¿Chem am tati espiritu santo? Tüfa ta Ngünechen tañi nehuen (Miqueas 3:8; Lucas 1:35, Traducción del Nuevo Mundo [TNM]).⁠ a Ngünechen pünequei tañi nehuen fillque dungu meu ca cheu rume, femngechi ñi femngeal tañi ayüqueel (Salmo 104:30; 139:7).

 Biblia meu huinca dungu mu feipingequei “espiritu”, huelu hebreo quehun meu feipingequefui ru’ach ca griego quehun meu feipingequefui pneu’ma. Biblia meu feipingelu espiritu, fentren rupa adentulei Ngünechen tañi nehuen (Génesis 1:2, TNM). Huelu tüfachi dungun caque dungu adentuleafui ca, tüfa ta quiñeque:

•   Neyeal (Habacuc 2:19; Apocalipsis 13:15, TNM).

•   Cürüf (Génesis 8:1; Juan 3:8, TNM).

•   Feichi nehuen ñi mongen-niefiel ta che ca pu culliñ (Job 34:14, 15).

•   Quiñe che eluucülelu ñi femal quiñe dungu (Números 14:24).

•   Tati pu püllü (1 Reyes 22:21; Juan 4:24, TNM).

 Felei llemai, tati espiritu caquerume dungu adentuleafui ca iñchiñ pequelafiyiñ com tüfa, huelu quimfali ñi femürpuquen. Ngünechen tañi nehuen, “trürümfalngeafui cürüf meu, iñchiñ pequelaiñ cürüf, huelu quimnieiñ ñi fütra nehuen-ngen ca femngechi quimnieiñ Jehová ñi fütra pepiluhun-ngen” (Diccionario expositivo de palabras del Antiguo y del Nuevo Testamento exhaustivo, de William E. Vine).

 Tüfachi nehuen cüpalu Ngünechen meu, Biblia mu trürümfalngei quiñe cuhu meu cam quiñe changül cuhu meu (Salmo 8:3; 19:1). Quiñe cüdaufe fillque dungu femquei tañi cuhu ca changül cuhu meu. Ca femngechi, Chau Ngünechen tañi nehuen meu fillque dungu femquei. Tüfa ta quiñeque dungu ñi femün:

•   Deumai ti callfü huenu (Salmo 33:6; Isaías 66:1, 2).

•   Deumai ta Biblia (2 Pedro 1:20, 21, TNM).

•   Cuifi meu Chau Ngünechen nehuentucufi tañi pu che ñi femal afmatufalchi dungu ca ñi amuldungucheal (Lucas 4:18, TNM; Hechos 1:8, TNM; 1 Corintios 12:4-11, TNM).

•   Chau Ngünechen tañi nehuen meu quelluquefi tati pu che ñi doi cüme chengeal (Gálatas 5:22, 23, TNM).

Tati espiritu santo quiñe che no tati

 Fentren rupa Biblia meu tati espiritu santo trürümngei tati cuhu, changül cuhu ca neyen meu, fei tüfa raquiduameleiñmu quiñe chenofel (Éxodo 15:8, 10). Quiñe cüdaufe ñi cuhu quisu ngüneucülelai. Ca femngechi Ngünechen tañi nehuen quisu ngüneucülelai, Jehová ta adniefi (Lucas 11:13). Ca femngechi Biblia trürümfi Ngünechen tañi nehuen tati co meu, ca feipi ñi nüucülen tati feyentun ca quimün meu. Feimu fei tüfa pengeleiñmu quiñe che no tati Ngünechen tañi nehuen (Isaías 44:3; Hechos 6:5, TNM; 2 Corintios 6:6, TNM).

 Biblia feipi Chau Ngünechen Jehová pingei ca tañi Fotüm Jesucristo pingei, huelu feipilai Ngünechen tañi nehuen ñi nien quiñe üi (Isaías 42:8; Lucas 1:31). Cuifi meu quiñe huentru poyequefilu ta Chau Dios, Esteban pingelu, pengelngei tati huenu. Fei pefi ta Ngünechen ca tañi Fotüm müten, quisu pelafi tati espiritu santo. Biblia feipi: “Esteban nierquei Chau Ngünechen ñi nehuen. Lelipürai huenu mu, fei pei Chau Dios ñi pepiluhun. Ca pefi ta Jesús Chau Dios ñi man püle” (Hechos 7:55, TNM). Felei llemai, Chau Ngünechen eluyefi tañi nehuen ta Esteban ñi peal tüfachi afmatufal dungu.

 Quiñeque che ñi feyentuquen: Tati espiritu santo quiñe püllüngei, feimu fentren che raquiduamquei Chau Ngünechen, Jesucristo ca tati espiritu santo quiñengeingün, chumngechi pengeli Mateo 28:19, 20. Tüfachi feyentun Trinidad pingei.

 Ti rüf dungu: Mateo 28:19, 20 feipingei tati Chau, tati Fotüm ca tati espiritu santo, huelu tüfa ¿pengelpei mai ñi quiñengen engün? Femlai, ca femngechi feipilai ñi trürngen engün tañi quimün ca nehuen meu. Fei ca femngechi caquelu troquiñ Biblia meu tripalu ti Chau, Fotüm ca tati espiritu santo, pengelquelai ñi trürngenon engün.

 Quiñeque che ñi feyentuquen: Tati Biblia feipi tati espiritu santo femquei fillque dungu ñi femqueel ta che, feimu feipiafuiñ tati espiritu santo quiñe che tati.

 Ti rüf dungu: Quiñeque mu, Biblia nütramcalu tati culpan, lan, ca quimün meu, quiñe che ñi femngen reque troquihuafuiñ, huelu femngelai tati. Raquiduamnge tüfa, Biblia feipi tati culpan ngüchaltucuchequei (Mateo 11:19; Lucas 7:35; Romanos 7:8, 11).

 Ca femngechi feipingequei Chau Ngünechen ñi nehuen meu, quiñeque mu Biblia nütramcalu tati espiritu santo meu quiñe püllü reque troquiafuiñ ñi femngen, huelu feingelai tati (Proverbios 1:20; Romanos 5:17, 21).

 Quiñeque che ñi feyentuquen: Tati pu che fautizangequei tati espiritu santo ñi üi meu, feimu quiñe püllüngei.

 Ti rüf dungu: Quiñeque mu, Biblia pengeli quiñe che ñi üi mu femngequei quiñeque dungu, fei ñi pengelal tüfachi che ñi ngen autoridad (Deuteronomio 18:5, 19-22; Ester 8:10). Feimu quiñe che fautizaulu tati espiritu santo ñi üi meu, tüfachi che pengeli ñi maneluucülen Chau Ngünechen ñi nehuen meu, ca feyentuquei Chau Ngünechen tañi nehuen mu femafui tañi ayünieel (Mateo 28:19).

 Quiñeque che ñi feyentuquen: Pu hunenque cristiano, quiñe rüf püllü troquifingün tati espiritu santo.

 Ti rüf dungu: Tüfachi dungu ñi feypiqueel ta che, quimeltuquelai Biblia. Quiñe enciclopedia feipi: “Fentren tripantu rupalu hula ñi lan ti inan apostol Constantinopla huaria meu, femngei quiñe fütra trahun, ca üyeu quimeltungei tati espiritu santo quiñe püllüngei” (Encyclopædia Britannica).