1. ¿Chumquei Jehová tañi pu che fachantü?

BIBLIA feipicünui fentren che eluucüleai tañi inayal Jesús ñi feipin ca ñi serfiafiel Jehová (Sal. 110:3). Tüfa huechutripamequei fachantü. Fill tripantu mu Jehová tañi pu che fentren hora amuldunguqueingün, quisu tañi ayün mu femqueingün tüfachi cüdau. Cafei Jehová tañi pu che huelucontu quelluuqueingün chem tañi duamnieel, yafültucuuqueingün ca quelluuqueingün tañi doi cüme hueniyeafiel Jehová. Cafei tati pu loncolelu ca tati pu quelluquelu, rume pepicauqueingün tañi hulal ñi asignacion trahun mu ca eluuqueingün tañi yafültucuafiel pu peñi ca pu lamngen. ¿Chemu femquei Jehová tañi pu che? Tañi piuqueyefiel mu ta Jehová ca tañi chafche (Mat. 22:37-39).

2. ¿Chumquefui ta Jesús? (Romanos 15:1-3).

² Jesús quisu duamuuquelafui, doi duamtuquefui tati pu che. Iñchiñ cüpa inayentuquefiyiñ ñi femün ta Jesús (papeltunge Romanos 15:1-3). Iñchiñ Jesús reque duamtufiliyiñ tati pu che, rume cümelcayaiñmu. ¿Chumngelu feipiafuiñ? Jesús feipi: “Doi cümei ta hulal ta llohun meu” (Hech. 20:35).

3. ¿Chem peaiñ tüfachi chillcatun mu?

³ Feitachi chillcatun mu peaiñ chumi Jesús ñi quelluafiel ta caquelu che, ca peaiñ chumngechi inayentuafuiñ ta Jesús. Cafei peaiñ chem quelluaiñmu taiñ doi quelluafiel ta caquelu che.

4. ¿Chumngechi pengeli ñi duamtuchequen Jesús?

⁴Jesús quellufi ta caquelu che cansalefulu rume. Raquiduamnge tañi rupan ta Jesús. Quiñe pun Jesús ngillatufi ta Jehová, rupan ngillatulu amui quiñe huincul mu. Fentren che mülepurquei fei mu, ca müleyerquei quiñeque cutran che ca pofre. Rume cansalepelafui Jesús. ¿Chumi ta Jesús? Pefilu cutranpiuqueyefi engün. Re tremoltulafi müten, ca yafültucufi quiñe hueupin mu. Tüfachi hueupin Sermón del Monte pingequei (Luc. 6:12-20).

5. Cansalefulu rume pu ngen familia, ¿chumngechi inayentuafuingün ta Jesús?

⁵Pu ngen familia inayentuafuingün ta Jesús. Raquiduamnge tüfa, quiñe antü ti ngen ruca rume cansalefui acutulu tañi ruca mu. Feichi tarde ti familia deu feipicünuufuingün tañi trür papeltuafiel Biblia. Huelu fente tañi cansalen, ti huentru raquiduamfui ca antü ñi papeltuafiel Biblia engün. ¿Chumi ti ngen ruca? Ngillatufi ta Jehová tañi nehuentucuaeteu. Jehová allcütueyu, fei ti familia trür papeltuingün Biblia feichi antü chumngechi ñi femquen fill semana. Femngechi ñi femün mu ti chau, pu pichiqueche quimürpuingün ñi poyengeal ta Jehová doi falin-ngei chem dungu mu rume.

6. ¿Ca chumngechi pengeli ñi duamtuchequen ta Jesús?

⁶Jesús ayüfulu rume ñi quisuleal, eluhui ñi quelluafiel ta che. Langümngelu tañi cüme hueni, Juan ti Fautizachefe, müna hueñancülepelafui ta Jesús. Fei ti Biblia feipi Jesús quimlu ñi lan Juan ti Fautizachefe, farcu mu amui ca mapu ñi quisuleal (Mat. 14:10-13). ¿Püntünentuufui chi tañi quisu ngümayal? Femquei ta che, huelu Jesús pepi femlafui. Fentren che puhurquefui cheu tañi puhuam ta Jesús. ¿Chumi Jesús? Pefilu tati pu che, inaduamfi tañi duamnien ñi quellungeal engün ca ñi allcütual Chau Jehová ñi dungu. Femngechi quellufi engün ca ‘quimeltufi engün fentren dungu’ (Mar. 6:31-34; Luc. 9:10, 11).

7, 8. Pu loncolelu, ¿chumngechi inayentuquefingün ta Jesús?

 ⁷Pu loncolelu inayentuafuingün ta Jesús. Tati pu loncolelu rume cüdauqueingün, huelu quiñeque mu pequelafiyiñ chumte tañi cüdauquen. Por ejemplo, quiñeque loncolelu quelluquefi pu peñi ca pu lamngen pitalconcülelu. Fei chumtepun rume avisangele engün ñi pitalconcülen quiñe peñi cam quiñe lamngen, quellufemqueingün. Feitachi pu loncolelu famentucünuquefingün quisu tañi dungu ñi quelluafiel tañi pu peñi ca pu lamngen, fei tañi familia engün ca quelluntucuqueyu.

⁸ Tati pu loncolelu ca quelluquei ñi deumangeal Trahunhue Ruca. Ca quelluquefingün tati pu peñi ca pu lamngen rupan mu engün huesaque dungu mu. Huelu femngechi cüdau müten femquelaingün. Ca elcünuqueingün fentren tiempo tañi quimeltuafiel ca yafültucuafiel pu peñi ca pu lamngen. Feimu eimün pu loncolelu, mañumniehuiyiñ tamün cüme cüdauquen mu. Eimün ca tamün familia rume saquifalimün, Jehová cümelcayaimünmu. Huelu pu loncolelu mülei ñi cuñiutucuhual engün. Fentren cüdau niefule engün tati trahunche mu, mülei ñi elcünual tiempo tañi müleal tañi familia engün.

9. ¿Chem mülefui taiñ femal com iñchiñ? (Filipenses 2:4, 5).

⁹ (Papeltunge Filipenses 2:4, 5). Com iñchiñ mülefui taiñ inayentuafiel ta Jesús, fei quiñepülecünuafiyiñ taiñ ayüqueel femngechi taiñ quellucheal. Raquiduamnge tüfa, Jesús elcünui com tañi  nierquefel huenu mu, fei quiñe esclavo reque femcünuupai Mapu mu (Filip. 2:7). Quiñe cüme esclavo ayüquei tañi ayühulafiel tañi ñidol. Iñchiñ Jehová tañi esclavo reque feleiñ, feimu ayüqueiñ taiñ ayühulafiel. Ca ayüqueiñ taiñ doi quelluafiel taiñ pu peñi ca pu lamngen. ¿Chumngechi femafuiñ? Peafiyiñ.

10. ¿Chem ramtuhuafuiñ iñchiñ?

¹⁰Ngüneduamuhuaiñ. Ramtuhuaiñ: “¿Eluucülefun tañi elcünual tiempo ñi quellucheal? Feipingeli tañi pemeafiel quiñe füchalechi peñi cam lamngen ñi ruca mu, ¿chem piafun cai? Feipingeli cai tañi yeafiel quiñe papai trahun mu, ¿ayühunquechi femafun? Ca, ¿eluucülefun tañi quelluntucual ñi liftual cheu ñi femngeal ti fütra trahun? Cam, ¿eluucülefun tañi liftual ti Trahunhue Ruca?”. Loncontucuaiñ, iñchiñ feipicünufiyiñ ta Jehová taiñ serfiafiel com piuque mu. Feimu iñchiñ com piuque mu eluucüleiñ taiñ quelluafiel taiñ pu peñi ca pu lamngen, chem dungu rume duamniele engün. Ca Jehová ayüuquei taiñ femün meu. Huelu ngüneduamliyiñ taiñ müte eluucülenon taiñ quellucheal, ¿chem quelluafeiñmu? Peafiyiñ.

11. Müte eluucülenoliyiñ taiñ quellucheal, ¿chumafuiñ?

¹¹Llellipuafiyiñ Jehová taiñ quelluaeteu. Inaduamuuliyiñ taiñ nehue cüpa quelluchequenon, llellipuafiyiñ Jehová. Com feipiafiyiñ taiñ chum duamcülen. Feipiafiyiñ taiñ nehuentucuaeteu, femngechi taiñ quellucheal (Filip. 2:13).

12. Tati pu huecheque peñi, ¿chumngechi quelluntucuafuingün?

¹² Eimi huechengelmi ca fautizaucülelmi, ca llellipuafuimi Jehová. ¿Chumal? Tami nehuentucuaeteu, fei doi eluucüleaimi tami quelluafiel pu peñi ca pu lamngen. ¿Chemu cümeafui tami femal tüfa? Famülque mu, quiñeque mapu mu mülei siervo ministerial deu füchalerpulu. Ca fill tripantu doi alünuhurpuquei Jehová tañi troquiñche, feimu doi duamniengei huecheque peñi ñi quelluntucuafiel pu loncolelu ñi cuidayafiel tati trahunche. Eluucülelmi tami quelluntucual chem dungu mu rume, ayüucüleaimi. ¿Chumngelu? Ayühulafimi ta Jehová, ca tati trahunche peaimu tami cüpa quelluchequen. 

13, 14. ¿Chumngechi quelluafuiñ taiñ pu peñi ca pu lamngen? (Inaduamnge ti adentun huenulelu).

¹³Raquiduamaiñ chem tañi duamnien pu peñi ca pu lamngen. Peafiyiñ ñi chem pifiel tati pu hebreoche ta Pablo: ‘Ngüyünentuquilmün tamün femal cümeque dungu ca tamün hueluconque eluhual tamün nieelchi chemcün, fei tüfachi dungu tutequefi ta Ngünechen’ (Heb. 13:16). ¿Cüme ngülam no am tati? Feitachi pu cristiano rupayechi tripantu mu lloufilu tüfachi carta, mülefui ñi elcünual tañi ruca engün, tañi negocio, fei ñi lefmautripayal Jerusalén mu (Mat. 24:16). Elcünulu am com tañi niequefel engün, feimu mülefui tañi huelucontu quelluhual engün. Feitachi pu cristiano huimtulefule ñi hueluconque eluuquefel tañi nieelchi chemcün, müte cüdautulayafuingün nienole rume engün fentren chemcün tañi ruca mu.

¹⁴ Taiñ pu peñi ca pu lamngen feipilayaiñmu chi chem tañi duamnieel engün, feimu cüme raquiduamaiñ chem ñi duamnieafel engün. Raquiduamnge tüfa: quiñe peñi lale tañi domo, ¿chumngechi quelluafuiñ? Deumalelmeafuiñ chi  ta iyael cam quelluafuiñ chi ñi liftual tañi ruca. Ti peñi feipilayafeiñmu chi chem tañi duamnieel, huelu feipinoeliyiñmu rume taiñ quellumeafiel, amuaiñ müten. Rume mañumtupelayai ti peñi femliyiñ. Quiñe peñi cam quiñe lamngen duamniele ñi quellungeal, turpu raquiduamlayaiñ: “Caquelu mülei tañi quelluaeteu”. Ca turpu feipilayaiñ: “Duamniele ñi quellungeal, quisu feipiaeneu chem ñi duamnieel” pilayaiñ. Doi mai, ramtuhuaiñ: “Iñche femngechi dungu mu rupali, ¿chumngechi ayüafun tañi quellungeal?”.

15. ¿Chem eluucüleaiñ taiñ femal?

¹⁵Rumel eluucüleaiñ taiñ quellucheal. Trahunche mu, mülei quiñeque peñi ca lamngen eluucülelu ñi quellucheal. Chem dungu mu rume rupamequele quiñe peñi cam quiñe lamngen, eluucülequei ñi quellucheal. Iñchiñ ca femngechi ayüafuiñ taiñ femngechi chengeal quisu engün reque. Quiñe peñi loncolelu, Alan pingelu, ayüquei ñi femngechi chengeal. Quisu feipi: “Raquiduamquen Jesús mu. Quisu fentren duam rume niefulu, huelu tati pu che cüme duamquefuingün ñi fülcontufiel mu ta Jesús ca ñi pedifiel ñi quelluaeteu. Feitachi pu che quimniefuingün Jesús ñi ayühunquechi quelluchequen. Iñche ayüafun Jesús reque tañi femal. Femngechi tati pu peñi, pu lamngen, pu pichiqueche tañi fülcontuaeteu duamniele engün tañi quellungeal. Cafei tañi peaeteu iñche tañi ayühunquechi quelluchequen”.

16. ¿Chem quelluafeiñmu taiñ doi cüme inayentuafiel ta Jesús? (Salmo 119:59, 60).

¹⁶ Quiñeque mu com cüme inayentulayafuiñ ta Jesús ñi femquefel (Sant. 3:2). Huelu raquiduamnge tüfa: quiñe estudiante  trürümngelayafui tañi enseñalqueteu. Huelu ti estudiante inafile tañi enseñalngeel quimürpuai, fei doi cüme inayafui ñi femün tañi profesor. Ca femngechi iñchiñ inafiliyiñ taiñ quimürpuel Biblia mu, ca eluucüleliyiñ taiñ doi cüme chengeal fill antü, doi cüme inayentuafuiñ ñi femquefel ta Jesús (papeltunge Salmo 119:59, 60).

17, 18. ¿Chumngelu cümei taiñ inayentuafiel ta Jesús?

¹⁷ Eluucüleliyiñ taiñ quellucheal, taiñ pu peñi ca pu lamngen peaiñmu ca inayentuafeiñmu. Quiñe loncolelu, Tim pingelu, feipi: “Quiñeque huecheque peñi inayentuquefingün caquelu peñi ca lamngen ayühunquechi quelluchequelu. Ñi femün mu feitachi huecheque peñi, feimu siervo ministerial ngerpuingün. Ca femngechi müna quelluquefingün tati trahunche ca quelluntucuquefingün pu loncolelu”.

¹⁸ Fachantü fentrenque che eluucülelai ñi quelluafiel ta caquelu che. Huelu Jehová tañi pu che femquelai. Iñchiñ inayentuquefiyiñ ta Jesús, quisu am ayühunquechi quelluquefilu ta caquelu pu che. Iñchiñ cüme inayentuafuiñ ñi femün ta Jesús (1 Ped. 2:21). Femngechi femliyiñ, ayühulafiyiñ ta Jehová, fei rume ayüucüleaiñ.