Chi Biblia feypi Satana ‘ngünenkamekey kom Mapu mew mülechi pu che’ (Apokalipsi 12:9). Weküfü ka tañi pu inuma pilayngün taiñ feyentunieafiel chi Biblia, Chaw Ngünechen ñi Küme Dungu. Tüfa engün amuldungukeyngün tati pu layelu ñi mongelen wenu mapu mew. Feymu inaduamafiyiñ chumngechi ngünenkakefingün ta che ñi feyentual tüfachi dungu.

Fentren religion kimeltukeyngün “kom iñchiñ nieiñ kiñe am ka kiñe püllü lakenolu layüm kiñe che, kañpüle amutukey ñi mongeleal kakelu püllü engün”, pikeyngün.

Welu Biblia kimeltukelay tüfachi dungu. Nütramlu chumngechi ñi dewmangen ta Adan, Biblia feypi: “Ngünechen [dewmafilu] tati wentru, feytichi trufür mapu mew, ka [pimutukulelfilu] neyen ñi yu mew, fey elurkefi ta mongen” (Génesis 2:7). Fey llemay, Chaw Ngünechen tukulerkelafi ta Adan kiñe am kam kiñe püllü amulealu ñi mongen, lallefule rume Adan.

Biblia ta feypi, lalu kiñe che ngewelay chem mongen no rume. Lalu am tati che, chem no rume pepi femkelafi tati mongelechi che. Biblia ta feypi:

•  “Tripakey tañi püllü, fey wiñotuy trufür mapu mew; feychi antü mew may niewelay rakiduam” (Salmo 146:4).

• “Mongelechi che kimingün tañi layal; welu tati pu layelu chem dungu no rume kimwetukelayngün, ka kullingewekelay, dew ngoymayelu am engün ñi rakiduam. Kom dungu tami femal tami kuwü mu, femnge kom tami newen mu, fey ngenolu am küdaw, adkünun, ngüneduamün, ka kimün rüngan küfwe mew, chew tami amual” (Eclesiastés 9:5, 10).

Biblia ka feypi, chumngechi tañi lan pu kulliñ, ka femngechi lay tati pu che (Eclesiastés 3:19, 20). Tati pu layechi che turpu kimwetulayngün. Fey lale kiñe che chem mongen no rume ngewelay.

‘Kañpüle mongeleputukeyngün tati pu layelu’ feypikelay Biblia chem versikulo mu no rume. Lale kiñe che püllüngetulay. Biblia ta kimeltukelay ñi nien ta che kiñe am ñi kuerpu mu, fey kañpüle mongeleputualu dew lalu. Satana ka tañi pu weküfü kimeltukeyngün tüfachi koyla dungu. Welu Jewba üdekefi kom feychi koyla ñi kimeltukeel pu religion (Proverbios 6:16-19; 1 Timotew 4:1, 2).

Müley kiñeke che rangiñelwelelu tati pu püllü engu pu che mu. Satana ka ngünenkamekefi ta che tüfachi dungu mu. Fentren che, ka feychi rangiñelwelelu kütu, pu layechi che ñi werkün dungu trokikefingün. Welu femlay tati, feypi ta Biblia (Eclesiastés 9:5, 6, 10).

Fey, ¿chew küpay tüfachi werkün dungu? ¡Pu weküfü mu küparkey! Pu weküfü lüyütumekefingün ta che petu ñi mongelen; ngüneduamingün chumngechi ñi dunguken, ñi ad, ñi chumün, ka ñi kimün. Feymu, tati pu weküfü feychi che yem mu femuwfaluwkeyngün (1 Samuel 28:3-19).

Satana amultukukey koylake nütram tati lachi che mu, ngünenkachealu. Tüfachi koylake nütram mu, tati pu che ñi feyentunoafiel Biblia tañi rüf dungu (2 Timotew 4:4).

Africa pingechi mapu mu nütramngekey chumngechi kiñeke lachi che pengerkeyngün, ‘petu mongeley’, pikeyngün. Welu feychi lalu alü kamapu tañi ruka mu mületurkey. Welu kiñe la wiñomongetule, ¿püntütripayafuy tañi pu che mu?

Kafey kiñe che keñangeafuy (ngoymangeabuy) kiñe lachi che mu. Kiñe rupa kiñe fücha che inantukuniefi epu wentru amuldunguyawlu lelfün mew. Tüfachi epu wentru ramtueyew ‘¿chumngelu am ta (chemu am) inantukuniemuyu?’, fey chi fücha che feypifi ta kiñe amuldungulu ‘iñche ñi peñi yem trokinieeyu’, pi. Welulkawi llemay, welu may ‘keñalafiñ tati (ngoymalabiñ), fey tañi peñi yem ürke’, pimekey. Tüfachi fücha che, ¡ngam chem feypipelafi tañi pu che welu rakiduamlu!

Kiñeke che weda dungu allküturkey, pewmarkey kam perumerkey.  Ka fütra pellkeyngün tüfachi dungu mu. Marein pingechi domo, Africa mapu mu mülelu konwe antü püle, pun mu allkütukefuy tañi chuchu yem ñi dungun. Müna pellkey tüfachi domo, fey mekey ñi wirarün ka trepeltufi tañi pu che. Kom tüfachi dungu weluduameleyew.

Feymu tati pu layelu petu mongelekale engün, ¿llükalkayafuyngün tañi pu che? Femlayafuy llemay. Kom tüfachi weda werkün dungu am tati pu weküfü mu küpalu.

Welu kiñeke werken dungu kümelu trokingeafuy ka kelluafeiñmew, fey ¿chew küpay tüfachi werkün dungu? Kiñe domo Gbassay pingelu, Sierra Leona pingechi mapu mu, kutrankülekefuy. Welu tañi chaw em pewmarkefi. Tüfa ta feypifi ñi entumeal tapül lawen kiñe anümka mew, reyülafiel ko engu, ka ñi pütokoal ti lawen. ‘Petu tami femnon, iney no rume dungukifilnge’ pifi. Gbassay femi kom tañi feypietew, fey mongetuy.

Ka kiñe papay, kiñe pun mu perumey tañi füta yem. ‘Küme adniey ka tutelu takun yeniey’, pi feychi papay.

 Kom tüfachi werkün dungu kümelu trokingeafuy, ka kelluafeiñmew chi. Fey ¿Chaw Ngünechen mu küpay tüfachi werkün dungu? Femlay tati, Jewba mu küpalay. “Ngünechen ta koyladungukelay” (Tito 1:2). Jewba turpu ngünenkalayafeiñmew. Pu weküfü, fey keta koylatukey.

Welu, ¿mülepey may kümeke weküfü? Femlay tati. Kiñeke mu kelluchekelu trokiafuiñ, welu kom pu weküfü wedañmangeyngün. Tati Weküfü dungufilu ta Eva, wenifalngelu trokieyew (Génesis 3:1). Eva allkütufi ta Weküfü, ka feyentuñmafi tañi dungu, welu ¿chum tripay? Lay tati.

Kiñe weda che weni femuwfaluwi ñi ngünenkacheal. Feymu pu che feypi “fütra ngürüka müten”. Ka chi Biblia feypi: “Weküfü ka femngechi pewfaluwkey Ngünechen ñi kiñe küme werken püllü reke” (2 Korintio 11:14).

Chaw Ngünechen dunguwekelafi tati che mülelu Mapu mu pewma mu, perimontun mu, ka wenu mapu nagpachi dungun no rume. Welu Biblia mew ngülamtukefi ka ngüyulkefi ta che, fey “tañi fente küme pepikawküleael tañi femael itrofill kümeke dungu” (2 Timotew 3:17).

Jewba müna piwkeyenieeiñmew, feymu ngüfetunieeiñmew (eypikeeiñmu) taiñ ngünenkangenoal Weküfü ñi ngünen mew. Chaw Ngünechen kimniey ñi kuñiwün-ngen tati pu weküfü.