FEY TÜFA Jesu müley ti Olifu wingkul mew. Tati meli wentru müleyelu engün fey tañi pu apostol Andre, Pedro, Santiaw ka Juan pingey engün. Feytichi ruka mülelu tiye püle, feyta Ngünechen ñi ngillatuwe ruka Jerusalen waria mew.

Dew rupay epu antü konpulu Jesu Jerusalen waria mew ñi angkadpüralen (pürakawelli) kiñe furiku (burro) mu. Marte antü ngey. Wünetu mu feychi antü Jesu mülepukey ti ngillatuwe ruka mu. Üye mew tati pu saserdote ayüfuy (küpa) ñi nüafiel Jesu ñi langümafiel. Welu llükayngün, tati pu che am ayükefilu ta Jesu.

Jesu feypifi tati pu longkolechi religioso: ‘¡Filu ka filu ñi pu choyün (llegün) reke feleymün!’ Fey mew feypifi Ngünechen ñi kastigayaetew kom wedake dungu ñi femken engün. Fey wüla, Jesu pürapuy ti Olifu wingkul mew, ka fey mew tüfachi meli apostol llituyngün ñi ramtuafiel Jesu. ¿Kimimi chem ramtuyngün?

Tati pu apostol ramtufingün küpalechi dungu mu. Kimnieyngün ta Jesu ñi apümafiel kom wedake dungu ñi femkeel Mapu mu. Welu küpa kimi engün chumül ñi rupayal. ¿Chumül ka küpayay Jesu ñi ngünenieal Rey reke?

Jesu kimi tañi pu inanieetew mülelu Mapu mu ñi penoafiel kidu ka küpale. Jesu müleay wenu mapu mu, fey mew pelayafingün üye mew. Feymu lle, Jesu feypifi ñi pu apostol kiñeke dungu ñi rupamekeal tüfachi Mapu mew, kidu ngüneniealu wenu mapu mu. ¿Chuchi am kiñeke dungu tüfa?

Jesu feypi ta müleay fütrake awkan (weychan), müleay fentren kutran-ngechi che, ka ngüñün dungu, ka müleay fentren che femmekeayngün rume (mütre) wedake dungu, ka müleay fütrake nüyün. Ka feypi wüldungunieay kom Mapu püle tati kümeke dungu Ngünechen ñi reyno mu. ¿Pefiyiñ kom tüfachi dungu rupameken tüfachi antü mu? ¡Fey llemay! Feymu lle, rüf maneluwafuyiñ ta Jesu ñi ngünenieel wenu mapu mew. Pichin mu apümay kom wedake dungu Mapu mu.