Biblia ñi quimeltuqueel

 Ñi fautizahual quiñe che mülei ñi com ñamümtucuñmangeal tañi cuerpo co meu. a Biblia meu huirintucungei ñi fautizahun fentren che (Hechos 2:41). Quiñe tüfa Jesús fautizaulu Jordán leufü mu (Mateo 3:13, 16). Rupalu ta antü, quiñe Etiopía huentru fautizangei “cheu ñi mülen co” inafül ti rüpü cheu ñi amulen (Hechos 8:36-40).

 Jesús quimeltui tañi pu inanieteu duamfalngei ñi fautizahual (Mateo 28:19, 20). Ti apostol Pedro ca femngechi quimeltui (1 Pedro 3:21).

Tüfachi troquiñ mu inaduamaiñ tüfachi ramtun:

•  Fautizahun mu iñchiñ, ¿chem pengelafuiñ?

•  Biblia, ¿quimeltuquepei mai quiñe pichiche ñi fautizangeal?

•  Fautizahual ti Chau, ti Fotüm ñi üi meu ca Chau Ngünechen ñi nehuen tañi üi meu, ¿chem pengeli?

•  Huiño fautizahual, ¿huesalcalepei mai?

•  Caquelu che fautizaulu huirintucungelu Biblia mu

•  Quiñeque che raquiduamquei coilaque dungu ti fautizahun mu

 Fautizahun mu iñchiñ, ¿chem pengelafuiñ?

 Fautizahun mu quiñe che pengelelfi caquelu pu che tañi repentiuhun tañi culpan mu ca feipicünufi ta Chau Jehová ñi femal tañi ayüqueel chem rupale rume. Com tañi mongen mu inayafi ta Chau Dios ca Jesús ñi feipin. Pu che fautizaucülelu eluuquei ñi rumel mongeleal.

 Quiñe che ñamümtucungelu co meu, cüme pengeli ñi cüme elcünutun tañi mongen. ¿Chumngelu? Tati Biblia trürümfi ti fautizahun tañi rüngaltucungen reque quiñe che (Romanos 6:4; Colosenses 2:12). Quiñe che petu ñamümtucungelu co meu, rüngaltucufi reque tañi cuifi mongen. Fei tripatulu co meu, hue mongen nietuquei ca eluhui ñi cüme poyenieafiel ta Chau Dios.

 Biblia, ¿quimeltuquepei mai quiñe pichiche ñi fautizangeal?

 Biblia quimeltuquelai ñi fautizangeal pu pichiche. b

 Ñi fautizangeal pu pichiche quiñeucülelai Biblia ñi quimeltun mu. Doi mai, Biblia quimeltuquei quiñe che ayülu ñi fautizangeal mülei ñi femal quiñeque dungu. Quiñe dungu ñi femal, mülei ñi adümal ti doi falinque quimeltun Biblia mu ca inayafiel tüfa tañi mongen mu. Repentiuhui tañi culpan mu, cafei llellipufi ta Chau Jehová ñi hultucual tañi mongen (Hechos 2:38, 41; 8:12). Pu pichiche pepi femlayafuingün tüfachi dungu.

 Fautizahual ti Chau, ti Fotüm ñi üi meu ca Chau Ngünechen ñi nehuen tañi üi meu, ¿chem pengeli?

 Jesús tüfachi dungu feipifi tañi pu inanieteu: “Amumün com troquiñ mapu mülechi pu che meu, ca quimeltuafimün iñche tañi inayaeteu engün. Fei ti Chau, ti Fotüm ca Chau Ngünechen ñi nehuen tañi üi meu fautizayafimün engün. Cafei iñche tamün huercüfiel ta eimün, com quimeltuafimün ñi inayal engün” (Mateo 28:19, 20). Ñi fautizahual “ti Chau, ti Fotüm ca Chau Ngünechen ñi nehuen tañi üi meu”, pengeli quiñe che ñi eluucülen tañi ngünenieaeteu ti Chau ca ti Fotüm ca quimtucui ñi femqueel Chau Ngünechen tañi nehuen. Tüfa ñi femün Pedro, feipifi quiñe huentru cüntro choyüngelu: “Ti Nazaret che Jesucristo ñi üi meu, ¡trecatunge!” (Hechos 3:6). Pedro quimtucui Jesús ñi nien autoridad ca ñi tremoltufiel ti huentru.

•   “Ti Chau”, fei ta Chau Jehová. c Quisu tati Com Deumalu, tati Hulquelu Mongen ca Com Nehuen Nielu, feimu felei ñi ngünenieafiel com dungu (Génesis 17:1; Apocalipsis 4:11).

•   “Ti Fotüm”, fei ta Cristo Jesús. Quisu huli ñi mongen iñchiñ taiñ duam mu (Romanos 6:23). Fei taiñ montulngeal, mülei taiñ falintuafiel ñi femün Jesús ca quimal chumngechi coneltulei Chau Dios tañi ayüqueel pu che mu (Juan 14:6; 20:31; Hechos 4:8-12).

•   “Chau Ngünechen ñi nehuen” quimfali tañi femqueel mu. d Chau Dios ñi nehuen mu deumai com ñi mülen, huli mongen, elufi huercün dungu tañi pu huerquen ca caquelu pu che ca elufi nehuen tañi femal quisu tañi ayüqueel (Génesis 1:2; Job 33:4; Romanos 15:18, 19). Chau Dios ca elufi nehuen pu huentru ñi huirintucual quisu tañi raquiduam Biblia mu (2 Pedro 1:21).

 Huiño fautizahual, ¿huesalcalepei mai?

 Fentren che elcünui tañi religion ñi conal ca religion mu. Deu fautizaulu engün tañi hunen religion mu, ¿huesalcalepei mai tañi huiño fautizahual? Quiñeque mai piafuingün chi, ngüneduamlu engün ñi feipin Efesios 4:5: “Quiñelei müten ta Ñidol, ti feyentun ca ti fautizahun”. Huelu tüfachi versiculo feipilai ñi huiño fautizaunoal quiñe che, ¿chumngelu?

 Caquelu dungu nüucülelu. Pablo ñi feipin Efesios 4:5 mu, pengeli ñi fente falin-ngen pu rüfngechi cristiano ñi quiñeucüleal tañi feyentun ca tañi maneluhun mu (Efesios 4:1-3, 16). Ñi femngechi quiñeucüleal pu cristiano, duamfali inayafiel quiñe Ñidol müten, fei ta Jesús, quiñe maneluhun müten nieal ca quiñeucüleal chumngechi inayal Biblia ñi feipin. Cafei duamfali inayal Biblia ñi feipin fautizahun mu.

 Ti apostol Pablo feipifi ñi fautizangeal quiñeque che deu fautizangelu rume, ¿chumngelu? Feichi pu che deu fautizangelu cüme adümquelafui pu cristiano ñi quimeltun (Hechos 19:1-5).

 Chem duamfali tañi fautizangeal. Cüme quimürpuliyiñ Biblia ñi rüf quimeltuqueel ca fautizauliyiñ, Chau Dios cümelu troquiafi taiñ fautizahun (1 Timoteo 2:3, 4). Quiñeque che quimeltungequei fillque quimeltun quiñeucülenolu Biblia ñi feipin mu, huelu fautizaule engün, Chau Jehová ayülai ñi femngechi fautizangeal (Juan 4:23, 24). Tati pu che cüme piuquengeafui, huelu “cüme quimlaingün chem ayüniei Chau Ngünechen” (Romanos 10:2). Feichi pu che ñi ayühuelafiel ta Chau Dios, mülei ñi quimürpuafiel Biblia ñi feipin, inayal tañi quimeltuqueel, hulal ñi mongen ta Chau Ngünechen ca huiño fautizangeal. Quiñe che femngechi dungu rupale, mülei tañi huiño fautizahual. Femle, culpalai.

 Caquelu che fautizaulu huirintucungelu Biblia mu

 Biblia mu pengeli caque rumei chumngelu pu che fautizauquefui. Quiñeque tüfa, pu inaniequelu ta Jesús. Peaiñ quiñeque:

 Juan ti Fautizachefe. e Juan fautizafi pu judio che ca pu inaquefilu pu judio ñi huimtun. Tüfa engün culpaingün tañi inanofiel Moisés ñi ley (fei tati ley Chau Ngünechen ñi elufiel pu Israel che), feimu repentiuhuingün ca fautizahuingün. Femngechi fautizaule che, pepicaucüleafuingün ñi maneluhual ca ñi quimal ineingen tati Mesías, Jesús tati Nazaret che (Lucas 1:13-17; 3:2, 3; Hechos 19:4).

 Jesús ñi fautizahun. Juan ti Fautizachefe fautizafi ta Jesús, femngechi fautizahun trürümfal-lai, Jesús culpan chengenolu cai (1 Pedro 2:21, 22). Jesús fautizaulai tañi pengelal ñi repentiucülen ca ñi ‘llellipuafiel ta Chau Dios ñi nieal cüme raquiduam’ (1 Pedro 3:21). Doi mai pengeli ñi hulün tañi mongen Chau Dios mu, femngechi ñi femal tañi ayüqueel. Tüfa feipicünungei ñi femal ti Mesías cam Cristo. Cafei ñi femal tüfa, huli tañi mongen com iñchiñ mu (Hebreos 10:7-10).

 Fautizangeal Chau Dios tañi nehuen mu. Juan ti Fautizachefe ca Jesús nütramcai ñi fautizangeal che Chau Dios tañi nehuen mu (Mateo 3:11; Lucas 3:16; Hechos 1:1-5). Tüfa trürngelai ñi fautizangeal che Chau Ngünechen ñi nehuen tañi üi meu (Mateo 28:19). ¿Chumngelu trürngelai?

 Quiñeque che müten inaniequelu ta Jesús fautizangequei Chau Dios tañi nehuen mu. Chau Ngünechen dullifi engün quisu tañi nehuen mu, sacerdotengeaingün huenu mu ca ngünenieaingün ti mapu Jesús engün f (1 Pedro 1:3, 4; Apocalipsis 5:9, 10). Cafei ngünenieaingün millonque che inaniequefilu ta Jesús, tüfa tati pu che rumel mongelealu ayüfalchi mapu mu (Mateo 5:5; Lucas 23:43).

 Fautizahual ñi quiñeucüleal Cristo Jesús engu ca fautizahual quisu tañi lan meu. Pu che fautizangelu Chau Dios tañi nehuen mu ca fautizangequei ñi ‘quiñeucüleal Cristo Jesús engu’ (Romanos 6:3). Femngechi fautizangequei pu dullin che inaniequelu ta Jesús ca ngüneniealu quisu engün huenu mu. Fautizaulu engün ñi quiñeucüleal Cristo Jesús engün, coneltuleingün quiñe dullin troquiñche mu. Cristo loncolei tüfachi troquiñche mu (1 Corintios 12:12, 13, 27; Colosenses 1:18).

 Pu cristiano dullingelu fautizangei Jesús tañi lan meu (Romanos 6:3, 4). Jesús reque, doyümqueingün ñi cüdahuelafiel ta Chau Dios ca feyentuafiel, quisutu duamuuquelaingün. Quimnieingün ñi rumel mülenoal mapu mu. Lalu engün huiñomongetuingün huenu mu quiñe püllü reque, femngechi dehui reque tañi fautizahun Jesús tañi lan meu (Romanos 6:5; 1 Corintios 15:42-44).

 Fautizahun cütral meu. Juan ti Fautizachefe feipi: “[Jesús] fautizayaimünmeu Chau Ngünechen ñi nehuen ca cütral meu. Nüniei tañi horqueta, fei cüme liftucünuafi cheu ñi pünolquetran-ngequem. Ngülümai ñi cachilla tati elquetranhue meu. Huelu ti pinu lüpümngeai chongquenochi cütral meu” (Mateo 3:11, 12). Tüfachi texto pengeli ñi fautizangeal quiñe che cütral meu ñi trürngenon fautizangeal Chau Ngünechen ñi nehuen meu. Ñi feipin Juan, ¿chem adentulei?

 Ti cachilla, fei tati pu inaniequefilu ta Jesús ca feyentuquefilu. Tüfa engün ca fautizangeafui Chau Ngünechen ñi nehuen meu. Ti pinu, fei tati pu allcütunofilu ta Jesús. Tüfa engün fautizangeai reque cütral meu, ti cütral adentulei ñi apümngeal rumel mu (Mateo 3:7-12; Lucas 3:16, 17).