Isaías 14:1-32
14 Chau Jehová cutranpiuqueyeafi ta Jacob ca huiño dulliafi ta Israel. Femcünuai ñi anüpual* tañi mapu meu. Pu ca cüpanche quiñehuaingün quisu engün meu, conaingün Jacob ñi pu cüpanche meu.
2 Caquelu troquiñche nüafingün pu Israel che ca huiño yetuafingün tañi mapu mu. Chau Jehová ñi mapu meu pu Israel che nüafingün tüfachi pu huentru ca pu domo tañi cüdahuelaeteu. Presuyeafingün feitichi pu che tañi presuyequefeteu, ca ngünenieafingün pu dicümtucuqueteu* ñi cüdahual.
3 Puhuai chi antü Chau Jehová tami entuñmayaeteu tami cutrancahun ca tami hueñancün. Femcünuai tami esclavongehuenoal.
4 Feichi antü tüfachi feipin meu ayentuafimi tati lonco ülmen Babilonia mu, feipiaimi:
“¡Tüfei! Ngüneduamfinge chumngechi ñi felehuetun feiti dicümtucuchequefulu ñi cüdahual.
¡Tüfei! Ngüneduamfinge chumngechi ñi dicümtucuchehuenon.
5 Chau Jehová trafoñmafi pu huesaque che ñi faraca pu ngünenielu ñi retrü.
6 Apümcafi feiti illcunquechi* cupafcaniefilu ti pu che,apümcafi tati illcunquechi inantucuniefilu ca nüfilu fillque troquiñche tañi ngünenieafiel.
7 Tüfa hula com ti pu che mapu mu tüngcülen* ürcütulei.
Huirarmequeingün fente ñi ayühun.
8 Enebro anümca müna ayühuingün tami rupan mu,cedro anümca Líbano mu cüpalu ca ayühuingün.
Feipingün: ‘Trananaglu hula eimi,inei no rume cüpalai taiñ catrüaeteu’.
9 Naglu eimi ti Rüngan mu,* mülerquei fentren pofolcahun.
Eimi tami duam meu trepelngei* pu layechi che,com pu huesaque ngüneniefulu mapu meu.
Fillque troquiñche ñi pu lonco ülmen huitrapüraingün tañi ülmen huancu meu.
10 Com engün eluhuingün ñi dungual, feipingün:
‘Eimi, ¿ca nehuen-ngehuelaimi iñchiñ reque?
¿Iñchiñ reque feletuimi am?
11 Rüngan mu* ütrüftucungei tami mallmangenca tami dungulhue* ñi ül.
Fentren piru mülei miñche eimi mu quiñe cahuitu reque,cafei pu piru tacunieimu’.
12 Eimi tati huilüfcülechi huangülen.
Huelu, ¡tüfei! Huenu mu trananagpaimi.
Eimi hueufimi fillque troquiñche.
Huelu, ¡tüfei! Catrünacümngeimi mapu mu.
13 Piuque mu feipirqueimi: ‘Huenu mu pürayan.
Püramcünuafiñ ñi ülmen huancu huente Chau Dios ñi huangülen mu,anüpuan huente ti huincul mu cheu ñi püramyengequen ta Chau Dios,*ti doi camapulechi mapu norte püle* mülelu.
14 Huente tromü pürayan,tati Doi Alüpüralelu reque femcünuhuan’.
15 Huelu nagaltu ütrüftucungeaimi ti Rüngan mu,*tati doi alüconcülelu mu.
16 Pu che tami peaeteu leliniehueaimu,ngüneduamnieaimu ca feipiaingün:
‘¿Tüfachi huentru am nengümcaquefui ti mapu?
¿Quisu ñi duam mu am müllmüllcülequefui fillque troquiñche?
17 ¿Quisu am huellicünuquefui ti mapuca apümcaquefi fillque huaria?
¿Quisu am eluquelafui pu presu ñi huiñotual tañi ruca mu?’.
18 Com pu lonco ülmen caquelu troquiñche meu,com engün yamün mu* rüngaltucungei,caque quiñeque engün tañi rüngan mu.*
19 Huelu eimi quiñepülecünungeaimi, rüngaltucungelayaimiquiñe üdengeelchi rou reque.*
Tami cuerpo* tacunieayu com pu langümngelu fütra cuchillo mutrananaglu huente cura rüngan mu.
Quiñe pünocangeelchi la reque felehuetuaimi.
20 Eimi apümcafimi tami mapu,langümfimi eimi tami pu che,feimu rüngaltucungelayaimi cheu ñi mülen pu lonco ülmen.
Pu huesaque che ñi pu cüpanche üitungehuelayai chumcaunorume.
21 Pepicacünuafimün cheu ñi langümngeal ñi pu fotüm.
Femngechi femafimün tañi pu cuifiqueche yem ñi culpan meu.*
Fei nehuen-ngelayaingün ca ngen-ngelayaingün ti mapu muñi apolafiel tañi pu huaria mu”.
22 “Iñche lefcontuafiñ engün” pi Chau Jehová Ñidolcülelu pu hueichafe mu.*
“Apümcayafiñ Babilonia ñi üi, tati pu mülehuelu fei mu, tañi pu cüpanche ca chem cüpanche rume” pi Chau Jehová.
23 “Pu puercoespin* femcünuan ñi ngen-ngeal Babilonia mu, fotracocünuafiñ, com apümcayafiñ”* pi Chau Jehová Ñidolcülelu pu hueichafe mu.
24 Chau Jehová Ñidolcülelu pu hueichafe mu feipicünui:
“Chem tañi ayülen, felerpuai.
Chem tañi dulliel, huechutriparpuai.
25 Iñche tañi mapu mu trañmayafiñ ti Asiria huentru,tañi mahuida mu pünocayafiñ.
Famentuafiñ* ti yucu quisu ñi tuculelfiel tañi pu checa famentuafiñ ti fanechi chemcün* ñi meñcutuculelfiel tañi pu che”.
26 Tüfa dullingei ñi femngeal com ti mapu.
Tüfa Chau Dios ñi nehuen tañi cutrancayafiel* com pu troquiñche.
27 Chau Jehová Ñidolcülelu pu hueichafe mu deu dulli tañi chumal,¿inei am catrütuafeyu?
Deu eluucülei tañi cutrancacheal,¿inei am huiño huitratuafeyu?
28 Feichi tripantu ñi lan ti lonco ülmen Acaz, tüfachi dungu feipicünungei:
29 “Eimi, Filistea, ti retrü tami cupafcaqueteu trafoi,huelu quiñe tami pu che no rume ngelai ñi ayühual.
Filu ñi curam mu* tripayai quiñe venenongechi filu,ca tañi püñeñ, quiñe venenongechi filungeai matu miyauquelu.
30 Pu cuñifallcülelu ñi pu yall* iyaingün,pu pofre cuduaingün cuñihun-ngenon mu.
Huelu femcünuan ñi layal tami pu che entrin mu,ca tami mülehuechi pu che langümngeaingün.
31 ¡Eimün, pu che, eyütumün ti puerta mu! ¡Huirarmün, eimün pu mülelu huaria mu!
¡Com eimün yafüngehuelayaimün, ahuem Filistea!
Norte püle* cüpalei quiñe troquiñ hueichafe fitrun reque,*quiñe hueichafe no rume furitulehuelai”.
32 ¿Chem huiñoldungulelngeai* ti troquiñche ñi huerquen?
Chau Jehová cüme anücünufi ta Sion,pu cuñifallcülelu tañi troquiñche mu ellcahuaingün üye mu.
Quimnieal
^ Cam: “Ürcütual”.
^ Ca lof mu: “Fülümtucuqueteu, obligaqueteu”.
^ Ca lof mu: “Lladcünquechi”.
^ Ca lof mu: “Cüme duamquechi”.
^ Cam: “Seol”. Tüfa pengelquei cheu ñi ürcütumequen reque pu la. Diccionario mu ngüneduamnge “Seol”.
^ Ca lof mu: “Nepelngei”.
^ Cam: “Seol”. Tüfa pengelquei cheu ñi ürcütumequen reque pu la. Diccionario mu ngüneduamnge “Seol”.
^ Ca lof mu: “Ayecahue”.
^ Hebreo quehun feipilei: “Trahunhue huincul”.
^ Ca lof mu: “Picun püle”.
^ Cam: “Seol”. Tüfa pengelquei cheu ñi ürcütumequen reque pu la. Diccionario mu ngüneduamnge “Seol”.
^ Ca lof mu: “Respetan mu”.
^ Hebreo quehun feipilei: “Ruca mu”.
^ Cam: “Üdengeelchi choyün reque”.
^ Ca lof mu: “Calül”.
^ Ca lof mu: “Yafcan meu”.
^ Ca lof mu: “Quehuafe, aucafe”.
^ Quiñe fütra dehu reque felei nielu chacai reque tañi incañpehual.
^ Hebreo quehun feipilei: “Lepüafiñ tati apümcaquelu chi lepühue meu”.
^ Ca lof mu: “Quiñepülecünuafiñ”.
^ Ca lof mu: “Fillem”.
^ Cam: “Cupafcayafiel”.
^ Hebreo quehun feipilei: “Folil”.
^ Ca lof mu: “Familia”.
^ Ca lof mu: “Picun püle”.
^ Ca lof mu: “Pitrun reque”.
^ Ca lof mu: “Lloudungulelngeai”.
