Kom duamnieyiñ plata ñi eluafiel taiñ reñma (pu che) kom ñi duamnien (Proverbios 30:8). Femngechi, “tati plata kuñiwtukukey” (Eclesiastés 7:12). Kiñeke rupa küdawngekey nütramkayal ti plata dungu, welu eluwkilnge ñi müleal ti weda dungu tamu kurewen-ngen plata ñi duam mu (Efesio 4:32). Müley tamu welukontu maneluwküleal ka tamu dullial (ngümintual) chumngechi püneal tati plata.

BIBLIA TAÑI FEYPILEN: “Fey kiñe che ayüle ñi dewmayael kiñe fütra ruka, ¿wüne anükünuwpelayafuy may ñi nentukuentayael, femngechi tañi kimael tunten pülata mew ñi dewmayafiel ñi ruka?” (Luka 14:28). Doy falin-ngey tamu trür (trir tripa) nütramkayal chumngechi tamu püneal tati plata (Amós 3:3). Rakiduamaymu tunte (chumten) tamu duamnieel ñi ngillakayal ka tunte pepi tamu püneal (Proverbios 31:16). Nielmu fentren plata ñi ngillakawal fentren chemküfkechi, welu duamfalngelay tamu kom püneal. Tamu nieelchi plata, fey müten püneaymu, kafey defeluwkilmu (Proverbios 21:5; 22:7).

TAMI FEMAFEL:

• Nielmu plata petu ñi afnon chi küyen, ngüneduamaymu chumngechi püneal petu mülewechi plata

• Puwnole tamu plata, müte ngillakawekinolmu. Kiñe dungu: Tripakinolmu tamu yafütumeal chew fendengekeelchi iyael, welu doy kümeafuy mür dewmafilmu iyael tamu ruka mu

BIBLIA TAÑI FEYPILEN: “Feymew ayüleiñ taiñ femngechi femkeel mew, fey taiñ tuteafiel ta Ngünechen ka femngechi taiñ pu peñi ka lamngen” (2 Korintio 8:21). Rüf piwke mu, dunguaymi tami kompañ tunte plata tami llowken ka tunte pünekeymi tami ngillakan mu.

Wüne nütramkafinge tami kompañ chumngechi tamu püneal ti plata (Proverbios 13:10). Nütramkalmu tüfachi dungu tamu kompañ engu kelluaeymumew tamu nieal tüngün tamu kurewen-ngen. Tamu wewelchi plata tami küdaw mu, mülelay tami peafiel eymi müten no, ka tami reñma koneltuley (1 Timotew 5:8).

TAMI FEMAFEL:

• Ramtuwaymu tami kurewen-ngen tamu tunte (chumten) püneal fey ñi ramtunoafiel kangelu

• Elkilnge (ingelkilnge) tamu rupayael kiñe weda dungu, tamu nütramkayal ti plata dungu mu