TROQUIÑ ÑI CHILLCATUNGEAL 22
ÜLCANTUN 15 ¡Püramyeafiyiñ Jehová tañi hunen Fotüm!
Jesús, ¿chumngelu rume falintuquefi Chau Jehová tañi üi?
“Quimeltulelfiñ engün tami üi. Ca fentecünulayan” (JUAN 17:26).
¿CHEM QUIMAIÑ?
Jesús chumngechi quimeltuñmafi Jehová tañi üi, ca chumngechi quimfalcünui Jehová ñi nor dungu femquen ca ñi yamfalngen tañi üi.
1, 2. 1) ¿Chem chumi Jesús petu ñi langümngenon? 2) ¿Chem ngüneduamaiñ tüfachi troquiñ mu?
FEICHI pun 14 conchi nisan 33 tripantu mu, Jesús trahuluhui ñi iyal tañi pu apostol engün. Jesús quimniefui pichiñma mu Judas ñi hultucuaeteu tañi pu caiñe mu, ñi cutrancangeal ca tañi langümngeal. Feimu rupan ilu, yafültucufi tañi pu apostol. Petu tañi amutunon engün, Jesús entui quiñe falin llellipun, tüfa huiriconcülei Juan capitulo 17 mu.
2 Tüfachi troquiñ mu, peaiñ chem quimeltuaiñmu Jesús tañi llellipun. Pichilehuelu ñi layal, ¿chem raquiduamtucuniefui Jesús? Ca, ¿chem doi falintuniefui petu ñi mülen mapu mu?
“QUIMELTULELFIÑ ENGÜN TAMI ÜI”
3. Jesús, ¿chem pi Jehová tañi üi mu? Ca, ¿chem cüpa feipi? (Juan 17:6, 26).
3 Tañi llellipun mu, Jesús feipifi ta Jehová: “Quimeltulelfiñ engün tami üi”. Epu rupa feipifi Jehová, feimu pengeli ñi fente falintuniefiel (papeltunge Juan 17:6, 26). ¿Chem cüpa feipi tüfa? Pu discipulo, ¿duamniefuingün ñi quimeltungeal Jehová tañi üi? Femlai. Fei engün judiongefui, ca quimniefuingün Jehová tañi üi fentren rupa huiriconcülelu cai Hebreo Huirintucun mu. Feimu Jesús feipifilu ta Jehová “quimeltulelfiñ engün tami üi”, cüpa feipi ñi quimeltulelfiel ñi chumngen ta Jehová, chem tañi ayüqueel, chem tañi femün cuifi ca chem tañi femal. Jesús müten fente cüme quimniefi tañi Chau.
4, 5. 1) ¿Chumngechi doi piuqueyerpuafuiñ quiñe che taiñ deu quimniefiel? Feipinge quiñe ejemplo. 2) Jesús ñi pu discipulo, ¿chumngechi doi quimürpufi Jehová?
4 Peaiñ quiñe ejemplo. Tami trahunche mu mülei quiñe loncolelu David pingelu, fei doctorngei. Eimi fentren tripantu quimniefimi chi. Quiñe antü cuñihun mu rupai tami mongen, feimu duamnieimi quiñe doctor. Matu yengeimi pital mu, fei tüfachi peñi montulmaeimu tami mongen. Feimu doi piuqueyerpufimi ca falintuquefimi ñi femün eimi mu. Allcüimi David tañi üitungen, feula raquiduamlaimi tañi loncolen müten, ca raquiduamtucufimi tañi doctorngen montuleimu tami mongen.
5 Ca femngechi Jesús tañi pu discipulo quimniequefui Jehová tañi üi, huelu feula doi cüme quimürpufingün, feimu doi falintuñmafi ñi üi. ¿Chumngechi doi quimürpufingün? Jesús cüme inayentui ñi Chau ñi femqueel mu ca tañi feipiqueel mu, femngechi pengeli ñi chumngen tañi Chau. Feimu pu discipulo allcütufilu chumngechi quimeltui Jesús ca ngüneduamfilu ñi poyechefengen, doi cüme quimürpufingün Jehová (Juan 14:9; 17:3).
“EIMI ELUEN ÑI YEAL TAMI ÜI”
6. Jesús feipilu “eimi eluen ñi yeal tami üi”, ¿chem cüpa feipi? (Juan 17:11, 12).
6 Jesús llellipui tañi pu discipulo ñi duam mu. Feipifi ta Jehová: “Eimi eluen ñi yeal tami üi. Feimu tami üi ñi duam mu, cuñiutucufinge engün” (papeltunge Juan 17:11, 12). Tüfa cüpa feipilai Jesús ñi Jehová pingetual. Feimu, ¿chem cüpa feipi Jesús? Hunelu mu, Jehová huercüfi Jesús ñi dungual quisu meu. Jesús cüpai tañi Chau ñi üi mu ca femi afmatun dungu tañi Chau ñi üi mu (Juan 5:43; 10:25). Jesús ñi üi cüpa feipi “Jehová montulchequei”, feimu Jehová tañi üi coneltulei Jesús tañi üi mu.
7. ¿Chumngelu feipiafuiñ Jesús dungui Jehová tañi üi mu? Feipiaimi quiñe ejemplo.
7 Taiñ doi cüme adümafiel, raquiduamaiñ tüfachi ejemplo mu. Ti presidente huercüafui quiñe che, fei eluafui autoridad ñi dungual quisu tañi üi mu. Feimu dungule tati huerquen, tati presidente ñi dungun reque troquingeai. Ca femngechi femi Jehová huercüfilu ta Jesús ñi dungupayal quisu tañi üi mu (Mat. 21:9; Luc. 13:35).
8. Jehová, ¿chumngelu feipi Jesús “iñche tañi üi yeniei”? (Éxodo 23:20, 21).
8 Biblia feipiquei Jesús tati Dungun, ¿chumngelu? Chau Jehová huercüquefi Jesús ñi eluafiel quisu ñi huercün dungu tati pu cümeque püllü ca tati pu che mapu mu (Juan 1:1-3). Jesús peno huercüfi ñi cuñiutucuafiel pu Israel che miyaulu huellin mapu mu. Jehová feipifilu pu Israel che ñi allcütuafiel tüfachi cüme püllü, “iñche tañi üi yeniei” pi (papeltunge Éxodo 23:20, 21). a ¿Chumngelu Jehová feipi tüfa? Jesús nütramcaquei tañi Chau ñi dungu ca hunelei tañi incañpeafiel Jehová tañi üi.
“CHAU PÜRAMYEFINGE TAMI ÜI”
9. ¿Chumngelu feipiafuiñ Jesús rume falintufi tañi Chau ñi üi?
9 Taiñ ngüneduampeel, petu ñi cüpanon mapu mu Jesús, tañi Chau ñi üi rume falintuniequefui. Ca femngechi femi mülepalu mapu meu. Com tañi femel mu, pengeli tañi doyümniefiel tañi Chau ñi üi. Pichilehuelu ñi layal, ngillatufi ta Jehová: “Chau püramyefinge tami üi”. Nehuentu dungun mu huiñoldunguleyu Jehová: “Deu femün llemai, fei ca quiñe rupa püramyeafiñ” (Juan 12:28).
10, 11. 1) Jesús, ¿chumngechi püramyefi Jehová ñi üi? (Ca inaduamnge ti adentun). 2) ¿Chumngelu duamfali ñi incangeal Jehová tañi üi?
10 Jesús ca püramyefi tañi Chau ñi üi. ¿Chumngechi femi? Nütramcaquefi pu che Jehová tañi cüme piuquengen ca ti afmatufalchi dungu ñi femel. Huelu ñi püramyengeal Jehová tañi üi, ca quiñe dungu duamfali. Jesús mülefui ñi quimfalcünual Jehová ñi nor dungu femquen ca ñi yamfalngen tañi üi. Jesús pengeli fente ñi falin-ngen tüfa quimeltufilu tañi pu discipulo ñi ngillatual. Feipi: “Taiñ Chau huenu mülelu, rume yamniengepe tami üi” (Mat. 6:9).
11 ¿Chumngelu duamfali ñi yamniengetual ca incangeal Jehová tañi üi? Edén pingechi lof mu, Huecüfü huitrapüramelfi coila ta Jehová, feipifi Adán ca Eva coilatuleimu Jehová ca rücünieimu cümeque dungu (Gén. 3:1-5). Femngechi femlu, Huecüfü feipicai reque Jehová ñi nor dungu femquenon. Ñi femngechi feipin mu Huecüfü, fentrenque pu che raquiduamafui Jehová ñi huesa Chau Dios ngen. Job ñi antü mu, Huecüfü ca feipi com pu che poyequefi ta Dios re tañi cümelcangeal müten. Ca tüfachi coila feipi pu che rüf poyequelafi ta Dios, feimu huesa dungu rupale püntütripayai Chau Dios mu pi ta Huecüfü (Job 1:9-11; 2:4). Feimu, duamfali tiempo ñi pengelngeal inei ñi feipiquen rüf dungu: Jehová cam Huecüfü.
Jesús quimeltufi tañi pu discipulo ñi fente falin-ngen yamnieafiel Jehová tañi üi. (Inaduamnge parrafo 10).
“IÑCHE HULQUEN TAÑI MONGEN”
12. Fente ñi piuqueyeniefiel tañi Chau ñi üi, ¿chem eluucülefui ñi femal Jesús?
12 Jesús rume piuqueyefui tañi Chau, feimu ayüniefui ñi pengelal Jehová ñi nor dungu femquen ca tañi yamfalngen tañi üi, feimu eluucülefui ñi layal cütu (Juan 10:17, 18). b Adán engu Eva quiñepülecünufi ta Jehová ca inafingu tati Huecüfü. Huelu Jesús eluucülefui ñi feyentuafiel ta Jehová ca ñi hulcünual ñi mongen, femngechi pengeli ñi piuqueyefiel tañi Chau (Heb. 4:15; 5:7-10). Com tañi mongen mu turpu elcünulafi ta Jehová puulu rume tañi langümngeal (Heb. 12:2). Femngechi pengeli ñi piuqueyefiel Jehová ca tañi üi.
13. Jesús, ¿chumngelu doi pepicaucülefui ñi incayafiel Jehová tañi üi? (Ca inaduamnge ti adentun).
13 Com tañi femel Jesús pengeli Jehová ñi rüf dunguquen, Huecüfü fei coilatufe (Juan 8:44). Inei no rume doi quimlafi ta Jehová, Jesús müten doi cüme quimniefi. Huecüfü ñi feipielchi coilaque dungu rüfngefule, Jesús quimafui. Huelu pichi no rume rüfngelafui, feimu Jesús eluucülefui ñi incayafiel Jehová tañi üi. Jesús quisucünueteu Jehová troquiufui, huelu püntütripalai, eluucülefui ñi layal cütu (Mat. 27:46). c
Com tañi mongen mu Jesús pengeli Huecüfü tañi coilatufengen, Jehová turpu coilatulai. (Inaduamnge parrafo 13).
“HUECHUNENTUN TATI CÜDAU TAMI ELFALCÜNUFIEL”
14. Jehová, ¿chem cümelcan elufi Jesús?
14 Feichi pun petu ñi lanon Jesús, feipifi tañi Chau: “Huechunentun tati cüdau tami elfalcünufiel”. Jesús maneluucülei ñi cümelcayaeteu Jehová tañi cüme femün mu (Juan 17:4, 5). Ngünam maneluulai Jesús, Jehová elcünulaeyu rüngan mu feichi langümngelu (Hech. 2:23, 24). Jehová huiñomongeltueyu ca elueyu fütra autoridad (Filip. 2:8, 9). Fentren tripantu rupalu, Jesús elungei ñi ngünenietual Chau Dios ñi Gobierno mu. Feichi Gobierno mu huechutripayai Jesús tañi feipin: “Cüpape tami ngünenietual mapu. Chumngechi ñi femngequen tami ayüqueel huenu meu, ca femngechi femngepe mapu mu” (Mat. 6:10).
15. ¿Ca chem femai Jesús?
15 Pichin antü mu, Jesús hueichayafi Jehová tañi pu caiñe ca apümafi pu huesaque che Armagedón mu (Apoc. 16:14, 16; 19:11-16). Ca pichin mu, ütrüftucuafi Huecüfü “fütraconchi lolo” reque felelu. Cerrantuculelu cai, pepi chumlayai rume (Apoc. 20:1-3). Fei hula, conai ñi ngünenieal mil tripantu, femngechi tüngcületuai com mapu ca quelluafi pu che ñi culpafe chengehuenoal. Huiñomongeltuafi tati pu layelu ca cüme elcünutuafi com mapu. Feula com femtripayai Jehová tañi ayüqueel (Apoc. 21:1-4).
16. Fentepuule ti mil tripantu ñi ngünenieal Jesús, ¿chumletuai tati mongen?
16 Fentepuule ti mil tripantu ñi ngünenieal Jesús, ¿chumletuai tati mongen? Inei no rume culpafe pingehuelayai. Ngehuetunolu cai culpan, duamngehuelayai ñi perdonangeal che Jesús tañi duam mu. Pu che duamniehuelayai ñi quelluaeteu Jesús ca pu 144 mil ñi cüme hueniyeafiel Jehová. Cafei “apümcangeai ti quiñelehuechi caiñe, ti lan dungu”. Pu layelu huiñomongetuai. Com pu che mülealu mapu mu culpafengehuelayai (1 Cor. 15:25, 26).
17, 18. 1) Afle ti mil tripantu, ¿chem quimngeai com püle? 2) Fentepuule ñi ngünenien, ¿chumai Jesús? (1 Corintios 15:24, 28; ca inaduamnge ti adentun).
17 ¿Ca chem rupayai fentepuule ti mil tripantu? Feichi mu, com püle quimngeai Jehová ñi nor dungu femquen ca ñi yamfalngen tañi üi. Chumngechi ngüneduampeiñ, Huecüfü feipi Jehová ñi coilangen, ca feipifi quim ngünelai ca poyequelafi pu che. Feichi mu ca fantepu mu, Jehová tañi pu che quelluntucuquei ñi cüme acordangeal tañi fütra üi. Feimu afle ti mil tripantu ñi ngünenieal Jesús, liftucünungeai Jehová tañi üi ca chumcaunorume huesa acordangehuelayai. Taiñ Chau Ngünechen pengelcünuai tañi cüme Chau ngen ca tañi piuqueyechequen.
18 Fentepuule chi mil tripantu com pu che quimürpuai Huecüfü ñi fütra coilangen. Afle Jesús tañi ngünenien, ¿chem chumai? ¿Caiñetupeafi mai tañi Chau, Huecüfü reque? Femlayai, pichi trürlaingu rume (papeltunge 1 Corintios 15:24, 28). Huiñoleltuafi ñi ngünenieal tañi Chau, ca quisu eluhuai ñi ngünenieaeteu. Femai poyeniefiel mu tañi Chau.
Fentepuule tati mil tripantu, Jesús elutuafi Jehová tañi ngünenietual. (Inaduamnge parrafo 18).
19. ¿Tunte falintuñmaquefi Jesús tañi Chau ñi üi?
19 Rüfcünu, com taiñ peel mu quimfali chumngelu Jehová elufi tañi Fotüm ñi yenieal quisu tañi üi. Com tañi feipin ca com tañi femün mu, Jesús pengeli ñi chumngen tañi Chau. Jesús, ¿tunte falintuñmaquefi tañi Chau ñi üi? Doi falintuquefi chem dungu meu rume. Chau Jehová ñi üi meu, Jesús eluhui tañi langümngeal, ca eluhuai ñi huiñoleltuafiel tañi Chau ñi ngünenieal. Iñchiñ, ¿chumngechi inayentuñmayafuiñ tañi femün? Cüpalechi troquiñ mu, doi quimafiyiñ.
ÜLCANTUN 16 Tañi dullielchi Fotüm mu, püramyeafiyiñ Jehová
a Quiñeque mu, tati pu cümeque püllü cafei yeñmafi Jehová tañi huercün dungu, femngechi dunguingün Jehová tañi üi mu. Feimu quiñeque mu Jehová dungui pingequei Biblia mu, huelu rüfcünu quiñe cüme püllü dungui Jehová ñi huercün dungu (Gén. 18:1-33). Biblia feipi Jehová elufi Moisés tati ley dungu, huelu caquelu texto feipi Jehová huercüi tañi cümeque püllü eluafiel ti ley (Lev. 27:34; Hech. 7:38, 53; Gál. 3:19; Heb. 2:2-4).
b Jesús ñi lan mu elufi maneluhun ti pu che ñi nieal rumel mongen.
c Inaduamnge “Pu papeltuquelu ñi ramtuqueel” tripalu Ti Huerquen abril 2021, pagina 30 ca 31.
