Saquin pu peñi ca pu lamngen:

Piuqueyeniefiyiñ Chau Jehová, feimu piuqueyeniefiyiñ tañi Dungu, tati Biblia. Maneluucüleiñ, Biblia ñi feipin rüfngei, manelfalngei tañi ngülam, ca pengelqueiñmu fente taiñ piuqueyenieteu Chau Jehová (Salmo 119:105; Lucas 1:3; 1 Juan 4:19). Rume ayünieiñ quimeltuafiel pu che tüfachi falinque dungu Biblia mu mülelu. Feimu rume ayüucüleiñ tamün nieal tüfachi lifru feipilu: Falinque rupan ca quimeltun entungelu Biblia mu. Pichi feipihuaiñ ñi chumcünungen tüfachi lifru.

Tüfachi lifru deumangei ñi quelluafiel pu pichiqueche. Huelu ca femngechi quelluafui pu füchaqueche ayünielu doi quimafiel ta Biblia. Chau Dios eli tati Biblia ñi quelluafiel com pu che, feimu itrofill che cümelcangeafui ngüneduamle tañi quimeltun, femngechi rüf ayüucüleafui.

Biblia mu peafuiñ fentren dungu ñi rupan, ca tüfachi lifru mu cüme elcünungei chumngechi ñi rupan cuifi mu, femngechi cüdaungelayai ñi inanieafiel ca doi adümfalngeai.

Huelu tüfachi lifru re nütramcaquelaeiñmu müten chem ñi rupan. Doi mai, tañi huirintucun ca tañi ayüfalngechi dibujo quelluaiñmu doi cüme raquiduamafiel chem ñi rupan pu che cuifi mu, ca ñi chum duamcülen.

Tüfachi lifru cüme quimfalcünuiñmu tati Biblia epeu lifru no tati, doi mai feipiqueiñmu ñi rüf rupan tati pu che femquelu Chau Dios ñi ayüqueel ca pu femquenolu. Cafei quelluaiñmu entual falinque quimeltun tañi femün mu feichi pu che (Romanos 15:4; 1 Corintios 10:6). Tüfachi lifru hudamngei 14 troquiñ mu. Ellaconlu caque quiñeque troquiñ huiriconcülei falinque quimeltun ñi ngüneduamngeal feichi troquiñ mu.

 Pu chau ca ñuque ca pichiqueche eimün quiñentrür papeltuafuimün quiñe quimeltun, fei ngüneduamafuimün fillque dibujo. Fei hula papeltuafuimün ti texto cheu ñi entungen ti quimeltun. Quelluafimün tamün pichiqueche ñi cüme adümürpual chumngechi nüucülei ti texto ca fillque quimeltun. Ca femngechi quellungeafui pu füchaqueche quimquenolu Biblia ñi dungu.

Quellupe tüfachi lifru com pu che cüme piuquengelu, huechengefule cam doi niefule ta tripantu, fei ñi quimürpual Chau Dios tañi Dungu ca inayal tañi cümeque ngülam. Femngechi com engün poyeafuingün ta Chau Jehová ca conelturpuafuingün tañi saquin familia mu.