Isaías 44:1-28
44 ”Jacob nayan servirija, jichhajj istʼam,nayan ajllit Israel, jichhajj istʼam.+
2 Khititï jumar lurktam,+khititï naskayäta ukhatpach* yanaptʼktam,uka Jehová Diosajj akham siwa:
‘Jacob, nayan servirija, jan ajjsaramti,+Jesurún,*+ nayan ajllitaja, janirak jumas ajjsaramti.
3 Waña oraqerojj* umwa purjjatayanëjja,+waña oraqerojj umwa jaltatayäjja.
wawanakamjjarojj nayan espiritujwa warjjatanëjja,+jumat jutir wawanakamarusti bendisirakïwa.
4 Chʼojjña pastonakjamaw jilapjjani,+álamo qoqanakjamaw* jawir jakʼan jilapjjani.
5 Maynejj akham saniwa: “Nayajj Jehová Diosanktwa”+ sasa.
Yaqhajj Jacobun sutipat sutinïniwa,yaqhasti “nayajj Jehová Diosanktwa” sasaw amparaparojj qellqantasini.
Jupasti Israelan sutipwa aparakini’.
6 Jehová Diosajj akham siwa,mä arunjja Israelan Reyipa,+ Salviripa,*+ ejercitonakan Jehová Diosapajj akham siwa:
‘Nayaw nayrïrïtjja, nayarakiw qhepïrïtjja.+
Nayat sipansa yaqha Diosajj janiw utjkiti.+
7 ¿Khitis nayjamajja?+
¡Utjchi ukhajj arspan, parlpan, uñachtʼayitpan!+
Kunanakatï pasañampïski ukanak arspan,kunanakatï akat jutïrirojj paskani ukanak arspan,kunjamtï nayajj nayra markar uttʼayasin arskayäta ukhama.
8 Jan ajjsarapjjamti,janirak ajjsarañat ukharuk saytʼat quedasipjjamti.+
¿Janit nayajj janïräkipan jumanakar sapa maynir sapksma? ¿Janit yatiyktjja?
Jumanakaw nayan testigonakajäpjjtajja.+
¿Nayat sipansa yaqha Diosajj utjiti?
Janiwa, janiw yaqha Qarqajj*+ utjkiti, janiw yaqhan utjatapsa nayajj yatkti’ sasa”.
9 Taqe khitinakatï idolonak lurapki ukanakajja janiw kunäpkisa,jupanakan wali munat yänakapajj* janiw kunatakis sirvkaniti.+
Ukanakajj* testigöñatakejj janiw uñjapkiti ni kunsa yatipkiti,+ukatwa luririnakapajj phenqʼachat uñjasipjjani.+
10 ¿Khitirak jan kunatak serviri mä diosjan ukajj metalat mä ídolo luraspasti?+
11 ¡Ídolo luririn compañeronakapajj taqeniw phenqʼachatäpjjani!+
Artesanonakajj aleq jaqekïpjjewa.
Jupanakajj taqeni tantachasipjjpan, lugaranakapan saytʼasipjjpan.
Jupanakajj wal ajjsarapjjani, taqpachaniw phenqʼachatäpjjarakini.
12 Metalamp trabajir jaqejja herramientapampiw hierrorojj nina sankʼa patjjar pariptayi.
Martillomp leqʼjasaw hierrorojj mä kunarus tukuyi,amparapan chʼamapampiw hierrorojj mä kunarus tukuyi.+
Manqʼat awtjayasisasti jupajj jan chʼamaniw uñjasi,jan um umatapatjja qaritarakiwa.
13 Madera khituri jaqejja mediñatak pitampiw midtʼi, kunjamsa trabajop lurani ukwa wila color tizamp marctʼaraki.
Mader khituñ herramientampiw kuntï munki ukar tukuyi, compás sat herramientampiw marctʼaraki.
Uka maderarojj mä jaqëkaspas ukhamaw tukuyi,jaqer uñtat wali sumwa tukuyi,+ukhamat mä utar* uchañataki.+
14 Mä jaqejj cedro qoqanak* khuchuñanwa trabaji.
Jupajj mä qoqa ajllisi, mä roble qoqa ajllisi,montenkir* qoqanak taypin wali jachʼa, wali fuerte jilsuñapkamaw uka qoqa sum uñji.+
Mä laurel qoqa jupajj ayru,* jalluw uka qoqarojj jiltayaraki.
15 Ukatjja mä jaqew uka maderampejj nina naktayi.
Uka maderan mä partepampejj juntʼuchtʼasiwa,ninwa aqtayi, tʼantʼwa luraraki.
Uka maderatjja mä dios lurasi, ukaruw adoraraki.*
Uka maderjja mä idoloruw tukuyi, uka nayraqatanwa altʼasiraki.+
16 Chikat maderjja ninaruw phichkati,uka chikat maderampejj manqʼañatakiw aycha kanktʼasi, sistʼasiñkamaw manqʼaraki.
Juntʼurasisajj akham sarakiwa:
“Aka nina uñkatatajj wali sum nayajj juntʼurtʼasta” sasa.
17 Ukampis jiltʼir maderampejj mä dios lurasi, mä ídolo lurasi.
Uka nayraqatan altʼasisajj adorarakiwa.*
Uka idolorojj akham sasaw orasiraki:
“Salvakitaya, jumaw nayan diosajätajja”+ sasa.
18 Uka idolonakajj janiw kuns yatipkiti, janirakiw kuns entiendipkiti,+kuna laykutejj nayranakapajj tapantatawa, janiw kuns uñjapkaspati,chuymanakapajj janiw yatiñanïpkiti.
19 Janiw khitis chuymapan amuykiptʼkiti,janirakiw yatipkisa ni amuyapkisa, ukhamajj janiw akham sapkaspati:
“Chikat maderjja ninaruw phichkatjjta,nina sankʼanakapjjaruw tʼantʼa lurta, manqʼañatakiw aycha kankasirakta.
¿Mader jiltʼampejj mä ajjtaskañ lurañajäspati?+
¿Qoqat* apsut mä jiskʼa maderar adorañajäspati?”* sasa.
20 Jupajj qhellanakwa manqʼe.
Engañjat chuymapaw juparojj saranukuyi.
Janiw jupa pachpajj salvaskaspati, janirakiw akham jisktʼaskiti:
“¿Kunatï kupi amparajankki ukajj janit falsöki?” sasa.
21 “Jacob, ukanakat amtasim, Israel, jumajj ukanakat amtasim,kuna laykutejj jumajj nayan servirijätawa.
Nayaw jumarojj lursma, jumajj nayan servirijätawa.+
Israel, janiw nayajj jumat armaskäti.+
22 Jan wali luratanakamjja mä qenayas tapjjatkaspa ukhamwa chhaqtayäjja,+juchanakamjja mä chʼiyar qenayas tapjjatkaspa ukhamwa chhaqtayäjja.
Nayan ukar kuttʼanjjam, nayaw jumarojj salväma.*+
23 ¡Alajjpachanaka, kusisiñat arnaqasipjjam,kuna laykutejj Jehová Diosajj kuntï jupajj lurañ amtkäna ukwa luri!
¡Oraqe, jumajj atipjatam laykojj jachʼat arnaqasim!
¡Qollunaka, kusisiñat arnaqasipjjam,+jumajj monte,* taqpach qoqanakamas* kusisiñat arnaqasipjjam!
Kuna laykutejj Jehová Diosajj Jacoburuw salvi,*Israel laykuw jupajj kunja kʼajkirisa uk uñachtʼayi”.+
24 Jumar Salviri*+ Jehová Diosamajj akham siwa,khititï mamaman purakapankaskayäta ukhatpach jumar lurktam uka Diosajj akham siwa:
“Nayaw Jehová Diosätjja, khititï taqe kunsa lurki uka Diosätwa.
Naya sapakiw alajjpachanakjja isïkaspas ukham janatatta,+nayarakiw oraqsa janatatta.+
¿Khitis mä yanapirjam nayamp chikäskänjja?
25 Inamay arunak parlirinakan* señalanakap nayajj pantjasiytwa,nayaw yatirinakar jan amuytʼasir jaqenakarjam sarnaqayta,+nayaw yatiñani jaqenakar pantjasiyta,kuntï jupanakajj yatipki ukjja jan kunatak serviriruw tukuyta,+
26 khititï serviripan arunakap phoqasiyki ukajj nayätwa,khititï yatiyirinakapan arsutanakap phoqatpach phoqasiyki ukajj nayätwa,+khititï Jerusalén markan ‘jaqenakaw jakapjjani’+ siski ukajj nayätwa,khititï Judá oraqen markanakapajj ‘wasitat saytʼayatäniwa,+laqayanakapas wasitat saytʼayatäniwa’+ siski ukajj nayätwa,
27 khititï wali manqha umanakarojj ‘wañsjjapjjam,taqe jawiranakapsa wañtʼayäwa’+ siski ukajj nayätwa,
28 khititï Ciro+ chachat ‘jupaw nayan awatirijajja,jupaw nayan munañaj phoqatpach phoqani’+ siski ukajj nayätwa,khititï Jerusalenat ‘mayamp saytʼayatäniwa’ siski ukajj nayätwa,khititï templot ‘cimientonakamajj uchatäniwa’+ siski ukajj nayätwa”.
Notanaka
^ Jesurún sutejja, “cheqap jaqe” sañ muni. Israel markar jachʼar aptañatakiw uka sutejj aytasïna.
^ Hebreo arunjja, “purakankkayäta ukhatpach”.
^ Jan ukajja, “Umat pharjat (wañjat) jaqerojj”.
^ Jan ukajja, “arbolanakjamaw”.
^ Hebreo arunjja, “Mayamp Aliripa”.
^ Variante: “Jaqhejj”.
^ Ukajja, idolonakatwa parlaski.
^ Jan ukajja, “cosasanakapajj”.
^ Jan ukajja, “mä santuarior”.
^ Variante: “mallki”.
^ Jan ukajja, “arbolanak”.
^ Jan ukajja, “bosquenkir”.
^ Jan ukajja, “yupaycharaki”.
^ Jan ukajja, “yupaycharakiwa”.
^ Jan ukajja, “Arbolat”.
^ Jan ukajja, “yupaychañajäspati”.
^ Hebreo arunjja, “mayamp aläma”.
^ Hebreo arunjja, “mayamp ali”.
^ Jan ukajja, “arbolanakamas”.
^ Jan ukajja, “bosque”.
^ Hebreo arunjja, “Mayamp Aliri”.
^ Jan ukajja, “Falso profetanakan”.
