Mateo 9:1-38
-
Jesús tremoltufi (mongeltufi) quiñe huentru lañmalelu ñi cuerpo (1-8)
-
Jesús inaen feipifi ta Mateo (9-13)
-
Jesús ramtungei ngüñüluhun dungu meu (14-17)
-
Jairo ñi ñahue. Quiñe domo nünütufi ñi tacun ta Jesús (18-26)
-
Jesús tremoltufi epu trauma ca quiñe quetro (27-34)
-
“Fentrelei ti cosecha, huelu pichin cüdaufe mülei” (35-38)
9 Jesús farcu mu amui nometu lafquen, fei quisu ñi huaria mu conpui.*
2 Fei ngütantu mu* cüpalelngei quiñe huentru lañmalelu ñi cuerpo.* Ngüneduamlu Jesús fente ñi feyentulen engün, feipifi ti huentru: “¡Yafüluunge chacha!* Deu rulpacünungei tami culpan”.*
3 Fei quiñeque quimeltuquelu Moisés ñi ley dungu raquiduamingün: “Tüfachi huentru caiñetudungumequefi ta Chau Ngünechen”.
4 Quimlu Jesús chem ñi raquiduamcülen engün, feipifi: “¿Chumngelu* fente huesa raquiduamcüleimün?
5 Feipimuchi, ¿chem doi cüdaungei? ¿‘Rulpacünungei tami culpan’* ñi feipiafiel? ¿Cam ‘huitratunge ca trecatunge’ ñi feipiafiel?
6 Huelu pengeleluhuayiñ ti Huentru ñi Fotüm* elfalcünungei mapu meu ñi rulpacünual pu che ñi culpan”.* Fei feipifi ti huentru: “Huitrapüratunge, nünge tami ngütantu, fei amutunge tami ruca mu”.
7 Ti huentru huitrapüratui ca amutui.
8 Pu che pefilu tüfa afmatulehuei, fei püramyefingün ta Chau Ngünechen, elfalcünufilu cai ta che ñi femal tüfachi dungu.
9 Deu amuletulu Jesús, pei quiñe huentru Mateo pingelu, anülelu cheu ñi cofrangequen impuesto. Fei feipifi: “Cüpange, inaen”. Feimeu müten Mateo huitrapürai ca inaeyu.
10 Fei hula, petu imequelu Jesús Mateo ñi ruca meu, puhurquei fentren cofraquelu impuesto ca alün culpafe.* Quiñentrür ipai Jesús engün ca tañi pu inanieteu.
11 Pu fariseo pefilu tüfa, ramtufingün Jesús ñi pu inanieteu: “¿Chumngelu* tamün Quimeltufe quiñentrür iquei pu cofraquelu impuesto ca pu culpafe engün?”.*
12 Jesús allcüi tüfa, feimu feipifi engün: “Pu tremolelu duamlai lahuentuchefe, huelu pu cutrancülelu duamniei llemai.
13 Feimu, amumün ca quimaimün chem ñi feipin tüfachi dungu: ‘Duamnielan tamün chalintucual mañumtun, doi mai duamnien tamün cutranpiuqueyecheal’. Iñche cüpan pu culpafe* ñi nor raquiduamtual engün, huelu pu nor che troquiuquelu no”.
14 Feimeu Juan ñi pu inanieteu fülcontufi* ta Jesús, fei ramtui engün: “Iñchiñ ca pu fariseo ngüñüluuqueiñ, huelu ¿chumngelu* tami pu inanieteu femngechi femquelaingün?”.
15 Jesús huiñoldungui:* “Ti novio ñi pu hueni ngelai ñi hueñancüleal, petu mülecalu cai ti novio, ¿felei no am? Huelu acuai ti antü ñi müntuñmangeal* ti novio, fei hula ngüñüluhuaingün.
16 Lapatungequelai quiñe huesa tacun hue pañu meu. Femngefule, ti hue pañu trücüfquei,* fei ti huesa tacun doi huichafquei.*
17 Ca inei no rume tucuquelai hue pulcu ti huesa trülque carpa meu.* Femngele, ti carpa paucüafui,* ti pulcu hutruafui, fei ti carpa cümehuetulayai. Feimu ta che hue carpa meu tucuquefi ti hue pulcu, femngechi trür huesañmauquelai”.
18 Jesús petu dungumequelu, quiñe loncolelu ngillatuhue ruca meu* fülcontupafi, lucutunagi* ca feipifi: “Tañi ñahue deu lapelai, huelu cüpange, fampuhulelafimi tami cuhu, fei mongetuai”.
19 Feimu Jesús huitrapürai, trür amuingu. Cafei tañi pu inanieteu compañeyu engün.
20 Fei cüparumei quiñe domo, mari epu tripantu catrühuelai ñi mollfüñ. Jesús ñi furi püle fülconpui ca nünütufi ñi huechuñ tacun,*
21 quisu feipihui: “Nünütufili müten ñi tacun, tremofemtuan llemai”.*
22 Fei Jesús huiñoquintui ca feipifi: “¡Yafüluunge, papai!* Fente tami feyentulen tremotuimi tati”. Feica müten tremotui ti domo.
23 Fei hula, conpulu Jesús feitichi loncolelu ñi ruca meu, pepui ti pu ülcantuquelu hueñancün-ngechi ül* ca tati pu che ñi rume ngümacaumequen engün.
24 Jesús feipifi engün: “Tripamün, ti pichi domo lalai, umaucülei müten”. Allcütulu tüfa, ayentueyu engün.
25 Feimu, deu tripatulu pu che, Jesús conpui cheu ñi mülen ti pichi domo, nüñmafi ñi cuhu, fei huitrapüratui.
26 Tüfachi nütram, com feichi troquiñ mapu mu quimngerpui.
27 Jesús tripatulu tüfa mu, inaeyu epu trauma huentru, nehuentu dungueyu engu: “¡David ñi Fotüm, cutranpiuqueyemuyu!”.
28 Cangelu ruca mu conpulu Jesús, ti epu trauma fülcontueyu. Fei Jesús ramtufi engu: “¿Feyentuimu cai iñche tamu tremoltuafiel?”. “Mai Ñidol” huiñoldungui engu.*
29 Feimu lle, fampuhuli ñi cuhu tañi nge mu ca feipifi engu: “Chumngechi tamu feyentulen, femtripape tamu llellipuel”.
30 Fei pelotui engu. Huelu Jesús fente cüme feipicünufi: “Inei no rume ngelai ñi quimal tüfa”.
31 Huelu amutulu engu, nütramcapui ñi femün Jesús com feichi troquiñ mapu mu.
32 Amuletulu engu, pu che cüpalelfi ta Jesús quiñe quetro huentru conhuecüfülelu.*
33 Fei Jesús huemünentufilu* ti huesa püllü, entui ñi dungun ti quetro huentru. Afmatulehuei pu che, feimu feipi engün: “Turpu pequelafuiñ femngechi dungu Israel mapu meu”.
34 Huelu pu fariseo feipi: “Huecüfü ñi nehuen mu huemünentuquefi* huesaque püllü”.
35 Jesús miyaupui com huaria ca lof püle. Fei quimeltuyahulquefi pu che ñi ngillatuhue ruca mu, amuldungui ti cüme dungu Chau Dios ñi ngünenietual mapu ca tremoltufi fillque cutran.
36 Jesús adquintufilu pu che, rume cutranpiuqueyefi engün. Ngüneduami ñi allfülen ca ñi quisucünungen, ufisa reque nienolu camañ.
37 Feimu feipifi tañi pu inanieteu: “Fentrelei ti cosecha, huelu pichin cüdaufe mülei.
38 Feimu llellipuafimün mai tati Ngen lelfün, huercüpe cüdaufe tañi püramquetranal”.*
Quimnieal
^ Tüfa ta Capernaúm, cheu ñi mülequefel Jesús amuldunguyaulu Galilea troquiñ mapu püle.
^ Cam: “Cahuitu, camilla”.
^ Cam: “Calül”.
^ Griego quehun feipilei: “Fotüm”. Feipilu tüfa, Jesús pengeli ñi piuqueyefiel ti huentru.
^ Cam: “Yafcan”.
^ Cam: “Chemu”.
^ Cam: “Yafcan”.
^ Ngüneduamnge “Huentru ñi Fotüm”.
^ Cam: “Yafcan”.
^ Cam: “Yafcafe”.
^ Cam: “Chemu”.
^ Cam: “Yafcafe”.
^ Cam: “Yafcafe”.
^ Cam: “Püllecontufi”.
^ Cam: “Chemu”.
^ Cam: “Lloudungui”.
^ Cam: “Montuñmangeal”.
^ Cam: “Huitrauquei, ñücolquei”.
^ Cam: “Huicürquei”.
^ Cam: “Cuntra, trontron”.
^ Cam: “Trofafui”.
^ Griego quehun feipilei: “Sinagoga”.
^ Cam: “Püramyefi”.
^ Cam: “Chiñai tacun”.
^ Cam: “Mongefemtuan”.
^ Griego quehun feipilei: “Ñahue”. Feipilu tüfa, Jesús pengeli ñi piuqueyefiel ti domo.
^ Cam: “Pu flautatuquelu”.
^ Cam: “Lloudungui engu”.
^ Cam: “Conpapüllülelu”.
^ Cam: “Quechanentufilu”.
^ Cam: “Quechanentuquefi”.
^ Cam: “Cosechayal”.
