TROQUIÑ ÑI CHILLCATUNGEAL 27
ÜLCANTUN 79 Quellufinge ñi nehuencüleal engün
Quelluafimi tami estudiante tañi serfiafiel Jehová
“Nehuentulepe tamün feyentun, [...] yafüluucülemün” (1 COR. 16:13).
¿CHEM QUIMAIÑ?
Chumngechi quelluafuiñ taiñ estudiante ñi nehuencünuhual ca feyentual, femngechi ñi serfiafiel Jehová.
1, 2. 1) ¿Chumngelu quiñeque papeltuquelu Biblia cüdautuquei ñi testigongeal? 2) ¿Chem peaiñ tüfachi troquiñ meu?
AYÜLU eimi tami Dunguquelu Ineingen Jehová ngeal, ¿mülefui quiñeque dungu tami catrütueteu? Llicaquefuimi chi tami chem pingeal tami cüdau mu, tami pu hueni ca tami pu familia. Cam raquiduamquefuimi chi tami rume cüdautuafiel tami cüme tripayal Chau Jehová tañi dungu mu. Femngechi rupalmi eimi, quimtucuafuimi chumngelu quiñeque estudiaquelu Biblia cüdautuquei tañi Dunguquelu Ineingen Jehová ngerpual.
2 Jesús quimniefui femngechi raquiduamle catrütuafui pu che ñi serfiafiel ta Jehová (Mat. 13:20-22). Femfulu rume, Jesús amulei ñi quellufiel tüfachi pu che. ¿Chumngechi femi? Quellufi tañi pu discipulo ñi ngüneduamal chumngelu ñi cüdautuquen engün ñi serfirpuafiel Jehová. Quellufi ñi doi piuqueyeafiel Jehová ca quellufi ñi hunentucuafiel Jehová tañi mongen mu. Ca quimeltufi ñi chumal engün caiñetungele. ¿Chumngechi inayentuafuiñ Jesús taiñ cüme püneafiel chi lifru ¡Rumel ayüucüleaimi! taiñ quelluafiel pu estudiante ñi testigongeal?
QUELLUAFIMI TAMI ESTUDIANTE ÑI QUIMAL CHEM ÑI CATRÜTUMEQUETEU
3. ¿Chumngelu cüdautuquefui Nicodemo Jesús ñi discipulongeal?
3 Pu judio mu mülefui quiñe falin loncolelu Nicodemo pingei. Cüdautuquefui ñi inayafiel Jesús. Cayu cüyen yeniei Jesús ñi amuldungulen, Nicodemo deu quimtucui Chau Dios tañi huercüeteu (Juan 3:1, 2). Huelu tañi llicaniefiel mu pu judio, pun meu ellca amui ñi pemeafiel Jesús (Juan 7:13; 12:42). Jesús ñi discipulongele, llicaquepelafui ñi loncolehuenoal ca ñi niehuenoal tañi falinque fillem. a
4. Jesús, ¿chumngechi quellufi Nicodemo ñi cüme quimal ñi chumal?
4 Nicodemo cüme quimniefui Moisés ñi ley dungu. Huelu duamniefui ñi quellungeal chem ayüniei Jehová ñi femal quisu. ¿Chumngechi quellueyu Jesús? Jesús elcünui antü ñi quimeltuafiel, pun cütu eluhui ñi quelluafiel. Jesús cüme feipieyu ñi chumal tañi discipulongeal. Mülefui ñi nor raquiduamtual tañi culpan mu, fautizahual co mu ca feyentual Jesús meu (Juan 3:5, 14-21).
5. ¿Chumngechi quelluafuiñ taiñ estudiante niele dungu ñi catrütumequeteu?
5 Tami estudiante cüme adümniefi chi ta Biblia, huelu duamniei quellu ñi ngüneduamal chem ñi catrütumequeteu ñi testigongeal. Tañi rume cüdauquen mu, müte nielai chi ta tiempo. Cam ñi familia chi eluñmaquelaeyu. ¿Chumngechi inayentuafuimi Jesús? Elcünuaimi antü tami quelluafiel tami estudiante. Mangelafuimi tamu matetual cam tripayafuimu tamu adquintual lelfün. Femngechi femülmi, doi cüme nütramcayafuimu chem dungu ñi catrütumequeteu. Quelluafimi chem dungu ñi cüme elcünuafiel. Feipiafuimi: “Femlayaimi iñche tañi ayüucüleal, Jehová mai ta ayühulafimi”.
6. ¿Chumngechi quelluafuimi tami estudiante ñi inayafiel Biblia ñi quimeltun? (1 Corintios 16:13).
6 Ti estudiante maneluucülele Jehová ñi quelluaeteu, eluucüleai ñi inayal Biblia tañi ngülam (papeltunge 1 Corintios 16:13). Quimeltuquelu Biblia ñi dungu trürümngeafui quiñe profesor mu. Raquiduamnge quiñe cüme profesor mu. Re quimeltuquelafi tañi pu estudiante chem tañi femal engün. Maneluucülei fei engün mu, “eimi femafuimi tati” piquefi. Ca femngechi mülei tami femal tami estudiante mu. Re quimeltulelquelafimi chem ñi chumal. Ca raquiduamelafimi tañi femürpual, “Jehová quelluaimu llemai” piafimi, femngechi tañi cüme elcünutual ñi mongen. ¿Chumngechi femafuimi? Peaiñ.
QUELLUAFIMI TAMI ESTUDIANTE ÑI DOI PIUQUEYEAFIEL JEHOVÁ
7. Jesús, ¿chumngechi quellufi pu che ñi doi piuqueyeafiel Jehová?
7 Jesús quimniefui tañi pu discipulo piuqueyefile Jehová, doi cüdautulayai ñi inayal tañi quimürpuel. Feimu Jesús quimeltulelquefui engün tañi doi piuqueyeafiel Jehová. Tüfa ta quiñe, trürümfi Jehová quiñe cüme chau mu ñi eluquefiel cümeque dungu tañi pu yall (Mat. 7:9-11). Quiñeque pu che allcütufilu Jesús nielafui chi quiñe poyen chau. Feimu Jesús nütramcalu quiñe poyen chau ñi huiño lloutufiel tañi fotüm huesaque dungu femlu, puhui ñi piuque mu engün. Tüfachi quimeltun rume quellufi pu che ñi ngüneduamal fente ñi poyefe chengen Jehová (Luc. 15:20-24).
8. ¿Chumngechi quelluafuimi quiñe estudiante ñi doi piuqueyeafiel Jehová?
8 ¿Chumngechi quelluafuimi quiñe estudiante ñi doi piuqueyeafiel Jehová? Rumel nütramcayafimi tañi rume cüme piuquengen Jehová. Fill rupa tami quimeltuquefiel Biblia, quimelelafimi tañi quimel feichi antü pengeli Jehová tañi piuqueyeteu. Nütramcafilmi Jehová ñi hulün tañi Fotüm, feipiafimi: “Femi tañi piuqueyefiel mu com pu che, doyelchi mai eimi tami duam mu” (Rom. 5:8; 1 Juan 4:10). Femngechi tati estudiante cüme adümfile fente ñi piuqueyeteu Jehová, doi amuleai ñi piuqueyefiel (Gál. 2:20).
9. ¿Chem quellueyu Miguel ñi cüme elcünutual ñi mongen?
9 Peaiñ Miguel ñi rupan, Indonesia mu mülelu. Quisu quimfi ti rüf dungu pichicalu müten, huelu turpu fautizaulai. Nielu 18 tripantu amui cañpüle tañi cüdahual, camionerongei. Huiñoi Indonesia mu, fei curengei ca niei quiñe ñahue. Huelu ca huiño amui ñi cüdahual cañpüle, quisulen amui. Tañi domo ca tañi ñahue eluhui ñi papeltual Biblia engu. Piuquentucuingu tañi quimürpuel. Miguel ñi ñuque lalu, huiñoi ñi cuidayafiel tañi chau. Feimu ca eluhui ñi papeltual Biblia. Papeltui ti lifru ¡Rumel ayüucüleaimi! Puulu ti quimeltun 27 mu, pefi ti troquiñ “Doi quimaimi” pingelu. Fei puhui tañi piuque mu. Fei ngümacahui raquiduamlu ñi fente cutrancahun Jehová langümüñmangelu tañi Fotüm. Ca quimtuculu Jehová ca Jesús ñi fente piuqueyeteu, rume mañumi. Cüme elcünutui ñi mongen, fei fautizahui.
QUELLUAFIMI TI ESTUDIANTE ÑI HUNENTUCUAFIEL JEHOVÁ
10. Jesús, ¿chumngechi quellufi tañi pu discipulo ñi doyümafiel ti amuldungun? (Lucas 5:5-11; ca inaduamnge ti adentun).
10 Quiñeque discipulo pürüm quimtucuingün Jesús tañi Mesías ngen. Huelu duamniefui quellu engün tañi cüme adümafiel ñi doyümafiel ti amuldungun tañi mongen mu. Pedro ca Andrés yenieuyefuingu fentren cüyen ñi inaniefiel ta Jesús. Fei Jesús mangeleyu ñi elcünual ñi cüdau engu, fei ñi fill antü compañquiyahulaeteu (Mat. 4:18, 19). Tüfa engu quiñentrür cüdauquefui Santiago ca Juan engu. Challhuaquefuingün, fei rume cüme amulequefui ñi cüdau engün (Mar. 1:16-20). Pedro engu Andrés eluulu ñi compañafiel Jesús, com cüme adcünupelai tañi familia ñi nieal com tañi duamnieel. ¿Chumngelu eluhuingu ñi elcünual ñi cüdau? Jesús femi quiñe afmatun dungu, femngechi pengelelfi Jehová tañi eluaeteu com tañi duamnieel. Tüfa quellueyu doi ñi maneluhual Jehová mu engün (papeltunge Lucas 5:5-11).
Jesús quellufi ñi pu discipulo ñi doyümafiel Jehová, ¿chumngechi inayentuafuiñ? (Inaduamnge parrafo 10). b
11. ¿Chem dungu feipiafuiñ tati estudiante ñi yafültucuñmayafiel ñi maneluhun?
11 Iñchiñ femlayafuiñ afmatufalchi dungu. Huelu feipiafuiñ Jehová quelluquefi com pu che doyümfilu ti amuldungun. ¿Acordanieimi chumngechi tami quellueteu Jehová hue amulu trahun mu eimi? Dungufimi chi tami jefe tami eluaeteu permiso tami amual trahun mu. Feipiafimi tami estudiante chumngechi tami quellueteu Jehová tami hunentucufiel mu, fei tüfa yafültucuñmaeimu tami maneluhun.
12. 1) ¿Chumngelu cümeafui tami mangelafiel caque rume peñi, lamngen tami quimeltumeal Biblia? 2) ¿Ca chem chumafuimi tami estudiante ñi doyümafiel Jehová tañi mongen mu? Feipinge quiñe pengelün dungu.
12 Tati estudiante ca cümelcayayu allcütufile ñi chumün caquelu peñi ca lamngen ñi doi cüdahuelafiel ta Jehová. Feimu cümeafui mangelfilmi caque rume peñi ca lamngen tami compañaeteu amulmi tami quimeltumeafiel. Feipiafimi tami compañ ñi nütramcayal chumngechi ñi quimfiel ta Jehová ca chem ñi chumün ñi hunentucuafiel ti amuldungun tañi mongen mu. Ca cümeafui tami elcünual tiempo pengelelafiel ti video mülelu ti troquiñ “Doi quimaimi” ca ti troquiñ “Ca peafuimi” pingelu, mülelu ti lifru ¡Rumel ayüucüleaimi! Papeltufilmu ti quimeltun 37, peafuimu ti video Jewba eluaeiñmew taiñ duamnieel ca nütramcayafuimu chumngechi ñi quelluaeteu Jehová doyümfile tañi mongen mu.
PEPICAFINGE TAMI ESTUDIANTE CAIÑETUNGELE
13. Jesús, ¿chumngechi pepicafi tañi pu discipulo caiñetungele?
13 Fentren rupa Jesús feipifi tañi pu discipulo ñi caiñetungeal, ca tañi familia cütu caiñetuafeyu (Mat. 5:11; 10:22, 36). Pichilehuelu ñi layal, Jesús ca feipifi quiñeque mu laconafui cütu tañi serfiniefiel mu Jehová (Mat. 24:9; Juan 15:20; 16:2). Cafei tañi amuldunguleal, feipifi cuñiutucuhual tañi chem femal ca tañi chem pial. Ca feipifi ñi chaftudungunoafiel tañi pu caiñe.
14. ¿Chumngechi pepicanieafuiñ taiñ pu estudiante caiñetungele? (2 Timoteo 3:12).
14 Jesús reque, iñchiñ cafei pepicayafuiñ taiñ pu estudiante. Feipiafuiñ quiñeque tañi pu compañ cüdau mu, quiñeque tañi pu familia ca hueni catrütudunguafeyu tañi papeltumequen mu Biblia (papeltunge 2 Timoteo 3:12). Quiñeque tañi pu compañ cüdau mu ayentuafeyu tañi caletun ca ñi cüme yenietun ñi mongen. Quiñeque mu, tañi pu familia cam caquelu che quiñeulayafui tañi quimün tripalelu Biblia mu. Cümeafui pürümquechi feipiafiel taiñ pu estudiante ñi rupayal tüfachi caiñetun dungu mu. Femngechi caiñetungele ti estudiante, pepicaucüleai chem femal ca chem feipial.
15. Tati estudiante caiñetueliyu ñi familia, ¿chumngechi quelluafuiñ?
15 Quiñeque tañi familia caiñetueliyu, quellufinge ti estudiante ñi raquiduamal chumngelu tañi feipieteu. “Pu testigo coilatumequeleyu” piafui tañi pu familia. Cam feipiafui “pu testigo huesaque chengei”. Jesús femngechi dungu mu rupai, quiñeque tañi pu familia raquiduami ñi hueluduamün ta Jesús (Mar. 3:21; Juan 7:5). Quimeltufinge tati estudiante ñi ñom piuquengeal ca piuqueyenquechi dunguafiel tañi pu familia ca caquelu che.
16. ¿Chumngechi quelluafuiñ ti estudiante ñi piuqueyenquechi pengelal tañi quimürpuel?
16 Quiñe tañi familia duamle ñi quimal Biblia mu, doi cümeafui chi estudiante pürümquechi com feipinoafiel. Femngechi femfule, tañi familia huesa duamafui ca pihuelayafui ñi nütramcalngeal Biblia mu. Doi mai feipifinge ti estudiante ñi pichin nütramcayal müten ca quimfalngepe. Femngechi tañi familia ca rupa ayüafui tañi nütramcalngeal Biblia mu (Col. 4:6). Tati estudiante ca feipiafui tañi pu che ñi conal jw.org mu. Femngechi duamle engün tañi doi quimal pu testigo mu, fei conafui taiñ pagina mu.
17. ¿Chumngechi pepicayafuimi tami estudiante huiñoldungulelafiel tañi pu ramtuqueteu? (Ca inaduamnge ti adentun).
17 Taiñ pagina jw.org mu mülei quiñe troquiñ feipilelu “Doi rupa ñi ramtungequeel”. Tüfa pengelelafuimi tami estudiante, femngechi ñi quim huiñoldungual ramturumefeliyu tañi pu familia cam compañ cüdau mu (2 Tim. 2:24, 25). Ca quimelelfinge caque quiñeque quimeltun nielu ti lifru ¡Rumel ayüucüleaimi!, mülei quiñe recuadro feipilelu “Quiñeque che feipiafeimu”. Feipifinge tami estudiante ñi adümcantunieafiel chumngechi ñi huiñoldungual. Ti estudiante duamle, feipiafimi chumngechi ñi doi cüme quimeltual ñi quimürpuelchi dungu.
Quelluafimi tami estudiante ñi adümcantual, femngechi doi cüdautulayai tañi amuldungual. (Inaduamnge parrafo 17). c
18. ¿Chumngechi quelluafuimi tami estudiante ñi publicadorngerpual? (Mateo 10:27).
18 Jesús huercüfi tañi pu discipulo amuldungulelafiel com pu che (papeltunge Mateo 10:27). Quiñe estudiante eluule tañi amuldungual com ruca mu, ngüneduamai Jehová tañi quelluqueteu, fei doi maneluhurpuai Jehová mu. ¿Chumngechi yafültucuafuimi tami estudiante quelluconal amuldungun mu? Feipingele ñi müleal quiñe campaña taiñ amuldungual, feipifinge tami estudiante: “¿Chem raquiduamcüleimi tami publicadorngeal?”. Feipifinge tami estudiante: “Doi adümfali amuldungual mülele quiñe campaña”. Ca dungu quelluafeyu tati estudiante: huirintucuafui ñi üi tañi hulal nütramcan tati trahun rangiñ semana mu, femngechi doi cüme adümcahuai ñi quimeltucheal.
MANELUHUAIMI TAMI ESTUDIANTE MU
19. Jesús, ¿chumngechi pengelelfi tañi pu discipulo ñi maneluucülen quisu engün mu ca chumngechi inayentuafuiñ?
19 Petu ñi amutunon huenu mu, Jesús feipifi tañi pu discipulo: “Cüpalechi antü mu ca huiño trahuluutuaiñ”. Feichi mu fei engün adümlafuingün Jesús ñi feipimequeteu ñi amual engün huenu mu. Petu quimnolu engün rume quiñeque dungu, Jesús doi piuquentucuniei ñi inayaeteu engün (Juan 14:1-5, 8). Jesús quimniefui fei engün duamniefui tiempo tañi adümafiel quiñeque dungu. Quiñe tüfa, tañi amual huenu mu engün (Juan 16:12). Iñchiñ ca Jesús reque pengelelafiyiñ taiñ pu estudiante maneluucüleiñ ñi serfiafiel engün ta Jehová.
Quiñe estudiante eluule tañi amuldungual, ngüneduamai Jehová tañi quelluqueteu, fei doi maneluhurpuai Jehová mu
20. Quiñe lamngen, ¿chumngechi pengeli maneluucülen tañi estudiante mu?
20 Com taiñ piuque mu maneluucüleaiñ taiñ estudiante ayüniefui tañi ayühulafiel ta Jehová. Peaiñ quiñe rupan dungu. Quiñe lamngen mülelu Malaui mu eluhui ñi quimeltulelafiel Biblia quiñe catolicangechi domo. Petu papeltulu engu ti quimeltun 14 ti lifru ¡Rumel ayüucüleaimi!, taiñ lamngen ramtufi: “¿Chem pimi cai ñi püramyengeal Chau Dios adentun meu?”. Ti domo illcui ca feipi: “Püramyefili Chau Dios adentun mu, iñche ñi dungu müten”. Feimu, “¿fantepupelai tañi estudiante?” pi taiñ lamngen. Huelu taiñ lamngen ñom piuque mu quimeltuniefi Biblia, maneluucülei tañi estudiante ñochiquechi quimürpuai ñi cümenon püramyengeal Chau Dios adentun mu. Quiñeque cüyen rupalu, papeltuingün ti quimeltun 34. Niei quiñe ramtun feipilelu: “Feula doi quimimi tati Biblia, ca doi fülmanieimu ta Jehová, ¿chumngechi quellueimu ta tüfa tami mongen meu?”. Tati estudiante feipi fentren cümeque dungu tañi quimürpun, ca feipi: “Feipile Biblia ñi cümenon, pu testigo femquelai”. Pichin antü mu, tüfachi domo elcünui ti adentun, fei fautizahurpui.
21. ¿Chumngechi quelluafuiñ taiñ estudiante ñi serfiafiel Jehová?
21 Quimnieiñ Chau Jehová “tremümquefi ti fün”. Huelu iñchiñ ca quelluntucuafuiñ ti estudiante ñi serfirpuafiel ta Jehová (1 Cor. 3:7). Re quimeltuquelafiyiñ Jehová tañi huercün dungu, ca quelluquefiyiñ tañi doi piuqueyeafiel Jehová. Ca quelluquefiyiñ tañi mongen mu ñi hunentucuafiel Jehová, femngechi ñi pengelal tañi piuqueyefiel. Ca quimeltuquefiyiñ chumngechi ñi maneluhual Jehová mu caiñetungen mu. Ca pengelquefiyiñ taiñ estudiante taiñ maneluucülen quisu mu, femngechi nehuencünuhuai ñi serfiafiel Jehová.
ÜLCANTUN 55 ¡Llicaquilnge!
a Doi epu tripantu rupalu Nicodemo ñi nütramcafiel Jesús, petu coneltulefui pu judio ñi doi falin tribunal mu (Juan 7:45-52). Quiñeque historiador feipi Nicodemo ñi discipulongerpun rupan lalu ta Jesús (Juan 19:38-40).
