Éxodo 7:1-25
7 Ukatjja Jehová Diosajj akham sasaw Moisesar säna: “Nayaw jumarojj uttʼaysma, ukhamat faraonatakejj Diosjamäñamataki. Aarón jilamasti juma lantiw profetjam parlani.+
2 Taqe kuntï nayajj jumar siskäma ukanakjja Aarón jilamaruw yatiyañama, jupaw faraonarojj parlani. Ukatsti faraonajj israelitanakarojj aka oraqet khitanukjjaniwa.
3 Nayasti faraonan chuymap qalarayasiñapatakiw jaytäjja,+ walja milagronakwa Egipto oraqen lurarakëjja.+
4 Ukampis faraonajj janiw istʼapkätamti. Ukatwa nayajj Egipto marka contrajj chʼamaj uñachtʼayäjja,* uka markarojj castigarakïwa. Ukatjja ejercitonakar uñtasitäki uka markajarojja, mä arunjja israelitanakarojj Egipto oraqetwa irpsöjja.+
5 Kunapachatï Egipto markar castigkä ukhamarak egipcionak taypit israelitanakar irpskä ukhajja, egipcionakajj cheqpachapuniw nayan Jehová Diosätaj yatipjjani”+ sasa.
6 Moisesampi Aaronampejj kuntï Jehová Diosajj siskäna ukhamwa lurapjjäna. Jïsa, jupanakajj kuntï Diosajj siskäna ukhampunwa lurapjjäna.
7 Kunapachatï Moisesampi Aaronampejj faraonar parlapkäna ukhajja, Moisesajj 80 maranïnwa, Aaronasti 83 maranirakïnwa.+
8 Ukatjja Jehová Diosajj akham sasaw Moisesampir Aaronampirojj säna:
9 “Kunapachatï faraonajj ‘mä milagro lurapjjam’ sasin sapjjätam ukhajja, akham sasaw jumajj Aaronar sañama: ‘Varamjja faraón nayraqatar jaqonoqam’ sasa. Uka varasti mä jachʼa asiruruw* tukjjani”.+
10 Ukatjja faraonan ukar sarasajja kunjamtï Jehová Diosajj siskäna ukhampunwa Moisesampi Aaronampejj lurapjjäna. Aaronajja faraonana ukhamarak faraonan servirinakap nayraqataruw varap jaqonoqäna, ukatsti uka varajj mä jachʼa asiruruw* tukjjäna.
11 Ukampis faraonajj yatirinakampiru layqanakampiruw jawsayanïna, Egipto markankir magianak lurir sacerdotenakajja,+ kuna milagrtï Aaronajj lurkäna uka pachparakwa lurapjjäna.+
12 Sapa mayniw varanakap jaqonoqapjjäna, uka varanakajj jachʼa asirunakaruw* tukjjapjjäna. Aaronan asirupasti* jupanakan asirunakaparuw* manqʼantäna.
13 Ukampis kunjamtï Jehová Diosajj siskänjja ukhamapuniw faraonajj chuymap qalarayasïna,+ janirakiw jupanakar istʼkänti.
14 Ukatjja Jehová Diosajj akham sasaw Moisesar sarakïna: “Faraonajj jan istʼasir chuymaniwa.+ Jupajj janiw markar khitañ munkiti.
15 Qharür alwajj faraonan ukar saram. Jupajj Nilo jawiraruw sarani, jupamp jikisiñatakejj Nilo jawir lakaruw saytʼasïta, asirur* tukki uka varamsa+ apasiñamarakiwa.
16 Juparusti akham sañamawa: ‘Hebreonakan Jehová Diosapaw juman ukar khitanitu,+ jupajj akham siwa: “Markajar khitam, ukhamat jupanakajj wasaran nayar servipjjañapataki” sasa. Ukampis jumajj janiw jichhakamajj istʼasktati.
17 Jehová Diosajj akham siwa: “Kuntï nayajj lurkä uk uñjasaw jumajj nayan Jehová Diosätaj yatïta.+ Nayajj Nilo jawiran utjki uka umaruw varajampi jawqʼatatäjja, ukatjja Nilo jawir umajj wilaruw tukjjani.
18 Nilo jawirankir chawllanakajj jiwarapjjaniwa, uka jawirajj wal thujsani, egipcionakas janiw uka jawirat umtʼañ puedipkaniti” sasa’”.
19 Ukatjja Jehová Diosajj akham sasaw Moisesar säna: “Aaronarojj akham sätawa: ‘Varam katjjarusin Egiptonkir umanak toqer aytam.+ Jawiranakapjjaru, canalanakapjjaru,* siniya* lugaranakapjjaru,+ tantat taqpach umanakapjjar aytam, ukhamat wilar tukuñapataki’ sasa. Taqpach Egipto oraqenwa wilajj utjani, lawata ukhamarak qalat lurat uma imañanakan utjki uka umanakasa wilar tukuyatarakïniwa” sasa.
20 Moisesampi Aaronampejja jankʼakiw kunjamtï Jehová Diosajj siskän ukham lurapjjäna. Faraonana ukhamarak faraonan servirinakapan uñjkataw Aaronajj varapamp Nilo jawirar jawqʼatatäna. Ukatjja Nilo jawiran taqpach umapajj wilaruw tukjjäna.+
21 Nilo jawirankir chawllanakajj jiwarapjjänwa,+ jawiras wal thujsjjarakïna, egipcionakajj janiw uka jawirat umtʼañ puedjjapjjänti.+ Egipto oraqpachanwa wilajj utjäna.
22 Ukampis Egipto markankir magianak lurir sacerdotenakajja uka pachparakwa lurapjjäna.+ Ukatwa faraonajj chuymap qalarayasïna, janirakiw Moisesampir Aaronampirojj istʼkänti, kunjamtï Jehová Diosajj siskänjja ukhama.+
23 Ukatjja faraonajj utaparuw kuttʼawayjjäna, kunanaktï jupajj uñjkäna ukanakarojj janirakiw yäqkänti.
24 Egipcionakajj janiw Nilo jawirat umtʼañ puedipkänti, ukatwa taqe jupanakajj Nilo jawir jakʼanakan phujunak allipjjäna,* ukhamat um umtʼañataki.
25 Jehová Diosajj Nilo jawir wilar tukuyatapatjja, paqallqo urunakaw uka jawirajj ukhamäskäna.
Notanaka
^ Hebreo arunjja, “Egipto markjjarojj amparaj uchäjja”.
^ Jan ukajja, “katariruw”.
^ Jan ukajja, “katariruw”.
^ Jan ukajja, “katarinakaruw”.
^ Hebreo arunjja, “Aaronan varapasti”.
^ Hebreo arunjja, “varanakaparuw”.
^ Jan ukajja, “katarir”.
^ Ukajja, Nilo jawirat mistki uka canalanakatwa parlaski.
^ Jan ukajja, “pantano”.
^ Variante: “jatʼsupjjäna”.
