Iñche ayecahun, quimlafun tañi hueni ñi religiosongen. “¿Eimi chem quimimi Biblia mu?” pifiñ. Ramtufilu iñche, pürüm lloudungulaeneu, huelu feipieneu tañi ñuque ñi Dunguquelu Ineingen Jehová ngen, feimu pichi quimürpun pieneu. Ayüfilu am iñche, feimu ramtucadungufiñ.

Epe com pun nütramcayu. Tañi hueni feipieneu Biblia feipi tati Huecüfü ngüneniefi com ti mapu (Juan 14:30). Eimi cuifi chi quimquefuimi feitachi dungu, huelu iñche quimquelafun, feimu ayüfun tañi doi quimal. Iñche allcüquefun Chau Dios ñi ngüneniefiel mapu, iñche quimniefun Chau Dios ñi cüme piuqueyechefengen, huelu ¿chumngelu fente huesaque dungu mülei? ramtuhun. 26 tripantu müten niefun, huelu pequefun fente huesaque dungu tañi rupamequen.

Tañi chau manejaquefui avion, coneltuquefui Fuerza Aérea Estados Unidos mu. Pichicalu müten iñche, quimniefun ñi mülerumeal quiñe hueichan. Tati pu soltau eluucülefui ñi hueichayal engün. Iñche mülelu universidad mu, mülerumei quiñe hueichan Vietnam mapu mu. Iñche protestaquefun caquelu estudiante iñchiñ. Tati pu soltau mamüll mu inacaqueiñmu, ütrüftungequeiñ gas lacrimogeno, feimu lefcülen tripaquefuiñ. Pepi neyequelafuiñ rume ca pelohuequelafuiñ. Feichi mu pofolcaumequei pu che, fentren politico langümngei ca pu che protestaquefuingün. Caquerume raquiduam niequefui ta che, com huesalcalefui.

1970 tripantu mu eluhun ñi cüdahual Alaska mu. Trapümün fentren plata. Rupachi antü mu amun ta Londres, fei ngillan quiñe moto. Fei tripan, quimlan rume cheu tañi amual. Mufüque cüyen mu, puhun África mu. Rüpü mu pefiñ fentrenque che iñche reque ayülu ñi lefmahual tañi mapu mu, femngechi ñi quintual tañi nieal doi cüme mongen.

Allcütuquefun ca pequefun fentren huesaque dungu. Fei feipingen mu ta iñche Huecüfü ñi ngüneniefiel ta mapu, rüfngelu troquifiñ. Fei ramtuhun: “Chau Dios ngünenienole ta mapu, fei ¿chummequei am?”. Ayüfun tañi quimal.

 Rupayechi cüyen mu, quimürpun. Cafei quimürpufiñ fentren pu peñi, pu lamngen feyentuquefilu ta Chau Dios, chem dungu mu rupafule rume engün.

Huiñotulu ta Londres ta iñche, quintufiñ tañi hueni tañi ñuque, fei elueneu quiñe Biblia. Rupachi antü mu, amun Ámsterdam mu. Quiñe antü, papeltumequelu Biblia ta iñche, perumeeneu quiñe peñi, fei quelluqueneu. Amulu Dublín, Irlanda mapu mu, pefiñ cheu ñi mülen Betel. Tralentralentufiñ tati puerta, fei tripai quiñe peñi Arthur Matthews pingei. Rume quimfui ca adümuufui. Fei feipifiñ tañi enseñaleteu ta Biblia, fei femiyu.

Ayühunquechi papeltun, ayüniefun tañi papeltuafiel ti lifru ca revista ñi nieel pu testigo, doi mai tati Biblia ayüñmaniefuiñ. Amulu ta trahun mu iñche, pefiñ quenü tati pichique che ñi cüme lloudungumequen falinque dungu ñi ramtuuquefel pu che. Por ejemplo: “¿Chemu ñi mülen fente huesaque dungu? ¿Inei am ta Chau Dios?, ca ¿chumletui pu lachi che?”. Trahuquefun tati pu testigo engün müten, quimnofilu am caquelu che feitachi pais mu. Tati pu testigo quelluqueneu ñi poyerpuafiel ta Jehová ca tañi femal Chau Dios tañi ayüqueel.

Fei 1972 fautizahun. Quiñe tripantu rupalu, precursorngen quiñe pichi congregacion mülelu Newry mu. Alquilafiñ quiñe ruca inafülcülelu mahuida mu. Inafül cheu tañi mülen mu tañi ruca, mülequefui fentren culliñ. Fei tañi adümcantuafiel tañi hueupin, amuquefun cheu tañi mülen tati pu huaca. Iñche ta allcütueteu troquiquefiñ engün. Chem piquelafeneu rume, huelu quelluqueneu chumngechi tañi ngüneltuafiel ta che huli tañi hueupin. 1974 tripantu mu, precursor especialngerpun, compañquefeneu Nigel Pitt, fei cüme hueniyehuiyu.

Feichi mu, rupamequefui huesaque dungu Irlanda mapu mu, tati bomba ca tati bala feipingequefui feitachi mapu, fei mu huimtulequefui ta che ñi quehuayal. Tralcatumequengequei ta che ca tuculelngei bomba tati auto meu. Com tati pu che quehuaquefui politica dungu mu ca religion mu. Huelu tati pu protestante ca pu catolico quimniequefui tati pu testigo ñi coneltuquenon politica dungu mu, feimu elungequei taiñ amuldungual. Tati ngenque ruca feipiquefeiñmu cheu ñi mülean quehuan, femngechi taiñ amunoal fei mu.

 Femfule rume, quiñeque mu llicalefuiñ. Quiñe antü, amuldunguquefuyu tañi peñi Denis Carrigan iñchiu, quisu ca precursorngefui. Feichi huaria mu tayu amuldunguyahun epu rupa amufuyu, huelu ngequelafui quiñe testigo no rume. Quiñe domo soltau troquieiñmu, fei feipintucueiñmu taiñ lloftuyahulfiel. Iñchiu dungulayu tati pu irlandes reque, ¿fei mu peno feipieiñmu? Llicalefuyu. Feichi mu, hueniyefulmi quiñe soltau langümngeafuimi cam tralcatungeafuimi matra mu. Huitralefuyu tayu esperanieafiel ti micro, hutrelefuyu ca quisulefuyu. Fei acurumei quiñe auto cheu tañi mülen tati domo, fei fülcontupufi tati domo. Fei tati domo nütramcafi tati epu huentru mülelu auto mu, sichosichoyeyumu tañi changüll cuhu mu. Tati epu huentru ñochiquechi fülcontueiñmu. Ramtueiñmu chem hora ñi rupaquen tati micro. Aculu tati micro, tati epu huentru nütramcafi ti manejaquelu ti micro, huelu iñchiu allcülayu chem tañi feipifiel engu. Tati micro mu ngelafui chem che no rume, tati chofer iñchiñ müten mülefuiñ. Raquiduamiyu, huesalcangeafuyu chi pihuiyu. Huelu chumngelayu rume. Petu naglu iñchiu micro mu, ramtufiñ tati chofer: “¿Chem pi tati epu huentru iñchiu mu?”, fei feipieneu: “Tüngcülemün. Iñche quimniehuiyiñ tamün ineingen, deu feipifiñ tañi ineingen eimu”.

Quiñe fütra trahun 1976 tripantu mu, quimfiñ ta Pauline Lomax, Dublín mapu mu. Quisu precursora especialngefui, cüpai ta Inglaterra mapu mu. Quiñe cüme lamngen, maneluuquefui Jehová mu ca ñom piuquengefui ca piuqueyechefengefui. Feitachi lamngen ca tañi huentru lamngen pichicalu müten quimfingu ta Jehová. Quiñe tripantu rupalu, Pauline iñchiu niehuiyu. Amuleyu tayu precursor especialngeal Ballymena huaria, Irlanda mapu mu.

Rupachi antü mu, huitrancontumequefiyiñ tati trahunche Belfast huaria mu, Londonderry mapu mu. Ca amuquefuyu caquelu cuñihun-ngechi lof mu. Ayühueleiñmu fente tañi feyentuquen pu peñi ca pu lamngen. Quiñeque elcünuingün cuifique quimeltun tañi niequefel engün. Dullintuchehuelaingün ca üdechehuelaingün tañi poyeafiel ta Jehová. Feimu Jehová cuñiutucuqueyu ca quelluqueyu engün.

Mari tripantu mülefun Irlanda mapu mu. 1981 tripantu mu, mangelngeyu clase 72 Galaad pingechi escuela mu. Tripalu iñchiu Galaad pingechi escuela, huercüngeyu Sierra Leona, África Occidental mapu mu.

Mülequefuyu quiñe ruca mu caquelu mari quiñe misionero iñchiñ. Feitachi ruca mu mülefui quiñe cocina müten, cüla baño, epu ducha, quiñe telefono, quiñe lavadora ca quiñe secadora müten. Quiñeque mu, catrürumequei tati luz. Feipingequelafui rume chumül tañi catrüngeal. Huente ruca mu, miyauquefui tati dehu ca miñche ruca mu, conquefui tati filu.

Nehue cüme felequelafuiñ ruca mu, huelu müna ayüucülequeiñ taiñ amuldungual. Feiti che mülelu fei mu yamquefingün tati Biblia ca cüme allcütuqueiñmu. Fentrenque che papeltuquefui ta Biblia ca testigongerpuingün. Tati pu che mülelu fei mu “señor Robert” piquefeneu, ca tañi domo “señora Robert” pingequei. Rupachi antü mu, doi cüdahun Betel mu, nehue tripahuelan tañi amuldungual,  fei tati pu che feipitufi tañi domo “señora Pauline”, iñche “señor Pauline” pitueneu engün. Tañi domo ayüi tañi feipingeal.

Fentrenque taiñ pu peñi, pu lamngen pofrelequefui. Huelu Jehová eluqueyu tañi duamnieel engün. Afmatuqueiñ chumngechi ta Jehová tañi quelluqueteu engün (Mat. 6:33). Quiñe rupa, quiñe lamngen ca tañi püñeñ niequefui plata tañi ngillayal iyael feichi antü müten. Feitachi lamngen quimlu quiñe peñi trahunche mu ñi com gastan tañi plata ñi ngillayal lahuen, elufi com tañi plata tañi niequefel. Feimu ti lamngen niehuelai plata ñi ngillayal iyael. Huelu feichi antü müten, acui quiñe domo tañi ruca mu ñi cüme elcünulelngeal tañi lonco. Feiti domo cullifi taiñ lamngen. Afmatufali chumngechi Jehová tañi quelluquefiel taiñ pu peñi ca lamngen.

Ailla tripantu mülefuyu Sierra Leona mapu mu, fei huercüngeyu ñi cüdahual Betel Nigeria mapu mu. Feula, quiñe fütra Betel mu cüdauquefuyu. Iñche deu huimtulefun, feichi cüdau am femquefulu iñche Sierra Leona mapu mu. Huelu Pauline cüdautufui tañi huimtual feitachi hue cüdau mu. Quisu 130 hora amuldunguquefui fill cüyen. Enseñalelquefui Biblia fentren che ca cümeque estudio niequefui. Huelu Betel mu, tañi domo cüdauquefui ñi ñüdüfcayal ca cüme elcünutual huesaquelu. Huelu rupachi antü mu, ayühueleyu tañi cüdau. Inaduami pu peñi pu lamngen ñi falintuñmaquefiel tañi cüdau. Feimu eluhui ñi yafültucuafiel tañi pu lamngen Betel mu.

Quimquelafuiñ pu Nigeria che ñi huimtun. Quiñe rupa, quiñe peñi cüpai tañi oficina mu, fei cüpalfi quiñe lamngen hue aculu Betel mu tañi chaliaeteu. Iñche ayüfun tañi man cuhuafiel, huelu quisu llollinacümuhui tañi chaliaeteu. Iñche afmatulehuen tañi femeteu mu. Raquiduamfemün epu texto mülelu Biblia mu: Hechos 10:25, 26 ca Apocalipsis 19:10. Raquiduamün “feipiafuiñ tañi femnoal”, huelu ca raquiduamün “quisu mangelngei Betel mu, ¿quimnoafulu am Biblia ñi feipin?”.

Nütramcalu iñchiñ, yehuelefun. Huelu amutulu ti lamngen, quimürpun quiñeque troquiñ feichi mapu mu huimtulei ñi femngechi chalichequen. Tati pu huentru ca femngechi femquei. Femngechi femquelaingün tañi püramyeafiel ta che, doi mai ñi pengelal tañi yamniefiel. Feita huesa  dungu no, ca femngechi femquei quiñeque che Biblia mu (1 Sam. 24:8). Cüme duamün tañi feipinofiel mu tati lamngen, feipifili yehuelcayafuiñ.

Quimfiyu fentren Nigeria che fente ñi feyentulen Jehová mu. Quiñe peñi Isaiah Adagbona pingei. a Quisu quimfi ti rüf dungu huechengelu. Rupachi antü mu, contueyu lepra pingechi cutran, fei yengei cheu ñi mülemum tati pu nielu femngechi cutran, fei müten testigongefui fei mu. Caiñetungefulu rume, quellufi doi 30 leproso ñi quimafiel ti rüf dungu, fei deumangei quiñe trahunche.

1996 tripantu mu, huercüngeyu ta Kenia ñi cüdahual Betel mu. Ellaca mu, feipihuiyiñ tañi mülequefel Kenia mu, tüfa hula huiñotun. Mülequefuyu Betel mu, fei mu mülequefui fentrenque mono. Hueñeñmaquefui tañi fruta tati pu lamngen. Quiñe antü, quiñe lamngen nülacünui tañi fentana, fei coni tati pu mono. Tati lamngen huiñotulu tañi pieza mu, huirari. Pefi mufüque mono iñmaeteu tañi iyael. Ti lamngen lefcülen tripai, pu mono rüncütripai fentana mu engün.

Pauline iñchiu amuquefuyu quiñe trahunche suajili quehun dunguquelu. Pichin tiempo mu, elfalcünungen ti chillcatun Biblia trahunche mu. Huelu iñche nehue pepilquelafun tati quehun. Cüme pepicauquefun, femngechi ñi cüme papeltual ti ramtun chillcatun mu. Huelu quiñe peñi pichi cacünutule ñi feipin ta revista, iñche adümquelafiñ. Rume huesa duamquefun. Afmatulehuequen fente tañi nieleteu paciencia ta iñche, ca tañi ñom piuquengen engün.

Epe quiñe tripantu mülequefuyu ta Kenia. 1997 tripantu mu, mangelngeyu ñi amual Betel Brooklyn mu, New York mapu meu. Feitachi pais mu, pu che niei fentren plata ca falinque chemcün, feita cuñihun-ngefui (Prov. 30:8, 9). Femfule rume, taiñ pu peñi ca pu lamngen pengelqueingün tañi maneluucülen Jehová mu. Tañi plata ñi nieel engün pünequelafi quisu engün ñi cüme rupaleal müten, doi mai ñi quelluntucual Jehová tañi cüdau mu.

Rupayechi tripantu mu, pequefiñ tañi pu peñi pu lamngen fente ñi feyentuquen Jehová mu engün. Irlanda mapu mu, huesaque dungu rupafulu engün rume, maneluucülequefuingün ta Jehová mu. Püntütripafule engün rume ca pofrelefule rume África meu, ca Estados Unidos mu niefule fentren plata engün rume, maneluuquefuingün Jehová mu müten. ¿Jehová müna ayüucülepelai ñi piuqueyenieteu mu tañi pu che chem dungu rupale engün rume?

Müchai müten rupaquei tati tripantu (Job 7:6). Feula cüdaucüleiñ caquelu peñi, lamngen iñchiñ fütra Betel mu Warwick huaria mu. Ayüucüleyu tayu cüdahual tayu pu peñi, pu lamngen rüf piuqueyeulu. Ca ayüucüleyu tayu quelluntucual Jesús mu. Pichiñma mu, Jesús cümelcayafi pu feyentuquelu Jehová meu (Mat. 25:34).