1. Petu tami chillcatunofiel Biblia, ¿chem mongen yeniequefuimi?

 PETU tami papeltunofiel Biblia, ¿chem mongen yeniequefuimi? Femquefuimi chi huesaque dungu ca inaquefuimi chi huesaque che tañi raquiduam. Quimquelafuimi ta Chau Dios ca niequelafuimi ta maneluhun (Efes. 2:12). Huelu chillcatulu am eimi Biblia cacünutui tami mongen.

2. Petu chillcatufilu Biblia ta eimi, ¿chem dungu quimürpuimi?

² Petu chillcatufilu Biblia ta eimi, ¿chem dungu quimürpuimi? Quimürpuimi ta Huenu Chau rume piuqueyeimu. Ca quimürpuimi cüme elcünutufulmi tami mongen ca tami raquiduam, femngechi müten ayühulafuimi ta Jehová ca conafuimi quisu tañi troquiñche mu. Ca quimürpuimi tami femal Jehová ñi ayüqueel ca tami famentuafiel Jehová ñi ayüquenoel (Efes. 5:3-5).

3. 1) ¿Chem feipieiñmu Jehová taiñ femal? (Colosenses 3:9, 10). 2) ¿Chem peaiñ tüfachi troquiñ mu?

³ Jehová deumaeiñmu, feimu quisu müten feipiafeiñmu chem taiñ femal. Fei quisu feipieiñmu, petu taiñ fautizaunon, mülei taiñ ‘famentuafiel taiñ cuifi huesa mongen ca taiñ femquefelchi dungu’ * (papeltunge Colosenses 3:9, 10). Tüfachi chillcatun mu ngüneduamaiñ cüla ramtun. 1) Quiñe che huesa mongen yeniequelu, ¿chumngechi chengei? 2) Jehová, ¿chumngelu feipieiñmu taiñ famentuafiel taiñ ‘cuifi huesa mongen’ taiñ niequefel? Ca 3) ¿chumngechi famentuafuiñ taiñ ‘cuifi huesa mongen’? Tüfachi troquiñ quelluafi pu ayülu ñi fautizahual. Ca quelluaiñmu iñchiñ pu fautizaucülelu taiñ femhuenoal huesaque dungu taiñ femquefel ta cuifi.

4. Quiñe che huesa mongen yeniequelu, ¿chumngechi chengei?

⁴ Quiñe che huesa mongen yenielu, ¿chumquei? Quisutu duamuuquei, illcufemquei, mañumquelai ca mallmangei. Rume ayüuquei ñi pefiel pornografia ca pelicula pengelquelu huesaque cudumuhun ca quehuan dungu. Tunte cüme piuquengefule rume ca huesa duamcülele rume tañi huesa femquen mu, huelu eluucülelai tañi cüme elcünutual tañi mongen (Gál. 5:19-21; 2 Tim. 3:2-5).

5. ¿Com famentupeafuiñ mai taiñ cuifi huesa mongen? (Hechos 3:19).

⁵ Taiñ culpanchengen mu com famentulayafuiñ taiñ huesaque raquiduam, feimu quiñeque mu huelulcahuafuiñ taiñ feipin mu cam taiñ femün mu (Jer. 17:9; Sant. 3:2). Huelu eluucüleliyiñ taiñ famentuafiel taiñ cuifi huesa mongen, ngüneniehuelayaiñmu taiñ huesaque raquiduam, doi cüme chengetuiñ (Is. 55:7; papeltunge Hechos 3:19).

6. Jehová, ¿chumngelu feipiqueiñmu taiñ famentuafiel huesaque raquiduam ca huesaque huimtun?

⁶ Pu che famentuquenofilu huesaque raquiduam quisutu huesalcauquei ca huesalcaquefi caquelu. Jehová quimniei tüfa. Quisu ayüquelai taiñ cutrancahual, rume piuqueyeiñmu. Ayüquei taiñ cümelcaleal, feimu feipiqueiñmu taiñ famentuafiel huesaque raquiduam ca huesaque huimtun (Is. 48:17, 18).

7. Ñi feipin Romanos 12:1, 2, ¿chem mülei taiñ femal?

⁷ Eluucüleliyiñ taiñ famentuafiel taiñ cuifi huesa mongen, taiñ familia ca hueni poyequenofilu Jehová ayentuafeiñmu chi (1 Ped. 4:3, 4). Ca feipiafeiñmu: “Inei no rume feipiqueelmu tami chumal. Chem dungu rume ayülmi tami femal, femaimi müten”. Pu famentuquefilu Jehová ñi ngülam quisutu ngünenieulu troquihuafuingün. Huelu femlai, Satanás ngünenieyu engün (papeltunge Romanos 12:1, 2). Com iñchiñ mülei taiñ raquiduamal chem taiñ chumal. ¿Eluupeaiñ mai taiñ ngünenieaeteu Huecüfü cam eluupeaiñ mai Jehová taiñ  adnieaeteu, femngechi taiñ cacünutual taiñ mongen? (Is. 64:8).

8. ¿Chem quelluafeiñmu taiñ famentuafiel huesaque raquiduam ca huesaque huimtun?

⁸ Jehová quimniei iñchiñ cüdautuafuiñ ca alüñmayafuiñ taiñ famentuafiel huesaque raquiduam ca huesaque huimtun (Sal. 103:13, 14). Huelu Jehová quelluqueiñmu ca eluqueiñmu quimün taiñ cacünutual taiñ mongen. ¿Chumngechi quelluqueiñmu? Biblia mu, tañi nehuen mu ca tañi troquiñche mu. Feula peafiyiñ chem femafuimi tami famentuafiel tami cuifi huesa mongen, femngechi tami fautizahurpual.

9. Biblia, ¿chumngechi quelluafeimu?

⁹ Papeltuafimi Biblia tami cüme ngüneduamuhual. Biblia quiñe espejo reque felei. Quelluafeimu tami cüme ngüneduamuhual tami raquiduam, chumngechi tami dunguquen ca chem tami femquen (Sant. 1:22-25). Tami quimeltuqueteu Biblia ca caquelu peñi ca lamngen doi quimün nielu ca quelluafeimu. ¿Chumngechi? Quisu engün Biblia mu pengelafeimu chem dungu tami cüme femqueel ca chem dungu doi cüme elcünutuafuimi. Ca quelluafeimu tami chumngechi quintual cümeque ngülam taiñ fillque publicacion mu. Jehová rumel mülequei tami quelluaeteu. Inei rume quellulayafeimu Jehová reque, quisu am quimniefilu tami piuque (Prov. 14:10; 15:11). Fill antü llellipuafimi Jehová ca papeltuafimi Biblia, rumel femqueaimi tüfa.

10. Taiñ peñi Elie ñi rupan, ¿chem quimeltueimu eimi?

¹⁰ Raquiduamtucuaimi Chau Jehová ñi huercün dungu doi cümei. Chem dungu rume feipielmu Jehová tami femal, cümelcayaimu. Pu inaquefilu Chau Jehová ñi huercün dungu ayüucülequei ñi piuque (Sal. 19:7-11). Huelu pu pinolu ñi inayafiel Chau Jehová ñi huercün dungu ayüuduamcülequelai, cutrancauquei. Peaiñ ñi rupan quiñe peñi, Elie pingelu. Tañi chau ca tañi ñuque ñi tremümeteu testigongeingu. Huelu huechengelu ti peñi huesaque hueni dullifi, femngechi coni droga mu, huesaque cudumuhun mu ca hueñefengerpui. Cafei lladcüfe chengetui ca quehuafe chengetui. Quisu feipi: “Com ñi quimeltungeel ñi femnoafel quiñe cristiano, iñche femürpun”. Huelu tüfachi peñi ngoimalai tañi quimeltuqueteu tañi pu chau pichi huentrungelu. Rupachi tripantu mu, taiñ peñi ca huiño papeltui Biblia. Taiñ peñi rume cüdahui ñi famentuafiel huesaque dungu ñi femquefel ta cuifi, fei fautizahurpui 2000 tripantu mu. ¿Chumngechi quellufi taiñ peñi ñi inafiel mu Jehová ñi huercün dungu mu? Taiñ peñi feipi: “Feula tañi piuque tüngduamcülequei ca cümeque raquiduam nietun”. * ¿Chem quimeltueiñmu ñi rupan taiñ peñi? Tati pinolu ñi inayafiel Jehová ñi huercün dungu quisutu huesalcauquei, huelu Jehová eluucülei ñi quelluafiel ñi norümtual tañi mongen engün.

11. ¿Chem dungu üdequei Jehová?

¹¹ Üdeafimi Jehová ñi üdequeel (Sal. 97:10). Tati Biblia feipi Jehová üdequefi ‘tati nge mallmangelu, quiñe quehun coila dunguquelu, ca tati cuhu langümquefilu ti che nienolu culpan’ (Prov. 6:16, 17). Jehová ca “üdequefi pu che quehuatufengelu  ca ngünencachequelu” (Sal. 5:6). Noé tañi antü mu, tati pu che femngechi huesaque dungu femquefuingün feimu Jehová apümcaeyu engün (Gén. 6:13). Cafei ti profeta Malaquías mu, Jehová feipi ñi üdequefiel tati pu füta ca domo raquiduamquelu chumngechi ñi hudayafiel tañi afcadi. Quiñe tüfa poyefile Jehová, Jehová famentuaeyu ca juzgayaeyu (Mal. 2:13-16; Heb. 13:4).

12. ¿Chumngechi pengelafuiñ taiñ ‘üdequefiel huesaque dungu’?

¹² Jehová ayüquei taiñ ‘üdeafiel huesaque dungu’ (Rom. 12:9). ¿Chumngechi femafuiñ? Raquiduamnge tüfa. Feipingelmi tami iyafiel quiñe funalechi iyael, ¿chumaimi? ¿Iyafimi? Femlayafuimi. “Ünufali” piaimi, pürüm famentuafimi. Ca femngechi üdeafiyiñ huesaque dungu, raquiduamlayaiñ rume taiñ femal huesaque dungu. Ünufalngelu troquiafiyiñ, feitachi funalechi iyael reque.

13. ¿Chumngelu famentufemafiyiñ huesaque raquiduam?

¹³ Cuñiutucuhuaiñ chem taiñ raquiduamqueel. Jesús pengeli fente falin-ngen tüfa. Quisu feipi taiñ famentuafiel huesaque raquiduam, femngechi taiñ fütra culpanoal (Mat. 5:21, 22, 28, 29). Com iñchiñ ayüqueiñ taiñ ayühulafiel ta Jehová, ¿felelai? Feimu rume falin-ngei taiñ famentufemafiel chem huesaque raquiduam rume nierumeliyiñ.

14. Taiñ dunguqueel, ¿chem pengeli? Ca, ¿chem ramtuhuafuiñ?

¹⁴ Ngüneunge chumngechi tami dungual. Jesús feipi tati tripaqueel hun mu, piuque mu tuhui (Mat. 15:18). Felei, taiñ dunguqueel pengelquei taiñ nieel ta piuque mu. Feimu ramtuhuafuiñ: “¿Rumel rüf dunguquen, quiñeque mu cümelcanoelimu rume? Curengeli, ¿daquelcantuquefiñ caquelu pu domo? Fütangeli, ¿daquelcantuquefiñ caquelu pu huentru? ¿Com famentuquefiñ podngechi nütram? Huesa pielimu quiñe che, ¿ñom piuque mu lloudunguquefiñ?”. Com tüfachi ramtun raquiduamtucuaimi. Ayülmi tami elcünual tami cuifi huesa mongen, huesa pilayafimi tati pu che, coila dungulayaimi ca podngechi dungu nütramcalayaimi.

15. Iñchiñ mülei taiñ clafantucuafiel reque orcon mamüll mu taiñ cuifi huesa mongen. ¿Chem cüpa feipifui tüfa?

¹⁵ Com nehuen mu cüme elcünutuafimi  tami mongen. Ti apostol Pablo feipi taiñ cuifi huesa mongen taiñ niequefel mülei taiñ clafantucuafiel reque orcon mamüll mu (Rom. 6:6). ¿Chem cüpa feipifui ta Pablo? Mülei taiñ inayentuafiel ñi femün ta Jesús. Jesús eluucülefui ñi clafantucungeal orcon mamüll mu, femngechi tañi ayühulafiel ñi Chau. Ca femngechi iñchiñ eluucüleaiñ taiñ famentuafiel Jehová tañi üdequeel, femngechi ayühulafiyiñ ta Jehová. Femngechi müten femliyiñ, cüme raquiduam nieaiñ ca maneluhuafuiñ taiñ rumel mongeleal (Juan 17:3; 1 Ped. 3:21). Loncontucunge, Jehová cambiacünulayai tañi huercün dungu iñchiñ taiñ duam mu. Doi mai, iñchiñ mülei taiñ cambiatual taiñ chumngechi chengen, femngechi taiñ inayafiel ñi huercün dungu (Is. 1:16-18; 55:9).

16. ¿Chumngelu mülei tami chaftunieafiel huesaque raquiduam?

¹⁶ Chaftuniefinge huesaque raquiduam. Petu tami fautizaunon, chaftuquefimi huesaque raquiduam. Huelu ca chaftunieafimi fautizahulmi hula. Peaiñ ñi rupan quiñe peñi, Maurício pingelu. Huechengelu cudumuuquefui caquelu huentru engu. Rupachi tripantu mu quimürpufi Jehová tañi pu che, fei chillcaturpui Biblia. Cüme elcünutui ñi mongen, fei fautizahui 2002 tripantu mu. Fentren tripantu yenielu rume ñi testigongen taiñ peñi, huelu petu chaftuquefi huesaque raquiduam. Fei, ¿chumquei taiñ peñi? Quisu feipi: “Huesaque raquiduam rume tuculi tañi lonco mu, famentuquefiñ, femngechi ayühulquefiñ Jehová. Quimfiel tüfa tüngduameleneu”. *

17. Nabiha tañi rupan mu, ¿chumngechi quellueimu?

¹⁷ Llellipuafimi Jehová tami quelluaeteu ca maneluunge quisu ñi nehuen mu, eimi tami nehuen mu no (Gál. 5:22; Filip. 4:6). Cüdahuaiñ taiñ famentuafiel taiñ cuifi huesa mongen ca cüdahuaiñ taiñ niehuetunoafiel feichi huesa mongen. Peaiñ ñi rupan quiñe lamngen, Nabiha pingelu. Nielu cayu tripantu, tañi chau quisucünueyu, fei tüfa rume cutrantupiuqueleyu. Doi tremlu lladcüchefengerpui, fenderpui droga, fei carceltucungei quiñeque tripantu. Quiñeque testigo amuqueingün  feiti carcel mu ñi amuldungulelafiel pu preso, fei Nabiha eluhui ñi chillcatual Biblia. Quisu feipi: “Quiñeque huesaque huimtun tañi niequefel cüdautulafiñ tañi elcünuafiel, huelu rume cüdautun tañi pütremtuhuenoal”. Doi quiñe tripantu rupai, fei Nabiha pütremtuhuelai. ¿Chem quellueyu? Taiñ lamngen feipi: “Rume llellipuquefiñ ta Jehová tañi quelluaeteu. Iñche raquiduamquen, cüdautun rume tañi cüme elcünutuafiel tañi mongen, huelu femürpun. ¿Ca femnoafulu caquelu pu che?”. *

18. Fentren taiñ pu peñi ca pu lamngen, ¿chumingün? (1 Corintios 6:9-11).

¹⁸ Hunen siglo mu, Jehová dullifi quiñeque che ñi ngünenieal Jesús engün huenu mu. Quiñeque engün cuifi ñihualuuquefuingün, cudumuuquefuingün chaf huentru engu ca hueñefengefuingün. Huelu Jehová tañi nehuen mu norümtufingün tañi mongen (papeltunge 1 Corintios 6:9-11). Ca femngechi famülque mu, Biblia ñi feipin mu fentrenque che huesaque huimtun niequefulu cüme elcünutuingün tañi mongen. * ¿Chem quimeltueimu tañi rupan engün? Eimi ca famentuafuimi tami cuifi huesa mongen ca huesaque huimtun, femngechi tami fautizahurpual.

19. ¿Chem peafiyiñ cüpalechi troquiñ mu?

¹⁹ Pu ayülu ñi fautizahual mülei ñi famentuafiel tañi cuifi huesa mongen. Huelu fei ca müten no. Ca mülei ñi nietual tati hue mongen. ¿Chumngechi femafuingün? ¿Inei engün am quelluaeyu? Cüpalechi troquiñ mu peafiyiñ tüfa.