CAPITULO 7
Quimeltui “ti cümeque dungu ta Jesús meu”
Inayentufali Felipe tati amuldunguquelu
Hechos 8:4-40 mu entungei
1, 2. Inantucungelu rume pu cristiano, ¿chem rupai?
PU CRISTIANO ñi pu caiñe eluhuingün ñi huesa inantucuafiel. Saulo eluhui ñi “rume caiñetuafiel” ti trahunche (Hech. 8:3). Pu discipulo llicaingün, lefmahuingün Jerusalén mu. Femlu engün rume, Saulo pepi catrütulafi tañi amuldungun cüdau. Doi mai, cümeque dungu tripai. ¿Chem dungu chi? Peafiyiñ.
2 Pu lefmaulu Jerusalén mu “nütramcalelfi pu che Chau Ngünechen ñi cümeque dungu” cheu tañi puhun engün (Hech. 8:4). Tañi pu caiñe cüpa catrütufuingün ñi amuldunguhuenoal, huelu quelluntucuingün ñi doi alü camapu puhual Chau Dios tañi dungu. Fantepu meu, ca femngechi dungu rupaquei.
‘Cheu ñi puhun pu lefmaulu’ (Hechos 8:4-8)
3. 1) ¿Inei am ta Felipe? 2) ¿Chumngelu epe com che Samaria mu quimlafui tati cümeque dungu? 3) ¿Chem feipicünui Jesús ñi rupayal Samaria mu?
3 Felipe lefmahui tañi mapu mu ñi amual ta Samaria (Hech. 8:4; inaduamnge ti huichulechi dungu: “ Felipe ‘tati amuldunguquelu’”). a Üye mu, epe com che quimlafui tati cümeque dungu, ¿chumngelu? Jesús feipifui pu apostol: “Chem huaria no rume Samaria mu mülelu conpulayaimün. Doi mai, Israel troquiñche meu quintunieafimün pu ñamquiyauchi ufisa reque felelu” (Mat. 10:5, 6). Feipilu rume, quimniefui pu Samaria che ñi llohual tati cümeque dungu cüpalechi antü. Petu ñi amutunon huenu mu, feipicünui: “Huldunguaimün iñche meu Jerusalén püle, com Judea, Samaria ca huall mapu püle” (Hech. 1:8).
4. 1) Pu Samaria che, ¿chumngechi llohuingün ñi feipieteu Felipe? 2) ¿Chumngelu femngechi duamcülepelaingün?
4 Felipe ngüneduami Samaria mu ‘ancüi reque ti quetran ñi cosechangeal’ (Juan 4:35). Pu Samaria che cüme llohui tati cümeque dungu, füshcüduameleyu ñi piuque. ¿Chumngelu? Pu judio famentuquefuingün pu Samaria che, illamcaquefingün cütu. Cafei pu fariseo dullintuchequefuingün ca doicülelu caquelu che mu troquiuquefuingün. Huelu Felipe femngechi chengelafui, dullintuchequelafui, com che amuldungufi tati cümeque dungu. Feimu fentren che Samaria mu, “cüme ngüneduamquefui chem ñi feipin Felipe” (Hech. 8:6).
5-7. Caiñetungen mu pu cristiano, doi fentren che quimürpuquei tati cümeque dungu. Feipinge quiñe rupan dungu.
5 Caiñetungequelu rume Chau Dios tañi troquiñche, pepi catrütungequelai ñi amuldunguhuenoal. Doi mai fentren rupa pu cristiano presuyengeingün ca mapu, fei amuldunguqueingün cheu tañi yengen ca doi fentren che quimürpuquei tati cümeque dungu. Femngechi rupai conlu ti Segunda Guerra Mundial, pu testigo yengeingün cheu ñi rume cüdauquen pu presu, campo de concentración nazi ca pingequelu. Quiñe judio presulelu üye mu quimfi tati rüf dungu, fei feipi: “Pu Dunguquelu Ineingen Jehová nehuen piuquengeingün. Quimfali Chau Dios tañi huirintucuel mu cüpai tañi quimeltuel engün, feimu testigongerpun”.
6 Quiñeque mu, taiñ pu caiñe cütu cüme llouqueingün tati cümeque dungu. Femngechi rupai taiñ peñi, Franz Desch pingelu, yengei cheu ñi rume cüdauquen pu presu Austria mapu mu. Üye mu, quiñe soltau eluhui ñi quimeltungeal Biblia. Rupalu chi tripantu, feiti soltaungefulu amuldungurpui. Fei amulu quiñe fütra trahun mu, huiño peutuingu Franz engu. ¡Rume ayühuingu!
7 Ca femngechi dungu rupaquei caiñetungen mu pu cristiano, fei lefmaulu ca mapu mu. 1970 tripantu püle, taiñ pu peñi ca pu lamngen caiñetungeingün Malaui mapu mu, fei lefmahuingün ta Mozambique. Üye mu, cüme amuldunguingün. Huelu pichin rupalu, ca caiñetungeingün Mozambique mu. Femngelu rume, amuleingün ñi amuldungun. Taiñ peñi Francisco Coana feipi: “Fentren iñchiñ presuntucungeiñ quiñeque mu taiñ amuldunguquen mu, huelu pefiel mu pu che ñi cüme lloufiel tati cümeque dungu, quimtucuiñ Chau Dios taiñ quellunieteu, chumngechi ñi quellufiel pu hunenque cristiano”.
8. Rupan mu huesaque dungu, ¿chumngelu cüme tripaquei taiñ amuldungun?
8 Caiñetungen mu, doi alü camapu puuquei taiñ amuldungun. Cafei pu che rupan mu huesaque dungu politico ñi duam mu ca plata tañi duam mu, lefmauquei tañi pais mu ñi doi cüme feletual cangelu mapu mu. Fei eluuqueingün ñi quimeltungeal Biblia cheu tañi puhun engün. Feichi pu che caque rume quehun dunguquei, feimu duamnieingün ñi amuldungungeal quisuque tañi quehun mu. Fei eimi, ¿yafüluuquepeimi mai tami amuldunguafiel pu che “itrofill tuhun-ngelu, mollfüñ ca fillque quehun dunguquelu”? (Apoc. 7:9).
“Iñche ca elumuchi tüfachi pepiluhun” (Hechos 8:9-25)
‘Simón pefi pu apostol fampuhulelfiel ñi cuhu tati pu che ñi llohual Chau Dios ñi nehuen. Fei feipicünufi ñi eluafiel plata pu apostol’ (Hechos 8:18).
9. ¿Inei am ta Simón? Ca, ¿chumngelu afmatulehuei Felipe mu?
9 Samaria mu, Felipe femi fentren afmatun dungu, tremoltufi pu cutrancülelu ca huemünentufi huesaque püllü (Hech. 8:6-8). Quiñe calcu huentru, Simón pingelu, müna yamniengequefui, “niei Chau Ngünechen ñi fütra nehuen” pingequefui. Huelu pefilu fillque afmatun dungu ñi femün Felipe, ngüneduami Felipe mai elungei Chau Dios tañi nehuen, feimu cristianongetui (Hech. 8:9-13). Huelu mülefui ñi pengelal chumngelu ayüfui ñi cristianongeal, ¿chumngechi? Peafiyiñ.
10. 1) Pedro ca Juan, ¿chumingu Samaria mu? 2) Ñi pefiel mu, ¿chem femi Simón?
10 Quimlu pu apostol ñi cristianongerpun quiñeque che Samaria mu, huercüfingün ta Pedro ca Juan (inaduamnge ti huichulechi dungu: “ Pedro elungei ‘tati llafe’”). Puulu engu, fampuhulelfingu tañi cuhu pu hue discipulo, femngechi llohuingün Chau Dios tañi nehuen. b Pefilu tüfa Simón, afmatulehuei. Feimu feipifi pu apostol: “Iñche ca elumuchi tüfachi pepiluhun. Femngechi tuchi fampuhulelfiel ñi cuhu iñche, llohuai Chau Ngünechen ñi nehuen”. Cüpa culli ñi elungeal feichi pepiluhun Chau Dios mu cüpalu (Hech. 8:14-19).
11. Pedro, ¿chem huiñoldungufi ta Simón? Fei Simón, ¿chumi?
11 Pedro nehuen mu feipifi ta Simón: “Tami plata engu rüngaltucungeaimi. Raquiduamimi plata mu tami llohual chem ñi eluel ta Chau Dios. Eimi chumconquelaimi tüfachi dungu mu. Nor piuquengelaimi Chau Dios ñi adquiñ meu. Huelulcaimi, feimu nor raquiduamtunge. Llellipufinge ta Chau Jehová ñi rulpacünual tami huesa raquiduam”. Simón cüme huentrungefui, huelu feichi mu huesa raquiduami fei huesa femi. Feimu, feipifi pu apostol: “Iñche tañi duam mu llellipuafimu ta Chau Jehová, femngechi tañi rupanoal chem no rume tamu feipiel” (Hech. 8:20-24).
12. Coilaque religion, ¿huimtulequepei mai pu che ñi cullial tañi elungeal autoridad?
12 Pedro ñi feipin com iñchiñ ngülamtuafeiñmu. Fantepu meu, quiñeque che culliquei ñi doi autoridad nieal religion mu. Tüfa cümelai, ngelai ñi femngeal. Huelu coilaque religion fentren rupa femquei femngechi huesa dungu. 1878 tripantu mu, quiñe falin lifru feipi dullingen mu pu loncolechi religioso, papa ca pingequelu, pu huentru culliqueingün plata ñi elungeal feichi autoridad. Fentren engün yehuelai, ellcalafingün rume tañi femün.
13. ¿Chem dungu ngelai ñi femal pu rüf cristiano? Feipinge quiñeque ejemplo.
13 Pu rüf cristiano turpu culliquelai ñi doi autoridad nieal trahunche mu. Raquiduamnge tüfa: Quiñe cristiano eluquefi falinque regalo ca cüme dunguquefi pu doi autoridadcülelu trahunche mu, fei ñi eluaeteu falinque cüdau. ¿Cümepei mai tüfa? Femlai tati, müna huesa dungu. Ca femngechi cümelayafui, pu doi autoridadcülelu trahunche mu ñi doi saquiafiel ca füreneafiel pu doi plata nielu trahunche mu, fei ñi llohual falinque fillem. Doi mai pu rüf cristiano ‘ñom piuquengeingün’, eluucüleingün Chau Jehová ñi dulliafiel inei ñi nieal autoridad trahunche mu (Luc. 9:48). Chau Jehová ñi troquiñche mu conquelai pu mallma che ayünielu ñi püramyengeal müten (Prov. 25:27).
“¿Rüf ngüneduamimi chem tami papeltumequen?” (Hechos 8:26-40)
14, 15. 1) ¿Ineingefui ti Etiopía huentru ca chumngechi trafyefi Felipe? 2) ¿Chumngechi llohui ñi quimeltueteu Felipe? 3) ¿Pepicaucülepefui mai ñi fautizahual? (Inaduamnge ti quimal dungu).
14 Inaduamaiñ ca dungu. Jehová huercüfi quiñe cüme püllü ñi feipiafiel ta Felipe ñi amual quiñe rüpü mu Jerusalén puulu Gaza huaria mu. ¿Ramtuupelai Felipe chumngelu tañi femal? Quimlaiñ. Huelu pichin mu müten trafyefi quiñe falin huentru Etiopía mapu tuulu, nehuentu papeltumequei ñi feipin Isaías (inaduamnge ti huichulechi dungu: “ Quiñe ‘falin cüdaufe’ Etiopía mu”). Chau Jehová adniefi ta Felipe, fei ramtumefi: “¿Rüf ngüneduamimi chem tami papeltumequen?”. Ti huentru huiñoldungueyu: “Nielan inei tañi quimeltuaeteu, ¿chumngechi ngüneduamafun?” (Hech. 8:26-31).
15 Ti Etiopía huentru feipifi ta Felipe ñi pürayal tañi carretela mu. ¡Müna ayüupelaingu tañi nütramcahual! Isaías feipicünui ñi müleal quiñe huentru “ufisa” reque felelu, huelu fentren tripantu mu quimngequelafui ñi ineingen feichi huentru (Is. 53:1-12). Fei Felipe quimeltufi feichi “ufisa” feita Jesucristo. Feichi pu che reque fautizaulu Pentecostés mu, ti Etiopía huentru inaquefui pu judio ñi huimtun, feimu quimtucufemi chem tañi femafel. Feipi: “¡Tüfa ñi mülen co! ¿Chumngelu fautizangelayafun iñche?”. Feimu müten, Felipe fautizafi (inaduamnge ti huichulechi dungu feipilu: “ Fautizahui ‘cheu ñi mülen co’”). c Chau Jehová adcünufi ta Felipe ñi femal cangelu falin cüdau Asdod huaria mu, üye mu amulei ñi amuldunguchequen tati cümeque dungu (Hech. 8:32-40).
16, 17. Pu cümeque püllü, ¿chumngechi quelluntucuquei amuldungun mu?
16 Iñchiñ femngechi falin cüdau nieiñ Felipe reque, feimu allmalltuqueiñ fentren rupa taiñ amuldungucheal. Quiñeque mu, amuldunguchequeiñ petu taiñ amulen cañpüle, fei pequeiñ fentren che cüme piuquengelu. Iñchiñ taiñ duam mu müten rupalai tüfa, doi mai pu cümeque püllü adniequeiñmu, feimu pu che “caque tuhun nielu, itrofill quehun dunguquelu, caque rume mollfüñ nielu” allcütuai tati cümeque dungu (Apoc. 14:6). Fei tüfa lle tañi feipicünuel Jesús, pu cümeque püllü fei tati ‘pu cosechayalu’ reque tati pu che afaelchi antü meu. Chau Jehová elfalcünufi pu cümeque püllü ñi trahulafiel tati pu che ngüneniealu huenu mu ca famentuafiel “com pu huelulcachequelu ca pu huesa femquelu”, fei ñi conpunoal Chau Dios ngünenietule ta mapu (Mat. 13:37-41). Ca femngechi, pu cümeque püllü trahulmequefingün tati “fütra troquiñche”, “caquelu ufisa” reque felelu, femngechi Jehová tañi troquiñchengeal engün (Apoc. 7:9; Juan 6:44, 65; 10:16).
17 Fentren rupa pequeiñ pu che hue llellipumequelu Chau Dios tañi quelluaeteu. Feimu rüf maneluucüleiñ taiñ quellueteu pu cümeque püllü. Inaduamnge ñi rupan epu testigo amuldunguyaulu quiñe pichi huentru engu. Epe rangi antülu, eluucülefuingu tañi amutual. Huelu ti pichi huentru rume ayüniefui ñi amuldungumeal ti inalechi ruca, fei quisu amui ñi mütrümafiel. Tripai quiñe üllcha domo, fei ti epu testigo dungumefi. Afmatulehueingu feipingelu ñi hue llellipumequen tañi quimeltungeal Biblia, fei ti üllcha domo eluhui ñi femal.
“Huenu Chau, quimlaeyu... huelu füreneen, quelluafen”.
18. ¿Chumngelu mülei taiñ piuquentucual taiñ amuldungun cüdau?
18 Eimi iñchiñ quiñentrür cüdauqueiñ pu cümeque püllü engün. Amuldunguqueiñ tati cümeque dungu huall mapu püle. ¡Müna saquin cüdau nieiñ! Feimu piuquentucuafimi, com tami nehuen mu amuldunguaimi “ti cümeque dungu ta Jesús meu” (Hech. 8:35). Femngechi müten rüf ayüucüleaimi.
a Tüfa ta cangelu Felipe, apostol no tati. Tüfachi lifru, capitulo 5 mu, pu apostol dullifingün “regle huentru cüme nütramyengelu” ñi hudamafiel iyael pu lantu domo griegodunguquelu ca hebreodunguquelu, quiñe tüfa feita Felipe (Hech. 6:1-6).
b Pu hue discipulo elungequefui Chau Dios tañi nehuen fautizaulu engün müten. Femngechi dullingefuingün ñi amual huenu mu, fei ñi ngünenierpual Jesús engu ca sacerdotengeal (2 Cor. 1:21, 22; Apoc. 5:9, 10; 20:6). Huelu tüfachi rupa, Pedro ca Juan mülefui ñi fampuhulelafiel ñi cuhu pu hue discipulo, fei ñi llohual engün Chau Dios tañi nehuen ca pepiluhun ñi femal afmatun dungu.
c Ti Etiopía huentru inaquefui pu judio ñi huimtun, feimu quimniefui fillque dungu feipicünungelu tati Mesías mu. Ca tañi quimeltueteu Felipe, quimürpui Jesús mu femtripai Chau Dios tañi piel. Feimu pepicaucülefui tañi fautizahual.
