¡ADKINTUFINGE rume küdawmekeyngün tüfa mu! Tati pu Israel che dewmayngün fütrake kura malal Jerusalen mu. Nafukodonosor apümfilu Jerusalen, trafokafilu ti malal ka lüpümfi wülngiñ (konpuwe) waria mu, dew rupay pataka kechu mari epu tripantu feychi antü mu. Tati pu Israel che wiñotulu ta Babilonia mew, witranpüramlayngün tati kura malal.

Kom feychi pu tripantu mülenolu kura malal, ¿kimimi chem duam nieyngün? Küme duamkülelayngün. Küdawtulayafuyngün ñi pu kayñe ñi lefkontuaetew engün. Welu fey wüla pefiyiñ tüfachi wentru, Neemia pingelu kellumekefi tati pu che ñi wiño dewmayal tati malal mülelu Jerusalen. ¿Eymi kimimi iney ngen tüfachi wentru Neemia?

Neemia kiñe Israel che küpalu tati Susa pingechi waria, Mardokeo ka Ester ñi mülemum. Tüfa küdawkey ti rey ñi ülmen ruka mu, fey mew küme weni ngekefuyngün chi Mardokeo ka Ester engu. Welu tati Biblia feypilay ta Neemia tañi küdawelkefiel Ester tañi füta, Asuero ti rey. Küdawi inalechi rey, Artajerje pingelu.

Tukulpafinge, Artajerje küme rey ngelu ñi elufiel ta Esdra kom feychi plata ñi yeafiel ta Jerusalen, ka ñi kümelngetual Jewba ñi ngillatuwe ruka. Welu Esdra witranpüramlay ti malal trananaglu mülelu ti waria mu. Peafiyiñ chumngechi Neemia femi tüfa.

Dew rupay mari küla tripantu, Artajerje ñi elufiel ta Esdra ti plata tañi küme elael tati ngillatuwe ruka. Fewla Neemia wünen nüfül kopakelu ta rey mew. Kidu wüne pichi (püchü) putukey (pütokokey) ñi nienoal üñfitun (feneno) chi pulku, fey wüla elukefi ñi pütokoal chi rey. Kiñe doy falin-ngechi küdaw.

Fey mew, kiñe antü Anani, Neemia ñi peñi, ka kakelu pu wentru, küpayngün Israel mapu mu ñi pemeafiel Neemia. Feypifingün tati pu Israel che nieyngün wedake dungu, ka tati malal Jerusalen mu petu tranaley. Neemia rume weñangküy, fey ngillatufi Jewba tüfa mu.

Kiñe antü ti rey kangentuy Neemia ñi weñangkülen, fey ramtufi: ‘¿Chumngelu (chemu) weñangküleymi?’ Neemia feypieyew ñi weda felen Jerusalen, ka malal ñi tranalen. ‘¿Chem duam nieymi?’ ramtueyew ti rey.

‘Eluñmaen tañi amual Jerusalen mu,’ pieyew Neemia, ‘iñche pepi tañi wiño dewmatuael tati kura malal.’ Artajerje rume küme piwkengey. ‘Amunge’ pieyew, ka kelluntükufi ñi yelmengeal mamüll ñi dewmangeal ti küdaw. Neemia pichiñmalu ñi pun Jerusalen, feypifi tati pu che ñi rakiduam. Fey ayüyngün ñi feypin, ka feypi engün: ‘Dewmayiñ tüfachi küdaw.’

Tati pu Israel che ñi pu kayñe pefilu ñi witranpüramniel tati malal, feypingün: ‘Pürayiñ, langümafiyiñ, katrütuñmayafiyiñ ñi küdaw engün.’ Kimlu tüfa, Neemia elufi tati pu küdawfe fütrake kuchillo, ka tati wayki, ka feypi: ‘Llükakenofilmün. Kewañpeaymün tamün pu peñi, pu yall, pu domo, ka tamün ruka mu.’

Welu tati pu che llükakelayngün. Pepikawküleyngün ñi fütrake kuchillo ka wayki, fill pun (trafia) ka fill antü, fey amuley ñi dewmanieel ñi küdaw engün. Feymu lle, kechu mari epu antü müten, dewi tati malal. Fewla müley tüngün ti waria mu. Neemia ka Esdra kimeltukefingu Ngünechen ñi ley dungu, ka tati pu che ayüwküley engün.

Welu tati pu Israel che ñi dungu petu kümelkalay kuyfi chumlekefuy petu ñi presukünunon engün Babilonia mew. Ti rey Persia ngüneniey, ka tati pu che müley ñi serfiaetew. Welu Jewba feypikünuy tañi werküafiel kiñe we rey, ka tüfa ñi küpalal tüngün ti pu che. ¿Iney (iñi) am tüfa? ¿Chumngechi küpalay tüngün ti Mapu mu? Rupay ella meli pataka kechu mari tripantu, petu ñi doy kimngenon tüfachi dungu mu. Fey mu müley kiñe doy falin-ngechi choyüm kiñe we püñeñ. Welu rupay tüfa fewla kangelu nütram.