Números 11:1-35
11 Fei tati pu che Chau Jehová ñi adquiñ meu aungeiñ pimequeingün. Chau Jehová allcütufilu engün, rume illcui,* fei Chau Jehová huercülelfi cütral ca lüpümngeingün quiñeque che mülelu huecun cheu ñi mülen tañi tolto ruca.*
2 Ti pu che llellipufilu engün ta Moisés tañi quelluaeteu, Moisés llellipufi ta Chau Jehová, fei ti cütral chongnagi.
3 Feimu Taberá* üituculelngei feichi mapu, tiye mu am Chau Jehová huercüleleyu cütral engün.
4 Fei tati pu ca cüpanche mülelu fei engün meu, feipingün ñi rume illutuniefiel ti iyael ñi niequefel cuifi. Fei pu Israel che ca eluhuingün ñi huiño ngümacahual ca feipingün: “Ilo fel anai.
5 ¡Egipto mapu mu cullinon mu iquefuiñ challhua, pepino, santilla, porro, cefolla, acu! ¡Müna hueñancütufiyiñ!
6 Tüfa hula yafüngehuelaiñ. Nieiñ re mana müten”.
7 Tati mana fün culantu reque felefui, tati bedelio* reque trüri.
8 Ti pu che tripaqueingün ñi ñimituafiel,* fei rüngümquefuingün quiñe cudi mu cam quiñe tranantrapihue mu. Fei huadcümngequei challa mu cam deumangequei chincülcülechi cofque.* Cochürquei quiñe cochülechi galleta reque nielu aceite.
9 Pun meu nagpalu ilhuen* cheu ñi toltoucülen* ta che, huente mu ca nagpaquei ti mana.
10 Moisés allcüi tati pu che ñi ngümacaumequen, caque quiñeque familia, caque quiñeque che femmequei itrotripa tañi tolto ruca mu. Chau Jehová rume illcui* ca Moisés huesa duamnagi.
11 Fei Moisés feipifi ta Chau Jehová: “¿Chumngelu* illcutunieen?* ¿Chumngelu elfalcünuen cuidayafiel tüfachi pu che? Rume cüdautumequen.
12 ¿Iñche ñuquengen am com tüfachi pu che mu? Eimi feipien: ‘Metayenieafimi engün, quiñe cüdaufe reque ñi metayeniefiel quiñe pichiche’. Huelu, ¿iñche am choyüfiñ engün? ¿Iñche am mülei ñi puhulafiel engün feichi mapu tami feipicünufiel ñi cuifiqueche yem?
13 ¿Cheu chi iñche peafun ilo ñi eluafiel tüfachi pu che? Ngümamequeingün iñche tañi adquiñ meu, feipimequeingün: ‘Elumuiñ ilo’.
14 Iñche quisu cuñiutuculayafun tüfachi pu che, rume cüdaungei iñche mu.
15 Femngechi femeli, füreneen, matu langümen. Füreneeli, elulaen ñi peal doi huesaque dungu”.
16 Chau Jehová huiñoldungufi* ta Moisés: “Tati pu Israel che ñi pu loncolelu meu, trapümafimi 70 huentru. Ngüneduamafimi ñi cüme loncolen engün ca ñi cüme yenieel tañi falinque cüdau, fei yeafimi tati trahunhue tolto ruca. Fei mu mülenagaimün.
17 Iñche nagpayan tami dunguafiel, fei chumngechi tami elufiel nehuen ca eluafiñ engün. Fei engün quelluaimu tami cuñiutucuafiel ti pu che, femngechi quisu yelayafimi feiti fanechi cüdau.
18 Mülei tami feipiafiel tati pu che: ‘Pepicahuaimün,* hule ilotuaimün. Chau Jehová allcüi tamün ngümacaumequen ca tamün feipimequen: “¿Inei eluaiñmeu ilo? Doi cüme felefuiñ Egipto mapu mu”. Chau Jehová eluaimünmeu ilo, fei eimün iyafimün.
19 Ilotulayaimün quiñe, epu, quechu, mari cam epu mari antü no rume.
20 Huelu mai com quiñe cüyen ilotuaimün, yu püle* tripayai ilo, ünüafimün. Famentufimün* ta Chau Jehová mülelu eimün meu. Quisu tañi adquiñ mu ngümalen feipingün: “¿Chumngelu am* tripaiñ Egipto mapu mu?”’”.
21 Fei Moisés feipifi: “Iñche mülen 600.000 huentru engün, fei eimi feipimequeimi ‘¡Iñche eluafiñ ñi ilotual com quiñe cüyen!’.
22 Langümfili com huaca ca ufisa, ¿tuduampeafuingün mai? Cam entufili com challhua ñi mülen lafquen meu, ¿tuduampeafuingün mai?”.
23 Fei Chau Jehová feipifi ta Moisés: “¿Chau Jehová femlayafui tüfa? Tüfa hula peaimi ñi mupitripapen mai tañi feipin”.
24 Fei Moisés tripai ca quimelelfi tati pu che ñi feipieteu Chau Jehová. Cafei trahulfi 70 huentru tati pu loncolelu Israel meu ca huallontucufi engün ti tolto ruca mu.
25 Fei Chau Jehová quiñe tromü mu nagi ñi dunguafiel ta Moisés, elufi nehuen feitichi 70 huentru chumngechi ñi deu elufiel ta Moisés. Fei lloulu müten engün Chau Dios ñi nehuen, Chau Dios ñi huerquen reque femingün, huelu feichi meu müten femngechi femingün.
26 Epu huentru mülenagingu cheu ñi toltoucülen* pu che, Eldad ca Medad pingeingu. Amulaingu ti trahunhue tolto ruca mu, huelu tañi üi deu huirintucuñmangerquei. Feimu llohuingu Chau Dios tañi nehuen, fei Chau Dios ñi huerquen reque femingu cheu ñi toltoucülen pu che.
27 Quiñe hueche lefcülen pemefi ta Moisés, feipifi: “¡Eldad ca Medad Chau Dios ñi huerquen reque femmequeingu cheu ñi toltoucülen* pu che!”.
28 Josué, Nun tañi fotüm, huechengelu müten eluhui ñi quelluafiel ta Moisés, fei quisu feipi: “Ñidol, Moisés, ¡catrütufinge engu!”.
29 Huelu Moisés feipi: “¿Raquiduamcülepeimi mai iñche meu? Femlayaimi. ¡Iñche ayüafun com pu che Chau Jehová ñi troquiñche mu quisu ñi huerquen-ngeal engün ca Chau Jehová ñi eluafiel com engün quisu tañi nehuen!”.
30 Fei hula Moisés quiñentrür pu loncolelu Israel meu huiñotuingün cheu ñi toltoucülen* pu che.
31 Fei Chau Jehová cüpali quiñe cürüf, feiti cürüf cüpalfi lafquen püle codornices ca ütrüfnacümfi inafül cheu ñi toltoucülen* pu che, fill püle mülerquei. Tami rupayal cheu ñi mülen codornices, com quiñe antü trecayahuafuimi. Tacufingün ti mapu, quiñe metro* alüpürai.
32 Fei com feichi antü, com ti pun ca com ti inalechi antü tati pu che ñimitumequeingün codornices. Caque quiñeque che ñimituingün doi huaranca* kilo.* Ca inafül cheu ñi toltoucülen* pu che ünifcünufingün mapu mu tati codornices.*
33 Huelu petu nielu engün ilo tañi foro mu, petu changafmequelu engün, Chau Jehová illcutufi* tati pu che, fei Jehová eluhui ñi cutrancayafiel engün, fentren che langümfi.
34 Üye mu rüngaltucungei tati pu che illutuniefilu ti iyael, feimu Quibrot-Hataavá* üitucungei feitichi mapu.
35 Fei tati pu che tripaingün Quibrot-Hataavá mu ñi puhual Hazerot mapu mu, fei üye mu mülenagpuingün.
Quimnieal
^ Ca lof mu: “Lladcüi”.
^ Cam: “Carpa ruca”.
^ Tüfachi üi cüpa feipi “lüpümuhun”.
^ Tüfa ta cüme nümün-ngechi resina quiñeque anümca mu tripalu.
^ Ca lof mu: “Ngümituafiel”.
^ Ca lof mu: “Trincürcülechi cofque”.
^ Ca lof mu: “Mülfen”.
^ Ca lof mu: “Cheu ñi elcünun tañi tolto ruca”.
^ Ca lof mu: “Lladcüi”.
^ Ca lof mu: “Chemu”.
^ Ca lof mu: “Lladcütunieen”.
^ Ca lof mu: “Lloudungufi”.
^ Cam: “Liftuhuaimün, püntücünuhuaimün”.
^ Ca lof mu: “Yiu püle”.
^ Ca lof mu: “Chemu”.
^ Ca lof mu: “Quiñepülecünufimün”.
^ Ca lof mu: “Cheu ñi anümcünufiel ñi tolto ruca”.
^ Ca lof mu: “Cheu ñi anümcünufiel ñi tolto ruca”.
^ Ca lof mu: “Cheu ñi anümcünufiel ñi tolto ruca”.
^ Ca lof mu: “Cheu ñi anümcünufiel ñi tolto ruca”.
^ Hebreo quehun feipilei: “2 codo”. Quiñe codo fei ta 44,5 centimetro. Ngüneduamnge apendice B14.
^ Ca lof mu: “Doi mil”.
^ Hebreo quehun feipilei: “10 homer”. Quiñe homer feita 220 litro. Ngüneduamnge apendice B14.
^ Ca lof mu: “Cheu ñi anümcünufiel ñi tolto ruca”.
^ Fempelaingün ñi ancümafiel ti ilo.
^ Ca lof mu: “Lladcütufi”.
^ Tüfachi üi cüpa feipi “cheu ñi rüngaltucungequen pu rume illutuquelu”.
