Jeremías 1:1-19
1 Aka arunakasti Benjamín oraqenkkäna Anatot+ markan sacerdotëkarakïna uka Hilquías chachan Jeremías* yoqapan arunakapawa:
2 Amón+ chachan Josías+ sat yoqapan urunakapanwa Jehová Diosajj nayar parlitäna, ukapachajj 13 maranakaw jupajj Judá markan reyit apnaqaskäna.
3 Judá markan reyipäkäna uka Josías chachan Jehoiaquim+ yoqapan urunakapan Diosajj ukhamarakiw parlitäna. Judá markan reyipäkäna uka Josías chachan Sedequías+ yoqapajj 11 maranak apnaqañ tukuyjjäna ukhakamasa, Jerusalén markajj phesqëri phajjsin yaqha markar preso apatäjjäna ukhakamas ukhamarakiw parlitäna.+
4 Jehová Diosajj akham sasaw parlitäna:
5 “Janïr mamaman matrizapan lurkayäsma ukhaw jumarojj uñtʼjjayäsma,*+janïr jumajj naskayäta* ukhaw nayajj santor tukuyjjayäsma.*+
Nayajj yaqha markanakan profetäñamatakiw jumar uttʼaysma” sasa.
6 Ukampis nayajj akham sayätwa: “¡Taqe Kunjjar Munañani Jehová Dios Tata!
Nayajj wawäsktwa,*+ janiw parlañ yatkti”+ sasa.
7 Ukatsti Jehová Diosajj akham sitänwa:
“Jan jumajj ‘nayajj wawäsktwa’ sasin samti.
Jumajj taqe khitinakarutï nayajj khitkäma ukar sarañamawa,taqe kunanaktï nayajj siskäma ukanak parlañamawa.+
8 Jan jupanakar ajjsaramti,+‘jumar salvañatakejj nayaw jumampïskta’,+ naya Jehová Diosaw ukham sista” sasa.
9 Jehová Diosasti amparap loqatatasaw nayan lakaj llamktʼitu.+ Ukatjja Jehová Diosajj akham sarakituwa: “Nayaw juman lakamarojj arunakaj uchta.+
10 Nayaw jichhürojj markanakjjarus reinonakjjarus* autoridad chursma, ukhamat jikʼsuñamataki, tʼunjañamataki, tukjañamataki, tinkuyañamataki, lursuñamataki, ayruñamataki”*+ sasa.
11 Jehová Diosajj wasitat akham sasin parlitäna: “Jeremías, ¿kuns jumajj uñjta?” sasa. Ukatwa akham sayäta: “Nayajj mä almendro qoqan* ramap uñjta” sasa.
12 Jehová Diosajj sarakituwa: “Jumajj sum uñjtajja, nayajj arunakajan phoqasiñapatakejj uñnaqaskaktwa” sasa.
13 Jehová Diosasti wasitat akham sasin parlitäna: “¿Kuns jumajj uñjta?” sasa. Ukatwa akham sayäta: “Nayajj wallaqeskiri* mä phuku* uñjta, uka phukun lakapasti alay toqet* altʼayanitawa” sasa.
14 Ukatjja Jehová Diosajj akham sitänwa:
“Jan waltʼäwejj alay toqet* antutatäniwa,uka oraqen taqe jakirinak contra.+
15 Kuna laykutejj ‘alay toqenkir reinonakan* taqe familianakaparuw nayajj jawsthapiskta’, sistwa naya Jehová Diosajja,+‘uka familianakajj jutapjjaniwa. Jupanakan reyinakapasti sapa mayniw tronop uttʼayasini,Jerusalén markan punkunakap mantañ cheqaru,+muyuntir taqe murallanakap contra,ukhamarak Judá oraqen taqe markanakap contra.+
16 Ukatsti jupanakan taqe jan wal lurapjjatapat jupanak contraw nayan juicionakaj yatiyäjja,kuna laykutejj nayarojj apanukupjjetuwa,+yaqha diosanakaruw sacrificionak jewqʼeyapjje,+pachpa amparanakapamp luratanakaruw altʼasipjjaraki’.+
17 Ukampis jumajj kun lurañatakis wakichtʼatäñamawa,*jumajj saram, taqe kuntï nayajj sisksma ukanak jupanakar yatiyanim.
Jan jupanakar ajjsaramti,+ukhamat nayajj jupanak nayraqatan jumar jan ajjsarayañataki.
18 Kuna laykutejj nayaw jichhürun jumarojj mä jachʼa perqanakamp muyuntat markar tukuysma,hierrot lurat mä columnaru, cobret lurat murallanakaru, ukhamat taqpach oraq contra saytʼañamataki,+Judá markan reyinakap nayraqatana, principenakap nayraqatana,Judá markan sacerdotenakap nayraqatana ukhamarak markankir jaqenak nayraqatana.+
19 Jupanakajj cheqpachapuniw juma contrajj nuwasipjjani,ukampis janiw jupanakajj jumar atipjapkätamti,kuna laykutejj ‘nayaw jumampïskta’+ sasaw naya Jehová Diosajj arsta, ‘ukhamat jumar salvañataki’” sasa.
Notanaka
^ Uka sutejja, inas “Jehová Diosaw jachʼañchi” sañ munchi.
^ Hebreo arunjja, “janïr jumajj matrizat mistkayäta”.
^ Jan ukajja, “nayajj yaqhachjjayäsma”.
^ Jan ukajja, “ajlljjayäsma”.
^ Jan ukajja, “waynitukïsktwa”.
^ Variante: “mallkiñamataki”.
^ Jan ukajja, “gobiernonakjjarus”.
^ Jan ukajja, “arbolan”. Hebreo arunjja, “Nayajj mä sartirin”.
^ Hebreo arunjja, “phuskatata”, ukham sasajj manqhat ninamp phuskatañat parlaski.
^ Jan ukajja, “mä jachʼa lakan phuku”.
^ Jan ukajja, “norte toqet”.
^ Jan ukajja, “norte toqet”.
^ Jan ukajja, “norte toqenkir gobiernonakan”.
^ Hebreo arunjja, “caderam wakʼantasiñamawa”.
