir wawanakjjar yatiyam,+tantachtʼat waynanakjjarus ukhamaraki.
Taqeniw katuntat uñjasipjjani, mä chachajj warmipamp chika,jilïr jaqenakajj wali awkinakamp chikaraki.+
12 Utanakapajj yaqhanakar churatäniwa,oraqenakapas warminakapas ukhamaraki.+
Kuna laykutejj uka oraqen jakirinak contrajj nayaw amparaj loqatatäjja”, siw Jehová Diosajja.
13 “Kuna laykutejj jiskʼat jachʼakamaw mayninakat kʼarimp kʼarimpi beneficionak apsupjje,+profetat qalltasajj sacerdotenakamppachaw mayninakar engañjapjje.+
14 Jupanakajj akham sasakiw markajan heridanakap qollañ munapjje:
‘¡Sumankañaw utji! ¡Sumankañaw utji!’ sasa.
Ukampis janiw sumankañajj utjkiti.+
15 ¿Ajjtaskañ luratanakapat markajajj phenqʼasiti?
¡Cheqas janiw jupanakajj kunats phenqʼasipkiti!
¡Janirakiw kunjamas phenqʼachatäñajj uks yatipkiti!+
Ukatwa jupanakajj tinkurinak taypinkapjjani.
Jupanakar castigkä ukapachajj lanktʼasipjjaniwa”, siw Jehová Diosajja.
16 Jehová Diosajj akham sarakiwa:
“Thakinakajj jikiski uka cheqar saytʼapjjam, uñjapjjarakim.
Nayra thakinakat jisktʼasipjjam,kawkïris suma thakejj uk jisktʼasipjjam, uka thaki sarapjjarakim,+ukatsti jumanakatakejj samarañ jikjjatapjjarakïta” sasa.
Ukampis jupanakajj akham sapjjewa: “Janiw nanakajj uka thak sarapkäti”+ sasa.
17 “Ukatsti nayajj marka uñjir guardianak* uttʼayta,+ jupanakajj akham sapjjarakïnwa:
‘¡Pututun suynatapar istʼapjjam!’+ sasa”.
Ukampis jupanakajj akham sapjjänwa: “Nanakajj janiw uk istʼapkäti”+ sasa.
18 “Ukhamajj ¡istʼapjjam markanaka!
Yatipjjam jaqenaka,kunatï Jerusalén markar paskani uk yatipjjam.
19 ¡Istʼapjjam oraqenkir markanaka!
Nayajj mä jan waltʼäwi aka markatak apasinkta,+ukajj kuna jan walinaktï lurañ amtasipkäna ukarjamawa,kuna laykutejj janiw arunakajar istʼapkiti,leyijs* maysaruw apanukupjje”.
20 “Saba* markatpach janqʼo incienso apanitamasa,jaya oraqetpach suma olorani caña apanitamas ¿kuna walirak nayatakisti?
Jumanakan nakhantayat ofrendanakamajj janiw katoqatäkiti,janirakiw sacrificionakamas chuymar purtʼkituti”.+
21 Ukhamasti akham siw Jehová Diosajja:
“Jichhasti aka markatakejj lanktʼasiñanak uchäjja,ukanakampiw jupanakajj lanktʼasipjjani,awkinakajj yoqanakapamp chika,vecinonakajj amigonakapamp chika,taqenirakiw jiwarapjjani”+ sasa.
22 Jehová Diosajj akham siwa:
“Mä markaw alay toqenkir* oraqet jutaski,wali jaya oraqenkir mä jachʼa markaw sartani.+
23 Jupanakajj flechtʼañ arcompi lanzampi katupjjani.
Janiw jupanakan sinttʼasiñapajj utjkiti, janirakiw khuyaptʼayasipkaniti,arunakapajj lamar qotar uñtataw suynani,caballonakar qonjjatataw jutapjje.+
Sionan phuchapa, jupanakajj kunjamtï mä guerran nuwasir chachajj wakichtʼaski ukhamaw juma contra guerran nuwasiñatak formtʼasipjje”.
24 Nanakajj uka toqet yatiyäwinak istʼapjjtwa.
Amparanakajajj jan chʼamaniruw tukuraki,+wali llakisiñaw nanakar katuntapjjetu,kunjamtï mä ususir warmejj wal tʼaqeski* ukhama.+
25 Jan camponkir oraqer mistumti,jan thakin sarnaqamti.
Enemigojj mä espadanïtap layku.
Taqe cheqanwa wal ajjsarayasiñajj utji.
26 Ay markajan phuchapa,llakisiñ isi* uchasim,+ qhella patjjan suntʼisim.
Mä sapa yoqall wawatjam wal llakisim, wali jachʼat wararirakim,+kuna laykutejj mä akatjamatwa tukjirïki ukajj jiwasanakjjar jutani.+
27 “Nayaw jumarojj* qorimp qollqemp qʼomachirjam markaj taypin uchsma,wali suma yatjjatirïñamataki.
Jumajj kunjamsa markajajj sarnaqe ukanak sum amuytʼañamawa, sum uñakipañamawa.
28 Taqe jupanakajj jan istʼasir jaqenakäpjjewa,+mayninakar kʼarintasaw sarnaqapjjaraki.+
Jupanakajj cobrempir hierrompir uñtasitäpjjewa.
Taqe jupanakajj jan walinak lurirïpjjewa.
29 Nina phusañajj* nakhantatäjjewa.
Plomo sat metalaw ninat mistjjaraki.
Metalanak qʼomachirejj inamayakiw wal trabajiski,+jan wali jaqenakajj janiw markat apsutäpkiti.+
30 Ukajj jan munat qollqe metalawa sasaw jaqenakajj cheqpachans jupanakat sapjjani,kuna laykutejj Jehová Diosaw jupanakarojj rechazjjaraki”.+
Notanaka
^ Jan ukajja, “norte toqetwa”.
^ Hebreo arunjja, “jiñchunakapajj janiw circuncidatäpkiti”.
^ Jan ukajja, “centinelanak”.
^ Jan ukajja, “yatichäwijs”.
^ Jan ukajja, “Seba”.
^ Jan ukajja, “norte toqenkir”.
^ Hebreo arunjja, “partomp wal tʼaqeski”.
^ “Llakisiñ isi” siski uk glosarion liytʼäta.
^ “Jumarojj” sasinjja, Jeremiasat parlaski.
^ Hebreo arunjja, “fuellejj”. Ukajj metalanak qʼomachirin mä herramientapänwa, ukampiw aire phuskatasajj hornor jukʼamp juntʼuchkatirïna.
