CAPITULO 23
“Nütramcaleluhuayiñ chem ñi rupan”
Pablo incañpefi ti rüf dungu ti Sanedrín mu ca illculechi pu che ñi adquiñ meu
Hechos 21:18–23:10 mu entungei
1, 2. Pablo, ¿chumalu amui ta Jerusalén? Ca, ¿chem rupai üyeu?
CA QUIÑE rupa, Pablo mületui Jerusalén mu. Trecayahui ti pichi rupachi rüpü üye mu, apolelu che mu. Fentren tripantu mu, Jerusalén mu trahuquefui pu che ñi poyeafiel Jehová. Epe com che mülelu üyeu mallmauquei tañi huaria mu ca chem tañi rupan. Feimu fentren cristiano huimtulequefuingün ñi poyeafiel Chau Jehová chumngechi ñi feipin Moisés tañi ley, cüdautuqueingün ñi llohual tati hue quimeltun hulquelu Chau Jehová feichi mu. Pablo quimniefui tüfa. Feimu re raquiduamlai müten ñi yelelafiel plata engün, doi mai ayüfui ñi quelluafiel tañi doi cüme hueniyerpuafiel ta Chau Jehová (Hech. 19:21). Quimlu rume ñi cuñihun-ngen, eluucülefui ñi femal tañi cüdau.
2 ¿Chem rupai Pablo Jerusalén mu? Quiñe dungu: quiñeque cristiano allcüntucuingün Pablo ñi huesa dunguyengen, feimu fill raquiduamcülefuingün. Doyeli ti epu dungu: tañi pu caiñe coila dalluntucufingün ta Pablo, fei hulelcangei ca feipingei ñi langümngeal. Fentren huesa dungu rupai Pablo, huelu femngechi elungei ñi incañpeafiel ti rüf dungu. Chumngechi ñi incañpehun Pablo pengeli ñi ñom chengen, tañi nehuen piuquengen ca fente ñi foliluucülen tañi feyentun. Fentren dungu inayentuafuiñ tañi femün mu.
“Püramyefingün ta Chau Ngünechen” (Hechos 21:18-20)
3-5. 1) ¿Inei engün trahuluhui Pablo? Fei, ¿chem nütramcaingün? 2) ¿Chem quimeltun entuafuiñ feichi trahun mu?
3 Pablo puhui Jerusalén mu, fei ca antü trahuluhuingün Pablo tañi pu compañ ca “com pu loncolelu” ti trahunche (Hech. 21:18). Feichi mu, Biblia üitulafi pu apostol, feimu quimlaiñ cheu ñi mülefel, ¿ca mapu mu amuldunguyaupelaingün? Fei, ¿inei loncolefui feiti trahun mu? ¿Jesús tañi peñi peno, Santiago pingelu? Feita mülerquefui Jerusalén mu (Gál. 2:9).
4 Pablo chalifi pu loncolelu, “fei cüme nütramcalelfi Chau Dios ñi femün”, chumngechi ñi quellueteu tañi amuldunguafiel ca tuhun-ngechi pu che (Hech. 21:19). Pu allcütulu, ¿rume ayüupelaingün? Ca femngechi ayüucüleiñ iñchiñ allcütufiel mu ñi cüme tripan ti amuldungun cüdau ca mapu mu (Prov. 25:25).
5 ¿Feichi trahun mu peno Pablo feipifi pu loncolelu ñi cüpalelfiel quellu? Pu loncolelu rume cüme duamcülepelaingün allcütufilu ñi duamtueteu pu peñi ca pu lamngen ca mapu mülelu, Europa püle. Fentecünulu ñi feipin Pablo, pu loncolelu “püramyefingün ta Chau Ngünechen” (Hech. 21:20). Ca femngechi rupaquei famülque mu. Fentren taiñ pu peñi ca pu lamngen contueyu huesaque dungu, huelu rume ayüucülequetuingün ngüneduamfiel mu fente ñi quelluqueteu tañi pu peñi ca pu lamngen, femngechi nehuencontuqueingün.
Fentren che “inaniequefi Moisés ñi ley” (Hechos 21:20, 21)
6. ¿Chem dungu feipingei Pablo ñi rupamequen?
6 Judea mapu mu huesa dunguyengequefui Pablo, feimu pu loncolelu feipifingün Pablo: “Peñi, eimi quimnieimi, fentren [...] judio inayerpufi ta Jesús. Cafei com engün inaniequefi Moisés ñi ley. Huelu allcüntucuingün chem feipimequeimu pu che, tami quimeltumequefiel pu judio mülelu pu catripanche engün, fei tañi inahuenoafiel Moisés ñi ley, circuncidanoafiel tañi pu fotüm ca inanoafiel ti fillque huimtun” (Hech. 21:20, 21). a
7, 8. 1) ¿Chumngelu huelulcalefuingün fentren cristiano Judea mu? 2) Huelulcalefuingün, huelu caiñetulafingün ta Chau Dios. ¿Chumngelu feipiafuiñ tüfa?
7 Doi 20 tripantu deu rupauyefui ñi inangehuenofel Moisés ñi ley, feimu ¿chumngelu fentren cristiano petu ayüniefui ñi inanieafiel? (Col. 2:14). Pu apostol ca pu loncolelu Jerusalén mu huercülelfingün quiñe carta pu trahunche 49 tripantu mu, feichi carta mu feipingün ñi duamfalngehuenon ñi circuncidangeal ca inayafiel Moisés tañi ley pu judiongenolu (Hech. 15:23-29). Huelu feichi carta feipilai pu judio ñi femhuenoal, feimu fentren engün raquiduamquefuingün “iñchiñ pu judiongelu petu mülei taiñ inayafiel ti ley”.
8 Feichi pu judio huelulcalefuingün, huelu caiñetumequelafingün ta Chau Jehová. ¿Chumngelu feipiafuiñ tüfa? Fei engün poyequelafuingün coilaque dios ca ayüquelafuingün rume inanieafiel ñi femquen coilaque religion. Feichi ley ñi cüpa inaniefiel engün huercüquelafui ñi femal huesaque dungu, doi mai, cümeque dungu feipifui, Chau Jehová ta huli feichi ley. Huelu feiti ley hulngefui cuifi mu, feula Chau Jehová elufi pu cristiano hue eldungu, fei duamfalngehuelafui ñi inaniengeal feichi cuifi ley ñi ayühulafiel ta Chau Jehová. Huelu pu cristiano judio tuhun-ngelu cüme adümlafuingün tüfa, duamniefuingün ñi doi maneluhual Chau Jehová tañi troquiñche mu. Feimu mülefui ñi cüme elcünutual tañi raquiduam, fei ñi llohual Chau Jehová tañi hue quimeltun (Jer. 31:31-34; Luc. 22:20). b
Quimfali ñi “rüfngenon tami feipimequengen” (Hechos 21:22-26)
9. ¿Chem quimeltuquefui Pablo, duamfalngepefui mai ñi inangeal ti ley?
9 Tati pu che feipiyauquefui Pablo ñi feipifiel pu judio ñi “circuncidanoafiel tañi pu fotüm ca inanoafiel ti fillque huimtun”. ¿Rüfngepefui mai tüfa? Pablo huercüngei ñi hune amuldungulelafiel pu judiongenolu, feimu feipiquefui ñi duamfalngehuenon tañi inayal engün Moisés tañi ley. Cafei, cüme quimeltuquefui ñi cümenon dicümtucuafiel pu judiongenolu ñi circuncidangeal ca inayal ti ley (Gál. 5:1-7). Huelu re amuldungulafui pu judiongenolu müten, cafei quimeltuquefui ti rüf dungu tati pu judio mülelu fillque huaria mu tañi pemefiel. Feimu llemai, feichi pu judio ca quimeltungequefui Jesús tañi lan mu duamfalngehuelafui ñi inaniengeal ti ley tañi ayühulafiel ta Chau Dios (Rom. 2:28, 29; 3:21-26).
10. Pablo nütramcai chem ñi rupan Moisés tañi ley mu ca tati circuncision dungu, ¿chumngelu feipiafuiñ ñi norngen tañi feipin?
10 Pablo huesa piquelafui feichi pu judio petu inaniefilu quiñeque huimtun ti ley mu tuulu. Por ejemplo, juzgaquelafui pu judio cüdauquenolu fill ürcütun antü ca pu iquelu quiñeque iyael müten (Rom. 14:1-6). Pablo circuncidafi ta Timoteo, huelu tañi cuñiutucuafiel. Pu judio quimniefui ñi griego tuhun-ngen Timoteo tañi chau, feimu ayülafui ñi famentungeal. Huelu Pablo obligaquelafui inei no rume ñi circuncidangeal cam femnoal (Hech. 16:3). Quisuque tati pu che mülefui ñi raquiduamal chem tañi femal, ñi circuncidangeal cam ñi femnoal. Feimu, Pablo feipifi pu Galacia cristiano: “Falilai taiñ circuncidalen cam taiñ circuncidalenon. Ti feyentun mai ta falin-ngei, tüfa ta pengelngei piuqueyehun mu” (Gál. 5:6). Huelu quiñeque che raquiduamle ñi duamfalngen circuncidangeal ñi ayühulafiel ta Chau Dios, cümelai. Dicümtucufile cangelu che ñi inayal Moisés tañi ley, ca cümelai. Femle tüfa, pengelafui tañi maneluuquenon Chau Jehová mu.
11. Pu loncolelu, ¿chem ngülamtufingün ta Pablo ñi femal? Huelu, ¿chem dungu quimnieiñ ñi femnon Pablo? (Inaduamnge ti quimal dungu).
11 Pu judio allcüntuculu ñi huesa dunguyengen ta Pablo fill raquiduamcülefuingün, feimu pu loncolelu ngülamtufingün ta Pablo chem tañi femal. Mülerquefui 4 huentru feipicünufilu ta Chau Dios ñi femal quiñe falin dungu, huelu petu mülefui ñi huechunenturpual. Fei pu loncolelu ngülamtufingün ta Pablo ñi yeafiel feichi pu huentru “tamün liftuhual chumngechi ñi feipin Moisés ñi ley” pifingün. Ca feipingün: “Eimi culliaimi chem ñi duamnieel engün, fei cüme cupilcünuai engün tañi lonco. Feimu com pu che quimai tami cüme femquen ca tami inaquefiel Moisés ñi ley. Fei quimai engün tañi rüfngenon tami feipimequengen” (Hech. 21:23, 24). c
12. Pablo, ¿chumngechi pengeli ñi eluucülen tañi adnieaeteu pu loncolelu?
12 Pablo feipilai “iñche chem huesa dungu rume femlan, feichi pu cristiano judio tuhun-ngelu mai petu ayünieingün inayal Moisés tañi ley, huelu duamfalngelai”, feipiafui, huelu feipilai Pablo. Doi mai, eluhui ñi femal tañi feipieteu pu loncolelu, tañi ngülam chaftuquelafui Chau Dios ñi feipin. Pablo feipifui: “Mülelu iñche tati inaniefilu ti ley engün, ca inaniefilu reque femcünuuquen, femngechi ñi quelluafiel tati pu inaniefilu ti ley” (1 Cor. 9:20). Feichi rupa, Pablo femi tañi ngülamtueteu pu loncolelu, fei “inaniefilu ti ley” femcünuhui. Tañi cüme femün Pablo quimeltueiñmu taiñ ca femngechi eluucüleal taiñ adnieaeteu pu loncolelu. Ca raquiduam nieliyiñ rume, feipifeipilayaiñ ñi femngeal taiñ ayünieel (Heb. 13:17).
Pablo reque, ¿eluucülepeiñ mai taiñ cüme llohual taiñ ngülamtungequen chaftunofile Chau Dios tañi feipin?
“¡Ngelai tañi mongeleal!” (Hechos 21:27–22:30)
13. 1) Quiñeque judio, ¿chumngelu illculcafingün tati pu che Chau Dios tañi ruca mu? 2) ¿Chem rupai, chumngechi montui Pablo?
13 Pichilehuefui ñi huechunenturpual tañi eldungu feichi 4 huentru, fei Pablo Chau Jehová ñi ruca mu mülefui. Fei huesa dungu rupai. Pu judio Asia mu tuulu coila dalluntucufingün ta Pablo “cüpalfi quiñeque judiongenolu Chau Dios tañi ruca mu” piquefuingün, femngechi illculcafingün tati pu che ca hulelcafingün ta Pablo. Catrütunoeliyu ti hunen loncolechi soltau, langümngeafui. Feimu, presungei Pablo. Raquiduamlafui rume, doi 4 tripantu ñi presuleal. Presulelu rume, petu cuñihun-ngefui ti dungu. Ti hunen loncolechi soltau ramtufi pu judio chumngelu ñi hulelcafiel engün ta Pablo, huelu huaqueñcülefuingün ca culpatufingün ta Pablo. Fill pimequelu engün, ti hunen loncolechi soltau quimlai chem tañi feipimequen. Fei quiñeque soltau huitrañpüramfingün ta Pablo, fei yefingün cheu tañi presuleal. Epe puulu engün, Pablo feipifi tati hunen loncolechi soltau: “Llellipueyu, eluen ñi dungulelafiel ti pu che” (Hech. 21:39). Elungelu ñi dungual, llicaquenon mu Pablo incañpehui tañi feyentun meu.
14, 15. 1) Pablo, ¿chem feipifi tati pu judio? 2) Ti hunen loncolechi soltau, ¿chumi ñi quimal chumngelu ñi illculen pu judio?
14 Pablo feipi: “Allcütumuchi. Nütramcaleluhuayiñ chem ñi rupan” (Hech. 22:1). Allcütulu tati pu che hebreo ñi dungumequen, tüngduamingün. Feimeu, Pablo quimeleleyu engün chumngelu ñi cristianongerpun. Cüme feipifi engün quiñeque dungu tañi rupan, fei ayüfule engün, ngüneduamafui ñi rüfngen. Fentren che quimniefui ta Gamaliel, fei feipi feiti adümuhun huentru ñi quimeltueteu. Cafei quiñeque che tañi allcütueteu quimniepelaingün Pablo ñi caiñetufiel pu cristiano. Amulelu Pablo ta Damasco, Cristo huiñomongetulu peufaluhui ca nütramcaeyu. Pu compañfilu ta Pablo peingün quiñe alof pelon ca allcüingün quiñe dungun, huelu quimlaingün chem ñi feipin (Biblia de estudio huincadungun mu mülei quiñe nota Hechos 9:7 ca 22:9 mu, pefinge). Pefiel mu feichi dungu, Pablo pelohuelai. Feimu, tañi pu compañ nüfingün Pablo ñi cuhu tañi yeafiel ta Damasco. Üye püle, fentren judio quimniefui ta Ananías, feiti huentru tremoltufi ta Pablo ñi pelotual.
15 Pablo huiñotulu ta Jerusalén, Jesús peufaluhueyu Chau Dios tañi ruca mu. Pu judio allcülu tüfa rume illcuingün, fei huiraringün: “¡Langümngepe tüfachi huentru! ¡Ngelai tañi mongeleal!” (Hech. 22:22). Ñi langümngenoal Pablo, ti hunen loncolechi soltau feipi ñi presuntucungeal. Huelu ti soltau ayüfui ñi quimal chumngelu fente illculefui pu judio, feimu feipi ñi huimacangeal ca ramtucadungungeal Pablo. Fei petu ñi huimacangenon, Pablo feipi tañi Roma chengen, femngechi incañpehui Roma tañi ley mu. Ca femngechi, famülque mu, inchiñ pu testigo incañpeuqueiñ taiñ feyentun ley dungu mu (inaduamnge ti huichulechi dungu: “ Pu Roma che ca tañi ley”. Ca inaduamnge tati feipilu: “ Incaquefiyiñ ti cümeque dungu tribunal mu”). Quimlu ñi Roma chengen Pablo, ti hunen loncolechi soltau raquiduami ca dungu ñi inaduamafiel chem ñi rupamequen. Fei trahulfi ti Sanedrín, tati doicülechi tribunal ñi nieel pu judio, fei ñi ramtucadungungeal Pablo.
“Iñche ta fariseo” (Hechos 23:1-10)
16, 17. 1) Pablo cüpa dungufilu Sanedrín, ¿chem rupai? 2) ¿Chumngechi pengeli Pablo tañi ñom chengen?
16 Tati Sanedrín ñi adquiñ mu Pablo incañpehui, feipi: “Pu peñi, fantepu mu lif cüme raquiduam meu miyauquen Chau Ngünechen ñi adquiñ mu” (Hech. 23:1). Huelu “ti hunen lonco sacerdote Ananías allcülu tüfachi dungu, feipifi tañi pu afcadinieteu ñi cultraftucuafiel ñi hun ta Pablo”, fei ca chem pepi feipilai rume (Hech. 23:2). ¡Müna huesa femngei Pablo! Ti hunen loncolechi sacerdote coilatufe troquifi, allcütulafi, juzgafi müten. Feimu llemai Pablo huiñoldungueyu: “Cüme piuquefaluuqueimi. Eimi ta cultraftucuaimu Chau Ngünechen. Anücünuhuimi tami juiciantucuafiel ta iñche, chumngechi feipi Moisés ñi ley. Huelu feipimi ñi cultraftucungeal ta iñche, femngechi quiñepülecünufimi ti ley” (Hech. 23:3).
17 Quiñeque pu allcütulu rume illcuingün, huelu illcutulafingün ti hunen lonco sacerdote, doi mai illcutufingün Pablo chumngechi tañi feipin. Feimu feipifingün: “¿Huesa pimequefimi am ti hunen lonco sacerdote ñi elcünuel Chau Ngünechen?”. Pablo pengeli tañi ñom chengen ca tañi yamniefiel Moisés tañi ley, feipi: “Pu peñi, ¿ti hunen lonco sacerdote ama? Iñche quimlafun. Chau Ngünechen ñi huirintucuel feipilei: ‘Inei rume loncolele tami pu che meu, illamcadungulayafimi’” (Hech. 23:4, 5; Éx. 22:28). d Pablo raquiduami ca dungu tañi incañpehual. Quimniefui Sanedrín mu ñi coneltulen fariseo ca saduceo, feimu feipi: “Pu peñi, iñche ta fariseo, fariseo tuhun-ngen. Maneluuquen ñi huiñomongetual pu layelu, feimu juiciantucungen fachantü” (Hech. 23:6).
Pablo reque, quintuqueiñ chem dungu mu trürcülei taiñ raquiduam caquelu che mu.
18. ¿Chumngelu feipi Pablo “iñche ta fariseo”? Ca, ¿chumngechi inayentuafuiñ amuldungun mu?
18 Pablo tañi familia fariseongefuingün, feimu feipi: “Iñche ta fariseo”. e Huelu pu fariseo feyentuquefuingün lan pu cümeque che amulequefui tañi mongen cangelu cuerpo mu, ca Pablo feyentuquefui ñi huiñomongetual pu che chumngechi ñi quimeltuel Jesús. Fei, ¿chumngelu cai Pablo feipi tañi fariseongen? (Juan 5:25-29). Quiñe dungu mu trürcülefui Pablo ca pu fariseo ñi raquiduam, lale rume pu che, huiñomongetuafui. Huelu pu saduceo caiñetuquefui feichi feyentun. Amuldunguyahun mu iñchiñ, ¿chumngechi inayentuafuiñ tüfa ñi femün Pablo? Nütramcaliyiñ caquelu che nielu tañi religion, quintuaiñ chem dungu mu trürcülei taiñ raquiduam. Por ejemplo, iñchiñ quimürpufiyiñ ta Chau Dios Biblia mu, feita feyentuqueiñ. Caquelu che feyentuquei quisuque engün tañi dios, huelu fei engün ca iñchiñ feyentuqueiñ ñi mülen ta Chau Dios.
19. ¿Chumngelu notucadunguhui ti Sanedrín?
19 Tañi feipin mu Pablo, notucadunguhuingün com ti Sanedrín. Biblia feipi: “Huaqueñi ñi huirarün ti pu che. Fei huitrapürai quiñeque huentru coneltulelu pu fariseo ñi troquiñche. Tüfa engün quimeltuquei Moisés ñi ley, illculen feipi engün: ‘Peñmalafiyiñ chem huesa dungu no rume tüfachi huentru. ¿Dungueyu quiñe cüme püllü pemai?’” (Hech. 23:9). Pu saduceo feyentuquelafuingün chem püllü no rume, feimu rume illcuingün feipingelu Pablo ñi dungueteu quiñe püllü (inaduamnge ti huichulechi dungu “ Pu saduceo ca pu fariseo”). Fente notucadunguhuingün, ti hunen loncolechi soltau mülefui ñi ca huiño montulafiel (Hech. 23:10). Huelu Pablo petu mülefui ñi cuñiutucuhual. Fei, ¿chumi? Cüpalechi capitulo mu peafiyiñ.
a Fente ñi mülen cristiano judio tuhun-ngelu, feimu ¿mülepelafui fentren trahunche huichuque trahuluulu pu peñi ca pu lamngen ñi ruca mu?
b Rupalu quiñeque tripantu, Pablo cüme huirintuculelfi pu hebreo ñi doi cümen tati hue eldungu Chau Dios mu cüpalu trürümngefule Moisés tañi ley mu. Fente cüme quimeltui tüfa Pablo, quellufi pu cristiano judio tuhun-ngelu ñi incañpehual huesa pieteu mu caquelu judio. Cafei, quellupelafi pu cristiano petu ayüniefulu inayal Moisés tañi ley, femngechi doi maneluhuingün Chau Jehová mu (Heb. 8:7-13).
c Quiñeque adümuhunche feipiquei “feichi 4 huentru feipicünufingün ta Chau Dios ñi nazareongeal” (Núm. 6:1-21). Pu che inaquefulu Moisés tañi ley femquefuingün femngechi eldungu, huelu feichi mu duamfalngehuelafui ñi inangeal feichi ley. Feingefulu rume, Pablo raquiduampelai “huesa dungu no ñi huechunenturpual tañi feipicünufiel ta Chau Dios. Ca femngechi, huesa dungu no ñi compañafiel Chau Jehová tañi ruca mu ca cullial chem tañi duamnieel engün”. Rüf quimlaiñ chem eldungucünuingün feichi 4 huentru. Huelu feipicünule engün ñi chalintuculelafiel quiñe culliñ ta Chau Jehová, chumngechi ñi femquefel quiñeque nazareo, Pablo quelluntuculayafui. Jesucristo deu hulcünui tañi mongen ñi montulcheal, fei caquelu chalintucun falilai. Cüme quimlaiñ com ñi femün ta Pablo, huelu maneluuqueiñ ñi femnon chem dungu no rume cümenolu troquifile tañi raquiduam.
d Pablo, ¿chumngelu quimtuculafi ti hunen loncolechi sacerdote? Quimlaiñ, ¿nehue cüme pelohuelai chi?, femngechi feipiquei quiñeque adümuhunche. Cafei fentren tripantu mülelafui Jerusalén mu, ¿feimu peno quimlafui ñi ineingen ti hunen lonco sacerdote feichi mu? Ca fentren che mülefui, ¿feimu peno quimtuculai inei feipi ñi cultrafngeal?
e Trahuluulu pu apostol ca pu loncolelu 49 tripantu mu ñi inaduamafiel chem tañi femafel pu judiongenolu, ñi inayal cam inanoal Moisés tañi ley, Biblia feipi ñi trahuluhun quiñeque cristiano “inaquefulu pu fariseo ñi quimeltun” (Hech. 15:5). Huelu, ¿Tañi fariseongefel mu peno, petu fariseo troquingequefuingün?
