1 Crónicas 16:1-43
16 David pepicai quiñe tolto ruca* ñi müleal Chau Ngünechen ñi Falin Caja. Tiye mu tucungei ca elcünungei. Fei Chau Ngünechen ñi adquiñ mu, hultucuingün lüpümngeelchi chalintucun* ca chalintucun quiñentrür ingequelu.*
2 David deu hultuculu lüpümngeelchi chalintucun ca chalintucun quiñentrür ingequelu, fei ngillatuñmafi tati pu che Chau Jehová ñi üi mu.
3 Cafei David elufi com pu Israel che, quisuque pu huentru ca pu domo, quiñe cofque, quiñe cochü cofque tucungelu palmera fün ca quiñe cochü cofque tucungelu anquen ofad.
4 Fei hula dullifi quiñeque Leví che ñi cüdahual itrotripa Chau Jehová ñi Falin Caja meu. Tüfa engün mülefui ñi yamafiel,* mañumafiel ca püramyeafiel ta Chau Jehová, Israel ñi Chau Ngünechen.
5 Asaf loncolei ca Zacarías inalei loncolen mu. Jeiel, Semiramot, Jehiel, Matitías, Eliab, Benaya, Obed-Edom ca Jeiel dungulquefui tati dungulhue nielu cuerda ca tati arpa. Asaf dungulquefui ti cimbalo.*
6 Ca tati sacerdote Benaya ca Jahaziel amulei ñi dungulquefiel ti trompeta itrotripa ti falin caja pengelquelu Chau Ngünechen ñi eldungu.
7 Feichi antü David entui quiñe ülcantun ñi mañumafiel Chau Jehová. Tüfa tati hunen rupa ñi feipifiel ta Asaf ca tañi pu peñi ñi ülcantual. Ti ül feipi:
8 “¡Mañumfimün ta Chau Jehová! ¡Püramyefimün tañi üi!¡Quimelelafimün tañi femün rangi pu troquiñche meu!
9 Ülcantulelafimün, püramyefimün ülcantun mu,*raquiduamtucuniemün* com ti afmatun dungu tañi femün.
10 Saquihuaimün tamün dungual tañi yamfal üi mu.
Ayüucülepe ñi piuque pu quintuquefilu ta Chau Jehová.
11 Quintufimün ta Chau Jehová ca tañi nehuen.
Quintunieafimün tañi quellu.
12 Acordamün* com tati fütraque dungu tañi femün,tañi afmatun dungu ca chem tañi juiciantucuel.
13 Tamün cüdaufe Israel ñi cüpanchengeimün,Jacob tañi yallngeimün* ca tañi dullinchengeimün.
14 Fei taiñ Chau Ngünechen Jehová.
Tañi ley dungu com mapu meu mülei.
15 Rumel acordanieaimün tañi eldungu.Acordaniemün Chau Dios ñi feipicünufiel* tañi pu che rumel mu,
16 cafei ti eldungu ñi femün Abrahán enguca tañi feipicünufiel* ta Isaac.
17 Quiñe huercün dungu mu quimfalcünulelfi tüfachi eldungu ta Jacob,ca quiñe feipicünun mu quimfalcünulelfi pu Israel che tüfachi eldungu rumel mülealu,
18 feipilu ‘Eluayu Canaán mapu,feichi mapu elungeaimün’.
19 Tüfachi dungu rupai pichin-ngelu engün,mai, pichin-ngeingün, fei ca cüpanchengeingün feichi mapu mu.
20 Miyauquefuingün fillque troquiñcheca fillque pais mu.
21 Chau Ngünechen eluulai* chem huentru no rume tañi cutrancayaeteu engün,huelu mai, norümtufi pu lonco ülmen fei engün ñi duam mu.
22 Feipi: ‘Chumlayafimün rume tañi pu dullincheca huesa femlayafimün tañi pu huerquen’.
23 ¡Com ti mapu mülei ñi ülcantulelafiel Chau Jehová!
¡Fill antü huldunguaimün tañi montulchequen!
24 Com troquiñche mu huldunguaimün tañi afmatufalngen,com troquiñche mu huldunguaimün afmatufalchi dungu tañi femün.
25 Chau Jehová doi alüpüralei ca felei tañi püramyengeal.
Fei doi afmatufalngei caquelu pu dios mu.
26 Pu troquiñche ñi pu dios com falilai,huelu Chau Jehová llemai deumai ta huenu.
27 Cheu tañi mülen afmatufali ca rume cüme adi.Cheu tañi mülen mülei ta nehuen ca ayühun.
28 Pu troquiñche ñi familia eluafimün Chau Jehová chem tañi llohuafel.Chau Jehová afmatufalngei ca nehuen-ngei, feimu eluafimün chem tañi llohuafel.
29 Püramyeafimün Chau Jehová ñi üi,cüpalaimün quiñe regalo ca mülepuaimün tañi adquiñ mu.
Tucutuhuaimün yamfal tacun,* fei Chau Jehová ñi adquiñ mu pochongnagaimün.*
30 ¡Com ti mapu nüyüpe* tañi adquiñ mu!
Cüme anümcünungei ti mapu, pepi nengümngelai.*
31 Ayüupe ti huenu, ayüupe ti mapu.Pu troquiñche mu huldungumün: ‘¡Chau Jehová Lonco Ülmen-ngerpui!’.
32 Raracülepe ti lafquen ca com mülelu fei mu.Ayüucülepe ti lelfün ca com mülelu fei mu.
33 Ca femngechi Chau Jehová ñi adquiñ mu ayühunquechi huirarpe pu anümca mahuida mu mülelu.Chau Dios cüpayai* tañi juzgayafiel ti mapu.
34 Chau Jehová cüme piuquengei, feimu mañumafimün.Tañi piuqueyen* rumel mülequei.
35 Feipiaimün: ‘Ahuem Chau Dios taiñ montulqueteu, eimi montulmuaiñ,trahulmuaiñ ca montulmuaiñ pu troquiñche ñi duam mu,femngechi mañumafiyiñ tami yamfal üica püramyehuaiñ fente taiñ ayüucülen.
36 Rumel püramyengepe Chau Jehová,Israel ñi Chau Ngünechen’”.
Fei com pu che feipi: “¡Felepe mai!”, ca püramyefingün ta Chau Jehová.
37 Fei hula David elcünufi ta Asaf ca tañi pu peñi itrotripa ti falin caja pengelquelu Chau Jehová ñi eldungu. Mülefui ñi cüdaucüleal engün itrotripa ti Falin Caja mu, chumngechi femngequei fill antü.
38 Mülefui Obed-Edom ca tañi pu peñi, tüfa ta 68 huentru. Ca cuidaquefui ti puerta Hosá ca Obed-Edom, tüfa Jedutún ñi fotüm.
39 Ti yamfal mülehue* mülelu Gabaón mu mülefui ti sacerdote Sadoc ca tañi pu compañ sacerdote, itrotripa Chau Jehová ñi ngillatuhue tolto ruca mu.
40 Rumel mülefui ñi hultuculelafiel Chau Jehová lüpümngeelchi chalintucun altar mu, cheu ñi hulngen lüpümngeelchi chalintucun pulihuen ca nagantü mu. Cafei mülefui ñi femal engün com ñi huirintucuel Moisés ñi ley, Chau Jehová ñi elufiel pu Israel che.
41 Compañeyu engün Hemán, Jedutún ca caquelu dullin huentru elfalcünungelu ñi mañumafiel ta Chau Jehová, “tañi piuqueyen* rumel mülequei”.
42 Hemán ca Jedutún mülefui tañi dungulal trompeta, cimbalo ca tati dungulhue, fei ñi püramyengeal* Chau Ngünechen. Ca Jedutún ñi pu fotüm mülefui puerta püle.
43 Fei hula com pu che amutui tañi ruca mu ca David ngillatuñmafi tañi pu che.
Quimnieal
^ Ca lof mu: “Carpa ruca”.
^ Ca lof mu: “Füchotun, mañumtun”.
^ Cam: “Chalintucun ñi cümelcaucüleal Chau Dios engu”. Diccionario mu ngüneduamnge “chalintucun quiñentrür ingequelu”.
^ Ca lof mu: “Respetayafiel”. Hebreo quehun feipilei: “Acordayafiel, conümpayafiel, tuculpayafiel”.
^ Tüfachi dungulhue deumangei pañillhue, hierro mu ca chincülcülefui, trincürcülefui.
^ Cam: “Dungulelafimün musica”.
^ Ca feipiafui chi: “Nütramcamün”.
^ Ca lof mu: “Conümpamün, tuculpamün”.
^ Ca lof mu: “Familiangeimün”.
^ Hebreo quehun feipilei: “Huercüfiel”.
^ Ca lof mu: “Cuyalltufiel”.
^ Ca lof mu: “Eluñmalai”.
^ Ca feipiafui chi: “Fente ñi cüme adngen ca tañi lifngen”.
^ Ca lof mu: “Lloyünagaimün, ponornagaimün”. Cam: “Poyeafimün”.
^ Ca lof mu: “Nüyünpe”.
^ Cam: “Mütroungelai”.
^ Cam: “Cüpai”.
^ Hebreo quehun mu feipi piuqueyechen ca fürenechen afquenolu. Diccionario mu ngüneduamnge “piuqueyen afquenolu”.
^ Hebreo quehun feipilei: “Huechuñ mülechi mülehue”. Diccionario mu ngüneduamnge “huechuñ mülechi mülehue”.
^ Diccionario mu ngüneduamnge “piuqueyen afquenolu”.
^ Cam: “Ülcantulelngeal”.
