¿Cambiangepei mai Biblia ñi feipin?

AMULCÜNUNGEAL

Femlai llemai. Rume fentren tripantu meu, Biblia tañi feipin huirintucungequefui fillque chemcün meu. Huelu ngüneduamfiliyiñ cuifique chümpol lifru nielu Biblia tañi feipin quimtucuaiñ feichi Biblia tañi nieel fachantü trüri feichi cuifique chümpol lifru meu.

¿Rumel cüme copiangepefui mai ta Biblia?

Pengei fentren troquiñ Biblia meu huirintucungequefulu cuifi, huelu quiñeque ta tüfa trürlai tañi feipin meu. Fei tüfa pengeli quiñeque mu cüme copiangequelafui ta Biblia. Huelu femngechi femngefulu rume hueluletulai ti Biblia. Huelu quiñeque che copiaquefulu Biblia eluhuingün ñi cacünual quiñeque dungu ñi quimeltuqueel Biblia. Peafiyiñ epu dungu.

Quiñeque Biblia meu, femngechi rulpadungungei 1 Juan 5:7: “Doi fütra huenu mu mülei tati Chau, tati Verbo ca tati Espiritu Santo; com engün quiñengei engün”. Huelu manelfalngechi chümpol lifru nielu Biblia tañi feipin femngechi feipilai.⁠ a Feimu tati doi manelfalngechi Biblia mu femngechi rulpadungungelai tüfachi troquiñ.
Chau Ngünechen tañi üi rume fentren rupa tripai tati cuifique chümpol lifru meu. Huelu fentren Biblia meu entungei Chau Ngünechen tañi üi ca tuculelngei “Ñidol” cam “Dios”.

¿Caquelu dungu ca huesa copiangepei mai Biblia mu?

Fentren chümpol lifru nielu Biblia tañi feipin pengei deuma.⁠ b Feimu pürüm quimafuiñ chem ñi cüme copiangenon. Fei ngüneduamfiliyiñ feichi fillque chümpol lifru, ¿chem dungu quimtucuafuiñ? ¿Maneluhuafui mai Biblia ñi feipin meu?

Ca tati troquiñ Biblia huirintucungelu hebreo quehun meu, Antiguo Testamento feipingequelu, ¿ca manelfalngepei mai? Raquiduamnge ñi feipin quiñe quim huentru William Henry Green pingelu, feipi: “Quimfali ñi manelfalngen Biblia, chem cuifi lifru no rume fente manelfalngelai”.
Quiñe quim huentru Frederick Bruce pingelu feipi: “Quiñeque cuifique lifru müte quimfalngenolu rume tañi rüfngen, fentren che maneluucülei tañi feipin meu. Fei doyelchi mai maneluhuafuiñ Biblia mu, mülelu cai fillque dungu pengelquelu ñi rüfngen”.
Quiñe quim huentru, Sir Frederic Kenyon pingelu feipi: “Quiñe che niele quiñe Biblia feipiafui ñi nien Chau Ngünechen tañi Dungu ca rupalu rume fentren tripantu feipiafui ñi cambianon tañi quimeltuqueel”.

¿Chumngelu cai maneluhuafuiñ ñi rüfngen Biblia ñi feipin?

Pu judio ca pu cristiano copiaquefulu Biblia huirintucucünufingün tati huesaque dungu ca huesaque huimtun ñi nierquefel Chau Ngünechen ñi troquiñche (Números 20:12; 2 Samuel 11:2-4; Gálatas 2:11-14).⁠ c Ca femngechi entulaingün feitaquechi nütram pengelquelu ñi norümngen Jehová tañi pu che tañi huesa portan meu (Oseas 4:2; Malaquías 2:8, 9; Mateo 23:8, 9; 1 Juan 5:21). Femngechi pu copiaquefulu Biblia pengelingün ñi manelfalngen ca ñi yamniefiel Chau Dios tañi Dungu.
Chau Ngünechen adniefi pu huentru ñi huirintucual Biblia, fei ¿adnienoafulu fillque dungu ñi cambiangenoal Biblia ñi feipin? (Isaías 40:8; 1 Pedro 1:24, 25).⁠ d Loncontucufinge: Chau Ngünechen eli tati Biblia ñi cümelcayafiel com pu che cuifi meu ta fantepu mu (1 Corintios 10:11). Feimu Biblia feipi: “Com tati cuifi huirintucuelchi dungu ta Huirin Chillca meu, huirintucungei iñchiñ taiñ quimeltungeal. Fei ta famngechi taiñ nieal maneluhun Ngünechen meu tati Huirin Chillca ñi duam” (Romanos 15:4).
Jesús ca tañi pu discipulo pünequefuingün copiangeelchi Biblia ca maneluhuingün tañi feipin meu (Lucas 4:16-21; Hechos 17:1-3).

a Feitachi feipin tripalai tati Códice Sinaítico, el Códice Alejandrino, el Manuscrito Vaticano 1209, la Vulgata latina original, la versión siríaca Filoxeniana-Harclense, ca tati Peshitta siríaca mu.

b Deu pengei doi 5.000 chümpol lifru nielu Biblia tañi feipin griego quehun meu, fei tüfa Nuevo Testamento pingequei.

c Feichi che Chau Ngünechen ñi adniefiel ca huelulcauqueingün, feimu Biblia feipi: “Itrocom che ta culpai” (Romanos 3:23).

d Chau Ngünechen adniefi pu huentru ñi huirintucuñmayal tañi raquiduam, huelu feipilafi caque quiñeque dungu ñi huirintucual engün.