Deuteronomio 18:1-22
18 Pu Leví che sacerdotengelu, com Leví tañi troquiñche, lloulayaingün mapu caquelu Israel che reque. Fei engün iyafingün chem ñi chalintuculelngeel ta Chau Jehová cütral mu, quisu ngen-ngei tüfa mu.
2 Lloulayaingün mapu caquelu troquiñche reque.* Chau Jehová eluafi engün com tañi duamnieel.* Femngechi feipicünufi engün.
3 Pu che tüfa mülei ñi eluafiel pu sacerdote: inei rume hul-le quiñe chalintucun,* toro cam ufisangeafui rume, mülei ñi eluafiel ti sacerdote ti paletilla,* ti trangatranga* ca ti pütra.
4 Cafei eluafimi tami hune cosechaelchi fün, tami hune deumaelchi pulcu ca aceite. Cafei hue quediñfilmi tami pu ufisa, feitichi cal ufisa eluafimi.
5 Com tamün troquiñche mu, tamün Chau Dios Jehová dullifi pu Leví che ca tañi pu fotüm ñi rumel cüdahual engün Chau Jehová ñi üi mu.
6 Quiñe Leví che elcünuafui chi ti huaria cheu ñi mülen Israel mapu meu. Ayüafui chi ñi amual cheu ñi dulliel Chau Jehová.*
7 Com tañi pu peñi, pu Leví che, üye mu müleingün Chau Jehová ñi adquiñ mu. Fei quisu ca cüdahuafui üyeu tañi Chau Dios Jehová ñi üi mu.
8 Quisu fendefile tañi cuifiqueche yem ñi nieel, llohuai ti plata. Huelu ca elungeai iyael tañi pu peñi reque.
9 Conpulmi ti mapu mu tami eluaeteu tami Chau Dios Jehová, eluulayaimi tami inayentuafiel feitichi troquiñche ñi ünufalchi huimtun.
10 Inei no rume tamün mapu meu ngelai ñi lüpümafiel* cütral mu tañi fotüm cam tañi ñahue. Inei no rume conquinolpe pelontun dungu meu ca calcu dungu mu, quintuquinolpe chem ñi rupayal cüpalechi antü mu calcu dungu meu.
11 Inei no rume malisiaquinolpe tañi chafche* dahun dungu mu,* quintuquinolpe pu ramtuquefilu pu la cam pelontuchefe. Cafei mülequinolpe che ramtuquefilu pu la.
12 Chau Jehová üdequefi inei rume femngechi dungu femquelu. Fei tüfachi huesaque dungu ñi duam meu tami Chau Dios Jehová huemünentuafi* feitichi troquiñche tami adquiñ meu.
13 Mülei tami lif chengeal tami Chau Dios Jehová ñi adquiñ mu.
14 Tüfachi troquiñche tami huehuafiel allcütuquefuingün pu conquelu calcu dungu mu ca pelontun dungu meu, huelu tami Chau Dios Jehová eluquelaeimu tami femngechi femal.
15 Tamün pu peñi meu tamün Chau Dios Jehová dulliai quiñe huerquen, iñche reque. Mülei tamün allcütuafiel.
16 Feichi dungu ngillatufimün tamün Chau Dios Jehová Horeb huincul mu feichi antü ñi trahuluhun com tati pu che. Feichi mu feipimün nga: ‘Ayülelaiñ huiño allcütuafiel taiñ Chau Dios Jehová ñi dungun ca huiño peafiel tüfachi fütra cütral. Femliyiñ, latripayafuiñ’.
17 Chau Jehová feipieneu: ‘Ñi feipin engün cümelcalei.
18 Tañi pu peñi meu dullian quiñe huerquen eimi reque. Iñche quimelelafiñ tañi feipin, fei quimelelafi tati pu che com tañi feipifiel.
19 Inei rume allcütunole ñi chem pin tüfachi huentru iñche ñi üi mu, ramtucadunguafiñ.
20 Quiñe huerquen checahun mu dungule iñche tañi üi meu chem tañi huercünofiel cam dungule caquelu dios ñi üi meu, feiti huerquen mülei tañi layal.
21 Huelu raquiduamafuimi chi tami piuque mu: “¿Chumngechi am quimürpuafuiñ ñi cüpanon Chau Jehová mu tüfachi feipin?”.
22 Ñi chem pin ti huerquen Chau Jehová ñi üi meu mupitripanole cam femtripanole, quimfalngeai Chau Jehová ñi feipinon tüfachi dungu. Checahun mu ti huerquen feipicünui tüfa. Feimu llicanielayafimi’.
Quimnieal
^ Hebreo quehun feipilei: “Tañi pu peñi engün”.
^ Hebreo quehun feipilei: “Jehová, fei engün tañi herencia”.
^ Ca lof mu: “Füchotun, mañumtun”.
^ Ca lof mu: “Lipang”.
^ Ca lof mu: “Traltri”.
^ Cheu ñi dulliel tañi püramyengeal.
^ Cam: “Rulpayafiel”.
^ Ca lof mu: “Trafche”.
^ Ca lof mu: “Calcu dungu mu”.
^ Ca lof mu: “Quechanentuafi”.
