Pu papeltuquelu ñi ramtuqueel
¿Inei am tati “domo” feipilu Isaías 60:1? ¿Chumngechi am “huitrapürai” ca “huilüfcülei”?
Isaías 60:1 feipi: “Huitrapürange domo, huilüfcületunge, cüpalu am tami pelon. Jehová ñi afmatufalngen huilüfcülei eimi mu”. Ñi feipin ta Isaías pengeli ti “domo” fei ta Sion, tüfa ta Jerusalén ürque, Judá ñi capital ürque cuifi mu (Is. 60:14; 62:1, 2). Jerusalén pengelquefui reque com Israel huaria. ¿Chumül ca chumngechi huitrapürai ca huilüfquei Jerusalén? Quiñeque dungu ñi feipin Isaías, ¿femtripalerpui famülque mu? Huiñoldunguaiñ tüfachi epu ramtun.
¿Chumül ca chumngechi huitrapürai ca huilüfquei Jerusalén? Pu judio yengei ta Babilonia, mülefuingün 70 tripantu mu. Teifücangei Jerusalén huaria ca ti ngillatuhue ruca. Pu medo ca persa lefcontufilu Babilonia, pu Israel che elungei ñi huiñotual tañi mapu mu ca huiño poyetuafiel engün ta Jehová (Esd. 1:1-4). Fei 537 tripantu petu ñi mülepanon Jesús, quiñeque judio 12 Israel troquiñche tuulu huiñotuingün (Is. 60:4). Elutufingün chalintucun ta Jehová, fiestañmaquefuingün ca huiño deumatufingün ti ngillatuhue ruca (Esd. 3:1-4, 7-11; 6:16-22). Fei hula, Jehová ñi afmatufalngen huiño huilüfcületui Jerusalén mu, Jehová tañi pu che mu. Quiñe pelon-ngerpuingün reque caquelu troquiñche mu quimnofilu Jehová.
Ñi feipicünuel Isaías com femtripalai cuifi Jerusalén mu. Fentren pu Israel che eluulaingün ñi feyentuafiel ta Chau Jehová (Neh. 13:27; Mal. 1:6-8; 2:13, 14; Mat. 15:7-9). Doi mai famentufingün cütu Jesús, tati Mesías (Mat. 27:1, 2). Af mu, Jerusalén ca ti ngillatuhue ruca 70 tripantu mu ca huiño teifücangei.
Jehová deu feipicünufui ñi rupayal tüfa (Dan. 9:24-27). Quimfali ñi feipicünuel Jehová Isaías capitulo 60 mu, com femtripalayafui cuifi Jerusalén mu.
Quiñeque dungu ñi feipin Isaías, ¿femtripalerpui famülque mu? Mai, huelu feula tati “domo” adentulei cangelu dungu: tati “huenu mülechi Jerusalén”. ¿Chem am ta tüfa? Com pu cümeque püllü mülelu huenu mu, fei engün coneltulei Jehová tañi troquiñche mu. “Iñchiñ taiñ ñuque tati” pi apostol Pablo (Gál. 4:26). Ti domo tañi pu püñeñ fei ta Jesús ca pu 144.000 dullin cristiano maneluucülelu ñi müleal huenu mu, quiñe tüfa tati apostol Pablo. Fei engün “quiñe lif troquiñche” ca “Chau Dios ñi Israel troquiñche” pingeingün (1 Ped. 2:9; Gál. 6:16).
Huenu mülechi Jerusalén, ¿chumngechi huitrapürai ca huilüfquei? Peaiñ chem ñi rupan tañi pu püñeñ, pu dullinque cristiano mapu mu ca chumngechi nüucülei ñi feipin Isaías capitulo 60.
Peaiñ chumngechi huitrapüraingün pu dullinque cristiano. Deu lalu tati pu apostol, fentren pu che caiñetufingün ta Chau Dios, dumiñ mu reque mülequefuingün (Mat. 13:37-43). Pu dullinque cristiano presulequefuingün reque tati Fütra Babilonia mu, tüfa adentulei com pu coilaque religion. Presulequefuingün puulu ñi conal ti afaelchi antü “mapu müleyechi dungu”, tüfa coni 1914 tripantu mu (Mat. 13:39, 40). Fei 1919 tripantu mu lifretripaingün, fei eluhui tañi huilüfal engün, ¿chumngechi? Com piuque mu eluhui ñi amuldungual engün. a Feichi llemai, fillque lof tuhun che fülconingün tüfachi pelon mu. Quiñeque engün pu dullin cristiano petu mülelu mapu mu, fei tati pu lonco ülmen ñi nütramcael Isaías 60:3 mu (Apoc. 5:9, 10).
Cüpalechi antü mu, pu dullinque cristiano doi huilüfelafingün Jehová tañi pelon. Lale mapu mu, amutuaingün huenu mu, conelturpuaingün “ti Hue Jerusalén” mu. Tüfa ta Cristo tañi novia, coneltuleingün pu 144.000 lonco ülmen ca sacerdote (Apoc. 14:1; 21:1, 2, 24; 22:3-5).
Ñi femtriparpual Isaías 60:1, rume falin-ngei ñi femal ti Hue Jerusalén (ca inaduamnge Isaías 60:1, 3, 5, 11, 19, 20 ca Apocalipsis 21:2, 9-11, 22-26). Cuifi mu, Jerusalén mu mülequefui ti gobierno ñi ngüneniequefel com pu Israel che, ca femngechi ti Hue Jerusalén Jesús engu ngünenieai com tati mapu, feimu llemai feipingei “huenu mu nagcülepai cheu ñi mülen Chau Ngünechen”. Biblia feipi tüfachi “huaria ñi pelon mu miyahuaingün” com lof mapu mülechi pu che, culpahuelayaingün ca lahuelayaingün (Apoc. 21:3, 4, 24). Femngechi ‘huecünungetuai com dungu’, chumngechi feipi Isaías ca caquelu Chau Ngünechen ñi pu huerquen (Hech. 3:21). Cristo deu lonco ülmen-ngelu, eluhui ñi huecünutuafiel com dungu, fentepuule hula huaranca tripantu ñi ngünenien.
a Ezequiel 37:1-14 ca Apocalipsis 11:7-12 ca feipi ñi huiño poyengetun Ngünechen 1919 tripantu mu. Ezequiel feipicünui alüñma rupale ñi presulequen reque engün, com pu dullinque cristiano lifretripayaingün ñi poyeafiel Jehová. Ca Apocalipsis feipicünui chem ñi rupayal quiñe pichi troquiñ dullin cristiano ngüneniefilu taiñ cüdau. Feichi troquiñche pepi cüdahuel-lafingün Jehová pichiñma mu, presuntucungeingün chem ñi chumnon mu rume, fei lifrecünungetuingün. Fei 1919 tripantu “quim manelfal cüdaufe” pingetuingün (Mat. 24:45; inaduamnge La adoración pura de Jehová: ¡por fin restaurada!, pag. 118).
