Jueces 4:1-24
4 Huelu deu lalu Ehúd, pu Israel che ca huiño huesa femingün Chau Jehová ñi adquiñ mu.
2 Feimu Jehová elcünufi engün* Jabín ñi cuhu mu, tüfa Canaán ñi lonco ülmen, fei Hazor huaria mu ngüneniequefui. Quiñe huentru Sísara pingelu loncolefui Jabín ñi pu hueichafe mu* ca mülefui Haróset mapu mu.*
3 Jabín nierquefui 900 hueichan carretela* ca tañi rueda mu* nierquei fütra cuchillo.* Fei yeniefui 20 tripantu ñi rume caiñetuniefiel pu Israel che. Feimu pu Israel che llellipufingün ta Jehová tañi quelluaeteu.
4 Feichi mu Débora, Chau Ngünechen ñi huerquen domo juzgaquefui pu Israel che. Lapidot pingefui ñi füta.
5 Débora anücünuuquefui miñche tañi palmera anümca mu, mülefui Ramá ca Betel huaria püle Efraín ñi mahuidantu mapu mu. Pu Israel che pemequefui ta Débora, femngechi tañi feipingeal engün chem ñi dulliel Chau Dios juicio mu.
6 Fei mütrümfalfi Barac,* Abinoam ñi fotüm mülelu Quedes huaria, Neftalí ñi mapu mu. Feipifi: “Chau Jehová, pu Israel che ñi Ngünechen huercüeimu tüfa: ‘Amunge, trecacünuunge* Tabor pingechi huincul, fei yefinge 10.000 huentru cüpalu Neftalí ca Zabulón ñi troquiñche mu.
7 Fei Cisón pingechi huitrunco mu, iñche cüpalelayu ta Sísara, tati loncolelu Jabín ñi pu hueichafe mu. Ca cüpalelayu tañi hueichan carretela ca tañi pu hueichafe. Tami cuhu mu elcünuafiñ engün’”.
8 Allcülu tüfa, Barac feipieyu: “Eimi compañeli, iñche amuan. Huelu compañnoeli, iñche ta amulayan”.
9 Débora feipi: “Felei, trür amuayu tati. Eimi hueichayafimi engün, huelu saquingelayaimi. Quiñe domo ñi cuhu mu Chau Jehová hultucuafi ta Sísara”. Fei hula Débora huitrapürai, fei amui Barac engu Quedes huaria mu.
10 Barac trahulfi Zabulón ca Neftalí troquiñche Quedes huaria mu, fei 10.000 huentru inaeyu. Débora ca compañnieyu.
11 Huelu Héber tati quenita che püntühui* caquelu quenita che mu, Hobab tañi pu cüpanche tuhuingün, fei ta Moisés tañi chedcui. Héber pepicai tañi tolto ruca* inafül Zaananim fütra anümca mu, püllelei Quedes huaria mu.
12 Fei feipingei ta Sísara, Barac, Abinoam tañi fotüm, huechui Tabor huincul mu.
13 Feica müten, Sísara trahulfi com tañi carretela ñi hueichayal. Tüfa 900 carretela ca tañi rueda meu nierquei fütraque cuchillo.* Cafei trahulfi com pu soltau tañi compañnieteu. Tripatuingün Haróset mapu mu, fei ñi puhual Cisón pingechi huitrunco mu.
14 Fei hula Débora feipifi ta Barac: “Amunge, fachantü eimi tami cuhu mu Jehová hultucuafi ta Sísara. Chau Jehová llemai hunelei eimi mu”. Fei Barac nagi Tabor pingechi huincul mu, compañnierqueyu 10.000 huentru.
15 Fei caiñetuchequelu Barac, Jehová femi ñi hueluraquiduamelafiel ta Sísara, com tañi pu hueichafe ca com tañi pu carretela ñi hueichayal. Rupalu tüfa, Sísara nagi tañi carretela mu, fei namuntu lefmahui.
16 Barac inantucufi pu hueichafe ca tañi hueichan carretela, fei puhuingün Haróset mapu mu. Com Sísara ñi pu hueichafe hueungeingün fütra cuchillo mu. Quiñe hueichafe no rume mülehuelai.
17 Huelu Sísara namuntu lefmahui Jael ñi tolto ruca mu, fei ta Héber tañi domo, tati quenita che. Héber cüme yeuquefui* Jabín engu, Hazor tañi lonco ülmen.
18 Jael lloumefi ta Sísara, fei feipifi: “Cüpange ñidol, conpange. Llicalayaimi”. Fei Sísara conpui tolto ruca mu, fei Jael pontro meu tacueyu.
19 Sísara feipifi: “Huihulen, füreneen eluafen pichin co”. Jael nülai quiñe trülque carpa* nielu lichi, fei elueyu ñi lichitual. Fei hula huiño tacueyu.
20 Sísara feipifi: “Mülenagcülenge tati tolto ruca ñi conhue püle, fülconpale* quiñe che, fei ramtule ‘¿Fau mülepei mai quiñe huentru?’, ngelai piafimi”.
21 Huelu Sísara fente ñi cansalen, con umautui. Fei Jael, Héber tañi domo, nüi quiñe martillo ca quiñe pichi estaca traricünuquelu ti tolto ruca. Ñücüfcülen mu fülconpui, fei quiñe püle Sísara tañi lonco mu clafantuculelfi ti pichi estaca. Mapu mu rüngaconi ti estaca, fei lai.
22 Barac quintuyahulfilu ta Sísara, Jael trafmeyu ca feipieyu: “Cüpange. Pengelelayu tati huentru tami quintuyahulfiel”. Barac conpui tolto ruca mu Jael engu. Üyeu pepufi ñi lan ta Sísara, fei quiñe pichi estaca catarumelei ñi lonco mu.
23 Feichi antü, Chau Ngünechen elufi pu Israel che ñi huehuafiel ta Jabín, Canaán ñi lonco ülmen.
24 Pu Israel che doi nehuentu hueichafingün ta Jabín, Canaán ñi lonco ülmen, fei apümcafingün.
Quimnieal
^ Hebreo quehun feipilei: “Fendefi engün”.
^ Cam: “Quehuafe”.
^ Cam: “Haróset mülechi fillque troquiñche, Haróset-Ha-Goyim”.
^ Cam: “Carro”.
^ Cam: “Chincül”.
^ Hebreo quehun feipilei: “Carretela pañillhuengelu, hierrongelu”.
^ Cam: “Ngütrümfalfi”.
^ Cam: “Feipifinge tami pu huentru ñi amual”.
^ Cam: “Hudahui”.
^ Cam: “Carpa ruca”.
^ Hebreo quehun feipilei: “Carretela pañillhuengelu”.
^ Hebreo quehun feipilei: “Mülefui tüngün, cüme felen”.
^ Cam: “Cuntra, trongtrong”.
^ Cam: “Pülleconpale”.
