1. ¿Chumngelu fentren che hueluraquiduamcüleingün?

FAMÜLQUE mu fentren religion “iñchiñ mai ta rüf cristiano” piqueingün, ca “iñchiñ mai ta poyequefiyiñ ta Chau Dios chumngechi ñi ayüqueel”. Feimu fentren che hueluraquiduamcülei, “¿mülepei mai quiñe rüf religion müten?” ramtuuqueingün. Feimu iñchiñ pu Dunguquelu Ineingen Jehová mülefui taiñ ramtuhual: “¿Maneluucülepeiñ mai taiñ nieel ti rüf dungu? ¿Maneluucülepeiñ mai taiñ poyefiel ta Jehová chumngechi ñi ayüqueel?”. ¿Chumngechi quimtucuafuiñ tüfa? Peafiyiñ.

2. Ti apostol Pablo, ¿chumngelu cüme quimniefui ñi rüfngen tañi feyentuqueel? (1 Tesalonicenses 1:5).

² Ti apostol Pablo cüme quimniefui ñi rüfngen tañi feyentuqueel (papeltunge 1 Tesalonicenses 1:5). ¿Chumngelu? Tañi feyentuqueel ayühulqueyu ta Pablo, huelu cafei Pablo cüme ngüneduamquefui Chau Dios tañi huirintucuel. Pablo cüme quimniefui ti ‘Huirin Chillca huiringei Chau Dios ñi piel meu’ (2 Tim. 3:16). Tañi estudiafiel mu Chau Dios ñi Huirin Chillca, ¿chem quimürpui Pablo? Pablo quimürpui Jesús ñi rüf Mesíasngen. Huelu pu loncolechi religioso feichi mu, feyentuquelafui tüfa. Fei engün feipiquefuingün ñi enseñachequen Chau Dios ñi dungu, huelu re huesaque dungu ta femquefuingün (Tito 1:16). Tati apostol Pablo inayentulafi tati pu loncolechi religioso. Quisu com feyentuquefui Chau Dios ñi huirintucuel mu, quiñeque dungu müten no. Fei eluucülefui ñi enseñalelafiel tati pu che (Hech. 20:27).

3. Taiñ quimtucual taiñ nieel ti rüf dungu, ¿duamfali taiñ cüme adümal com dungu? (Inaduamnge ti huichulechi dungu “ Rume fentren-ngei ñi deumael ta Jehová, feimu com nütramcalayafuiñ”).

³ Quiñeque che raquiduamquei chem ramtun rume niele tati pu che, tati rüfngechi religion mülei ñi com huiñoldungual,  mülenole rume ti lloudungun Biblia meu. Huelu ti rüfngechi religion, ¿rüf pepi femafui tüfa? Femlai. Peaiñ ñi feipin ti apostol Pablo. Fei feipifi tati pu cristiano ñi cüme inaduamafiel com dungu. Huelu ca feipifi ñi com cüme adümnoafel quiñeque dungu (1 Tes. 5:21). Fei feipi ñi huenche adümquefiel com tati quimün, ca feipi “nehue pelotuquelafiyiñ quiñe espejo meu reque” (1 Cor. 13:9, 12). Pablo cüme adümquelafui com dungu, iñchiñ cafei com cüme adümquelafiyiñ. Huelu Pablo cüme quimniefui ti doi falin-ngechi quimeltun Chau Jehová mu. Pablo cüme adümnofilu rume com dungu, huelu tañi adümqueel quellueyu ñi quimtucual ñi nieel tati rüf dungu.

4. 1) ¿Chumafuiñ taiñ maneluhual taiñ nieel ti rüf dungu? 2) ¿Chem inaduamaiñ ñi femqueel pu rüfngechi cristiano?

⁴ ¿Chumafuiñ taiñ doi maneluhual taiñ nieel ti rüf dungu? Mülepalu Mapu mu, Jesús cüme pengeli chumngechi mülei ñi poyengeal ta Jehová. Iñchiñ trürümfiliyiñ ñi femün ta Jesús tañi femqueel pu Dunguquelu Ineingen Jehová famülque mu, feimu doi maneluhuaiñ taiñ nieel ti rüf dungu. Fei tüfachi troquiñ mu peaiñ ñi chumquen tati pu rüfngechi cristiano. 1) Püramyequefingün ta Chau Jehová müten. 2) Yamniefingün Jehová tañi üi. 3) Falintuquefingün Biblia ñi rüf dungu. Ca 4) hueluquentu piuqueyeuqueingün.

5. Jesús, ¿chumngechi poyefi ta Jehová cuifi? ¿Chumngechi inayentuafuiñ ta Jesús?

⁵ Jesús mülelu huenu mu ca mülepalu Mapu mu, fente ñi piuqueyefiel ta Jehová quisu müten poyeniefi (Luc. 4:8). Fei Jesús quimeltufi tañi pu inanieteu ñi ca femngechi femal. Jesús ca tañi pu inanieteu pünequelafingün chem adentun no rume ñi  püramyeafiel ta Jehová. Chau Jehová quiñe püllüngei, feimu pu che adentucünulayafui ñi chumngen ta Jehová (Is. 46:5). Huelu fachantü fentren che adentucünuquefi ta quiñeque che, santo troquiquefingün, fei llellipuquefingün. ¿Cümepei mai tüfa? Femlai. Ngüneduamnge ti ley Jehová ñi feipifiel pu israelche, feipi: ‘Ngelai tami deumayafiel quiñe adentun no rume, adentuquelayafimi chem dungu no rume mülelu huenu mapu mu ca nag Mapu mu. Ngelai tami lucutulelafiel tüfa meu’ (Éx. 20:4, 5). Feimu pu rüfngechi cristiano ayüqueingün ñi ayühulafiel ta Jehová, feimu poyequelafingün adentun.

6. Iñchiñ pu testigo, ¿chumngechi inayentuafuiñ pu hunenque cristiano?

⁶ Quiñeque adümuhun-ngechi che feipiquei feichi mülequefulu pu apostol, tati pu cristiano Chau Dios müten püramyequefuingün. Quiñe lifru feipi: “Cuifi mu pu apostol ñi antü meu, pu cristiano feipingefule ñi poyeafiel ta Chau Dios adentun meu, ünufal dungu ta troquiafui” (History of the Christian Church). Fachantü pu Dunguquelu Ineingen Jehová inayentuquefingün ñi femqueel pu hunenque cristiano mülequefulu cuifi. Iñchiñ llellipuquelafiyiñ tati pu santo, pu püllü, ca Jesús no rume, Chau Jehová müten. Cafei iñchiñ lloyünagquelaiñ ti bandera mu ca püramyequelafiyiñ tati pu huentru ñi gobierno. Obligangeliyiñ rume, iñchiñ femquelaiñ. Poyequefiyiñ ta Chau Jehová müten (Mat. 4:10).

7. Pu Dunguquelu Ineingen Jehová, ¿chem dungu meu trürümfalngelayafui caquelu religion mu?

⁷ Fachantü alün pu che ayühunquechi inaquefingün quiñeque loncolechi religioso, quiñe dios reque troquiquefingün. Amuqueingün tañi iglesia mu, ngillañmaquefingün tañi lifru ca quelluntucuquefingün fentren plata mu. Com ñi feipiqueteu pu loncolechi religioso feyentuquefingün. ¡Pefile engün rume ta Jesús, fente afmatulayafuingün! Huelu iñchiñ pu rüf poyequefilu ta Jehová femngechi femquelaiñ, püramyequelafiyiñ tati pu huentru. Iñchiñ yamquefiyiñ tati pu loncolelu, huelu ca cüme quimnieiñ Jesús ñi feipin taiñ peñihuen-ngen com iñchiñ (Mat. 23:8-10). Iñchiñ poyequelafiyiñ tati pu loncolechi religioso ca pu politico. Quelluntucuquelaiñ quisu tañi ayüqueel engün ca reyülconquelaiñ tüfachi Mapu mu müleyechi dungu. Com tüfachi dungu meu iñchiñ pu testigo trürümngelayafuiñ ñi femqueel caquelu religion mu (Juan 18:36).

8. ¿Chumngechi quimiyiñ Chau Jehová ñi ayüqueel ñi püramyengeal ca ñi quimngeal tañi üi?

⁸ Quiñe rupa Jesús feipifi ta Jehová: “Chau, com che püramyepe tami üi”. Fei Jehová feipieyu: ‘Iñche eluafiñ tati pu che tañi püramyeaeteu tañi üi’ (Juan 12:28). Jesús amuldunguyaulu Mapu mu, rumel yamquefi Chau Jehová tañi üi (Juan 17:26). Feimu pu rüfngechi cristiano rume falintuquefingün ñi püramyengeal Chau Jehová ñi üi ca tañi quimelelafiel ta com che.

9. Pu hunenque cristiano, ¿chumngechi pengelingün ñi yamniefiel Chau Jehová tañi üi?

⁹ Fütra cuifi mu hue elcünungelu ti cristiano trahunche, Biblia feipi ta Jehová eluhui ñi dulliafiel quiñe troquiñche ñi yenieal tañi üi (Hech. 15:14). Feitachi pu cristiano ayühunquechi püramyefingün Chau Dios tañi üi ca quimelelfingün ta caquelu pu che. Cafei quiñeque engün huirintucuingün quiñeque troquiñ Biblia, fei ca huirintucuquefuingün Chau Jehová ñi üi fei mu. *  Femngechi femün mu engün, quimfalcünuingün fei engün müten enseñachequefui Chau Jehová tañi üi (Hech. 2:14, 21).

10. ¿Chumngechi quimiyiñ pu testigo müten ñi enseñachequen Chau Jehová ñi üi?

¹⁰ Pu Dunguquelu Ineingen Jehová, ¿fei engün müten quimelchequeingün Chau Jehová tañi üi? Raquiduamnge tüfa. Fentren loncolechi religioso ellcalingün Chau Jehová tañi üi. Biblia meu entuquefingün Chau Dios ñi üi ca catrütuquefingün tati pu che ñi üitunoafiel ta Chau Dios. * ¿Iñchiñ cai pu testigo? Fentren che rume entucünulu Chau Dios ñi üi Biblia meu, huelu iñchiñ huirintucuquefiyiñ Chau Dios ñi üi taiñ Biblia meu, Traducción del Nuevo Mundo pingelu. Cafei doi mil quehun mu entuqueiñ fillque publicacion tuulu Biblia meu. Tüfa meu ca huiriconcülei Chau Dios tañi üi. ¡Quimfali llemai! Iñchiñ müten pu Dunguquelu Ineingen Jehová, yamquefiyiñ Chau Jehová tañi üi. Iñchiñ doi quimelelquefiyiñ tati pu che Chau Jehová tañi üi. Trürümngelayafuiñ caquelu religion mu. Felei llemai, ¡com taiñ nehuen mu dunguqueiñ ineingen Jehová! (Is. 43:10-12).

11. Pu hunenque cristiano, ¿chumngechi pengelingün tañi falintuquefiel ti rüf dungu?

¹¹ Jesús com tañi mongen mu pengelcünui ñi falintuquefiel ti rüf dungu Chau  Dios mu, ca ñi chumal cüpalechi antü mu. Fei ca quimelelfi tüfa tati pu che (Juan 18:37). Fei tati pu rüfngechi cristiano ca femngechi falintuquefingün feitachi rüf dungu (Juan 4:23, 24). Ti apostol Pedro feipi pu rüfngechi cristiano quimeltuqueingün tati rüf dungu (2 Ped. 2:2). Cuifi mu, pu hunenque cristiano fente ñi falintuquefiel ti rüf dungu, famentuquefuingün coilaque quimeltun, huesaque raquiduam ca huesaque huimtun (Col. 2:8). Famülque mu, ca femngechi pu rüfngechi cristiano ñi quimeltun Biblia meu tripai, ca eluucüleingün ñi inayafiel Biblia ñi feipin tañi mongen mu (3 Juan 3, 4).

12. Tati Cuerpo Gobernante inaduamle taiñ huelulcahun, ¿chumquei? ¿Chumngelu?

¹² Famülque mu, iñchiñ pu testigo feipiquelaiñ taiñ com adümfiel ñi huiriconcülen Biblia meu. Quiñeque mu huelulcauqueiñ chumngechi taiñ adümquefiel quiñeque dungu ñi feipin ta Biblia. Ca huelulcauqueiñ chumngechi ñi cüme yeniengeal ti trahunche. Huelu tüfa afmatulquelaeiñmu. Biblia feipi Chau Jehová ñi pu che ñochiquechi doi cüme adümürpuquefi Biblia ñi rüf dungu (Col. 1:9, 10). Feimu iñchiñ maneluucülequeiñ taiñ quelluaeteu Jehová taiñ doi cüme adümal ti rüf dungu (Prov. 4:18). Tati Cuerpo Gobernante inaduamle taiñ huelulcaucülen chumngechi taiñ adümfiel Biblia ñi feipin, fei cüme elcünufemquetui. Famülque mu, fentren iglesia cambiacünuquei tañi enseñaqueel re tañi ayühulafiel müten tati pu che. Huelu iñchiñ pu testigo doi cüme quimfalcünuquefiyiñ taiñ quimeltun taiñ doi fülconal Chau Jehová mu, ca taiñ poyeafiel chumngechi ñi ayüqueel (Sant. 4:4). Iñchiñ cambiaquelaiñ taiñ quimeltun taiñ inayafiel pu che ñi raquiduam. Huelu mai, iñchiñ doi cüme adümürpuquefiyiñ Biblia ñi feipin, feimu cambiaqueiñ taiñ quimeltun. Felei llemai, iñchiñ rume falintuquefiyiñ ti rüf dungu (1 Tes. 2:3, 4).

13. 1) ¿Chem mu doi quimngequei pu rüfngechi cristiano? 2) Famülque mu, ¿chumquei pu testigo?

¹³ Cuifi mu, pu hunenque cristiano doi quimngequefuingün tañi piuqueyehun mu. Jesús feipi: “Hueluconquechi piuqueyehulmün, com mapu meu mülechi pu che quimaingün iñche tañi discipulongen ta eimün” (Juan 13:34, 35). Famülque mu pu testigo huall Mapu mu, hueluconque piuqueyeuqueingün ca quiñeucülequeingün. Iñchiñ trürümngelayafuiñ caquelu religion mu. Caque tuhun niefuliyiñ rume, quiñe familia reque feleiñ. Taiñ trahun mu ca fütraque trahun mu, quimfali taiñ rüf piuqueyeuquen. Tüfa pengeli taiñ poyequefiel ta Jehová chumngechi ñi ayüqueel.

14. Ñi feipin Colosenses 3:12-14, ¿chumngechi pengelafuiñ taiñ rüf piuqueyeuquen?

¹⁴ Tati Biblia feipieiñmu taiñ hueluconque piuqueyehual (1 Ped. 4:8). Hueluconque perdonauliyiñ ca rulpacünufiliyiñ ñi huelulcan taiñ pu peñi ca pu lamngen, femngechi pengelaiñ taiñ rüf piuqueyehun. Cafei eluucüleiñ taiñ füreneafiel com taiñ pu peñi ca taiñ pu lamngen. Taiñ pu huesa duameleteu cütu ta ca fürenequefiyiñ. Femngechi piuqueyeuliyiñ, pengelaiñ taiñ rüf cristianongen (papeltunge Colosenses 3:12-14).

15. ¿Chumngechi inayentuquefiyiñ ñi femün pu cuifique cristiano?

¹⁵ ¿Ca chumngechi inayentuquefiyiñ ñi femquen pu hunenque cristiano? Por ejemplo, chumngechi ñi adcünungequefel pu cuifique cristiano ca femngechi adcünungequeiñ  famülque mu. Mülequei huitran-ngepaquechi loncolelu, loncolelu ca siervo ministerial (Filip. 1:1; Tito 1:5). Cafei fei engün reque, yamquefiyiñ ñi feipin ta Jehová ti cudumuhun dungu mu, ti curehuen mu ca ti mollfüñ mu. Cafei taiñ trahunche mu huemünentungequei tati pu che fütra culpalu ca repentiunolu (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Chem quimeltuqueiñmu ñi feipin Efesios 4:4-6?

¹⁶ Jesús feipicünui fentren che “iñche ta cristiano” piaingün, huelu rüf cristianongelayafuingün (Mat. 7:21-23). Biblia ca feipi ti afaelchi antü meu pu che cüme serfiquefilu ta Chau Dios troquihuaingün (2 Tim. 3:1, 5). Huelu tati Biblia ca feipi quiñelei müten tati feyentun cam ti religion ñi ayüqueel ta Jehová (papeltunge Efesios 4:4-6).

17. Famülque mu, ¿inei engün am poyequefingün Jehová chumngechi ñi femün Jesús?

¹⁷ Tüfachi troquiñ mu peiñ chumngechi Jesús ca tañi pu discipulo poyefingün ta Chau Jehová cuifi mu. Famülque mu, ¿inei engün am poyequefingün Jehová chumngechi ñi ayüqueel? Pu Dunguquelu Ineingen Jehová llemai. Rume ayüucüleiñ taiñ coneltulen Jehová tañi pu che mu ca taiñ quimfiel ti rüf dungu quisu meu. Feimu llemai quimtucunieaiñ: iñchiñ nieiñ ti rüf dungu.