Choyüngelu iñche, mülequefun quiñe pichi granja niefulu tañi chau, püllelelu Galicia mu, norte de España mu. Nien regle lamngen. Taiñ familia iñchiñ rume ayüucüleiñ. Feichi antü mu España mapu, huimtulefuingün tati pu familia ñi huercüafiel quiñe yall ca quiñe püñeñ tañi amual ta seminario ca convento mu. Tañi familia mu, iñche amun ca epu lamngen.

13 tripantu nielu iñche, amun ta quiñe convento Madrid huaria mu, cheu mülequefui tañi domo lamngen. Convento mu poyechequelafuingün. Catrüntucueiñmu taiñ nienoal hueni. Pepi femquelafuiñ chem taiñ ayüqueel. Pulihuen mu trahuluuqueiñ capilla mu taiñ raquiduamal, huelu iñche hueluraquiduamcülequen. Fei hula ülcantuquefuiñ fillque catolico ülcantun ca amuqueiñ misa mu latin quehun mu. ¡Turpu adümlafiñ! Camapulelu Chau Dios troquihun. Ñücüfcülequen, catrüntucüngequeiñ taiñ dungunoal. Tañi lamngen iñchiu puulu, re feipiafuyu müten: “¡Ave María purísima!”. Pu monja eluqueiñmu taiñ dungual deu yafütulu iñchiñ, rangi hora müten. Rume cangetui tañi mongen. Ayüucülequefun cuifi tañi ruca, tañi familia iñchiñ. Huelu mülepulu convento mu, quisulelu troquiuquefun ca ngümaquefun.

Turpu püllelelu Chau Dios troquiuquelan. Femngechi femle rume, 17 tripantu nielu iñche, feipin quiñe voto tañi monja ngerpual. Femngechi femün caquelu ayüquelu am ñi femal iñche. Huelu pürüm raquiduamün: “¿Rüf ayüniepen mai ñi monja ngeal?”. Tati pu monja feipiquefui tati pu femngechi raquiduamquelu amuai ta cütral mapu. Femfule rume, iñche epu raquiduamcülequefun. Quimniefun Jesús mülepalu Mapu mu huichulequelai, quisulequelai. Doi mai quimeltuchequei ca quellufi tati pu che (Mateo 4:⁠23-25). Nielu 20 tripantu, ayühuelan ñi monja ngeal. Rume afmatulehuen tati madre superiora ñi feipieteu: “Epu raquiduamcülefulmi, doi cümeafui tami amutual”. Llicalepelafui ñi hueluraquiduamelafiel caquelu pu monja. Feimu elcünufiñ chi convento. Amutun.

Huiñotun tañi ruca, cüme lloutueneu tañi chau, tañi ñuque. Huelu ngenolu am cüdau tañi huaria mu, amun ta Alemania mapu mu. Feichi mapu mu mülefui quiñe tañi huentru lamngen, fei coneltulefui quiñe trahun comunista. Caquelu fillque español che ca coneltulefuingün. Tüfachi pu comunista incañpefi tati pu cüdaufe ca raquiduamquefui trür falin-ngei quiñe huentru ca quiñe domo. Feimu comunista ngerpun ca fütangen quiñe huentru coneltulefui feichi trahun comunista mu. Iñche raquiduamquefun, cüme femün troquiuquefun. Hulquen papel ta pu che propaganda comunista mu ca coneltulefun fillque protesta.

Rupachi antü ngañhuadcülen. Tati pu comunista quimeltuqueingün quiñe dungu, huelu femqueingün caquelu dungu. 1971 tripantu mu, quiñeque pu hueche coneltulequefui iñchiñ taiñ trahun mu lüpümtucufingün tati consulado español, Fráncfort huaria mu mülelu. Feimu femfingün ñi protestayal ñi mülen fentren norngenochi injusticia España mu. Iñche ayülafiñ ñi femngechi protestayal, feimu raquiduamcülehuen.

Choyülu tañi hunen püñeñ, “amuhuelayan tati trahun comunista” pifiñ tañi huentru. Rume quisulen troquiuquefun. Pemelaeneu tañi cuifique hueni iñche ca tañi püñeñ hue choyün. Ramtuuquen chumal tañi mongen mu, ¿ngünam chaftuafiyiñ ti huesaque dungu?

1976 tripantu mu, epu Dunguquelu Inei Ngen Jehová español che acui tañi ruca mu. Elcünueneu fillque publicacion. Epu rupa aculu tañi ruca mu, ramtuquefiñ cutrancahun mu, norngenochi dungu mu ca ti huesaque dungu mu. Afmatulehuen ñi huiñoldungun Biblia mu tañi ramtun. Müchai müten eluhun tañi papeltuafiel Biblia.

Ellaconlu, iñche ayüfiñ ñi doi quimal Biblia mu müten. Tañi füta iñchiu amuyu pu testigo ñi trahun mu, fei hula com caletui chi dungu. Feichi mu nieyu epu püñeñ. Pu Dunguquelu Inei Ngen Jehová yemequeiñmu taiñ amual trahun mu, ca quelluqueiñmu ñi cuidayafiel tayu püñeñ trahun mu. Rume ayüquefiñ chumngen engün pu Dunguquelu Inei Ngen Jehová.

Femle rume, iñche müte feyentuquelafun chi religion. Eluhun ñi pemeafiel tañi familia España mapu mu. Tañi malle sacerdotengefui, ayülafui tañi papeltun Biblia, feimu ayüfui tañi elcünual. Huelu pu Dunguquelu Inei Ngen Jehová feichi lof mu mülelu, rume quelluqueneu. Huiñoldunguqueingün tañi ramtun Biblia mu, chumngechi ñi quimeltungeel Alemania mu. Huiñotun ta Alemania mapu mu, fei huiño papeltun Biblia. Tañi füta amulehuelai tañi papeltun Biblia. Huelu iñche amulen tañi papeltun Biblia müten. 1978 tripantu mu, fautizahun tañi testigo ngeal.

Tañi quimal chem rüf quimeltuquei Biblia quellueneu tañi quimal chem chumal tañi mongen mu. 1 Pedro 3:⁠1-4 ngülamtufi ta pu domo ñi eluucüleal tañi ngünenieaeteu tañi füta, ñi rume yamnieafiel ca ñi nieal cüme raquiduam ca ñochi piuquengeal. Tüfa, Chau Ngünechen rume falintuquefi. Tüfachi ngülam quellueneu tañi cüme domo ngeal ca cüme ñuque ngeal.

35 tripantu rupai tañi fautizahun. Rume ayüucülen tañi poyequefiel Chau Dios ca tañi concülen quisu tañi pu che mu. Nien 5 püñeñ, 4 serfiquefilu ta Jehová. Rume ayüucülen.