1, 2. ¿Chem dungu fentecünulayaiñ taiñ femal? ¿Chumngelu am?

 ¿CHUMTEQUEN rupa liftuqueimi tami ruca? ¿Hue puulu eimi cüme liftucapelafimi? Liftuhuenofilmi, ¿chem rupayafui? Apoleafui ta pod mu. Tami ruca ñi lifcüleal, rumel liftunieafimi.

² Ca femngechi, iñchiñ rumel norümnieaiñ taiñ raquiduam ca taiñ chumngechi chengen. Petu taiñ fautizaunon, eluhuiyiñ taiñ cüme elcünutual taiñ mongen, femngechi taiñ “liftuhual chem ñi huesalcaquefiel taiñ cuerpo ca taiñ raquiduam” (2 Cor. 7:1). Huelu, ¿fei müten femaiñ? Femlai. Ti apostol Pablo feipieiñmu: “Amulepe tamün huecünutufiel tamün raquiduam” (Efes. 4:23). ¿Chemu femafuiñ? Cuñiutucuunoliyiñ, huesaque che pürüm huelulcayafeiñmu. Fei ti ruca reque, podcüleafuiñ Jehová ñi adquiñ mu. Feimu taiñ ayühuelafiel ta Jehová, rumel ngüneduamuucüleaiñ taiñ niepen mai huesaque raquiduam, taiñ cüme elcünutual taiñ chumngechi chengen ca taiñ famentuafiel huesaque dungu.

3. Taiñ huecünutual taiñ raquiduam, ¿chumaiñ? (Romanos 12:2).

³ ¿Chumaiñ taiñ huecünutual taiñ raquiduam? (Papeltunge Romanos 12:2). Femliyiñ quiñeque cümeque dungu müten, ¿feipiafuiñ taiñ huecünutun  taiñ raquiduam? Femlai. Mülei taiñ ngüneduamuhual taiñ piuque ca cüme elcünutual taiñ raquiduam, femngechi taiñ inayafiel Jehová tañi huercün dungu. Quiñechi müten femlayaiñ, rumel mülei taiñ femal.

4. ¿Chumafuiñ taiñ huelulcanoaeteu huesaque che?

⁴ Culpan chengehuenoliyiñ, femaiñ com tañi ayüqueel ta Jehová. Petu ñi acunon feichi antü, cüdautuaiñ llemai taiñ ayühuelafiel ta Jehová. Romanos 12:2 mu, Pablo feipieiñmu taiñ huecünutual taiñ raquiduam, femngechi taiñ quimal chem ñi ayüqueel ta Jehová. Taiñ femal, eluulayaiñ taiñ huelulcayaeteu huesaque che. Doi mai mülei taiñ ngüneduamuhual: com taiñ femquen, ¿nüucülepei mai Jehová tañi raquiduam mu?

5. ¿Chumngechi pengelqueiñ taiñ raquiduamtucuniefiel Chau Jehová ñi antü? (Inaduamnge ti adentun).

⁵ Jehová ayüniei taiñ ‘raquiduamtucunieafiel Chau Jehová ñi antü’ (2 Ped. 3:12). Ramtuhuaiñ: “Chumngechi ñi yeniequen ñi mongen, ¿pengelquepen mai ñi püllelepan Jehová tañi antü? ¿Chem raquiduamquen universidad mu ca ti cüdau mu? ¿Doi falintuquepefiñ mai tañi cüdahuelafiel ta Jehová? ¿Maneluuquepen mai Jehová mu tañi eluaeteu com tañi duamnieel ca tañi pu familia? Cam, ¿re raquiduamcülequen müten plata mu?”. Eluuliyiñ taiñ femal Jehová ñi ayüqueel, fei ta rume ayühuai iñchiñ mu (Mat. 6:25-27, 33; Filip. 4:12, 13).

6. ¿Chem mülei taiñ femal?

⁶ Rumel ngüneduamuhuaiñ chem taiñ  raquiduamqueel ca cüme elcünutuafiyiñ. Pablo feipifi pu Corinto che: “Quisu ngüneduamniehuaimün, fei quimaimün ñi nehuencülen tamün feyentun. Ngüneduamniehuaimün tamün chumngechi chengen” (2 Cor. 13:5). ¿Chumngechi pengelqueiñ ñi ‘nehuencülen taiñ feyentun’? Amuqueiñ trahun mu ca tripaqueiñ amuldungual, huelu feica müten no. Nehuencülele taiñ feyentun, cümeque raquiduam nieaiñ piuque mu. ¿Chumafuiñ taiñ huecünutual taiñ raquiduam? Papeltuafiyiñ Chau Dios tañi Dungu, raquiduamaiñ Jehová reque ca norümuhuaiñ taiñ ayühuelafiel ta Jehová (1 Cor. 2:14-16).

7. ¿Chem mülei taiñ femal? Ca, ¿chemu cüdautuafuiñ taiñ femal? (Efesios 4:31, 32)

⁷ (Papeltunge Efesios 4:31, 32). Biblia ca feipieiñmu: “Huengetupe tamün chumngechi chengen” (Efes. 4:24). ¿Chumngechi femafuiñ? Famentuafiyiñ huesaque dungu taiñ femquefel, huelu cüdaungeafui taiñ femal. ¿Chumngelu? Fentren tripantu mu chi femngechi chengequefuiñ. Biblia feipi pu huentru ñi piuque eluucülei ñi femal huesaque dungu (Gén. 8:21). Feimu mülei tami cüme elcünutual tami chumngechi chengen petu tami fautizaunon ca deu fautizahulmi. Taiñ doi quimal, peaiñ ñi rupan quiñe peñi.

8, 9. Ñi rupan ta Stephen, ¿chumngelu falin-ngei taiñ huecünutuafiel taiñ mongen?

⁸ Peaiñ ñi rupan quiñe peñi, Stephen pingelu. Quisu feipi: “Deu fautizaulu rume iñche, cüdautuquefun tañi ngüneal tañi illcunoal. Quiñe rupa amuldunguyaulu iñche, pefiñ quiñe hueñefe. Entuñmaeneu tañi radio auto mu, fei lefcülen inafiñ. Epe nüfuiñ, fei ütrüfentufi ti radio, fei lefmahui. Feipifiñ tati grupo chem ñi rupan, fei quiñe quim cristiano feipieneu: ‘¿Chumafuimi nüfilmi?’. Fei ta raquiduameleneu, petu cüdautuquefun tañi ngüneal tañi illcunoal”. b

⁹ ¿Chem quimeltueiñmu Stephen ñi rupan? Iñchiñ deu ngünenien taiñ mongen piliyiñ rume, huelu quiñeque mu femafuiñ huesaque dungu taiñ femquefel cuifi. Femngechi dungu mu rupaliyiñ, cüme cristianongelan pilayaiñ. Ca tati apostol Pablo femngechi dungu mu rupafui, feipi: “Cüpa femün cümeque dungu, huelu huesaque dungu mülei iñche meu” (Rom. 7:21-23). Acordayaiñ: rumel liftucanofiliyiñ taiñ ruca, podcüleafui. Ca femngechi iñchiñ cuñiutucuunoliyiñ, femafuiñ huesaque dungu taiñ femquefel ta cuifi. Feimu amulepe taiñ cüme elcünutufiel taiñ mongen, ¿chumngechi femafuiñ? Peafiyiñ.

10. ¿Chumafuiñ taiñ famentuafiel huesaque dungu? (1 Juan 5:14, 15).

¹⁰ Llellipuafiyiñ Jehová taiñ famentuafiel huesaque dungu taiñ femquefel ca maneluhuaiñ llemai taiñ allcütuaeteu (papeltunge 1 Juan 5:14, 15). Jehová famentufemüñmalayaiñmu feitachi huesaque dungu, huelu eluaiñmu ñi nehuen taiñ chaftuafiel (1 Ped.  5:10). Falin-ngei taiñ llellipuafiel Jehová taiñ quelluaeteu, huelu iñchiñ mülei taiñ cuñiutucuhual chem no rume taiñ huelulcanoaeteu. Por ejemplo, television mu pengelngeafui huesaque dungu taiñ femquefel ta cuifi, fei cuñiutucuunoliyiñ, inayenturpuafuiñ. Cafei tuculayafiyiñ taiñ lonco mu feitachi huesaque dungu (Filip. 4:8; Col. 3:2).

11. ¿Chumafuiñ taiñ huecünutuafiel taiñ chumngechi chengen?

¹¹ Re famentulayafiyiñ müten taiñ chumngechi chengefel ta cuifi. Mülei taiñ huecünutuafiel taiñ chumngechi chengen, ¿chumngechi femafuiñ? Cüme quimafiyiñ ta Jehová ca inayentuafiyiñ (Efes. 5:1, 2). Raquiduamaiñ tüfa: Biblia mu quimürpuliyiñ Jehová ñi perdonachequen, fei ramtuhuafuiñ: “¿Eluucülen tañi perdonacheal?”. Ca quimürpuliyiñ Jehová cutranpiuqueyefi huesa rupamequechi che, fei ramtuhuafuiñ: “¿Raquiduamquen pu peñi pu lamngen duamnielu quellu fei quelluquefiñ?”. Feimu fentecünulayaiñ cüme elcünutuafiel taiñ raquiduam ca huecünutuafiyiñ taiñ chumngechi chengen.

12. Tañi rupan ta Stephen, ¿chem quimeltueiñmu Biblia mu?

¹² Stephen ñochiquechi huecünutufi tañi chumngechi chengen. Quisu feipi: “Deu fautizaulu iñche, quiñeque mu cüdautuquen tañi ngünehual ñi illcufemnoal. Inaduamfiel mu quiñe che tañi lladcülcayaeteu, iñche pürüm amuquetun cam fentecünuquefiñ müten ti dungu. Fentren che ca tañi domo saquiqueneu tañi ngüneuquen mu. Ca iñche quisutu afmatuuquen. Huelu quisu iñche tañi duam mu ngüneuquelan, Biblia llemai quelluqueneu”.

13. ¿Chem quelluaiñmu ñi femal cümeque dungu? (Gálatas 5:16).

¹³ (Papeltunge Gálatas 5:16). Jehová eluqueiñmu tañi nehuen taiñ femal cümeque dungu. ¿Chumngechi femquei? Papeltufiel mu ta Biblia, eluuqueiñ Jehová tañi nehuen taiñ adnieaeteu. Ca tati trahun mu llouqueiñ tañi nehuen, yafültucuqueiñmu taiñ trür müleal taiñ pu peñi, pu lamngen iñchiñ. Fei engün nehuencünuuqueingün ñi femal Jehová ñi ayüqueel, taiñ femün mu huelucontu yafültucuuqueiñ (Heb. 10:24, 25; 13:7). Ca llellipuquefiyiñ ta Jehová taiñ femnoal huesaque dungu, femngechi eluqueiñmu tañi nehuen. Femfuliyiñ rume, contuafeiñmu huesaque raquiduam, huelu nehuencüleaiñ taiñ femnoal huesaque dungu. Gálatas 5:16 feipi pu miyaulu Jehová tañi nehuen mu, ‘femlayaingün chem huesa illutun rume’.

14. ¿Chumngelu mülei taiñ famentunieafiel huesaque raquiduam?

¹⁴ Fentecünulayaiñ taiñ fülmanieafiel Jehová ca tucuaiñ cümeque raquiduam taiñ lonco mu. ¿Chumngelu am femaiñ? Quiñeque mu, conrumepayafui huesaque raquiduam taiñ lonco mu. Fautizaucüleliyiñ rume, ayürpuafuiñ taiñ femal huesaque dungu. Ayürpuafuiñ taiñ aucantual plata mu, taiñ rume putual ca taiñ peal podngechi dungu (Efes. 5:3, 4). Quiñe hueche  peñi feipi: “Quiñeque mu, ayüturumequefiñ chaf huentru, cüdautuquen tañi famentuafiel femngechi raquiduam. Raquiduamquefun tañi famentuafiel, huelu petu niefiñ piuque mu”. Femngechi huesaque raquiduam nieliyiñ, ¿chem quelluafeiñmu?

15. Iñchiñ müten nielaiñ huesaque raquiduam, feimu ¿chumngechi yafültucuqueiñmu tüfa? (Inaduamnge ti adentun).

¹⁵ Cüdautuliyiñ taiñ famentuafiel huesaque raquiduam, iñchiñ müten femngechi dungu mu rupaquelaiñ. Raquiduamaiñ Pablo ñi huirintuculelfiel pu Corinto che, feipifi: “Chumngechi ngüchaltucungequeimün huesa dungu mu, ca ngüchaltucungequei com pu che” (1 Cor. 10:13a). Feichi mu, quiñeque cristiano petu ñi cristianongenon ñihualpequefui tañi füta cam tañi domo, cudumuuquefui chaf huentru ca chaf domo engün ca ngollifengefuingün (1 Cor. 6:9-11). Deu fautizaulu engün, ¿niehuepelaingün mai feitachi huesaque raquiduam? Femlai llemai. Fei engün dullin cristianongefulu rume, huelu culpan chengequefuingün, feimu cüdautuqueingün ñi famentuafiel feitachi huesaque raquiduam. Tañi rupan engün yafültucuqueiñmu, iñchiñ ca femngechi famentuafuiñ huesaque raquiduam. Iñchiñ quimnieiñ com pu peñi, com pu lamngen ca femngechi cutrancaumequeingün. Feimu quisulelaiñ, amulepe taiñ chaftuniefiel huesaque raquiduam (1 Ped. 5:9).

16. ¿Chem raquiduamlayaiñ? ¿Chemu?

¹⁶ Chaftufiliyiñ huesaque dungu, inei no rume entendequelaeneu pilayaiñ. Femngechi raquiduam nieliyiñ cuñihun-ngeafui. Chumcaunorume famentunoafilu huesaque dungu troquihuafuiñ, huelu feingelai. Biblia feipi: “Chau  Ngünechen manelfali, fei femcünulayai tamün rupayal chem tamün pepi hueuquenofiel. Doi mai huesa rupalmün, quelluaimünmeu tamün hueutripayal ca tamün nehuentuleal” (1 Cor. 10:13b). Feimu cüdautuliyiñ rume, famentuafuiñ huesaque raquiduam. Jehová ñi quellun mu, chaftuafuiñ chem huesaque dungu rume.

17. Nieliyiñ rume huesaque raquiduam, ¿chumaiñ?

¹⁷ Culpan chengelu am iñchiñ, contuafeiñmu huesaque raquiduam. Femngechi raquiduam tuculiyiñ, famentufemafiyiñ. José femi, cuduyu ta iñchiu pieteu Potifar ñi domo, lefmahui (Gén. 39:12). Eluulayaiñ tati huesaque raquiduam taiñ ngüneaeteu.

18, 19. ¿Chem ramtuhuafuiñ?

¹⁸ Mülei taiñ ayühuelafiel Jehová taiñ raquiduam mu ca taiñ femün mu. Femngechi huecünutuafuiñ taiñ raquiduam, feimu mülei taiñ rumel ngüneduamuhual. Ramtuhuaiñ: “Tañi femün mu, ¿pengelquepen mai ñi püllelepan Jehová tañi antü? ¿Eluucülepen mai tañi cüme elcünutual tañi chumngechi chengen? ¿Eluuquepen mai tañi ngünenieaeteu Chau Dios ñi nehuen femngechi famentuafiel huesaque raquiduam?”.

¹⁹ Ngüneduamuuliyiñ, fei ayühuaiñ chumngechi taiñ cüme elcünutun taiñ mongen. Quimnieiñ taiñ huelulcahual, huelu huesa duamlayaiñ. Doi mai inayaiñ ñi feipin Filipenses 3:16: “Tunte amulele rume taiñ serfiquefiel ta Chau Dios, amulepe taiñ femmequen”. Femliyiñ, Jehová quelluaiñmu taiñ cüme elcünutual taiñ raquiduam.