Isaías 41:1-29
41 “Islanaka, amuki istʼapjjeta,*markanakajj chʼam katjjatapjjpan.
Jakʼachasinipjjpan, ukatjja parlapjjpan.+
Juzgatäñatak tantachasipjjañäni.
2 ¿Khitis maynirojj inti jalsu toqet jutayi,+ukhamat kayupäjjar* jawsasin justicia lurañataki,ukhamat markanak jupar apjjaruyañataki,ukhamat reyinakar apnaqañapataki?+
¿Khitis uka markanakarojj espadapampi laqʼa polvor tukuyi?
¿Khitis uka markanakarojj flechtʼañ arcopampejj thayamp apat pajarjam aywitatayi?
3 Jupasti* jupanakaruw arkti, janiw kunas juparojj avanzañatakejj jarkʼkiti,kayunakapajj jan taktʼki uka thaknam pasawayasaw jupanakarojj arkti.
4 ¿Khitis ukanak luri?
¿Khitis jaqenakarojj qalltatpach jawsthapi?
Naya Jehová Diosaw uk lurtjja, nayaw qalltatpach Diosätjja,+qhepa tiempon jakir jaqenakatakis nayajj pachpakïsktwa”.+
5 Islanakajj kuntï jupajj lurki uk uñjapjjewa, ukatsti ajjsarayasipjjewa.
Oraqen thiyanakapajja* khatatiñwa qalltapjje,tantachasipjjewa jutapjjarakiwa.
6 Sapa mayniw compañeroparojj yanaptʼi,jilaparojj akham sarakiwa: “Chʼamani saytʼasim” sasa.
7 Ukhamarakiw artesanojj metalamp trabajirirojj chʼamañchtʼi,+khititï metal leqʼeñ martillomp mä metalar planoptayki ukajja,khititï yunque patjjan martillomp metal leqʼeski ukaruw chʼamañchtʼaraki.
Jupajj akham sarakiwa: “Metalajj suma soldatawa” sasa.
Ukatjja jan jaqoqtañapatakejj clavonakampiw idolorojj segurtʼapjje.
8 “Ukampis Israel, jumajj nayan servirijätawa,+Jacob, jumajj nayan ajllitajätawa,+Abrahán amigojan wawapätawa,+
9 jumarojj oraqen thiyanakapatpachwa* nayajj irpansma,+oraqen wali jaya lugaranakapatpachwa jawsaraksma.
Nayasti jumarojj akham sissmawa: ‘Jumajj nayan servirijätawa,+nayaw jumarojj ajllissmajja, janiw rechazksmati.+
10 Jan ajjsaramti, nayaw jumampïskta.+
Jan llakisimti, nayaw juman Diosamätjja.+
Nayaw jumarojj chʼam churäma, jïsa, nayaw jumarojj yanaptʼäma.+
Cheqpachapuniw jumarojj cheqapar lurir kupi amparajampejj katjjasïma’ sasa.
11 Taqe khitinakatï juma contra colerasipki ukanakajja, phenqʼachatäpjjaniwa, jiskʼachatäpjjarakiniwa.+
Jumamp nuwasipki ukanakajja ina chʼusar tukuyatäpjjaniwa, chhaqtjjapjjarakiniwa.+
12 Juma contra nuwasir jaqenakarojj thaqkchïtasa, janiw jikjjatkätati.
Juma contra guerra lurapki uka jaqenakajja, janis utjapkaspa ukham ina chʼusar tukuyatäpjjaniwa.+
13 Kuna laykutejj naya Jehová Diosamaw kupi amparam katjjasiskta,nayaw jumarojj akham sissma: ‘Jan ajjsaramti. Nayaw yanaptʼaskäma’+ sasa.
14 Jacob, jiskʼa laqʼo,* jan ajjsaramti,+Israel marka, nayaw yanaptʼaskäma” siw Jehová Diosajja, jumar Salviri*+ Israelan Santo Diosapaw ukham arsu.
15 “Jumarojj grano takiñ tablaruw tukuysma,+grano takiñ machaq herramientaruw tukuysma.
Qollunakaruw jumajj takichasïta, qʼal tʼunjarakïta,jiskʼa qollunkarus tʼuna jipiruw tukuyäta.
16 Enemigonakamarojj granorjamaw jumajj khuytʼäta,thayaw jupanakarojj apasjjani.
Wali jachʼa thayaw jupanakarojj aywitatayani.
Jehová Dios laykojja jumajj kusisïtawa,+Israelan Santo Diosapatjja jachʼañchasïtawa”.+
17 “Tʼaqesiyat jaqenakasa pobre jaqenakas umwa thaqapjje, ukampis janiw umajj utjkiti.
Lajjranakapajja umatjamajj qʼala wañantatawa.+
Naya Jehová Diosaw jupanakar yanaptʼäjja.+
Naya Israelan Diosapajj janiw jupanakarojj apanukkäti.+
18 Qʼara jiskʼa qollunakanjja jawiranakwa jaltatayäjja,+valle pampanakansa walja cheqanakanwa um jalsuyarakëjja.+
Wasararojja cañanakamp phoqantat jiskʼa qotaruw tukuyäjja,waña oraqerojj uma jalsunakaruw tukuyarakëjja.+
19 Wasaranjja cedro qoqanakwa* ayröjja,*acacia, mirto, pino qoqanakwa ayrurakëjja.+
Wasar pampanjja enebro qoqanakwa ayröjja,fresno, ciprés qoqanakamp chikwa ayröjja,+
20 ukhamat taqe jaqenakajj Jehová Diosan amparapajj uk luratapa,Israelan Santo Diosapajj uk luratapuñjapjjañapataki, yatipjjañapataki,atención uskupjjañapataki, amuyapjjañapatakiraki”.+
21 “Quejanakam apanipjjam” siw Jehová Diosajja.
“Kamsasas arsupjjäta uk qhanañchapjjam” siw Jacobun Reyipajja.
22 “Pruebanak apanipjjam, kunanakas pasani uk yatiyapjjeta.
Kunanakas nayrajj pasäna ukanakat parlapjjeta,ukhamat ukanakjjat lupʼipjjañajataki,* kunanakas pasani uk yatipjjañajataki.
Jan ukajj kunanakas jutañampïski ukanak awisapjjeta.+
23 Kunas jutïrin pasani uk yatiyapjjeta,ukhamat jumanakajj diosanakäpjjatam yatipjjañajataki.+
Jïsa, kunatï sumäki jan ukajja kunatï jan walïki uk lurapjjam,ukhamat uk uñjasin musparapjjañajataki.+
24 Jumanakajj janis utjapkasma ukhamäpjjtawa,kuntï jikjjatapkta ukajja janiw kunäkisa.+
Khitinakatï jumanakar ajllipktam ukanakajj ajjtaskañäpjjewa.+
25 Alay toqenkirit* mayniruw nayajj jawsta, jupasti jutaniwa,+inti jalsu toqenkirit mayniw+ nayan sutij jachʼañchani.
Jupaw gobiernonakarojj ñeqʼer uñtat takichasini,+kunjamtï sañu lurirejj ñeqʼe takki ukhama.
26 ¿Khitirak qalltatpach uka toqet parlisti, ukhamat jiwasan yatiñasatakisti?
Jan ukajj ¿khitirak nayra tiempotpach uka toqet parlisti, ukhamat ‘jupajj razonaniwa’ sasin sañasatakisti?+
Cheqas ¡janiw khitis uka toqet yatiykiti!
¡Janiw khitis qhanañchkiti!
¡Janiw khitis jumanakarojj kun parlirsa istʼapktamti!”.+
27 Nayaw nayraqat Sionar akham sista: “¡Uñtam! ¡Akankapjjewa!”+ sasa,ukatjja suma yatiyäwinak yatiyir mä jaqeruw Jerusalenar khitäjja.+
28 Ukampis nayajj uñchʼukiskakiyätwa, janiw khitis utjkänti,jupanak taypitjja janiw khiti ewjjtʼiris utjkänti.
Nayajj jisktʼaskakiyätwa, ukampis janiw khitis jayskänti.
29 Taqe jupanakajj janis utjapkaspa ukhamäpjjewa.
Luratanakapajj inamayakiwa.
Metalat lurat idolonakapajj thayar uñtasitakïpjjewa, janis utjapkaspa ukhamakïpjjewa.+
Notanaka
^ Jan ukajja, “naya nayraqatan amukïpjjam”.
^ Ukajja, Diosar serviñatak jawsatäñatwa parlaski.
^ “Jupasti” sasinjja, inas Jehová Diosan munañap lurkäna uka gobernantet parlaskchi.
^ Variante: “qawayanakapajja”.
^ Variante: “qawayanakapatpachwa”.
^ Ukajja, “jan khiti arjjatirini, jan yäqata” sañ muni.
^ Hebreo arunjja, “Mayamp Aliri”.
^ Jan ukajja, “arbolanakwa”.
^ Variante: “mallkëjja”.
^ Jan ukajja, “piensapjjañajataki”.
^ Jan ukajja, “Norte toqenkirit”.
