1. 1) ¿Chumquei quiñe che cutranpiuqueyechefengelu? 2) Tati cüme samaritano, ¿chumngechi pengeli ñi cutranpiuqueyechefengen?

QUIÑE che cutranpiuqueyechefengelu feipiafuiñ ñi cüme piuquengen ca eluucülequei ñi quellucheal. Tati cüme samaritano ñi nütramcael ta Jesús pengeli tañi rüf cutranpiuqueyechefengen. Feitachi huentru pefi quiñe judio saltiangelu ca hulelcangelu, fei cutrantupiuqueyefi. Feitachi samaritano quellufi tati judio fei piuqueyenquechi cuidafi (Luc. 10:29-37). Feitachi nütram mu pengeleleiñmu Jehová ñi cutranpiuqueyechefengen. Chau Jehová rume piuqueyeiñmu, feimu fill antü pengeleleiñmu taiñ cutranpiuqueyequeteu.

2. ¿Ca chumquei quiñe che cutranpiuqueyechefengelu?

² ¿Ca chumquei tati cutranpiuqueyechefengelu? Quiñe che huesa femle, mülefui müten tañi castigangeal, huelu ti cutranpiuqueyechefengelu perdonayafeyu. Ca femngechi femquei ta Jehová. Cutranpiuqueyequeiñmu fei perdonaqueiñmu taiñ culpan (Sal. 103:10). Huelu quiñeque mu, Jehová norümtuafui quiñe che huesa culpalu.

3. ¿Chem ramtun ngüneduamafiyiñ?

³ Feitachi troquiñ mu peaiñ cüla ramtun. 1) ¿Chemu cutranpiuqueyechei Jehová? 2) Huemünentungen mu quiñe che, ¿“cutranpiuqueyengelai” piafuiñ? 3) ¿Chumafuiñ iñchiñ taiñ cutranpiuqueyecheal? Tüfachi troquiñ mu peafiyiñ chumngechi quelluafeiñmu Biblia tüfachi dungu meu.

4. Jehová, ¿chumngelu cutranpiuqueyechequei?

⁴ Jehová piuqueyequefi pu che, feimu cutranpiuqueyequefi. Tati apostol Pablo huirintucui Chau Ngünechen rume  fütra cutranpiuqueyechequei. ¿Chumngelu Pablo feipi tüfa? Chau Jehová fente ñi piuqueyefiel mu tati pu dullielchi cristiano, elufi ñi müleal ta huenu mu (Efes. 2:4-7). Huelu Jehová cutranpiuqueyequelafi müten tati pu amualu huenu mu. David feipi: “Jehová cüme piuquengei itrocom che mu, ca tañi cutranpiuqueyechen quimfali com tañi femün meu” (Sal. 145:9). Jehová fente piuqueyefilu am tañi pu che peñmaquefi cümeque dungu ñi piuque mu, feimu eluucülei ñi cutranpiuqueyeafiel.

5. Jesús, ¿chumngechi quimürpui Jehová ñi cutranpiuqueyechefengen?

⁵ Jesús cüme quimniefui tañi chau ñi cutranpiuqueyechequen. Jehová engu Jesús fentren tripantu mu mülequefui huenu mu engu (Prov. 8:30, 31). Feimu Jesús pefi Jehová fente ñi cutrantupiuqueyechequen (Sal. 78:37-42). Feimu Jesús mülepalu Mapu mu, enseñafi tati pu che Jehová ñi cutrantupiuqueyechequen.

6. Jesús, ¿chumngechi pengeleleiñmu Jehová ñi cutranpiuqueyechequen?

⁶ Jesús feipi quiñe pengelün dungu tañi quimeltual Jehová ñi cutranpiuqueyechefengen. Tüfa nütramcai quiñe hueche mu. Feitachi hueche tripai tañi ruca mu, cañpüle amui, fei coni huesaque dungu mu (Luc. 15:13). Rupayechi antü mu, feitachi hueche huiñoduamtui fei huiñotui tañi ruca mu. ¿Chumi tañi chau? Pefilu ñi püllelepan tañi fotüm, rume cutranpiuqueyefi. Fei lefi ñi trafmeafiel, pancofi ca piuqueyenquechi trepetucafi. Ti chau yehuelcalafi tañi fotüm, doi mai cutranpiuqueyefi ca perdonafi. Ti hueche rume huesaque dungu mu confui, huelu rüf huiñoduamtulu am, tañi chau perdonaeyu. Jesús tañi nütram mu, ¿inei mu am adentulei ti chau? Jehová mu llemai. ¿Chem cüpa quimeltui Jesús? Chau Jehová eluucülei ñi perdonayafiel pu rüf repentiuquelu (Luc. 15:17-24).

7. Jehová ñi cutranpiuqueyechefengen, ¿chumngechi pengeli tañi quimün-ngen?

⁷ Jehová fente tañi quimün-ngen mu cutranpiuqueyechequei. Jehová chem rume femquei taiñ cüme feleal. Tati Biblia feipi ti che nielu ‘huenu meu cüpachi quimün, cutranpiuqueyechequei ca cümeque dungu femquei’ (Sant. 3:17, TNM). Quiñe cüme chau reque, Jehová cüme quimniei tañi cutranpiuqueyefiel mu tañi pu che, cümelcayafi engün (Sal. 103:13; Is. 49:15). Jehová ñi cutranpiuqueyefiel mu tañi pu che, maneluucüleingün ñi rumel mongeleal  culpafengelu engün rume. Huelu Jehová re ngünam cutranpiuqueyechequelai. Doi mai peñmaqueiñmu taiñ cüme piuquengen, feimu cutrantupiuqueyequeiñmu. Huelu Jehová cutranpiuqueyechefengelu rume, tüfa feipilai ñi cümelu troquifiel ñi huesa femün quiñe che. ¿Chumngelu feipiafuiñ? Peafiyiñ.

8. 1) Quiñe che fütra culpale, ¿chem rupayafui? 2) ¿Chemu duamfalngeafui ñi huemünentungeal quiñe che?

⁸ Raquiduamnge tüfa: quiñe peñi cam quiñe lamngen quisu tañi ayün mu conle huesaque cudumuhun mu, ¿chem mülei taiñ femal? Pablo feipi taiñ trahuluuhuenoal feichi che iñchiñ (1 Cor. 5:11). Feimu quiñe che fütra culpale, repentiunole, huemünentungeai trahunche mu. Femngechi cuñiutucungeai tati trahunche ca quimfalcünungeai Jehová tañi pu che lif mongen yeniequei. Huelu quiñe che huemünentungele trahunche mu, “Chau Dios cutranpiuqueyechequelai” pingeafui. Huelu, ¿rüfngepei mai tüfa? Peafiyiñ.

9, 10. Ñi feipin Hebreos 12:5, 6, ¿chumngelu cümei ñi huemünentungeal quiñe che trahunche mu? ¿Chumngechi adentucünuafuimi?

⁹ Allcün mu trahun mu ñi huemünentungen quiñe taiñ piuqueyenieelchi che, müna hueñancüafuiñ. Feimu ramtuhuafuiñ: “¿Rüf cutranduamyengequepei mai feichi che huemünentungelu trahunche mu?”. Femi llemai. ¿Chumngelu? Feichi che duamniei tañi norümtungeal, feimu müna cümei ñi quellungeal (Prov. 13:24). Huelu huemünentungele quiñe che, ¿rüf quellupeafeyu mai ñi norümtual tañi raquiduam? Femafui llemai. Quiñeque peñi ca quiñeque lamngen huemünentungequefulu cuifi mu, feipingün ñi cümecünungen tañi huemünentungen trahunche mu. ¿Chumngelu? Femngechi inaduamuhuingün fente tañi huesa femün, repentiuhuingün, cüme elcünutuingün tañi mongen ca huiñotuingün Jehová mu (papeltunge Hebreos 12:5, 6).

¹⁰ Raquiduamnge tüfa: quiñe cuidaufisaquelu inaduami quiñe tañi pu ufisa ñi nien quiñe tul cutran. Feimu huichucünufi caquelu pu ufisa mu. Huelu ti ufisa tüngcülelai, ayüniei tañi müleal ti quechan ufisa mu. ¿Huesa che troquiafuiñ tati cuidaufisaquelu ñi huichucünufiel mu ti cutran ufisa? Femlai llemai. Ti cuidaufisaquelu quimniei feiti cutran ufisa mülele ti quechan ufisa mu, tulelafui tañi cutran, feimu huichucünufi ñi cuñiutucuafiel tati quechan ufisa (ca ngüneduamafuimi Levítico 13:3, 4).

11. 1) Quiñe huemünentungechi che, ¿chumngelu trürümngeafui quiñe cutran ufisa mu? 2) Huemünentungefule rume quiñe che, ¿chumafui?

¹¹ Trürümngeafui quiñe cutran ufisa quiñe che huemünentungelu trahunche mu. Feiti che cutrancülei reque, cüme hueniyelafi ta Jehová (Sant. 5:14). Quiñe che cutrancülelu tulafui ñi cutran ta caquelu che. Ca femngechi quiñe che cüme hueniyenofilu ta Jehová, hueluraquiduamelafui ta caquelu che trahunche mu. Feimu mülei ñi quechanentungeal trahunche mu ti huesa culpalu. Ñi huemünentungen mu quiñe che culpalu, Jehová cuñiutucuquefi tati trahunche ca quelluquefi tati culpalu ñi inaduamal tañi huesa femün fei ñi repentiuhual. Huemünentungefule rume quiñe che, trahuluhuafui femngechi ñi llohual Jehová tañi quimeltun fei ñi doi cüme hueniyeafiel. Ca femngechi llohuafui fillque publicacion ñi chillcatual ca peafui JW Broadcasting^®. Pu loncolelu inaduamfile ñi cüme amulen ti che, ngülamtuafeyu chumngechi  ñi doi cüme hueniyetuafiel Jehová, femngechi ñi huiñotual trahunche mu. *

12. Quiñe che culpale ca repentiunole, ¿chumngechi pengelafuingün pu loncolelu ñi piuqueyenieteu?

¹² Loncontucuaiñ: quiñe che culpale ca repentiunole tañi culpan mu, fei müten huemünentungei trahunche mu. Petu ñi huemünentungenon quiñe che, pu loncolelu mülei ñi cüme ngüneduamal com ti dungu. Jehová cüme quimniei chumngechi norümtuafiel quiñe che, fei pu loncolelu ayüingün ñi inayentuafiel (Jer. 30:11). Pu loncolelu rume piuqueyequefingün tati pu peñi ca pu lamngen, feimu eluucülequeingün ñi quelluafiel engün tañi cüme hueniyeafiel Jehová. Quiñeque mu, cümeafui tañi huemünentungeal quiñe che repentiunolu tañi culpan mu, femngechi pu loncolelu pengelelayu tañi cutranpiuqueyenieteu ca ñi piuqueyenieteu.

13. Quiñe huentru Corinto trahunche mu, ¿chumngelu mülefui ñi huemünentungeal?

¹³ Peaiñ ñi chumün ti apostol Pablo culpalu quiñe huentru Corinto trahunche mu. Feitachi huentru üñamyauquefui tañi ñeñe engu. Ünufalquefui tañi femün. Ti apostol Pablo cüme quimniefui Jehová ñi feipicünufiel tati pu israelita: “Quiñe huentru cudumfile tañi chau ñi domo, yehuelcafi tañi chau. Mür mülefui tañi layal engu llemai” (Lev. 20:11). Pablo feipilafi tati trahunche ñi langümngeal feitachi huentru, huelu mai ñi huemünentungeal ti trahunche mu. Tañi femmequen mu tüfachi huentru, raquiduamelfi tati trahunche ñi huesalcamequenon (1 Cor. 5:1, 2, 12).

14. Ti apostol Pablo, ¿chumngechi pengeli ñi cutranpiuqueyefiel ti culpachi huentru? ¿Chumngelu femi? (2 Corintios 2:5-8, 11).

¹⁴ Rupayechi antü mu Pablo ngüneduami feitachi huentru cüme elcünutui tañi mongen, fei rüf repentiuhui. Feitachi huentru yehuelcafilu rume tati trahunche, Pablo ayülafui ñi fente huesa duamelnoafiel. Feimu feipifi tati loncolelu: “Felei tamün huiñoduamatuafiel ca tamün yafültucuafiel”. ¿Chumngelu feipi Pablo? Femngechi ti huentru fentecünulayai tañi poyeafiel Jehová fente tañi hueñancülen. Pablo cutranduamyefi feitachi huentru  repentiulu. Pablo ayülafui feitachi huentru fente ñi hueñancülen ñi feipihuenoafiel ta Jehová ñi perdonayaeteu (papeltunge 2 Corintios 2:5-8, 11).

15. Quiñe che huesa culpale, ¿chumngechi norümtuafeyu pu loncolelu?

¹⁵ Jehová reque, tati pu loncolelu eluucülequeingün tañi cutranpiuqueyeafiel tati trahunche. Duamfalngele ñi nehuentu norümtungeal quiñe che, pu loncolelu femaingün. Huelu ca piuqueyenquechi norümtuafingün. Huelu loncontucuaiñ: pu loncolelu norümtunofile tati che huesa culpalu, rüf cutranpiuqueyelayafi, doi mai raquiduamelafi tañi huesa femnon. Huelu, ¿pu loncolelu müten mülei ñi cutranpiuqueyechefengeal? Femlai. Peafiyiñ.

16. Quiñe che cutranpiuqueyechenole, ¿chumayu Jehová? (Proverbios 21:13).

¹⁶ Com iñchiñ ayüqueiñ taiñ cutranpiuqueyechefengeal, Jehová reque. ¿Chemu? Jehová allcütulayafi tati cutranpiuqueyechequenolu (papeltunge Proverbios 21:13). Iñchiñ ayüqueiñ taiñ allcütuñmayaeteu taiñ ngillatufiel ta Jehová, feimu duamtuchequeiñ ca cuñillchequeiñ. Iñchiñ eluucülequeiñ taiñ quelluafiel taiñ pu peñi ca pu lamngen sufrilelu. Cafei raquiduamtucuniequefiyiñ ñi feipin Santiago 2:13: ‘Tüfei engün tati cutranpiuqueyenofilu ta caquelu ramtucadungungeai’. Com iñchiñ duamnieiñ taiñ cutranpiuqueyengeal. Loncontuculiyiñ tüfa, cutranpiuqueyeafiyiñ ta caquelu. Doi mai cutranpiuqueyeafiyiñ feiti culpachi che huiñotulu Jehová ñi troquiñche mu.

17. David, ¿chumngechi pengeli ñi cutranpiuqueyefiel ta Saúl?

¹⁷ Ñi rupan quiñeque che mülelu Biblia mu, quelluafeiñmu taiñ cutranpiuqueyechefengeal. Raquiduamaiñ ti rey David mu. Saúl ayüfui rume ñi langümafiel ta David, huelu David huiñoleltulaeyu tañi huesa femeteu Saúl, doi mai cutranpiuqueyeyu (1 Sam. 24:9-12, 18, 19).

18, 19. David, ¿chumngechi pengeli quiñeque mu ñi cutranpiuqueyechefengenon?

¹⁸ Huelu quiñeque mu, David cutranpiuqueyechequelafui. Quiñe rupa, Nabal huesa pifi ta David ca elulafi iyael ta David ca tañi pu hueichafe. Feimu David ayüfui ñi langümafiel ta Nabal ca tañi pu che. Quimlu tüfa Abigaíl, Nabal tañi domo, eluhui tañi catrütuafiel ta David ca elufi iyael. Ñi femün mu ta Abigaíl, David langümlafi ta Nabal (1 Sam. 25:9-22, 32-35).

¹⁹ Ca quiñe rupa mu, Natán raquiduamelfi ta David quiñe nütram mu. Natán nütramcai quiñe ricu huentru mu hueñeñmafi quiñe ufisa ta quiñe pofre huentru. Allcülu David, rume illcui. “Langümngepe” pi (2 Sam. 12:1-6). David cüme quimniefui chem pin tati ley: quiñe che hueñeñmafile quiñe ufisa ta cangelu, meli ufisa cullirqueafulu (Éx. 22:1). Huelu David quimfilu rume tüfa, feipi ñi langümngeal ti huentru. David cutranpiuqueyelafi tati huentru. Natán, ¿chem cüpa quimeltufi ta  David? Natán pengelelfi ta David ñi doi huesa culpan cuifi mu. Jehová cutranpiuqueyefi ta David, huelu David cutranpiuqueyelafi ti hueñelu ti ufisa (2 Sam. 12:7-13).

20. Ñi femün ta David, ¿chem quimeltuafeiñmu?

²⁰ David fente ñi illculen ayüfui ñi langümafiel ta Nabal. Cafei allcülu ñi nütrameleteu ta Natán, feipi ñi langümngeal ti ricu huentru. Huelu David cüme piuquengefui, ¿chemu cutranpiuqueyelafi tati huentru? Raquiduamaiñ ñi chum duamcülen ta David feichi mu. David huesa duamquefui tañi huesa femquefel cuifi, cümelcalelafui tañi raquiduam. Feimu peno cutranpiuqueyelafi ti ricu huentru. ¿Chem quimeltueiñmu tüfa? Quiñe che femngechi juzgafile ta caquelu, quimngeafui tañi cüme hueniyenofiel Jehová. Feimu Jesús feipifi tañi pu inanieteu: ‘Juzgachelayaimün. Juzgachelmün, ca femngechi juzgangeaimün’ pifi (Mat. 7:1, 2, TNM). Feimu llemai, eluucüleaiñ taiñ juzgachenoal, huelu mai taiñ cutranpiuqueyecheal Jehová reque.

21, 22. ¿Chumngechi pengelafuiñ taiñ cutranpiuqueyechequen?

²¹ Huelu iñchiñ re cutranpiuqueyechelayaiñ. Huelu mai eluucüleaiñ taiñ quelluafiel tati pu che. Com iñchiñ quelluafuiñ taiñ familia, taiñ trahunche mu ca taiñ lof mu. Ramtuhuaiñ: ¿Mülepei mai quiñe che duamnielu tañi yafültucungeal? Duamniele quiñe che, ¿ngillalelafuiñ chemcün, deumalelafuiñ iyael cam quelluafuiñ caquelu dungu mu? Cam quiñe peñi cam quiñe lamngen huiñotulu Jehová mu, ¿yafültucupeafuiñ mai? ¿Quimelelpeafuiñ mai caquelu che Jehová ñi dungu? Fente taiñ cutranpiuqueyefiel mu tati pu che, amuldungulelquefiyiñ. Tüfa quiñe rume falin dungu taiñ femafel (Job 29:12, 13; Rom. 10:14, 15; Sant. 1:27).

²² Inaduamliyiñ quiñe che duamnielu ñi quellungeal cam ñi yafültucungeal, eluhuaiñ taiñ cutranpiuqueyeafiel ca quelluafiyiñ. Femliyiñ, ayühulmayafiyiñ Jehová ñi piuque, tati Dios cutranpiuqueyechequelu.