Tati Biblia quimeltui Chau Jehová quiñeque mu feipiquei chem ñi rupayal cüpalechi antü mu (Is. 45:21). ¿Chumül femquei? ¿Chumngechi femquei? ¿Com ayüquei ñi quimal chem ñi rupayal cam quiñeque dungu müten? Biblia com feipilai, feimu cüme quimlaiñ. Huelu peaiñ quiñeque dungu.

Jehová com femafui tañi ayüqueel, quisu müten fentecünuan piafui reque. Jehová com quimün niei. Feimu ayüfule, quimafui com ñi rupayal (Rom. 11:33). Huelu Jehová ngüneuquei, feimu dulliafui ñi quimnoal quiñeque dungu ñi rupayal.

Jehová femürpuquei tañi ayüqueel. Isaías 46:10 feipi: “Ellaca mu feipicünun chem ñi rupayal, ca fütra cuifi chi dungu ñi femngequenon; Iñche feipin: ‘Iñche quisu ñi ngülam rumel müleai, ca itrocom ñi ayüqueel feman’”.

Felei llemai, Jehová nehuen-ngei ñi femal itrocom ñi ayüqueel, feimu duamnielai ñi peal chem ñi rupayal cüpalechi antü mu. Feipicünule ñi femal quiñe dungu, femürpuai müten. Raquiduamnge tüfa: iñchiñ taiñ quimal chem ñi rupayal afle quiñe lifru, rulparulpacünuafuiñ müten taiñ pürüm quimal. ¿Femquepei mai Jehová tañi peal chem ñi rupayal cüpalechi antü mu? Femlai. Jehová duamnielai peafiel reque chem ñi rupayal. Doi mai quiñeque mu Jehová feipicünuquei chem ñi rupayal, fei acule chi antü femürpuai müten (Éx. 9:5, 6; Mat. 24:36; Hech. 17:31).

Jehová feipin mu chem ñi rupayal, Biblia feipi Jehová deumafi cam eluhui ñi femal quiñe dungu (2 Rey. 19:25; Is. 46:11). Tüfachi dungu hebreo quehun mu, raquiduamelafeiñmu quiñe deumaquefilu quiñe metahue (Jer. 18:4). Quiñe cüdaufe nüi tati rag, masaquefi, fei deumafi quiñe metahue. Ca femngechi Jehová femquei reque ñi femtripayal quisu tañi ayüqueel (Efes. 1:11).

Jehová eluquefi pu che ñi quisutu dullial tañi chumal. Quisu dullilelquelafi chem dungu mu ñi rupayal caque quiñeque che. Ca dicümtucuquelafi cümeque che ñi femal huesaque dungu tañi huesalcayaeteu. Jehová elufi pu che quisutu dullial chumngechi tañi yenieal tañi mongen. Huelu enseñaquefi chumngechi taiñ cüme mongen yenieal.

Peaiñ epu dungu. Hunelu mu, ngüneduamaiñ chem ñi rupan pu Nínive che. Huesaque dungu ñi femquefel engün, feimu Jehová feipi tañi apümcangeal. Huelu tati pu Nínive che repentiuhuingün. Feimu Jehová “femürpulai tañi feipicünuel, fei huercülafi ti huesa dungu” (Jon. 3:1-10). Jehová inaduami pu Nínive che cüme elcünutueyu ñi mongen engün. Feimu feipicünulu rume tañi apümcangeal engün, Jehová cacünutui tañi raquiduam.

Epu dungu. Jehová feipicünui quiñe huentru Ciro pingelu ñi lifrenentuafiel tati pu judio Babilonia mu, ca ñi cüme elngetual Chau Jehová ñi ruca (Is. 44:26–45:4). Ti lonco ülmen Persia mapu mu Ciro pingelu huechurpui tañi feipicünuel ta Jehová (Esd. 1:1-4). Huelu Ciro poyequelafui ta Jehová. Jehová adcünufi ta Ciro ñi femal tañi feipicünuel, huelu obligalafi ta Ciro tañi poyeaeteu (Prov. 21:1).

Ñi quimal chem dungu ñi rupayal, Jehová ngüneduamquei fentren dungu. Iñchiñ taiñ chengen com quimlayafuiñ ñi femquen Jehová (Is. 55:8, 9). Huelu taiñ quimün ta Jehová, doi maneluuqueiñ com tañi femquen norngei. Ca femngechi femquei feipicünun mu chem ñi rupayal.