1. ¿Chem cüme quimfalcülei? Ca ¿chumngelu?

 FENTREN huesaque dungu ñi ruparupangen mu, quiñeque mu ramtuuqueiñ: ¿rupapeai mai feitachi huesaque dungu? Tati pu familiahuen nehue piuqueyehuelai. Pu che ayüquei tañi quehuayal engün müten ca ayüquei quisu müten tañi fürenengeal, ca femngechi tati pu autoridad manelfalhuelai. Huelu ti Biblia feipicünui com feitachi dungu ñi rupayal epe puucülele ñi afal huesaque dungu, feimu maneluucüleafuiñ ñi cüme elcünungetual chi dungu (2 Tim. 3:1-5). Ñi huechutriparpumequen tüfachi dungu ñi feipicünuel Biblia, cüme quimfalcülei Jesús ñi reycületun Chau Dios ñi Gobierno meu. Huelu feitachi profecia müten mülelai, ca mülei caquelu profecia Jehová ñi Gobierno mu. Quiñeque deu huechutriparpui ca quelluaiñmu taiñ doi feyentuleal.

2. ¿Chem peaiñ feitachi chillcatun mu? (Inaduamnge ti adentun hunen pagina mu).

² Feitachi chillcatun mu ngüneduamaiñ quiñeque profecia. 1) Quiñe profecia quelluaiñmu quimal chumül elcünungei Chau Dios ñi Gobierno. 2) Cangelu profecia  pengeli Jesús ñi reycületun huenu mu Chau Dios ñi Gobierno mu. Ca 3) ca profecia mu pengeli com pu caiñetuquefilu Jehová tañi Gobierno apümcangeaingün. Com feitachi profecia quiñeucüleingün reque, fei pengelaiñmu ñi fülcülepan Jehová tañi antü.

3. Ñi feipicünuel Daniel 7:13, 14, ¿chem pengeli?

³ Ti profecia mülelu Daniel 7:13, 14 pengeli Jesús fei tati doi cüme gobernante Chau Dios ñi Gobierno meu, ca turpu aflayai tañi ngünenieel. Com pu che ayühunquechi poyeafi engün. Daniel ca feipicünui Jesús ñi ngünenieal afle hula regle tripantu. ¿Quimpeafuiñ mai chumül tañi reyngerpun? Mai, peafiyiñ.

4. Ñi feipin Daniel 4:10-17, ¿chumngechi quellueiñmu quimal chem tripantu mu ñi reycünungen ta Jesús? (Inaduamnge ti quimal dungu).

⁴ (Papeltunge Daniel 4:10-17). ¿Chem adentulei feitachi regle tripantu? Tüfa ta 2.520 tripantu ürque. Tüfa coni 607 tripantu petu ñi mülepanon Jesús, feichi pu Babilonia che apümcafilu Jerusalén ca mülehuelai quiñe rey no rume. ¿Chumül afi tati regle tripantu? 1914 tripantu mu. Feichi antü Jehová reycünufilu ta Jesús ca elufi autoridad tañi ngünenieal Jehová ñi Gobierno mu (Ezeq. 21:25-27). b

5. Cüme entendefiliyiñ tati regle tripantu, ¿chumngechi quelluaiñmu?

⁵ ¿Chumngechi quelluqueiñmu feitachi profecia? Cüme entendefiliyiñ feitachi profecia nütramcalu regle tripantu mu, doi maneluhuaiñ Jehová mu ñi huechurpual tañi feipicünuel puuchi antü meu. Jehová cüme quimniefui chem tripantu mu tañi reycünuafiel ta Jesús, fei aculu feichi tripantu femcünufi. Ca femngechi huechurpuai caquelu dungu tañi feipicünuel. Felei llemai, Jehová tañi antü alüñmalayai ñi acual (Hab. 2:3).

6. 1) ¿Chem pengeli Jesús ñi ngünenietun huenu mu? 2) Ñi feipiel Apocalipsis 6:2-8, ¿ca chumngechi quimfalcünungei Jesús ñi ngünenietun huenu mu?

⁶ Mülepalu mapu mu Jesús feipicünui quiñeque dungu ñi rupayal, femngechi tañi pu discipulo quimaingün chumül ñi ngünenietual Jesús huenu mu. Jesús feipicünui ñi müleal fütraque quehuan, ngüñün ca fütraque nüyün. Ca feipicünui ñi müleal huesaque cutran fill püle, por ejemplo ti huesa cutran COVID-19. Com feitachi dungu ñi rupayal cüme quimfalcünuaingün Jesús tañi ngüneniemequen huenu (Mat. 24:3, 7; Luc. 21:7, 10, 11). Doi 60 tripantu rupalu ñi lan ta Jesús ca ñi huiñotun huenu meu, Jesús ca quimfalcünulelfi tati apostol Juan com feitachi dungu tañi rupayal (papeltunge Apocalipsis 6:2-8). Com feitachi huesaque dungu ruparupangei reycünungelu ta Jesús 1914 tripantu mu.

7. Reycünungelu Jesús huenu mu, ¿chumngelu fentren huesaque dungu ruparupangei mapu mu?

⁷ Reycünungelu ta Jesús huenu mu doi huesaque dungu mülei mapu mu. ¿Chumngelu? Apocalipsis 6:2 feipi hue reycünungelu ta Jesús hueichafi Huecüfü ca tañi huesaque püllü. Apocalipsis capitulo 12 pengeli Huecüfü ñi hueungen, ca quisu ca tañi huesaque püllü ütrüfnacümngepai mapu mu.  Feimu Huecüfü rume illculei, fei ñi duam mu ruparupangei huesaque dungu mapu mu (Apoc. 12:7-12).

8. Ñi huechutriparpumequen Biblia ñi feipin, ¿chumngechi quelluqueiñmu?

⁸ ¿Chumngechi quelluqueiñmu feitachi profecia? Pefiel mu iñchiñ pu che ñi femqueel quimnieiñ Jesús ñi deu ngünenieel huenu mu. Huesa duamcülelayaiñ ñi huesa piuquengen mu pu che. Doi mai, loncontucuaiñ tañi femqueel mu pu che huechutriparpumequei Biblia ñi feipin. Chau Dios ñi Gobierno deu ngüneniei (Sal. 37:1). Doi fülcülepale ti Armagedón, doi huesaque dungu müleai (Mar. 13:8; 2 Tim. 3:13). Rume mañumniefiyiñ ta Chau Jehová, quisu quelluqueiñmu taiñ quimal chemu ñi ruparupangen huesaque dungu mapu mu.

9. ¿Chumngechi adentucünungei ti inan fütra gobierno? ¿Chumül peufaluhui? (Daniel 2:28, 31-35).

⁹ (Papeltunge Daniel 2:28, 31-35). Fachantü ca huechutriparpumequei tüfachi profecia. Ti peuma ñi nieel ta Nabucodonosor pengeli “chem tañi rupayal ti afaelchi antü meu” reycünungelu ta Jesús. Com Jesús ñi pu caiñe, quiñe feita ti inan fütra gobierno ñi feipicünuel Biblia. Ti “namun pichin pañillhue mu ca pichin fotra mu” deumangelu adentulei feitachi fütra gobierno, fei ta deu ngüneniei. Feitachi fütra gobierno peufaluhui quiñeulu Gran Bretaña ca Estados Unidos tati Primera Guerra Mundial mu. Ñi peel ta Nabucodonosor quimeltueiñmu epu dungu feitachi fütra gobierno mu. Peafiyiñ.

10. 1) ¿Chumngechi adentucünungei Gran Bretaña Estados Unidos engu ca chumngelu raquiduamfali? 2) ¿Chem mu cuñiutucuhuaiñ? (Inaduamnge ti huichulechi dungu “ ¡Cuñiutucuucülenge!”).

 ¹⁰ Hunelu mu, chumngechi ñi adentucünungeel feitachi fütra gobierno trürlai caquelu fütraque gobierno mu. Estados Unidos engu Gran Bretaña adentucünungelai oro mu cam plata mu, huelu mai hierro ca fotra mu. ¿Chem adentulei ti fotra? Adentulei tati pu che (Dan. 2:43). Famülque mu, tati pu che protestaquei ca feipiquei ñi respetañmangeal tañi derecho. Ñi femqueel mu pu che, Estados Unidos engu Gran Bretaña cüdautuquei tañi femal ñi ayüqueel.

11. ¿Chumngechi nehuentucuqueiñmu ñi feipin Biblia Estados Unidos ca Gran Bretaña mu?

¹¹ Epu, Estados Unidos engu Gran Bretaña adentucünungei ti adentun ñi namun mu. ¿Chumngelu? Tüfa tati inan fütra gobierno ñi feipicünungeel Biblia mu. Tüfachi fütra gobierno ca caquelu gobierno apümcangeaingün Armagedón hueichan mu ca chem gobierno no rume ngehuelayai (Apoc. 16:13, 14, 16; 19:19, 20). c

12. ¿Ca chem dungu ñi feipin Daniel nehuentucuqueiñmu ca eluqueiñmu maneluhun?

¹² ¿Chumngechi quelluqueiñmu feitachi profecia? Ca dungu ñi feipicünuel Daniel pengelqueiñmu ñi epe puucülen ñi afal huesaque dungu. Doi 2.500 tripantu cuifi, Daniel feipicünui apümcangele Babilonia, meli fütraque gobierno müleai fei ngünenieafingün com ti pu che, Jehová ñi pu che cütu. Meli fütraque gobierno mu, ti inan fütra gobierno fei ta Estados Unidos engu Gran Bretaña. Fei ta nehuentucuqueiñmu ca eluqueiñmu maneluhun. ¿Chumngelu? Quimnieiñ pichi faltai Chau Jehová ñi apümcayafiel com pu gobierno, fei ñi ngünenieal com ti mapu (Dan. 2:44).

13. 1) Ñi feipin Apocalipsis 17:9-12, ¿inei am tati ‘purangechi lonco ülmen’ ca tati “mari lonco ülmen”? 2) ¿Chumngechi femtripamequei feitachi profecia?

¹³ (Papeltunge Apocalipsis 17:9-12). Tati Primera Guerra Mundial rume huesalcafi com mülelu, feimu ca huechurpui ca dungu ñi feipicünuel ta Biblia. Pu gobierno ayüfuingün ñi müleal ta tüngün com mapu püle. Feimu enero cüyen 1920 tripantu mu elcünungei ti Sociedad de Naciones pingelu. Fei octubre cüyen 1945 tripantu mu Naciones Unidas pingetui. Ti Biblia üitueyu ti ‘purangechi lonco ülmen’. Huelu tüfa quiñe fütra gobierno no tati. Ti Naciones Unidas niefui ta nehuen huelu caquelu gobierno ñi duam mu. Biblia feipi feitachi pu gobierno mu “mari lonco ülmen”.

14, 15. 1) ¿Chem feipi Apocalipsis 17:3-5 ‘tati Fütra Babilonia’ mu? 2) ¿Chem rupamequei tati coilaque religion?

¹⁴ (Papeltunge Apocalipsis 17:3-5). Quiñe peuma mu, Jehová pengelfi ta Juan quiñe prostituta, ‘tati Fütra Babilonia’ pingefui. Tüfachi domo adentulefui com tati coilaque religion mu. ¿Chumngechi femtripamequei Juan tañi peuma? Fentren tripantu mu pu coilaque religion cüdauqueingün pu gobierno engün ca quelluntucuquefingün. Huelu pichiñma mu Jehová raquiduamelafi tati pu gobierno ñi femal Jehová tañi ayünieel. ¿Chem rupayai? Tati “mari lonco ülmen” lefcontuafi tati  coilaque religion ca apümcayafi (Apoc. 17:1, 2, 16, 17).

¹⁵ ¿Chumngechi quimnieiñ ñi fülcülepan ñi apümcangeal ‘tati Fütra Babilonia’? Acordayaiñ chem ñi rupan cuifi chumngechi feitachi fütra leufü Éufrates pingelu cuñiutucuquefui tati Babilonia huaria. Feitachi leufü ancüi, fei cuñiutucuhuelafi tati huaria. Ca femngechi rupaquei ta fachantü. Apocalipsis feipi com tati che coneltulelu tati Fütra Babilonia co quechilei, cuñiutucuquefi (Apoc. 17:15). Huelu ca feipi feitachi co ñi ancüal. Feimu fentren che coneltuhuelayafui tati coilaque religion mu (Apoc. 16:12). ¿Chumngechi huechurpumequei fei ta ñi feipicünun ta Biblia? Fentrenque che famtripamequei feitachi coilaque religion, quintuquei cañpüle ñi quellungeal engün.

16. Ñi feipin ta Biblia ti Naciones Unidas mu ca ti Fütra Babilonia mu, ¿chem pengeleiñmu?

¹⁶ ¿Chumngechi quelluqueiñmu feitachi profecia? Elcünungelu tati Naciones Unidas ca fentren che ñi famtripamequen coilaque religion mu pengeleiñmu ñi epe puucülen ñi afal huesaque dungu. Huelu ti Fütra Babilonia apümcangelayai tañi coneltuhuenon fentren che. ¿Chumngechi  apümcangeai? Jehová raquiduamelafi tati pu gobierno quelluntucuquefilu tati Naciones Unidas ñi femal Jehová tañi ayünieel. Femngechi tati coilaque religion apümcangerumeai (Apoc. 18:8-10). d Apümcangele ti Fütra Babilonia, huesaque dungu müleai com mapu meu. Huelu iñchiñ, Jehová ñi pu che, epu dungu mu ayüucüleafuiñ. Quiñe, ngehuetulayai tati coilaque religion. Ca epu, lifrecünungeaiñ com huesaque dungu mu (Luc. 21:28).

17, 18. 1) ¿Chem quelluafeiñmu taiñ nehuentuleal taiñ feyentulen Jehová mu? 2) ¿Chem peaiñ cüpalechi chillcatun mu?

¹⁷ Daniel feipicünui “tati rüf quimün alün-ngerpuai”. Femngechi tripamequei. Doi cüme adümürpuquefiyiñ fentren dungu ñi feipicünuel Biblia (Dan. 12:4, 9, 10). Feitachi profecia huelulcauquelai, com ñi feipicünuel femtriparpuquei, feimu iñchiñ doi feyentuquefiyiñ ca yamquefiyiñ ta Jehová ca tati Biblia (Is. 46:10; 55:11). Feimu nehuentuleaiñ taiñ feyentulen Jehová mu. ¿Chem quelluafeiñmu? Cüme papeltunieafiyiñ ta Biblia ca quelluafiyiñ ta caquelu ñi hueniyeafiel ta Jehová. Chau Jehová cuñiutucunieafi com tati maneluuquelu quisu mu ca eluafi tañi “tüngcüleal” (Is. 26:3).

¹⁸ Cüpalechi chillcatun mu, peaiñ quiñeque profecia ñi huechurpumequen famülque mu ti trahunche mu. Ñi huechutriparpumequen feitachi profecia ca pengelelqueiñmu ñi pichilehuen ñi afal huesaque dungu. Ca peaiñ quiñeque dungu pengelquelu Jesús ñi adniefiel Jehová tañi pu che fachantü.