1, 2. 1) Jewba, ¿chumngechi dungukefi tati pu che? 2) ¿Chem inaduamaiñ tüfachi chillkatun mu?

JEWBA müna ayükey taiñ dunguaetew. Kuyfi, ñi kimeltual tañi rakiduam, Jewba adkünufi pu pelon wentru, pu kümeke püllü, ka tañi Fotüm Jesus (Amós 3:7; Gal. 3:19; Apok. 1:1). Famülke mu, Jewba dungukeeiñmu Biblia mew. Elkünuy tüfa taiñ kimürpual ñi rakiduam ka chumngelu femkey fillke dungu.

² Mülepalu Jesus Mapu mu, küla rupa Jewba dunguy wenu mu. Ngüneduamaiñ chem ñi feypin Jewba feychi mu, chem kimeltuafeiñmu tañi dungun ka chem chumafuiñ taiñ kümelkayaetew.

3. 1) Ñi feypin Marku 1:9-11, ¿chem feypi Jewba fawtisawlu ta Jesus? 2) Tañi feypin, ¿chem küla falin dungu pengelelkeeiñmu?

³ (Papeltunge Marku 1:9-11). Feytachi texto pengeli ti wünen rupa ñi dunguel Jewba wenu mu. Jewba feypi: “Eymi ta iñche ñi piwkeyen Fotüm, iñche tañi manelnieel”. Allkütulu ñi piwkeyenieetew ka manelnieetew tañi Chaw, nengümuwpelay tañi piwke Jesus. Ñi feypin ta Jewba pengelelkeeiñmu küla falin dungu Jesus mu. Wüne, Jesus Ngünechen ñi Fotümngey. Epu, Jewba müna piwkeyeniefi tañi Fotüm. Ka küla, Chaw Jewba manelniefi ta Jesus. Doy ngüneduamaiñ tüfachi küla dungu.

4. Dew fawtisawlu Jesus, Jewba ñi Fotümngetuy ka dungu mu, ¿chumngechi kay?

⁴ “Eymi ta iñche ñi [...] Fotüm”. Feypilu tüfa, Jewba pengeli Jesus kidu ñi Fotümngetuy ka dungu mu. ¿Chumngechi  kay? Petu ñi küpanon Mapu mu, Jesus Ngünechen ñi Fotüm ngekefuy. Welu dew fawtisawlu, Jesus dullingey Jewba tañi newen mu, fey nietuy ti maneluwün ñi müleputual wenu mu, femngechi ñi Longko Ülmenkületual ka Longkolechi Saserdotengetual Ngünechen tañi elkünuel (Luka 1:31-33; Eb. 1:8, 9; 2:17). Feymu llemay fawtisawlu Jesus Jewba ta feypieyew: “Eymi ta iñche ñi [...] Fotüm” (Luka 3:22).

5. Jewba pengelkey ñi piwkeyefiel ka sakikefiel ta kakelu, ¿chumngechi inayentuafuiñ?

⁵ “Eymi ta iñche ñi piwkeyen Fotüm”. Jewba pengelkey ñi piwkeyefiel ka sakikefiel ta kakelu che, ka femngechi iñchiñ müley taiñ kintual chumngechi taiñ yafültukucheal (Juan 5:20). Kiñe piwkeyen che pengeleliyiñmu taiñ piwkeyeetew ka sakieliyiñmu taiñ küme femün mu, müna küme duamküleaiñ. Ka femngechi taiñ pu peñi, pu lamngen trawünche mu ka taiñ pu che duamniey ñi piwkeyengeal ka yafültukungeal. Sakifiliyiñ ta kakelu che, kelluafiyiñ engün ñi doy weniyeafiel ta Jewba ka ñi püntütripanoal kidu mu. Doyelchi may, pu chaw ka ñuke müley ñi yafültukuafiel tañi pu familia, ñi piwkeyeniefiel ka sakiafiel engün. Femngechi femle, newenküleay engün.

6. ¿Chumngelu am (chemu) maneluwafuiñ Jesus mu?

⁶ “Iñche tañi manelnieel”. Tüfa pengeli Jewba maneluwkey Jesus ñi femürpual kidu tañi ayükeel. Feymu ka femngechi iñchiñ maneluwafuiñ Jesus mu, kidu femürpuay kom tañi feypikünuel ta Jewba (2 Kor. 1:20). Doy rakiduamliyiñ ñi femün ta Jesus, doy eluwküleaiñ kimürpual kidu mu ka inayafiel ñi femün. Chumngechi ñi maneluwken Jewba tañi Fotüm mu, ka femngechi maneluwkey tañi trokiñche mu, fey ñi doy kimürpuafiel ta Jesus (1 Ped. 2:21).

7. Ñi feypilen Matew 17:1-5, ¿chumül ka wiño dunguy Jewba? ¿Chem feypi?

⁷ (Papeltunge Matew 17:1-5). Kiñe antü “kangerumetuy ñi ad ta Jesus”, feychi mu ka wiño dunguy ta Jewba. Jesus mangelfi Pedro, Santiaw ka Juan ñi kiñentrür amual kiñe alüpürachi wingkul mu. Petu mülelu engün üye mu, peyngün kiñe afmatun dungu. Jesus tañi ange alofi ka tañi takun wilüfi. Fey adentukünungey Moyse ka Elia, pewfaluwingu reke ka nütramkawi Jesus engün kidu tañi layal ka tañi wiñomongetual. Pu küla apostol “rume küpa umawturkefuy engün”, welu dew trepelu pefingün tüfachi afmatun dungu (Luka 9:29-32). Fey kiñe alofkülechi tromü munulpaeyew engün, fey tati tromü mew tripay kiñe dungun, ¡Chaw Dios ñi dungun ürke! Chumngechi ñi femün Jewba fawtisawlu Jesus, fewla ka feypi fente ñi piwkeyefiel, sakifiel tañi Fotüm ka ñi rume manelniefiel, feypi: ‘Fey tüfa iñche tañi sakin Fotüm, iñche tañi manelnieel’. Welu fewla Jewba ka feypi: “Allkütuñmafimün ñi dungu”.

8. Ti afmatun dungu, ¿chumngechi kellufi ta Jesus ka tañi pu disipulu?

⁸ Feytachi afmatun dungu pengelkünuy feychi küme felen ka fütra pepiluwün ñi nietual ta Jesus Longko Ülmenkülele Chaw Dios tañi Ngünenien mu. Rüfkünu llemay, tüfa yafültukufi ka newentukufi ta Jesus ñi chaftual tüfachi wedake dungu: fütra kutrankawün ka ñi weda langümngeal. Ti afmatun dungu ka kellufi pu disipulu ñi doy feyentuleal Chaw Ngünechen mu. Fey doy pepikawküleyngün ñi chaftual wedake dungu ñi kontuaetew ka ñi küme wechunenturpual ñi fütra küdaw engün. Doy 30 tripantu rupalu, Pedro nütramkay tüfachi afmatun dungu mu kangerumetulu ñi ad ta Jesus, feymu kidu küme longkontukuniey tüfachi dungu (2 Ped. 1:16-18).

9. Jesus, ¿chem kümeke ngülam elufi tañi pu inanieetew?

⁹ “Allkütuñmafimün ñi dungu”. Chaw Jewba küme pengelkünuy, kidu ayüniey taiñ allkütuñmayafiel Jesus ñi dungu ka inayafiel. Mülepalu Mapu mu, ¿chem feypi Jesus? ¡Fentren falinke dungu taiñ inayal! Ngüneduamaiñ kiñeke tüfa. Jesus piwkeyenkechi kimeltufi tañi pu inanieetew chumngechi tañi amuldungual Chaw Dios tañi kümeke dungu, ka fentren rupa ngülamtufi tañi trepeluwküleal engün (Mat. 24:42; 28:19, 20). Kafey ngülamtufi tañi yafüluwal ka tañi afeluwnoal ñi femal Chaw Dios tañi ayükeel (Luka 13:24). Jesus ka ngülamtufi tañi pu inanieetew ñi welukonke piwkeyewal, ñi kiñewküleal ka inayal kidu tañi werkün dungu (Juan 15:10, 12, 13). ¡Müna kümeke ngülam elufi Jesus tañi pu inanieetew! Fentren tripantu rupafuy rume, tüfachi kümeke ngülam amuley ñi falin-ngen.

10, 11. ¿Chumngechi pengelafuiñ taiñ allkütukefiel ta Jesus?

¹⁰ Jesus feypi: “Fey kom tati koneltulelu ti rüfngechi dungu mew, fey ta allkütukeenew” (Juan 18:37). ¿Chumngechi pengelkeiñ taiñ allkütukefiel ta Jesus? Inayafiyiñ tüfachi ngülam: ‘Welukonkechi ñochi piwkengeaymün ka wiñoduamuwaymün’ (Kol. 3:13; Luka 17:3, 4). Kafey kom newen mu müley taiñ amuldungual ti kümeke dungu ‘ayünofule rume ta che ñi allkütuael engün’ (2 Tim. 4:2).

¹¹ Jesus ka feypi: “Iñche ñi pu ufisa kimüñmakeenew ñi dungun”, allkütuñmakeeyew llemay (Juan 10:27). Jesus ñi pu inanieetew, ¿chumngechi femkey tüfa? Re allkütukelay müten Jesus ñi feypin, fey chem duam no rume katrütulaeyew ñi inayafiel (Luka 21:34). Doy may doyümkey inayafiel Jesus tañi werkün dungu, tunte küdawngele rume tañi femal. Fentren taiñ pu peñi, pu lamngen kontukeeyew fütra wedake  dungu, kiñeke kayñetungekey, rume pofrengey kam rupakey fütrake nüyün, kürüftuku mawün ka kakelu femngechi dungu. Welu chem weda dungu rupallefule rume, kidu engün eluwkey ñi püntütripanoal Chaw Jewba mu. Kidu engün Jesus ta feypikünueyew: “Tati llowfilu iñche ñi werkün dungu ka müngeltufilu [inakefilu], fey ta kimfali rüf mew ñi piwkeyenieetew. Fey iñche ñi Chaw piwkeyeafi tüfey tañi piwkeyekeetew” (Juan 14:21).

12. ¿Ka chem chumaiñ allkütufiliyiñ ta Jesus?

¹² Allkütufiliyiñ ta Jesus, ¿ka chem chumaiñ? Kelluntukuafiyiñ feychi pu wentru ñi longkokünuel Jewba iñchiñ mu (Eb. 13:17). Chaw Jewba tañi adkünuelchi trokiñche küme elkünutuy fentren dungu rupayechi tripantu. ¿Chem dungu chi? Pepikafi weke kellun taiñ wüldungual ka chumngechi taiñ doy küme nütramkayafiel pu che. Doy küme elkünutuy ti trawün semana mu. Kafey adkünuy chumngechi taiñ doy küme dewmayal, küme elkünutual ka küme adnieal taiñ Trawünwe Ruka. ¡Müna mañumküleiñ kom tüfachi kümeke ngülam taiñ elungeel piwkeyen mu! Inaliyiñ kom taiñ ngülamtukeetew Jewba tañi trokiñche, kidu kümelkayaeiñmu llemay.

13. ¿Chumngechi kümelkakeeiñmu inayal Jesus tañi kimeltun?

¹³ Müna kümelkakeeiñmu inayal Jesus tañi kimeltun. Jesus feypikünufi tañi pu inanieetew ñi füshküduamelafiel engün kidu tañi kimeltun. Jesus feypi: “Fey ta famngechi kansatuaymün. Iñche ñi yuku tamün tukuleluwfiel fanelay yen mew ka küdawngelay tamün eluwfielchi dungu” (Mat. 11:28-30). Ti lifru Matew, Marku, Luka ka Juan nütramkalu Jesus ñi mongen ka tañi amuldungun, ka kom ñi wirikonkülen Biblia mu füshküduamelkeeiñmu, newentukukeeiñmu taiñ poyeafiel ta Jewba ka kellukeeiñmu taiñ kimchengeal (Sal. 19:7; 23:3). Jesus feypi: “¡Ayüwün nieay tüfachi pu che allkütulu Ngünechen tañi dungu, ka inaniefilu!” (Luka 11:28, TNM).

14. Ñi feypin Juan 12:27, 28, ¿chumül ka wiño dunguy Jewba wenu mu?

¹⁴ (Papeltunge Juan 12:27, 28). Ti lifru Juan pengeli ñi ka wiño dungun ta Jewba wenu mu. Pichilewelu tañi layal, Jesus mülerkey Jerusalen mu ñi fiestañmayal ti Paskua. Fey “¡fewla ta rume wesa kutrantupiwkelen!” pi. Fey ngillatufi ta Jewba: “Chaw, kom che püramyepe tami üy”. Fey Jewba  wiñoldungueyew wenu mu, feypi: ‘Kom che dew elufiñ ñi püramyeaetew [iñche tañi üy] ka wiño eluafiñ tañi püramyeaetew engün’.

15. Jewba ñi feypin, ¿chumngelu yafültukufi ka newentukufi ta Jesus?

¹⁵ Jesus kimniey ñi fente falin-ngen püntütripanoal Jewba mu, feymu rume weda kutrantupiwkeley. Jesus ka kimniey ñi awükangeal ka ñi weda langümngeal (Mat. 26:38). Welu doyelchi may, Jesus ayüniey ñi püramyeafiel tañi Chaw ñi üy. Jesus koyla dungun mu dalluntukungey, feymu rume rakiduamküley ñi illamkangeal Jewba kidu tañi lan mu. Feymu lle, Jewba ñi feypin müna yafültukupelafi ta Jesus. Femngechi rüf maneluwürpuy ñi püramyengeal tañi Chaw ñi üy. Ñi feypin ta Jewba ka newentukupelafi ta Jesus ñi chaftual wedake dungu ñi kontuaetew. Feychi mu dungulu ta Jewba, Jesus müten kimürpuy chi tañi dungumekeetew tañi Chaw. Welu Jewba adkünuy ñi wirintukungeal tañi feypin taiñ papeltual kom iñchiñ (Juan 12:29, 30).

16. Kiñeke mu, ¿chumngelu rume rakiduamküleafuiñ ñi illamkangeal Jewba tañi üy?

¹⁶ Jesus reke, iñchiñ rume rakiduamküleafuiñ ñi illamkangeal Chaw Jewba tañi üy. Kayñetungekeiñ chi kam femngekeiñ norngenochi dungu Jesus reke. Kafey taiñ pu kayñe feypikey koylake dungu iñchiñ mu. Feymu rakiduamküleafuiñ fente tañi illamkangeal Jewba tañi üy ka tañi adkünuelchi trokiñche feytachi koylake dungu mu. Rupaliyiñ femngechi dungu mu, müna yafültukuaeiñmu  Jewba ñi feypin mülelu Juan 12:27, 28. Ngelay taiñ fente rakiduamküleal ñi weda dunguyengeal Jewba ka tañi trokiñche. Chaw Jewba rumel püramyeafi tañi üy. Fey tañi Ngünenien mu, apümafi kom ñi weda femfiel Weküfü ka tañi ngünenieel kidu tañi pu nor piwkeyeetew (Sal. 94:22, 23; Is. 65:17). Feymu maneluwafuiñ ‘Ngünechen taiñ eluetewchi küme tüngün yafülnieñmayaeiñmew taiñ piwke ka taiñ rakiduam, iñchiñ am kiñewkülelu ta Cristo Jesus mew’ (Filip. 4:6, 7).

17. Ñi feypilen Isaías 30:21, ¿chumngechi dungukeeiñmu Jewba famülke mu?

¹⁷ Famülke mu Jewba amuley taiñ dungumekeetew. Biblia feypi: “Tamün pilun allküay kiñe dungun tamün furi püle feypilelu: ‘Tüfa tati rüpü. Amumün tüfa püle’. Amulelmün tamün famtripan man püle kam wele püle” (Isaías 30:21). Rüfkünu may, Chaw Jewba dungukelaeiñmu wenu mu. Doy may kidu elkünuy ta Biblia taiñ kimeltuaetew. Kafey Jewba tañi newen mu adniefi ti kim manelfal kona taiñ kimeltuaetew Ngünechen ñi dungu (Luka 12:42, TNM). ¡Müley fentren kimün taiñ fillke papel mu, taiñ peal internet mu, taiñ fillke video ka fillke dungu taiñ allkütual!

18. Jewba ñi feypin, ¿chumngechi kellukeeymu tami doy maneluwal ka tami fütra piwkengeal?

¹⁸ ¡Longkontukuaiñ may Jewba ñi dungufiel ta Jesus mülepalu Mapu mu! Jewba ñi feypin mülelu Biblia mu kelluaeiñmu maneluwal taiñ Wenu Chaw mu, kidu kom küme ngüneduamniey fey apümay kom ñi wedalkael Weküfü ka tañi ngünenieel. Eluwaiñ taiñ küme allkütual Jewba ñi dungu. Femngechi femliyiñ, newenküleaiñ taiñ chaftual chem weda dungu rume fewla ka küpalechi antü mu. Biblia llemay feypikünueiñmu: ‘Feley tamün nieael newen ta kutrankawün mew, femngechi tamün femael Ngünechen tañi ayükeelchi dungu ka femngechi tamün llowael kisu ñi feypikünuelchi dungu’ (Eb. 10:36).