EGIPTO mapu meu, pu che huirintucuquefui papiro mu. Pu griego ca pu romano ca femngechi pünequefingün ti papiro.⁠ * Ti papiro pünengequelafui re huiriam müten, ca pünengequefui ñi deumangeam ta farcu.

Rume fütra cuifi meu, tati profeta Isaías feipi Etiopía tuuchi huerquen miyauquefuingün papiro farcu meu. Cafei Jeremías feipi pu medo ca pu persa ñi caiñetuafiel pu babiloniache ca ñi lüpümüñmayafiel tañi pu farcu deumangelu papiro meu. Femngechi inei no rume lefmaulayafui (Is. 18:1, 2; Jer. 51:32).

Fantepu meu, pu arqueologo peingün chumngechi Egipto mapu meu deumangequefui farcu papiro meu. Huelu afmatuquelaiñ, tati Biblia fentren tripantu cuifi ñi feipin ta tüfa. Quimfali ñi cüpan Chau Dios mu (2 Tim. 3:16).

Pu egiptoche ñi eltun meu, pu arqueologo peingün fillque pintura ca dibujo pengelquelu chumngechi ñi pünengequefel ti papiro ñi deumangeal farcu. Hunelu meu, pu huentru catrüquefuingün ti papiro, rütragcünufingün ca traricünufingün. Femngechi com trapümngelu, rume nehuen ngefui. Quiñe lifru feipi quiñeque farcu deumangelu papiro meu alütucünungequefui 17 metro, feitachi farcu 10 cam 12 remo nierquefui epuñpüle (A Companion to Ancient Egypt).

Alünque papiro mülerquefui inaltu Nilo leufü meu. Fei cüdaungelafui ñi entungeal ca cüdaungelai ñi deumangeal farcu papiro meu. Amulen mu ta tripantu, pu che eluhui ñi deumayal fütraque farcu mamüll meu, huelu pu challhuafe ca caquelu che petu deumaquepelafuingün pichique farcu papiro meu.

Papiro farcu alüñma pünengequefui. Quiñe quimngeelchi huentru mülerquefulu pu apostol ñi antü meu, Plutarco pingequefulu, feipi feichi meu tati pu che petu miyauquefui papiro farcu meu.